Marco 5 - Tachi Ak'õre Pedea

Jesupa jaore mietá chok'ará ãyá jeret'aada

¹ Maapae senia k'ĩaria wãnak'ari Gerasa tuadea pasidama.

² Jesú p'ãp'orrodepa eda wãside ara mãɨne ẽpẽra jaore mietá pará bɨ jãɨrã te p'ẽya uriadepa ichimá chesima.

³ Mãɨ ẽpẽra jãɨrã te uriade bapachima. Abaɨ pida ichi p'uedak'a pasima, k'ãnenapa jɨ̃uta sida.

⁴ Bari k'ak'o minachia ichi k'ãnenapa jĩru jɨ̃pachidamina, jua sida jɨ̃pachidamina ãarea t'eek'oapachima. Ichi mi ãpia pida p'uedak'a pasima.

⁵ Teamasi, ãst'á pida jãɨrã tede mãɨnepa eyade bia nipapachima. Ara ichi k'ak'ua mawarapa sĩpachima.

⁶ Ichia t'ɨmɨɨpa Jesú unuside p'ira chesima. Jesú k'ĩrari sĩraporode k'obeek'ari,

⁷ jĩk'ua biak'ari, nãɨya jarasima: —Tachi Ak'õre chi Atepe bɨ Warra, Jesú, ¿k'ãre k'orea mɨ ome bariyá bɨma? ¡Tachi Ak'õre k'ĩrari piarãpẽa jarase mɨ mĩapiiwẽt'a!

⁸ Mãɨya pedeasima Jesupa ichiá nãɨya jara bada pẽra: «¡Jaore mietá, nãɨ ẽpẽra k'ak'uadepema ãyá wãse!»

⁹ Maapae Jesupa chi jaore mietá idisima: —¿Pɨ t'ɨ̃ k'aima? Chi jaore mietapa p'anoosima: —Mɨ t'ɨ̃ Chi Chok'araade apatama, tai minachia p'anɨẽra.

¹⁰ Mãɨne jaore mietapa Jesua chichupuria idisima mãɨ tuadepema ãyá jeret'aapiemaapa.

¹¹ Mãɨya p'anɨne ara k'ait'a bɨ eyade sina chok'ará nek'o tuanasidama.

¹² Mãɨ k'orea chi jaore mietaarãpa Jesua nãɨya chichupuria idisidama: —Tai jãɨrã sina k'ak'uade itu wãpise.

¹³ Mãɨya Jesupa itu wãpisima. Chi jaore mietaarã ẽpẽra k'ak'uadepema ãyá wãnak'ari sina k'ak'uade eda wãsidama. Maamina eda wãnak'ari sina p'ira errodak'ari p'ẽyanepa toedá t'ĩu wãk'oasidama. Ãarea todepa piusidama. Mãɨrã sina dos mil p'anasidama.

¹⁴ Mãɨne chi sinarã ak'ɨ p'anana p'uurudea p'ira wãsidama. Ãchi p'uurudepemarã́ mãɨnepa chi p'uuru k'ait'a berã́ jaore mietá pará bada k'orea ãarea nepɨrɨsidama. Mãɨpuru ak'ɨde cheepɨrɨsidama.

¹⁵ Jesú bɨmá cheutade, mãɨ ẽpẽra jaore mietá chok'ará uru bada unusidama. Mãɨ suak'abari bɨ, neet'á jɨ̃ bɨ mãɨnepa k'ĩra pia bɨ unusidaɨde, p'erasidama.

¹⁶ Chi mãɨ ununaanapa waapẽarã́ nepɨrɨsidama chi jaore mietá pará bada mãɨnepa chi sinarã sãasit'a.

¹⁷ Mãɨpuru Jesua chichupuria idisidama ãchi tuadepema ãyá wãmẽrá.

¹⁸ Jesú p'ãp'orrode batooside chi jaore mietá pará badapa chichupuria idisima ichi ome wãi k'orea.

¹⁹ Maamina Jesupa itu wãpié pasima. Mãɨpari jarasima: —Tiidá wãk'ari pɨ ẽpẽerã́ jarase Tachi Chiparipa pɨ ome ne waibɨa oodat'a. Ãchiá nepɨrɨse sãmaasã́ ichia pɨ minachia k'ĩra chupuriasit'a.

²⁰ Ara mãɨne chi jaore mietá pará bada wãk'ari jõma Decápoli tuade nepɨrɨpachima Jesupa ichi ome ne waibɨa oodat'a. Mãɨpuru ãareaɨrãpa k'awa k'ɨ̃risiadaé pasima.

Jesupa wẽrak'au jɨpa beepida

²¹ Jesú jĩitea p'ãp'orrode senia k'ĩaria lao wãk'ari ẽpẽerã minachia ichi bɨmá chesidama to ik'idá.

