Marco 3 - Tachi Ak'õre Pedea

Jesupa mimianak'apɨ́ ewaride ẽpẽra jɨpa beepida

¹ Mãicha Jesú judiorã ará pedeapataɨ tedea eda wãsima. Mãma ẽpẽra jua sorek'ea bɨt'a basima.

² Waapẽarãpa Jesú ak'ɨ p'anasidama mimianak'apɨ́ ewaride mãɨ ẽpẽra jɨpa beepii k'awadayá. Jɨpa beepisira Jesú k'orea k'achia pedeadai k'ɨ̃risia p'anasidama.

³ Mãɨne Jesupa chi ẽpẽra jua sorek'ea bɨa nãɨya jarasima: —P'irabarik'ari, ãareaɨrã taade bai nɨbeese.

⁴ Maapae Jesupa ãchiá idisima: —¿Mimianak'apɨ́ ewaride k'ãre oodai p'anɨma? ¿Nepia ooima, wa nemietá ooima? ¿Abaɨ k'ɨdade bɨ k'aripai wa itu piupiik'ãra? Maamina ãchi k'ĩup'ea p'aneesidama.

⁵ Mãɨne Jesú k'ĩra piawẽa beesima ãchi sõ chaarea p'anasideepuru. Ãchi k'ĩruu ak'ɨside chi jua sorek'ea bɨa jarasima: —Jua ɨase. Mãɨya ɨaside ichi jua jɨpa beesima.

⁶ Ara mãɨne p'ariseorã tajatá wãnak'ari chi Herodedepemarã paara pedea aumaa p'aneesidama, Jesú sãmaasã́ peadai k'orea.

Galilea senia ik'idá tuanana

⁷ Galilea tuadepemarã minachia ichi k'aade wãsidaɨde, Jesú mãɨnepa chi ichi ome p'ɨrrɨapataɨrã Galilea senianea wãsidama.

⁸ Jesupa ẽpẽerãpa ne p'ue oodak'apɨ́ oo bɨt'a ũrinak'ari, ẽpẽerã Judea tuadepemarã, Jerusalén p'uurudepemarã, Idumea tuadepemarã, Jordán to k'ĩaria laopemarã, Tiro tuadepemarã mãɨnepa Sidón tuadepemarã chi Jesú bɨmá wãsidama.

^9-10 Ichia k'ak'ua piawẽa be jɨpa beepi bada pẽra ẽpẽerãpa chi sĩsĩak'oa wãpachidama ichi k'ak'ua t'õmaridai k'orea. Ichimá p'isua nɨbeepidaemaapa, Jesupa ichi ome p'ɨrrɨapataɨrã́ jarasima p'ãp'orro jɨrɨ uru p'ananamẽrá.

¹¹ Ẽpẽra jaore mietá pará bepa Jesú unuutade ichi k'ĩrari sĩraporode k'op'aneenak'ari jaore mietaarãpa ne wap'eadepa biapachidama: «¡Pɨ Tachi Ak'õre Warrapɨ!»

¹² Maamina Jesupa jaore mietaarã́ minachia jarapachima ichi k'orea jarapidaemaapa.

Jesupa ẽpẽra doce p'anɨ jɨrɨ atada

¹³ Mãɨya nak'ari Jesú eyadea wãk'ari chi ichia k'ɨ̃riarut'a t'ɨ̃sima. Ãchia orrobaridak'ari,

¹⁴ maapae doce p'anɨrã jɨrɨ atak'ari, «ichia peedaɨrã» bɨk'oasima ichi ome p'ɨrrɨadamẽrá mãɨnepa ichi pedea jara nipadamẽrá.

¹⁵ Jesupa ãchiá jua chaarea teasima k'ak'ua piawẽa be jɨpa beepidamẽrá mãɨnepa jaore mietá ãyá jeret'aadamẽrá.

¹⁶ Chi ichia doce p'anɨ peeda nãɨrãpɨ: Simón (Jesupa ichi t'ɨ̃ bɨda Pedropɨ),

¹⁷ Zebedeo warra Santiago, mãɨnepa chi ũpẽa Juan. Mãɨ ũpẽarã Jesupa t'ɨ̃ bɨsima Boanerge, mãɨ t'ɨ̃ «pa warrarã» jara k'ɨ̃ria bɨẽra.

