Marco 10 - Tachi Ak'õre Pedea

Jesupa wẽra amaapataɨ k'orea jarada

¹ Maapae Jesú Capernaum p'uurudepa Judea tuadea wãsima Jordán to k'ĩaria. Ẽpẽerã minachia nɨbɨ mãicha ichimá cheepɨrɨsidaɨde ichia oopari jĩra ãchiá jaratea beesima.

² Mãɨya bɨde chi eda waapẽarã p'ariseorã chesidama. Ichiá piawẽa pedeapidai k'orea nãɨya idisidama: —¿Ɨmɨk'ĩrapa chi k'ima amaai pia bɨk'ãra?

³ Jesupa p'anoosima: —¿Moisepa k'ãre bɨsima?

⁴ P'ariseorãpa p'anoosidama: —Moisepa mãɨ itu bɨpisima. Chi ɨmɨk'ĩrapa chi wẽra amaai k'orea k'art'a bɨk'ari maapae wẽrá teak'ari, mãɨ amaai bɨma.

⁵ Mãɨne Jesupa jarasima: —Moisepa mãɨ pedea bɨsima mãra k'ɨɨrɨwẽa p'anɨẽra.

⁶ Maamina jua chiwidieda Tachi Ak'õrepa ɨmɨk'ĩra mãɨnepa wẽra oosima.

⁷ Mãɨpuru ɨmɨk'ĩrapa chi ak'õre mãɨnepa chi nae ameek'ari ichi k'ima ome ará beeipɨ.

⁸ Mãɨya k'ak'ua aba bɨ jĩra p'ananaipɨ. Ãchi ume p'anɨwẽma, mãɨpari aba bɨ jĩra p'anɨma.

⁹ Mãɨpuru Tachi Ak'õrepa chi ará bɨdat'a abaɨ pida amaai pia bɨwẽma.

¹⁰ Tiidá wãnak'ari chi Jesú ome p'ɨrrɨapataɨrãpa ichiá mãɨ k'orea idisidama.

¹¹ Mãɨne Jesupa p'anoosima: —Ɨmɨk'ĩra abaɨpa ichi k'ima awaraɨ ome k'ãiwẽa bɨt'a amaak'ari, maapae wẽra awaraɨ ataipɨra, mãɨ ɨmɨk'ĩrapa nemietá oo bɨma mãɨ k'aadeapema wẽra ome.

¹² Mãɨnepa wẽrapa ichi k'ima amaak'ari awaraɨ ɨmɨk'ĩra ataipɨra, mãɨ wẽrapa nemietá oo bɨma.

Jesupa warrarã́ pia pedeada

¹³ Mãɨne ẽpẽerãpa warrarã Jesumá enemeesidama ichi jua ɨ̃rɨ bɨk'ari pia pedeamẽrá. Maamina chi Jesú ome p'ɨrrɨapataɨrãpa chi warrarã enemeedaadarã ɨtɨasidama.

¹⁴ Jesupa mãɨ k'awaside, k'ĩruuk'ari nãɨya jarasima: —Warrarã mɨmá itu chepit'ɨ, ãchi chi Tachi Ak'õrepa ichidirã ichi juade ua bɨ jĩra p'anɨ pẽra.

¹⁵ Mɨa piarã jararuma: warra chak'e ichi ak'õre k'aade wãpari jĩra abaɨ pida Tachi Ak'õre k'aade wãepɨra, mãɨ ẽpẽra Tachi Ak'õre juade baiwẽma ichidirã paara.

¹⁶ Maapae chi warrarã ichi juadepa orek'oak'ari ichi jua ãchi ɨ̃rɨ bɨk'oak'ari ya pia pedeasima.

K'ũtã́ errearadepa ɨbɨa bɨ Jesú ome pedeada

¹⁷ Jesú mãmãɨpa wãrune ẽpẽra ichimá p'ira chesima. Mãɨ ẽpẽra Jesú k'ĩrari sĩraporode k'obeek'ari idisima: —Pia Jarateaparí, ¿mɨa k'ãre ooi bɨma Tachi Ak'õre ome ewaricha chok'ae bai k'orea?

¹⁸ Jesupa p'anoosima: —¿K'ãre k'orea mɨ pia bɨade a bɨma? Aba pida pia bɨwẽma; abapuru Tachi Ak'õret'u pia bɨpɨ.

¹⁹ Pɨa k'awa bɨma Tachi Ak'õrepa oopi bɨ pedea. Nãɨya jara bɨma: ẽpẽra pearãse, wẽra awaraɨ ome k'ãirãse, nechɨarãse, sea jararãse chĩara k'orea, searãse, pɨ ak'õre pɨ nae ome wap'ea base.

