Marco 11 - Tachi Ak'õre Pedea

Jesú Jerusalene cheda

¹ Jerusalén k'ait'a cheutade Betp'aké mãɨnepa Betania p'uurude chesidama, Olivo eya k'ait'a. Mãɨne Jesupa ichi ome p'ɨrrɨapataɨrã ume p'uurudea peesima.

² Ãchiá nãɨya jarasima: «Tachi k'ĩrari bɨ p'uurudea wãt'ɨ. Pautade mãrapa mũra chae ununaipɨ. Mãɨ mũra chae ɨ̃rɨ aba pida bat'oodak'a pasima. Ẽranak'ari nãmá enemeet'ɨ.

³ Abaɨpa mãrá k'ãre k'orea mãɨya oo p'anɨane a idiipɨra nãɨya jarat'ɨ: “Tachi Chiparipa nãɨ k'ɨ̃ria bɨma ya ara naane jĩitea tea peeipɨ”».

⁴ Ode wãutade chi mũra chae chipari tede eda wãpataɨ k'ait'a jɨ̃ nɨbɨt'a ununak'ari ẽrasidama.

⁵ Waapẽarã arí p'anɨrãpa idisidama: «¿K'ãre oo p'anɨma? ¿K'ãre k'orea jãɨ mũra chae ẽramaa p'anɨma?»

⁶ Jesupa jarada jĩra p'anoosidaɨde chi arí p'anɨpa itu ẽrapisidama.

⁷ Maapae chi mũra chae Jesumá ateewãnak'ari chi ãchia anamari jɨ̃ p'anana mũra ɨ̃rɨ bɨdak'ari maapae Jesú mãɨ ɨ̃rɨ suak'abari beesima.

⁸ Ẽpẽerã minachia p'anɨrãpa ãchia anamari jɨ̃ p'anana ode t'õk'oasidama. Chi eda waapẽarãpa pak'uru jua k'irú pará be mẽa bɨat'udada ojãne t'õk'oasidama.

⁹ Mãɨya ooutade chi ichi naa wã p'anɨrãpa mãɨnepa chi k'aadea che p'anɨrãpa jĩk'ua jarasidama: ¡Minachia pia bɨma chi Tachi Chipari t'ɨ̃nepa cherut'a!

¹⁰ ¡Minachia pia bɨma tachi chõarãenapema Davidepa cheda! ¡Ichia ichidirã ichi juade ua baipɨ! ¡Minachia pia bɨma chi Pajãne Bɨt'a!

¹¹ Jesú Jerusalene wãside Tachi Ak'õre te minachia bɨdea wãsima. Ãarea ak'ɨk'ari k'iumaa bɨẽra chi ichia doce jɨrɨ atadaɨrã ome Betania p'uurudea jĩitea wãsidama.

Higojõ bɨɨrɨ p'urpada

¹² Norema Betania p'uurudepa wãutade Jesú jarrapisia nɨbeesima.

¹³ Mãɨne higojõ bɨɨrɨ k'irú pará bɨ t'ɨmɨɨpa unusima. Higo chaudai ewariwẽmina Jesupa ak'ɨde wãsima chi mãɨya chau nɨbɨ k'awayá. Ará parude k'irúawa nɨbɨ unusima.

¹⁴ Mãɨne Jesupa higojõ bɨɨrɨa jarasima: «¡Abaɨ pida pɨ nejõ waa jõnaiwẽma!» Mãɨya pedeasit'a chi ichi ome p'ɨrrɨapataɨrãpa ũrisidama.

Jesupa ne netopataɨrã ãyá jerek'oada

¹⁵ Jesú Jerusalene mãicha chek'ari Tachi Ak'õre te minachia bɨdea wãsima. Mãma tajata ne netopataɨrã mãɨnepa ne atapataɨrã ome unusima. Mãɨya unuk'ari, Jesupa ãchi ãarea ãyá jeret'aak'oasima. Mãma jira bat'ak'oasima ne nek'opataɨ chi erreara tau tua awaraɨdepema k'ãpiapataɨrãné mãɨnepa p'aloma netopataɨrã suak'abari p'aneepataɨ sida.

¹⁶ Mãɨ awara mi ãpia pida chi ne netopataɨ neet'á itu ateepié pasima chi Tachi Ak'õre te minachia bɨ edaria.

¹⁷ Ãchiá nãɨya jarateasima: —Tachi Ak'õre pedeade nãɨya bɨ bɨma: “Mɨ te ɨt'aa chiidipataɨ teade adaipɨ, nãɨ ãarea p'uurudepemarã pae”. Maamina mãrapa “nechɨapataɨ te uria bɨ jĩra” papisidama.