¹⁸ Nãɨrã sida bɨsima: André, P'elipe, Bartolomé, Mateo, Tomá, Alp'eo warra Santiago, Tadeo, Simón Cananeo

¹⁹ mãɨnepa Juda Iscariote, chi mãɨya bak'ari Jesú jitapi bada.

Jesú k'orea k'achia pedeadada

²⁰ Maapae Jesú tiidá eda wãside mãicha ẽpẽerã minachia chesidama. Mãɨpa Jesú mãɨnepa chi ichi ome p'ɨrrɨapataɨrãpa p'ue nek'odaé pasima.

²¹ Jesú ichidirãpa mãɨ k'awadak'ari ichi atade wãsidama, ichi k'ĩra piawẽa bɨade a p'anɨẽra.

²² Maamina Moisepa bɨda jarateapataɨrã Jerusalén p'uurudepa chedaadapa jarasidama: —Jãɨ Jesú jãɨya bɨma chi jaore mietaarã chi atepe bɨ Beelzebú ichi k'ak'uade uru bɨ pẽra. Ichia jaore mietá ãyá jeret'aaparima, Beelzebupa mãɨ jua chaarea teada pẽra.

²³ Mãɨ ũrik'ari Jesupa ãchi t'ɨ̃k'ari maapae nãɨya nepɨrɨsima. Nãɨya jarasima: «¿Sãmaasã́ Tiorepa ara ichi ãyá jeret'aima?

²⁴ Tua abarik'a berã ãstu k'ĩruupik'adaipɨra, chi jõnaipɨ.

²⁵ Mãɨnepa te abarik'a berã ãstu k'ĩruupik'adaipɨra, tãaraa p'ananaiwẽma.

²⁶ Ara mãɨ jĩra Tiorepa ara ichi jaore mietaarã paara k'ĩruuk'ari maapae chi eda waapẽarã ãyá wãnak'ari ¿sãmaasã́ ãchi ará p'ananaima? Ãarea jõipɨ.

²⁷ »Mãɨnepa ẽpẽra jua chaarea bɨ naa jɨ̃ nɨbɨdaepɨra, ¿sãmaasã́ ichi tede eda nechɨade wãnaima? Aba mãɨya jɨ̃ nɨbɨsidara p'ue ichidí neet'á chɨadai p'anɨma.

²⁸ »Piarã ara mɨa mãrá jararuma: ẽpẽerãpa nemietá oopataɨ mãɨnepa k'achia pedeapataɨ Tachi Ak'õrepa mãɨ ãarea abarik'a k'ɨ̃risia atuaipɨ.

²⁹ Maamina abaɨpa Tachi Ak'õre Jaore k'orea k'achia pedeaipɨra, Tachi Ak'õrepa mãɨ k'ɨ̃risia atuaiwẽma. Mãɨ ẽpẽra ewaricha nepɨrade baipɨ».

³⁰ Jesupa mãɨya jarasima ichia jaore mietá uru bɨade adada pẽra.

Jesú ẽpẽerã ichimá chedada

³¹ Mãɨne Jesú ũpẽarã mãɨnepa chi nae chesidama. Ãchi tajata p'aneesidama mãɨnepa abaɨa chi Jesú t'ɨ̃ peesidama.

³² Maapae ẽpẽerã Jesuk'á suak'abari bepa ichiá jarasidama: —Pɨ nae mãɨnepa pɨ ũpẽarã tajataria p'anɨma. Ãchia pɨ jɨrɨ p'anɨma.

³³ Maamina Jesupa jarasima: —Mãramá ¿k'ait'a mɨ naema mãɨnepa mɨ ũpẽarãma?

³⁴ Chi ichi k'ait'a suak'abari bemá ak'ɨk'ari jarasima: —Nãɨrã mɨ naepɨ mãɨnepa mɨ ũpẽarãpɨ.

³⁵ Chi Tachi Ak'õrepa k'ɨ̃ria bɨ oo bet'a, mãɨt'u mɨ ũpẽapɨ, mɨ ũpẽawẽrapɨ, mãɨnepa mɨ naepɨ.