Marco 8 - Tachi Ak'õre Pedea

Jesupa k'ĩmari mil p'anɨa nek'opida

¹ Mãɨ ewaride mãicha ẽpẽerã minachia Jesumá chesidama. Ãchi nek'odai newẽ pẽra, Jesupa ichi ome p'ɨrrɨapataɨrã́ t'ɨ̃k'ari jarasima:

² —Mɨa nãɨ ẽpẽerã sõchupuria unu bɨma. Ewari k'ak'o ũpea pa bɨma mɨ ome p'anɨt'a. Ãchia nek'odai k'orea uru p'anana jõsima.

³ Mɨa ãchi nek'odawẽa ãchi tiidá peek'aipɨra, ode wãutade jarra jai jitadaipɨ, chi eda waapẽarã chi t'ɨmɨɨpa che p'anɨ pẽra.

⁴ Chi ichi ome p'ɨrrɨapataɨrãpa idisidama: —Nãma ẽpẽerã newẽmá ¿sãma jãɨ ẽpẽerã pae nek'opidai k'orea atadaima?

⁵ Mãɨne Jesupa idisima: —¿Mãrapa p'ana jõmasã́ uru p'anɨma? Ãchia p'anoosidama: —Siete.

⁶ Mãɨne Jesupa ẽpẽerã jeeda suak'abari beepik'oasima. Mãɨ p'ana siete ichi juade atak'ari Tachi Ak'õrea sõpia bɨade asima. Maapae p'ana t'oet'aak'ari ichi ome p'ɨrrɨapataɨrã́ teasima jedadamẽrá. Ara mãɨya oosidama.

⁷ Mãɨnepa beta chae wariwẽa uru p'anasidama. Jesupa mãɨ k'orea Tachi Ak'õrea sõpia bɨade ak'ari chi ichi ome p'ɨrrɨapataɨrã́ teasima jedadamẽrá.

⁸ Chi ẽpẽerãpa k'odak'ari jãwaak'oasidama. Chi pichoada jɨrɨp'esidaɨde jabara nepalá k'ak'o siete ipirusidama.

⁹ Chi mãɨ nek'odada k'ĩmari mil p'anasidama. Maapae Jesupa chi ẽpẽerã peek'ak'ari,

¹⁰ ara mãɨne ichi, chi ichi ome p'ɨrrɨapataɨrã paara p'ãp'orrode batoodak'ari Dalmanuta tuadea wãsidama.

P'ariseorãpa Jesua ẽpẽerãpa ne p'ue oodak'apɨ́ oopade a ididada

¹¹ Mãɨ ewaride p'ariseorã chedak'ari Jesú ome k'ĩruu pedea p'anasidama. Ãchia k'awa k'ɨ̃ria p'anasidama ichi piarã pajãnepa che bɨ k'awadayá. Mãɨpuru ãchia Jesua idisidama ẽpẽerãpa ne p'ue oodak'apɨ́ oomẽrá.

¹² Jesú ɨbɨa ɨ̃apaak'ari jarasima: —Mãra idiapaepemarã ẽpẽerãpa ¿k'ãre k'orea ẽpẽerãpa ne p'ue oodak'apɨ́ unu k'ɨ̃ria p'anɨma, mɨ Tachi Ak'õrenepa cherut'a k'awadayá? Mɨa piarã jararuma: mɨa ẽpẽerãpa ne p'ue oodak'apɨ́ ooiwẽma.

¹³ Mãɨya jarak'ari p'ariseorã ameesima. Jesú ichi ome p'ɨrrɨapataɨrã paara p'ãp'orrode batoodak'ari senia k'ĩaria lao wãsidama.

P'ariseorã p'ana ooropiparí

¹⁴ Mãɨ wãutade chi Jesú ome p'ɨrrɨapataɨrãpa p'ana ateewãnai k'ɨ̃risia atua p'anasidama. Mãɨ p'ãp'orrode p'ana abapuru uru p'anasidama.

¹⁵ Mãɨne Jesupa jarasima: —Jĩrak'aua p'anat'ɨ chi p'ana ooropiparí p'ariseorãné ome mãɨnepa chi Herodedé ome.

¹⁶ Jesú ome p'ɨrrɨapataɨrãpa ara ãstu pedea para beesima: —Ichia mãɨya jarasima tachia p'ana enemeenaé pada pẽra.

¹⁷ Jesupa mãɨ k'awaside jarasima: —¿K'ãre k'orea p'ana newẽane a p'anɨma? ¿Mɨa ooda mãrapa unusidamina wapida k'awadawẽk'ãra? ¿Wapida atua p'anɨk'ãra mɨ k'ait'a?

¹⁸ ¿Mãra tau uru p'anɨmina ununak'ama? ¿K'ɨɨrɨ uru p'anɨmina ũrinak'ama? Mɨa ooda ¿k'ɨ̃risia atuasidak'ãra?

¹⁹ Mɨa chi p'ana joesoma bɨdepa ẽpẽerã joesoma mil p'anɨa nek'opiside ¿jabara k'ak'o jõmasã́ mãrapa chi pichoada jɨrɨp'esidama? Ãchia p'anoosidama: —Doce.

²⁰ Jesupa jarasima: —Mãɨnepa mɨa p'ana siete p'anɨnepa mɨa ẽpẽerã mil k'ĩmari p'anɨa nek'opiside ¿jabara nepalá jõmasã́ chi pichoada jɨrɨp'esidama? Ãchia p'anoosidama: —Siete.