¹⁸ Mãɨ pedea ũrisidaɨde p'aarerã chi mãɨrã chaarearãpa mãɨnepa Moisepa bɨda jarateapataɨrãpa Jesú wap'easidama ichia jaratea bɨ ãareaɨrãpa pia ũri p'anɨ pẽra. Mãɨpuru jɨrɨ p'aneesidama ichi sãmaasã́ peadait'a.

¹⁹ Mãɨ ewari baepodoside Jesú chi ichi ome p'ɨrrɨapataɨrã ome mãɨ p'uurudepema wãsidama.

Higojõ bɨɨrɨ p'urpa nɨbeeda

²⁰ Tap'ededa chi higojõ bɨɨrɨk'á wãsidaɨde, chi k'arra p'oak'ari p'urpa nɨbɨt'a unusidama.

²¹ Mãɨne Jesupa jarada Pedropa k'ɨ̃risiak'ari nãɨya jarasima: —Jarateaparí, ak'ɨse. Chi pɨa k'achia pedea badá mãɨ higojõ bɨɨrɨ p'urpasima.

²² Jesupa jarasima: —Mãrapa Tachi Ak'õrene ĩjãanai p'anɨma.

²³ Mɨa piarã jararuma: parituapa cha bɨ eyá ãyá wãpade maapae p'usadea eda baewãpade asira, ara ichia jararu jĩra mãɨyaipɨ. Maamina mãɨ piarã ichi sõne k'ɨ̃risiaiwẽa bɨma ichia jararu mãɨyaiwẽt'a, mãɨpari piarã mãɨyait'a ĩjãai bɨma.

²⁴ Mãɨpuru mɨa mãrá jararuma: mãrapa Tachi Ak'õrea ne ɨt'aa chiididak'ari, mãɨnepa ichia mãɨ piarã teait'a a k'ɨ̃risia p'anɨpɨra, mãɨ ne ãarea jitadaipɨ.

²⁵ Mãɨnepa mãrapa Tachi Ak'õrea ɨt'aa chiidiutade abaɨ ome k'ĩruu p'ananapɨra, mãɨ ẽpẽrapa ne piawẽa ooda naa k'ɨ̃risia atuat'ɨ, mãrapa ne piawẽa oodada mãra Ak'õre pajãne bɨpa ichiaba k'ɨ̃risia atuamẽrá.

²⁶ Abaɨpa ne piawẽa oodat'a mãrapa mãɨ k'ɨ̃risia atuadaepɨra, ichiaba mãrapa ne piawẽa oodada mãra Ak'õre pajãne bɨpa k'ɨ̃risia atuaiwẽma.

¿K'ai t'ɨ̃nepa Jesupa jaratea bɨma?

²⁷ Maapae mãicha Jerusalene chesidama. Jesú Tachi Ak'õre te minachia bɨ k'ait'a wãrune, p'aarerã chi mãɨrã chaarearã, chi Moisepa bɨda jarateapataɨrã mãɨnepa judiorã chi mãɨrã chaarearã ichimá chesidama.

²⁸ Ãchia Jesua nãɨya idisidama: —Pɨa nãma oo bɨ ¿k'aipa oopi bɨma?

²⁹ Jesupa p'anoosima: —Mɨa pida mãrá ne idiipɨ. Mãrapa mãɨ p'anoosidara, mɨa pida jaraipɨ k'aipa mɨá mãɨya oopi bɨt'a.

³⁰ ¿Sãmãɨpa Juan chesima porochoamẽrá? ¿Pajãne Bɨpa ichi peesima, wa nãɨ ĩjũanepemarãpa? P'anoot'ɨ.

³¹ Mãɨne ara ãstu pedea para beesima: «Tachi Pajãnepema Ak'õrepa ichi peesiade adaipɨra, ichia jaraipɨ: “Mãɨ ¿k'ãre k'orea ĩjãanaé pasima?”

³² Maamina taipa p'ue “ẽpẽrapa ichi peesiade” adaiwẽma». Ãchia mãɨya jarasidama chi ẽpẽerã p'uurudepemarã wap'ea p'anɨ pẽra. Chi p'uurudepemarãmá, mãɨ Juan piarã Tachi Ak'õre pari pedeaparí pasima.

³³ Mãɨpuru Jesua p'anoosidama: —Taipa atuapɨ. Mãɨne Jesupa jarasima: —Mãɨya bɨpɨra mɨa pida mãrá jaraiwẽma k'aipa mɨá jãɨya oopi bɨt'a.