Marco 4 - Tachi Ak'õre Pedea

Ne uuda k'orea nepɨrɨda

¹ Mãicha Jesupa Tachi Ak'õre pedea senia minachia bɨ ik'idá jaratea beesima. Mãɨne ichimá minachia cheepɨrɨsidama. Mãɨpuru p'ãp'orrode batook'ari suak'abari beesima. Chi ẽpẽerã to ik'idá tuaneesidama.

² Maapae Jesupa ne minachia nepɨrɨ bɨdepa jarateasima. Nãɨya jarasima:

³ «¡Ũrit'ɨ! Ẽpẽra ne p'ode wãsima.

⁴ Mãɨya p'o nine chi eda waapẽarã net'a tau ode baek'oasima. Mãɨne ĩpana cheepɨrɨdak'ari mik'oasidama.

⁵ Chi eda waapẽarã chi net'a tau ĩjũa mawara idá bɨde baek'oasima. Chi ĩjũa mawara t'at'adá bɨẽra ĩjũa namia basima. Mãɨpuru chi net'a tau isapea t'õnosima.

⁶ Maamina pisia wãsiapa p'urpasima chi k'arra ɨ̃rɨa bada pẽra.

⁷ Mãɨnepa chi eda waapẽarã net'a tau ĩjũa ɨɨrɨ idá bɨde baek'oasima. Chi mãma baek'oada waridak'ari jɨ̃k'ara ɨɨrɨ pará bɨpa pɨra k'enasima. Mãɨpa p'ue chaudaé pasima.

⁸ Maamina chi eda waapẽarã net'a tau ĩjũa piade baek'oasidama. Mãɨ t'õnonak'ari, waridak'ari, maapae waapẽarã minachia chausidama, mãɨ awara atepe chausidama, mãɨ awara mãɨ atepe pará chausidama».

⁹ Maapae Jesupa jarasima: «Chi k'ɨɨrɨ pará bɨpa jĩrak'aua ũrise».

Jesupa ¿k'ãre k'orea nepɨrɨ bɨdepa jarateasima?

¹⁰ Ẽpẽrarã wãnak'ari Jesú ome p'ɨrrɨapataɨrã doce p'anɨpa mãɨnepa waapẽarã ichik'á p'ananapa idisidama chi ichia nepɨrɨ bɨdepa jarateada k'orea.

¹¹ Jesupa p'anoosima: «Chi Tachi Ak'õrepa ichidirã ichi juade ua bɨ k'orea ãareaɨrã́ k'awapiwẽa bɨmina mãrá k'awapi bɨma. Maamina waapẽarã́ mɨa nepɨrɨ bɨdepa pedea bɨma,

¹² “ãchia minachia ak'ɨ p'anɨmina mãɨ ununaemaapa, mãɨnepa minachia ũri p'anɨmina mãɨ k'awadaemaapa. Mãɨya p'ananaiwẽ pasira, Tachi Ak'õremá chedak'ari ãchia nemietá oopataɨ mãɨ ichia k'ɨ̃risia atuai pasima”».

Jesupa chi nepɨrɨda k'orea jarateada

¹³ Mãɨne Jesupa ãchiá jarasima: «¿Mãrapa mãɨ nepɨra ũrinawẽk'ãra? Mãɨyara ¿sãmaasã́ chi waapẽarã ũrinaima?

¹⁴ Ũrit'ɨ. Chi net'a tau p'oparí Tachi Ak'õre pedea jaraparí jĩra bɨma.

¹⁵ Chi net'a tau ode baeda chi Tachi Ak'õre pedea ũri p'anɨrã jĩra bɨma. Mãɨ pedea ũri p'anɨma, maamina ara mãɨne tiore chek'ari mãɨ pedea ãchi sõne cheda k'ɨ̃risia atuapiparima.

¹⁶ Chi net'a tau mawara idá bɨ ĩjũane p'odapa nãɨ jara bɨma: waapẽarã ẽpẽerãpa Tachi Ak'õre pedea ũrinak'ari minachia arapá ũripatama.

¹⁷ Maamina minachia k'arra jitawẽa be pẽra tãaraa choadak'ama. Nepɨrade baeutade mãɨyawẽpɨra Tachi Ak'õre pedea ĩjãa p'anɨ k'orea ẽpẽerãpa mĩapiutade ãchia ĩjãa p'anana itu bɨpatama.

¹⁸ Net'a tau ĩjũa ɨɨrɨ idá bɨde baedapa nãɨ jara bɨma: chi eda waapẽarã ẽpẽerãpa Tachi Ak'õre pedea ũripatama.

¹⁹ Maamina nãɨ ĩjũane sãmaasã́ pia beadai k'orea minachia k'ɨ̃risiapatama. Ne ãarea uru p'ananaipɨra, arapá p'ananai k'ɨ̃risiapatama. Ichiaba ne wawaria minachia k'ɨ̃riapatama. Mãɨpa ãarea Tachi Ak'õre pedea waa ũripik'ama, ne uu warida chauk'á bapari jĩra.

²⁰ Maamina chi net'a tau ĩjũa piade p'oda nãɨya jara k'ɨ̃ria bɨma: chi eda waapẽarãpa Tachi Ak'õre pedea pia ũrinak'ari ĩjãapatama. Mãɨrã chi waapẽarãpa nepia ãpia oopatama mãɨnepa chi waapẽarãpa ne wait'apea oopatama, mãɨ awara chi waapẽarãpa ne minachia oopatama».

