Marco 7 - Tachi Ak'õre Pedea

Jua sɨɨpataɨ k'orea jarateada

¹ Ewariaba p'ariseorã mãɨnepa Moisepa bɨda jarateapataɨrã Jerusalén p'uurudepa Jesumá chesidama.

² Mãɨne unusidama chi eda waapẽarã Jesú ome p'ɨrrɨapataɨrã jua sɨɨdawẽa nek'o p'anɨt'a, mãɨ chõarãenapemarãpa oopachida jĩra.

³ (P'ariseorãpa mãɨnepa chi waapẽarã judiorãpa jua mi ãpia pida p'ue sɨɨdawẽa nek'odak'ama, chi chõarãenapemarãpa jarateadada jĩra.

⁴ Mãɨnepa ne netopataɨdepa chedak'ari p'ue jua sɨɨdawẽa nek'odak'ama. Mãɨ awara chõarãenapemarãpa jarateadada jĩra ne minachia oopatama: ãchi pasu, chok'o mãɨnepa p'arat'u cobre ooda, sɨɨpatama).

⁵ Mãɨne p'ariseorãpa mãɨnepa Moisepa bɨda jarateapataɨrãpa Jesua idisidama: —¿K'ãre k'orea pɨ ome p'ɨrrɨapataɨrãpa tachi chõarãenapemarãpa jarateadada oodak'ama? Mãɨ jarateadada itu bɨdak'ari, ãchi jua sɨɨdawẽa nek'opatama.

⁶ Jesupa p'anoosima: —Mãra ẽpẽerã pia jĩra berã, Tachi Ak'õre pari pedeaparí Isaíapa mãra k'orea nãɨya bɨsima: Nãɨ p'uurudepemarãpa mɨá pia pedeapatama, maamina piarã ãchi sõne mɨne k'ɨ̃risiadak'ama.

⁷ Ãchi k'ɨ̃ría mɨá pia pedeapatama. Mɨ pedea k'aepẽra ẽpẽra k'ɨ̃risiat'u jarateapatama.

⁸ Mãɨya chi Tachi Ak'õrepa oopi bɨ pedea mãrapa itu bɨpatama, chõarãenapemarãpa jarateadadat'u ĩjãanai k'orea.

⁹ Mãɨ awara Jesupa jarasima: —Mãramá pia bɨma Tachi Ak'õrepa oopi bɨ pedea awara bɨdait'a, ara machia oopataɨ oodai k'orea.

¹⁰ Moisepa nãɨya jarasima: “Pɨ ak'õre mãɨnepa pɨ nae wap'ea base”. Nãɨ sida jarasima: “Abaɨpa ichi ak'õre wa ichi nae k'orea k'achia pedeaipɨra, mãɨ nepɨra pará bɨade adak'ari, peapidaipɨ”.

¹¹ Maamina mãrapa jarapatama chi warrapa chi ak'õrea wa chi naea nãɨya jaraparima: “Ãarea mɨa uru bɨt'a Tachi Ak'õrea teayade ada pẽra mɨa mãra p'ue k'aripaiwẽma”.

¹² Mãɨya jarateapatama chi warrapa chi ak'õre mãɨnepa chi nae k'aripapiemaapa.

¹³ Mãɨya mãra chõarãenapemarãpa jarateadada ĩjãa p'anɨnepa Tachi Ak'õre pedea itu bɨpatama. Mãrapa ne minachia ara mãɨ jĩra oopatama.

¹⁴ Ya mãicha Jesupa ẽpẽerã minachia nɨbɨ t'ɨ̃k'ari nãɨya jarasima: —Ãareaɨrãpa mɨ pedea ũrit'ɨ k'awadamẽrá.

¹⁵ Tachia chik'o k'odada k'orea tachi mietá p'aneenak'ama Tachi Ak'õre k'ĩrari. Mãɨpari tachi sõnepa pedea bɨpa Tachi Ak'õre k'ĩrari mietá bɨparima.

¹⁶ Chi k'ɨɨrɨ pará bɨpa jĩrak'aua ũrise.

¹⁷ Maapae Jesupa chi ẽpẽerã ameek'ari tiidá wãk'ari ichi ome p'ɨrrɨapataɨrãpa chi ichia nepɨrɨda k'orea idisidama.

¹⁸ Mãɨne Jesupa jarasima: —¿Mãra pida mãɨ p'ue ũrinawẽk'ãra? ¿Nãɨ k'awadawẽa p'anɨk'ãra? Chi tachia chik'o k'outapa mãɨ tachi mietá beepik'ama,

¹⁹ tachi sõne eda wãwẽa bɨ pẽra. Mãɨpari bide wãk'ari tajatá amaaparima. Mãɨya jara bɨdepa Jesupa k'awapisima ne ãarea k'odai pia bɨt'a.

