Marco 13 - Tachi Ak'õre Pedea

Tachi Ak'õre te minachia bɨ ãrinai pada Jesupa jarada

¹ Jesú Tachi Ak'õre te minachia bɨ edariipa tajatá wãrune, ichi ome p'ɨrrɨapataɨrãnepema abaɨpa jarasima: —Jarateaparí, ¡Ak'ɨse nãɨ mawara nepalá be mãɨnepa nãɨ te pia k'ede!

² Mãɨne Jesupa ãchiá jarasima: —Chi mãrapa nãɨ te unu p'anɨt'a minachia k'obepɨ. Nãɨ mawara p'ãnana pada ãarea ãriipɨ.

³ Maapae Olivo eyadea wãsidama, chi Tachi Ak'õre te minachia bɨ k'ĩrari. Jesú mãma suak'abari baside Pedropa, Santiagopa, Juanpa mãɨnepa Andrepa ãchi tuaba ichiá idisidama:

⁴ —Taiyá jarase: Tachi Ak'õre te minachia bɨ ¿sãapae mãɨ ãriima? ¿K'ãrenepa k'awadaima mãɨ ewari k'ait'a parude?

⁵ Mãɨne Jesupa jarasima: —Jĩrak'aua nipat'ɨ abaɨa pida mãra seapiemaapa.

⁶ Chok'araɨrãpa jaradaipɨ: “Mɨ Tachi Ak'õrepa Tachi K'aripaparí teai jara bada”. Mãɨya ẽpẽerã minachia ãarea seadaipɨ.

⁷ P'uuru aba bɨ awaraɨ ome k'ĩruupik'a nɨbɨ mãɨnepa mãɨ k'ĩruupik'a nɨbɨ ũriutade, p'erarãt'ɨ. Mãɨ jõma mãɨyai bɨma. Maamina nãɨ ewari waidi paiwẽma.

⁸ Ĩjũa aba bɨ ĩjũa awaraɨ ome k'ĩruupik'a nɨbaipɨ. Ichiaba tua abaɨdepema poro jũra jɨ̃parí jɨ̃ bɨ tua awaraɨdepema poro jũra jɨ̃parí jɨ̃ bɨ ome k'ĩruupik'a nɨbaipɨ. Tuacha iurumia wãipɨ mãɨnepa jarra minachia baipɨ. Maamina mãɨ chi ɨ̃rapuru ãpia minachia mĩanaidepemapɨ, wẽra warra p'ua bɨ jĩra.

⁹ »Jĩrak'aua p'anat'ɨ. Mãra chi ak'ɨpataɨrãmá ateewãnak'ari maapae judiorã ará pedeapataɨ tede soapa p'edaipɨ. Mɨne ĩjãa p'anɨ k'orea ãchia mãra chi poro chaarearã k'ĩrari mãɨnepa chi poro jũra jɨ̃parí jɨ̃ p'anɨrã k'ĩrari ateewãnaipɨ. Mãɨne mãrapa mɨ k'orea ãchi k'ĩrari pedeadaipɨ.

¹⁰ Maamina nãɨ ewari pai naena chi pedea pia mɨ k'orea p'uurucha ãarea jaradai p'anɨma.

¹¹ Mãra jita enemeeutade k'ɨ̃risia paraarãt'ɨ k'ãret'a jaradai k'orea. Chi chaarearã k'ĩrari p'anɨne Tachi Ak'õrepa k'awapiipɨ k'ãre jaradai p'anɨ. Mãɨ pedeautade mãra k'ɨ̃risiadepa pedeadaiwẽma, mãɨpari Tachi Ak'õre Jaorepa mãra k'ak'uadepa pedeaipɨ.

¹² Abaɨpa ara ichi ũpẽa peapiipɨ mɨne ĩjãa bɨ k'orea. Chi ak'õrepa ichi warra peapiipɨ mãɨnepa chi warrarãpa ãchi ak'õrerã k'ĩruunak'ari peadaipɨ.

¹³ Mɨne ĩjãa p'anɨ k'orea jõmãɨrãpa mãra unuemaanaipɨ. Maamina chi k'aadepema ewari parudea mɨne wapida ĩjãa p'anɨ itu bɨdaepɨra, Tachi Ak'õrepa mãɨ k'aripaipɨ ichi ome chok'ae p'ananamẽrá.

¹⁴ »Chi nemietá Tachi Ak'õrepa k'ɨ̃riak'aɨ ichi baiwẽa bɨmá mãrapa mãɨ unuutade Judea tuade berã eyadea mĩruwãnai p'anɨma. (Chi k'art'a eda jara bɨpa k'ãre jara bɨt'a k'awai bɨma).

¹⁵ Mãɨne ẽpẽra ichi te ɨ̃rɨ bɨ ichi tede eda wãiwẽa bɨma ne ateewãi k'orea.