Laap'ara k'orea nepɨrɨda

²¹ Ichiaba nepɨrɨsima: «Laap'ara enemeeparik'ãra ¿ne yaapataɨ ek'ari bɨi k'orea, wa k'ãipataɨ ek'ari bɨi k'orea? Mãɨyawẽma, laap'ara nek'opataɨ ɨ̃rɨ bɨpatama.

²² Ara mãɨ jĩra ne ãarea mẽranat'a jãapae mãɨ unuipɨ. Chi tachi k'awadawẽa p'anɨt'a jãapae Tachi Ak'õrepa ãarea k'awapiipɨ.

²³ Chi k'ɨɨrɨ pará bɨpa jĩrak'aua ũrise».

²⁴ Mãɨ awara Jesupa jarasima: «Mɨa jaratea bɨt'a jĩrak'aua ũrit'ɨ. Abaɨ pia bɨwẽane a jarapataɨ jĩra, ara mãɨya Tachi Ak'õrepa mãra pia bɨwẽane aipɨ mãɨnepa mãrá atepe k'awapiipɨ.

²⁵ Abaɨpa Tachi Ak'õre k'orea piarã k'awaipɨra, Tachi Ak'õrepa mãɨ atepe k'awapiipɨ. Maamina chi atua bɨpa ne k'awa bɨ k'ɨ̃risiaipɨra, ichia k'ɨ̃risia bɨ sida Tachi Ak'õrepa mãɨ ẽemariipɨ».

Ne uu ĩjũa sãmaasã́ wariparii k'orea nepɨrɨda

²⁶ Jesupa nepɨrɨpodosima: —Tachi Ak'õrepa ichidirã ichi juade ua bɨt'a net'a tau ĩjũane p'oparí jĩra bɨma.

²⁷ Teamasi chi ẽpẽra k'ãi bɨmisa mãɨnepa ãsã chok'ae bɨmisa chi net'a tau t'õnok'ari, wariparima. Chi p'odapa sãmaasã́ waripi bɨt'a k'awak'amina mãɨyaparima.

²⁸ Ĩjũane ara ichi tuaba t'õnoparima. Chi t'uk'u ochiaparima. Maapae chi k'irú ochiak'ari, otoparima. Otok'ari maapae net'a tau minachia chauparima.

²⁹ Maapae chi net'a tau waraak'ari, ẽpẽrapa nek'odepa t'ɨat'uk'ari jɨrɨp'epodoparima chi ewari pada pẽra.

Mostaza net'a tau k'orea nepɨrɨda

³⁰ Jesupa ichiaba jarasima: «¿Tachi Ak'õrepa ichidirã ichi juade ua bɨt'a k'ãre jĩra bɨma? ¿Chi sãɨ nepɨrat'a jarateaima pia k'awadamẽrá?

³¹ Mostaza tau jĩra bɨma. Mãɨ mostaza tau chi waapẽarã net'a tau k'aepẽra chi ãpia pará bɨma.

³² Maamina uuk'ari minachia wariparima pak'uru nepalá waapẽarã k'aepẽra, mãɨnepa chi jua sida jaachoaparima. Mãɨpuru ĩpana chi pak'uru juat'aede te ook'oapatama».

³³ Mãɨya nepɨrɨ bɨdepa Jesupa jarateapachima ẽpẽerãpa mãɨ waa ũriutamá.

³⁴ Nepɨrɨwẽa jarateak'a pasima. Maamina ichi ome p'ɨrrɨapataɨrã ãchi tuaba ará p'anɨne ãarea jarateapachima.

Jesupa nãu mãɨnepa senia ap'i bapida

³⁵ Mãɨ ewaride k'iupodode Jesupa ichi ome p'ɨrrɨapataɨrã́ jarasima: —¡K'ĩaria lao wãtɨma!

³⁶ Ara mãɨne ãchia ẽpẽerã arí p'anɨ ameenak'ari Jesú ome, chi badamá p'ãp'orrode k'ĩaria wãsidama. P'ãp'orro awaraɨrã ãchi paara wãsidama.

³⁷ Mãɨya p'anɨne nãu minachia p'õat'ɨ nɨbeesima. Mãɨpuru pania t'umá minachia p'ãp'orrode eda wã nɨbeesima. Chi p'ãp'orro pirupodo basima.

³⁸ Mãɨne Jesú p'ãp'orro ãtauari k'ãi basima porok'au ɨ̃rɨ. Mãɨ k'orea ichi ome p'ɨrrɨapataɨrãpa ɨ̃rɨmanak'ari nãɨya jarasidama: —Jarateaparí, ¿K'awawẽk'ãra tai k'uawãmaa p'anɨt'a?

³⁹ Maapae Jesú p'irabarik'ari, chi nãua ɨtɨak'ari, senia chomá minachia nãɨya ɨtɨasima: —¡K'ĩup'ea base! ¡Ap'i base! Ara mãɨne nãu k'ĩup'ea beesima mãɨnepa ãarea ap'i ũu beesima.

⁴⁰ Mãɨya bɨde Jesupa ãchiá jarasima: —Mãra ¿k'ãre k'orea minachia wap'ea p'anɨma? ¿K'ãre k'orea Tachi Ak'õrene ĩjãanawẽa p'anɨma?

⁴¹ Maamina Jesupa ooda k'orea ãchi minachia p'era p'anasidama. Mãɨpuru ara ãchi tuaba idi para beesima: —Nãɨ ¿K'ai ẽpẽrama? Nãupa mãɨnepa to pida ichi pedea ũripatama.