²² Mãɨya bɨde ẽpẽra Jairo apataɨ chesima. Mãɨ Jairo judiorã ará pedeapataɨ tede chi minachia k'awa bɨ pasima. Mãɨne Jairo Jesú k'ait'a chek'ari ichi jĩru k'ait'a bedabari k'obeek'ari,

²³ nãɨya chichupuria idisima: —Mɨ k'au chae piumaa bɨma. Pɨ jua ichi ɨ̃rɨ bɨde chese jɨpa beemẽrá.

²⁴ Ara mãɨne Jesú ichi ome wãsima. Ẽpẽrarã chok'ará Jesú ome wãuta pẽra p'isua nɨbasima.

²⁵ Mãɨne ẽpẽerã t'ãena wẽra aba ãyo k'ak'o doce oamia jita bɨt'a nipasima.

²⁶ Mãɨ wẽrapa nearã́ teapataɨrã́ ichi erreara ãarea teadamina jɨpa beaé pasima. Chok'ará nẽará teapataɨrãpa ichi minachia mĩapisidama maamina mãicha wariara k'ɨdade beesima.

^27-28 Mãɨne Jesú k'orea pedea p'anɨ ũrik'ari ẽpẽerã t'ãena Jesú ãpɨte k'ait'a wãsima. Nãɨya k'ɨ̃risiasima: «Ichi neet'á ɨ̃rɨpema t'õmariipɨra, mɨ jɨpa beeipɨ». Ara mãɨne Jesú neet'á k'ĩup'ea t'õmarisima.

²⁹ Ara mãɨne chi oa p'oasima mãɨnepa ichia k'awasima ichi k'ak'ua jɨpa beesit'a mãɨ oamĩapa mĩa bapachit'a.

³⁰ Maamina Jesupa k'awasima ichi jua chaareadepa abaɨ jɨpa beesit'a. Mãɨpuru jĩitea ak'ɨk'ari idisima: —Mɨ neet'á ¿k'aipa t'õmarisima?

³¹ Mãɨne ichi ome p'ɨrrɨapataɨrãpa jarasidama: —¿Sãmaasã́ idi bɨma k'aipa pɨ t'õmarisit'a? Pɨa unu bɨma ẽpẽerãpa pɨ p'isua uru p'anɨt'a.

³² Mãɨya jarasidamina, Jesupa jõmãɨrãmá ak'ɨsima ichi mãɨyana k'awai k'orea.

³³ Mãɨya bɨde wẽra ne wap'eapa ore nɨbasima Jesudepa jɨpa beeda k'awa bɨ pẽra. Maapae Jesumá chek'ari ichi k'ĩrari bedabari k'obeek'ari jarasima: —Mɨa piarã pɨ t'õmarisima.

³⁴ Mãɨpuru Jesupa ichiá jarasima: —K'au, piarã jɨpa beeit'a ĩjãana pẽra pɨ jɨpa beesima. Ne k'ɨ̃risiawẽa wãse. Waa mãɨya mĩa baiwẽma.

³⁵ Jesú wapida pedeamaa bɨde Jairo tedepa waapẽarã chedak'ari ichiá jarasidama: —Pɨ k'au k'ĩrawẽasima. ¿K'ãre k'orea chi Jarateaparia waa jara bɨma?

³⁶ Mãɨya jaradada ũrisimina, Jesupa Jairoa jarasima: —Ne wap'earãse. Sõnepa ĩjãase.

³⁷ Maapae Jesupa Pedro, Santiago mãɨnepa Santiago ũpẽa Juan mãɨ Jairo tiidá ateewãsima. Chi waapẽarã itu wãpié pasima.

³⁸ Jairo temá cheutade Jesupa ũrisima ẽpẽerã ooroa jẽa p'anɨt'a.

³⁹ Eda wãk'ari Jesupa chi jẽa p'anɨrã́ jarasima: —¿K'ãre k'orea jãɨya jẽa p'anɨma? Jãɨ wẽrak'au piuwẽa bɨma, mãɨpari k'ãi bɨma.

⁴⁰ Mãɨpuru ẽpẽerãpa ichi k'orea eesidama. Maamina Jesupa jõmãɨrã tajatá wãpisima. Maapae ichi ome p'ɨrrɨapataɨrã ũpea, chi wẽrak'au ak'õre mãɨnepa chi nae eda ateewãsima chi wẽrak'au badamá.

⁴¹ Wẽrak'au juade jitak'ari Jesupa jarasima: —Talitá cum. (Mãɨ arameo pedeade jara bɨma: “K'au chae, mɨa pɨá jararuma: p'irabarise”).

⁴² Ara mãɨne chi wẽrak'au p'irabarik'ari p'ɨrrɨa beesima. Ichi doce ãyo basima. Mãɨ k'orea ãareaɨrãpa k'awa k'ɨ̃risiadaé pasima.

⁴³ Maamina Jesupa ãchiá minachia jarasima mi ãpia pida abaɨa jarapidaemaapa. Mãɨnepa jarasima wẽrak'aua nek'opidamẽrá.