²¹ Maapae Jesupa ãchiá idisima: —¿K'ãre k'orea mãrapa waidi ũrinawẽa p'anɨma?

Jesupa ẽpẽra tau p'ãrio bɨ jɨpada

²² Betsaida p'uurude chesidaɨde waapẽarãpa ẽpẽra tau p'ãrio bɨ Jesumá ateewãnak'ari chichupuria idisidama t'õmarik'ari ya jɨpamẽrá.

²³ Jesupa mãɨ tau p'ãrio bɨ juade jitak'ari p'uuru awara ateewãsima. Maapae chi ẽpẽra taude iduk'ari, ichi jua ɨ̃rɨ bɨk'ari nãɨya idisima: —¿Ne p'ue unu bɨk'ãra?

²⁴ Mãɨne chi ẽpẽrapa ak'ɨk'ari jarasima: —Mɨa ẽpẽerã unu bɨma maamina pak'uru jĩra wã p'anɨt'a unu bɨma.

²⁵ Jesupa mãicha ichi jua chi ẽpẽra tau ɨ̃rɨ bɨsima. Mãɨne chi ẽpẽrapa minachia unu beesima ichi tau jɨpada pẽra. Ne ãarea jẽrat'ĩu unu beesima.

²⁶ Jesupa ichiá nãɨya jarasima: —Tiidá wãrune p'uurude eda wãrãse, mãɨnepa mɨa ooda mi ãpia pida abaɨa jararãse.

Pedropa Jesú k'orea jarada

²⁷ Mãɨya bak'ari Jesú chi ichi ome p'ɨrrɨapataɨrã ome Cesarea-P'ilipo tuade chi p'uuru chak'e becha p'ɨrrɨade wãsidama. Ode wãutade Jesupa chi ichi ome p'ɨrrɨapataɨrã́ idisima: —Ẽpẽerãpa mɨ ¿k'aiyade a p'anɨma?

²⁸ Ãchia p'anoosidama: —Chi eda waapẽarãpa jara p'anɨma pɨ Juan chi Porochoaparipɨ. Chi eda waapẽarãpa jara p'anɨma pɨ Eliapɨ. Chi eda waapẽarãpa jara p'anɨma pɨ Tachi Ak'õre pari pedeaparipɨ.

²⁹ Mãɨne Jesupa idisima: —Maamina mãrapa mɨ ¿k'ai k'ɨ̃risia p'anɨma? Pedropa p'anoosima: —Pɨ Tachi Ak'õrepa Tachi K'aripaparí teai jaradapɨ.

³⁰ Jesupa ichi k'orea mi ãpia pida abaɨa jararãapadade asima.

Jesupa ichi piui bɨt'a jarada

³¹ Mãɨya bak'ari Jesupa chi ichi ome p'ɨrrɨapataɨrã́ nãɨya jaratea beepachima ichi minachia mĩa bai bɨ k'orea: —P'uurudepema minachia k'awa berãpa, p'aarerã chi mãɨrã chaarearãpa mãɨnepa Moisepa bɨda jarateapataɨrã pida mɨ itu bɨdak'ari peapidaipɨ. Maamina mɨ ewari ũpeaɨde chok'ae p'irabariipɨ.

³² Jesupa mãɨ ãarea jarak'ari, Pedropa ichi awara ateewãk'ari ɨtɨasima.

³³ Maamina Jesupa chi ichi ome p'ɨrrɨapataɨrãmá jĩitea ak'ɨrude Pedroa nãɨya ɨtɨasima: «Tiore, mɨ omepema ãyá wãse. Pɨa Tachi Ak'õre jĩra k'ɨ̃risiawẽa bɨma. Mãɨpari ẽpẽra jĩra k'ɨ̃risia bɨma».

³⁴ Jesupa chi ichi ome p'ɨrrɨapataɨrã mãɨnepa chi ẽpẽerã minachia nɨbɨ t'ɨ̃k'oak'ari jarasima: «Abaɨpa mɨ ome wã k'ɨ̃ria bɨpɨra, ichia oo k'ɨ̃ria bɨt'a itu bɨk'ari minachia mĩai k'orea bai bɨma. Maapae mɨ ome wãi bɨma.

³⁵ Abaɨ pida nãɨ ĩjũane pia bai k'orea jɨrɨ baipɨra, mãɨ atuaipɨ. Maamina abaɨ pida mɨ k'orea piuipɨra wa chi pedea pia jara bɨ k'orea piuipɨra, Tachi Ak'õre ome ewaricha chok'ae baipɨ.

³⁶ Ẽpẽra nãɨ ĩjũane ne ãarea uru bɨde piuipɨra, ¿ichia uru bɨpa k'aripaik'ãra?

³⁷ ¿Jõmasã́ teai bɨma, ichi piuemaapa?

³⁸ Abaɨpa nãɨ ĩjũane nemietá oo be t'ãena mɨ mãɨnepa mɨ pedea atua bɨade aipɨra, mɨ, chi Ẽpẽra Warra jua chaarea pará bɨ cherude mãɨ ẽpẽra atua bɨade aipɨ. Mãɨ ewaride mɨ Ak'õre jua chaarea bɨdepa cheipɨ, chi ichia ɨt'aripa peedaɨrã pia berã paara».