²⁰ Maapae jarasima: —Chi ẽpẽra sõnepa k'ɨ̃risia che bɨpa mãɨ ẽpẽra mietá beepiparima Tachi Ak'õre k'ĩrari.

^21-22 Nãɨ ãarea ẽpẽra sõnepa cheparima: k'ɨ̃risia mietá, nemietá awaraɨ ome oo bai, nechɨai, mĩa peai, k'ima awaraɨ ome k'ãii, ãarea uru ba k'ɨ̃ria bai, ne k'achia oo bai, ẽpẽra seai, tachi k'ak'uapa nemietá minachia oo k'ɨ̃ria bɨt'a ooi, abaɨpa uru bɨ k'orea piawẽa k'ɨ̃risiai, abaɨ k'orea sea jarai, abaɨ k'aepẽra atepe pia bɨ jĩra k'ɨ̃risiai mãɨnepa atua bɨ jĩra bai.

²³ Mãɨ nemietá ãarea tachi sõnepa che bɨpa ẽpẽra Tachi Ak'õre k'ĩrari mietá beepiparima.

Jesupa wẽrak'au jɨpa beepida

²⁴ Jesú mãmãɨpa Tiro tuadea wãk'ari ẽpẽra tede beesima. Ichi sãma bɨt'a mi ãpia pida abaɨa k'awapi k'ɨ̃riawẽa basima. Maamina k'awasidama.

²⁵ Mãɨ tuade wẽra basima. Ichi k'au jaore mietá pará basima. Mãɨ wẽrapa Jesú k'orea ũriside ichi bɨmá wãk'ari ichi jĩru k'ait'a sĩraporode k'obeesima.

²⁶ Mãɨne chichupuria idisima Jesupa jaore mietá ichi k'au k'ak'uadepema ãyá jeret'aamẽrá. Maamina chi wẽra judio wẽrawẽ pasima. Mãawẽa Sirop'eniciadepema pasima.

²⁷ Jesupa ichiá jarasima: —Warrarã́ itu naa k'opise. Pia bɨwẽma warrarãpa nek'omaa p'anɨt'a ẽemarik'ari usarã́ p'eut'aa teait'a.

²⁸ Mãɨne wẽrapa p'anoosima: —Pɨa jara bɨt'a piarãpɨ, mɨ Chipari, maamina warrarãpa chik'o jurruchoa pida usapa nek'opataɨ ek'ari k'opatama.

²⁹ Mãɨ ũrik'ari Jesupa jarasima: —Pɨa mãɨya pia p'anoona pẽra ne k'ɨ̃risiawẽa tiidá wãse. Pɨ k'au k'ak'uade bada jaore mietá ãyá wãsima.

³⁰ Ichi tiidá cheside ichi k'au k'ɨdade ne k'ɨ̃risiawẽa bɨt'a unusima. Chi jaore mietá piarã ãyá wãsima.

Jesupa ẽpẽra k'ɨɨrɨ k'ii bɨ jɨpa beepida

³¹ Jesú Tiro tuade bada jĩitea wãsima. Sidón tuade wãk'ari Decápoli lawari p'asak'ari, maapae Galilea senianea wãsima.

³² Mãma ẽpẽerãpa k'ɨɨrɨ k'ii bɨt'a Jesumá ateewãsidama. Mãɨ ẽpẽra ichiaba k'ĩrame t'urrá basima. Ãchia Jesua chichupuria idisidama ichi jua mãɨ ẽpẽra ɨ̃rɨ bɨk'ari jɨpa beepimẽrá.

³³ Ara mãɨne Jesupa chi ẽpẽerã minachia nɨbɨ mãɨ awara ateewãsima, mãɨ ichi ome tuaba bayá. Maapae ichi jua jimini chi ẽpẽra k'ɨɨrɨ uriade berajuk'ari, ara ichi juadepa ichi iduba jitak'ari, chi ẽpẽra k'ĩrame t'õmarisima.

³⁴ Maapae pajãnea ak'ɨk'ari ɨbɨa ɨ̃apaak'ari arameo pedeade jarasima: «¡Ep'atá!» Mãɨ pedea jara k'ɨ̃ria bɨma «Ewase».

³⁵ Ara mãɨne ichi k'ɨɨrɨ ewak'ari, pia ũri beesima. Ichi k'ĩrame jɨpa beeda pẽra pia pedea beesima.

³⁶ Jesupa ãchiá jarasima mãɨ k'orea mi ãpia pida abaɨa jarapidaemaapa. Ichia mãɨya jara bapachimina, mãɨ wariara nepɨrɨpachidama.

³⁷ Chi arí p'anɨrãpa minachia k'awa k'ɨ̃risiadawẽa p'aneesidama. Nãɨya jarasidama: «Jesupa ne ãarea pia oo bɨma. ¡Chi k'ɨɨrɨ k'ii be ũripiparima mãɨnepa chi k'ĩrame t'urrá be pedeapiparima!»