²⁰ Mãɨne ẽpẽrapa jarasima: —Jarateaparí, k'ũtãenapema mɨa mãɨ ãarea oo bɨma.

²¹ Mãɨne Jesupa k'ɨ̃ria bɨdepa ichi ak'ɨk'ari jarasima: —Ne abawẽa bɨma. Pɨa uru bɨ ãarea netode wãk'ari erreara chi nenea k'edea tease. Mãɨya nepia pajãne uru baipɨ. Maapae mɨ ome p'ɨrrɨade chese.

²² Mãɨ ũrik'ari sõk'achia beek'ari, k'ĩra piawẽa wãsima, neet'á minachia uru basidepa.

²³ Mãɨne Jesupa p'ɨrrabari ak'ɨk'ari chi ichi ome p'ɨrrɨapataɨrã́ jarasima: —Piarã chi t'aju bɨma ẽpẽra errearadepa ɨbɨa bɨ Tachi Ak'õre juade bai k'orea, ichidirã paara.

²⁴ Chi ichi ome p'ɨrrɨapataɨrãpa k'awa k'ɨ̃risiadaé pasima. Maamina Jesupa mãicha jarasima: —Warrarã, chi t'aju bɨma ẽpẽra errearadepa ɨbɨa bɨ Tachi Ak'õre juade bai k'orea, ichidirã paara.

²⁵ T'ajuwẽa bɨma camello akuja ãtaude eda wãit'a, mãɨ chi ẽpẽra errearadepa ɨbɨa bɨ Tachi Ak'õre juade bai k'aepẽra.

²⁶ Chi ichi ome p'ɨrrɨapataɨrãpa aba mãicha k'awa k'ɨ̃risiadaé pasima. Mãɨne ara ãchi paara pedeapachidama: —Mãɨyara Tachi Ak'õrepa ¿k'ait'a k'aripaima?

²⁷ Jesupa ãchi pia ak'ɨk'ari jarasima: —Ẽpẽrapa mãɨ p'ue ook'ama maamina Tachi Ak'õremá ne chi t'aju bɨ newẽma.

²⁸ Mãɨne Pedropa Jesua jarasima: —Taipa ne ãarea ameesidama pɨ ome wãnai k'orea.

²⁹ Jesupa jarasima: —Mɨa piarã jararuma: mɨ k'orea mãɨnepa chi pedea pia k'orea abaɨpa ichi te, ũpẽarã, ũpẽawẽrarã, nae, ak'õre, warrarã mãɨnepa ĩjũa ameeipɨra,

³⁰ ichia ameena k'aepẽra nãɨ ewaride cien ataipɨ: te, ũpẽarã, ũpẽawẽra, nae, warrarã mãɨnepa ĩjũa. Ẽpẽrarãpa ichi piawẽa oodai k'orea ẽp'ẽnaipɨ maamina chi k'aadepema ewaride Tachi Ak'õre ome ewaricha chok'ae baipɨ.

³¹ Mãɨya minachia chi naa p'anɨ k'aadea p'ananaipɨ, mãɨnepa chi k'aadea p'anɨ naa p'ananaipɨ.

Jesupa ichi piui mãicha jarada

³² Jerusalenea wãsidaɨde Jesú naa wãsima. Mãma wãuta k'orea chi ichi ome p'ɨrrɨapataɨrãpa k'awa k'ɨ̃risiadawẽa p'anasidama mãɨnepa chi k'aadea wãutarã ne wap'ea p'anasidama. Mãɨya p'anɨne Jesupa mãicha chi doce p'anɨ awara ateewãk'ari, ichi mãɨyai bɨ k'orea jarasima:

³³ —Ũrit'ɨ, tachi Jerusalenea wãutama. Jãma abaɨpa mɨ, chi Ẽpẽra Warra jitapik'ari, p'aarerã chi mãɨrã chaarearã juade mãɨnepa Moisepa bɨda jarateapataɨrã juade bɨipɨ. Ãchia mɨ piui bɨade a jaradak'ari judiorãwẽa teadaipɨ.

³⁴ Mãɨrãpa mɨ oo uru p'ananak'ari, taba idudak'ari, soapa p'edak'ari peadaipɨ. Maamina ewari ũpeaɨde mɨ chok'ae p'irabariipɨ.

Zebedeo warrarãpa ididada

³⁵ Zebedeo warrarã Santiago mãɨnepa Juan Jesumá chedak'ari jarasidama: —Jarateaparí, taipa k'ɨ̃ria p'anɨma chi taipa idiutat'a pɨa taiyá teait'a.

³⁶ Jesupa idisima: —¿K'ãre k'ɨ̃ria p'anɨma mɨa mãra pae ooit'a?