¹⁶ Chi ne uu ĩjũane bɨpa ichi neet'á ɨ̃rɨ jɨ̃parí jĩitea atade wãiwẽa bɨma.

¹⁷ Mãɨ ewaride wẽrarã biak'oa berã mãɨnepa warra juto ua berã chupuria p'aneenaipɨ.

¹⁸ Tachi Ak'õrea ɨt'aa chiidit'ɨ mãɨ mĩruwãnai ewaride mãɨya ewãrapiemaapa.

¹⁹ Mãɨ ewaride ẽpẽerã minachia chupuria mĩanaipɨ. Tachi Ak'õrepa nãɨ ĩjũa oosiedapema ẽpẽerã mãɨ jĩra atepe mĩapik'a pasima, ichiaba mãɨya bak'ari waa ara mãɨ jĩra mĩanaiwẽma.

²⁰ Tachi Chiparipa mãɨ ewari edá baepiépara mi ãpia pida ẽpẽra baiwẽ pasima. Maamina ichia mãɨ ewari edá baepisima, ichia jɨrɨ atada ẽpẽerã k'orea.

²¹ »Mãɨ ewaride abaɨpa mãrá jaraipɨra, “Ak'ɨt'ɨ, Tachi Ak'õrepa Tachi K'aripaparí teai jarada nãma bɨma”, mãɨ ĩjãarãt'ɨ. Waapẽarãpa “Ak'ɨt'ɨ, chawa bɨade” aipɨra, mãɨ sida ĩjãarãt'ɨ.

²² Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽerãpa ne p'ue oodak'apɨ́ waibɨa be oodaipɨ ẽpẽerã seadai k'orea. Tachi Ak'õrepa jɨrɨ atadaɨrã p'ue seadaipara, ãchi sida seadai pasima.

²³ Tau pará p'anat'ɨ. Mɨa mãrá ãarea jarasima mãɨ mãɨyai naena.

Ẽpẽra Warra chei k'orea bɨda

²⁴ »Mãɨ ewaride ẽpẽerã minachia mĩa p'ananak'ari ɨmata p'ãrioipɨ. Jedek'o sida waa jẽrat'ĩuiwẽma.

²⁵ K'ãk'ãi pajãnepa baek'oadaipɨ. Ãarea pajãne be orek'oadaipɨ.

²⁶ »Mãɨ ewaride mɨ, chi Ẽpẽra Warra, mɨ jua chaareadepa jɨ̃ararãne cheit'a mãɨnepa k'ĩrawãrea bɨt'a ununaipɨ.

²⁷ Mãɨne mɨa Tachi Ak'õrepa ɨt'aripa peedaɨrã tuacha wãpiipɨ Tachi Ak'õrepa jɨrɨ atadaɨrã tausia ará jeredamẽrá.

²⁸ »Higo bɨɨrɨ k'orea nepɨrɨda k'awat'ɨ. Chi pak'uru jua t'uk'u nɨbeek'ari k'irú cheparima. Mãɨnepa jõmãɨrãpa k'awa p'anɨma tãaraawẽa bɨde iu p'oait'a.

²⁹ Ara mãɨ jĩra mɨa jarada unuutade k'awat'ɨ mɨ chei ewari ará pamaa bɨt'a.

³⁰ Mɨa mãrá piarã jararuma: nãɨ ewaridepema ẽpẽerã piudai naena mãɨ ãarea mãɨyaipɨ.

³¹ Pajã mãɨnepa nãɨ ĩjũa jõipɨ, maamina mɨ pedea jõiwẽma.

³² »Maamina abaɨ pida mãɨ ewari sãapae mãɨyait'a k'awadawẽma. Tachi Ak'õrepa ɨt'aripa peedaɨrã pida atua p'anɨma. Mɨ, chi Ẽpẽra Warra pida atua bɨma. Abapuru mɨ Ak'õrepuru mãɨ k'awa bɨma.

³³ »¡Tau pará p'anat'ɨ! ¡Ak'ɨ p'anat'ɨ! Mãrapa chi ewari sãapae chei atua p'anɨma.

³⁴ Mãɨ ewari cheru nãɨ jĩra bɨma: ẽpẽra tua awaraɨdea wãrune chi ichi pae pari mimiapataɨrã ameeparima ichi te ak'ɨdamẽrá. Ãchicha bɨparima ne oodamẽrá. Chi eda wãpataɨ ak'ɨparia jaraparima pia ak'ɨ bamẽrá.

³⁵ Ara mãɨ jĩra mãra pida atua p'anɨma mãra Te Chipari sãapae cheit'a: k'ewará, teamasi estarik'a, et'erre pirurude wa tap'ede. Mãɨpuru tau pará p'anat'ɨ,

³⁶ ara atua nɨbɨde, mɨ mãɨ cherude mãra k'ãi p'anɨ unuemaapa.

³⁷ Chi mɨa mãrá jara bɨt'a ãareaɨrã́ pida jara bɨma: tau pará p'anat'ɨ.