Marco 16 - Tachi Ak'õre Pedea

Jesú chok'ae p'irabarida

¹ Mimianak'apɨ́ ewari jõk'ari María Magdalenapa, Santiago nae Mariapa mãɨnepa Salomepa k'era atasidama Jesú k'ak'ua p'ɨrɨdai k'orea.

² Tomione tap'ededa, ɨmata ochiarude, Jesú t'ɨbaridaadamá wãsidama.

³ Mãɨne nãɨya jara nipasidama: «¿Jãɨ mawara waibɨa bɨpa uria jõat'ɨ bɨt'a k'aipa tachiá ãyá pɨra teaima?»

⁴ Maamina arí padak'ari, ak'ɨutade chi mawara nepalá bɨt'a ãyá pɨra k'obɨt'a unusidama.

⁵ Ara mãɨne chi uriade eda wãnak'ari k'ũtã́ aba ãchi juaraari suak'abari bɨt'a unusidama. Ichi anamari jɨ̃ bɨ t'orroa basima. Mãɨ k'orea chi wẽrarã p'erasidama.

⁶ Mãɨ k'ũtãpa ãchiá jarasima: —P'erarãt'ɨ. Mãrapa Jesú Nazaredepema k'urusude barijira bɨdada jɨrɨ p'anɨma. Ichi chok'ae p'irabarisima. Ichi t'ɨbaridaadamá ak'ɨt'ɨ. Nãma bɨwẽma.

⁷ Naapae jarade wãt'ɨ chi ichi ome p'ɨrrɨapataɨrãmá mãɨnepa Pedroa, Jesú ãchi naa Galilea tuadea wãrut'a. Mãma ichi ununaipɨ ara ichia naena jarada jĩra.

⁸ Mãɨne p'era p'anɨpa k'ak'ua wɨwɨrrɨadak'ari, chi wẽrarã Jesú k'ak'ua t'ɨbaridaadamãɨpa mĩruwãsidama. Ne wap'ea p'anɨ pẽra mi ãpia pida abaɨa jaradaé pasima.

Jesupa María Magdalená unupida

⁹ Tomione tap'ededa Jesú chok'ae p'irabarik'ari naa María Magdalená unupisima. Mãɨ wẽranepema Jesupa naena jaore mietaarã siete ãyá jeret'aa basima.

¹⁰ Maapae María chi Jesú ome p'ɨrrɨapataɨrãmá chi Tachi Ak'õrepa ɨt'aripa peedapa jara peeda jarade wãside, mãɨ ãchi sõp'uapa jẽa p'anasidama.

¹¹ Maamina Mariapa ãchiá Jesú chok'ae bɨt'a unusiade aside, mãɨ ĩjãanaé pasima.

Jesupa waapẽarã ume p'anɨa ichi unupida

¹² Mãɨya nak'ari Jesú ome p'ɨrrɨapataɨrã ume p'uurudepa wãuta pasima. Mãɨrã́ Jesupa ara ichi k'ĩra awara unupisima.

¹³ Ãchi jĩitea wãnak'ari chi waapẽarã́ jarasidama. Maamina ĩjãanaé pasima.

Chi Jesú ome p'ɨrrɨapataɨrã́ ichi unupida

¹⁴ Mãɨya nak'ari chi Jesú ome p'ɨrrɨapataɨrã once p'anɨ nek'omaa p'anasidaɨde ara ichi unupisima. Ãchi sõ chaareadepa ĩjãanawẽa p'anana pẽra mãɨnepa chi ichi chok'ae p'irabarida ununaanapa ãchiá jarada ĩjãanawẽa p'anana pẽra, ãchi ɨtɨasima.

¹⁵ Maapae Jesupa ãchiá jarasima: «Tuacha wãnak'ari chi pedea pia mɨ k'orea ãareaɨrã́ jarat'ɨ.

¹⁶ Mãɨ pedea ĩjãasidara mãɨnepa porochoasidara Tachi Ak'õrepa mãɨ k'aripaipɨ. Maamina chi mãɨ pedea ĩjãawẽ bɨt'a ichia mãɨ ɨtɨaipɨ.

¹⁷ Chi mɨne ĩjãa p'anɨrãpa nãɨ ẽpẽerãpa ne p'ue oodak'apɨ́ oodaipɨ: mɨ t'ɨ̃nepa jaore mietaarã ãyá jeret'aadaipɨ mãɨnepa pedea chiwidi pedeadaipɨ.

¹⁸ Taama ara ãchi juapa jitadaipɨ. Nearã́ mietá todaipɨra mãɨpa ãchi jitaiwẽma. Mãɨnepa chi k'ɨdade berã ãchi jua ɨ̃rɨ bɨutade mãɨ jɨpa p'aneenaipɨ».

Jesú pajãnea wãna

¹⁹ Mãɨya jarak'ari Tachi Ak'õrepa Tachi Chipari Jesú ɨt'aa pajãnea ateewãsima. Mãma ichi juaraari suak'abari beesima.

²⁰ Maapae chi Jesú ome p'ɨrrɨapataɨrãpa ichi pedea ãchi wãutacha jarasidama. Tachi Chiparipa ãchi k'aripapachima. Ẽpẽerãpa ne p'ue oodak'apɨɨrã oopi bɨdepa k'awapipachima ãchia jara p'anɨ piarãt'a.