³⁷ Ãchia p'anoosidama: —Pɨ jõmãɨrã chipari beerude tai pɨchi ome itu suak'abari beepise, aba pɨ juaraari aba pɨ juawieri.

³⁸ Mãɨne Jesupa ãchiá jarasima: —Mãrapa atua p'anɨma k'ãre idi p'anɨt'a. Mɨ minachia mĩaipɨ. ¿Mãra sida piarã mãɨ jĩra mĩanai k'orea p'anɨk'ãra? ¿Mɨ minachia mĩarune porochoauta jĩra ara mãɨya mãra p'ue porochoapidai p'anɨk'ãra?

³⁹ Ãchia p'anoosidama: —Ãjã, mãɨya p'ue p'anɨma. Mãɨne Jesupa jarasima: —Mãrapa chi pasu mɨa to bɨt'a todaipɨ mãɨnepa mɨ minachia mĩapidayá porochoadai jĩra mãra ara mãɨya ichiaba porochoadaipɨ.

⁴⁰ Maamina mɨ juaraari wa mɨ juawieri suak'abari p'aneenait'a mɨa mãɨya p'ue jaraiwẽma. Tachi Ak'õrepuru mãɨya jaraipɨ chi ichia bɨda pae.

⁴¹ Mãɨne chi waapẽarã diez p'anɨpa Santiago mãɨnepa Juanpa idi p'anɨt'a ũrisidaɨde, ãchi ome k'ĩruusidama.

⁴² Mãɨne Jesupa ãchi t'ɨ̃k'oak'ari jarasima: —Mãrapa k'awa p'anɨma chi nãɨ ĩjũanepema minachia k'awa p'anɨrãpa jua chaareadepa ãchi ẽpẽerã ãchi juade ua p'anɨt'a minachia chok'apatama. Mãɨya oopatama chi waapẽarãpa ãchi chi atepe p'anɨane a k'ɨ̃risiadamẽrá.

⁴³ Maamina mãra mãɨya p'ananaiwẽa p'anɨma. Mãranepema chi atepe ba k'ɨ̃ria bɨpɨra chi waapẽarã pae pari mimiaparí jĩra bai bɨma.

⁴⁴ Chi atepe ba k'ɨ̃ria bɨt'a jõmãɨrã k'aepẽra chi chipari pae pari mimiaparí jĩra bai bɨma.

⁴⁵ Mãɨpuru mɨ, chi Ẽpẽra Warra chewẽa bɨma ẽpẽerã chi mɨ pae pari mimiapataɨrã padamẽrá. Mãɨpari mɨ che bɨma ẽpẽerã pae pari mimiaparí bai k'orea. Mãɨya mɨ piuipɨ ẽpẽerã minachia k'aripai k'orea.

Jesupa ẽpẽra tau p'ãrio bɨ jɨpa beepida

⁴⁶ Jesú, ichi ome p'ɨrrɨapataɨrã mãɨnepa ẽpẽerã minachia p'anɨ Jericó p'uurude pasidama. Wãutade ẽpẽra tau p'ãrio bɨ o ik'idá erreara idi bɨ suak'abari basima. Mãɨ ẽpẽra Timeo warra Bartimeo pasima.

⁴⁷ Bartimeopa ũrisima Jesú Nazaredepema mãma wãrut'a. Mãɨpuru bia beesima: —¡Jesú, Davidepa cheda, mɨ k'ĩra chupuriase!

⁴⁸ Mãɨne ẽpẽerã minachia p'anɨrãpa ichi ɨtɨasidama k'ĩup'eamẽrá, maamina ichia atepe ɨbɨa biasima: —¡Jesú, Davidepa cheda, mɨ k'ĩra chupuriase!

⁴⁹ Mãɨ ũriside Jesú bai nɨbeek'ari, nãɨya jarasima: —Ichi t'ɨ̃t'ɨ. Mãɨne chi tau p'ãrio bɨ t'ɨ̃nak'ari jarasidama: —Sõpia base. P'irabarise. Jesupa pɨ t'ɨ̃ bɨma.

⁵⁰ Ara mãɨne Bartimeopa ichia neet'á ɨ̃rɨ jɨ̃ bada ẽrak'ari isapea p'irabarik'ari Jesumá wãsima.

⁵¹ Mãɨne Jesupa ichiá idisima: —¿K'ãre k'ɨ̃ria bɨma mɨa ooit'a pɨ k'orea? Chi tau p'ãrio bɨpa jarasima: —Jarateaparí, mɨ taupa unu k'ɨ̃ria bɨma.

⁵² Mãɨne Jesupa jarasima: —Wãse. Pɨa ĩjãana pẽra jɨpa beesima. Ara mãɨne chi tau p'ãrio badapa unu beesima. Maapae Jesú ome ode wãsima.