Marco 1 - Tachi Ak'õre Pedea

Juan chi Porochoaparipa jarateada

^1-2 Nãɨ chi pedea pia Tachi Ak'õre Warra Jesucristo k'orea bɨdapɨ. Naena chi Tachi Ak'õre pari pedeaparí Isaíapa nãɨya bɨsima: «Chi mɨ pari pedeaparí pɨ naa peeipɨ, pɨ pae o jarimẽrá.

³ Ẽpẽra ĩjũa pania newẽa bɨde jĩk'ua pedea bɨma: “O jarit'ɨ Tachi Chipari pia chemẽrá. O ichi pae jĩp'a jarit'ɨ”».

⁴ Mãɨya Juan chi Porochoaparí ĩjũa pania newẽa bɨde ẽpẽerã́ jaratea beesima ãchia nemietá oopataɨ itu bɨdak'ari Tachi Ak'õremá chedamẽrá. Ichia jarasima mãɨya oosidara Tachi Ak'õrepa ãchi nemietá oodada k'ɨ̃risia atuait'a. Maapae porochoadai p'anɨane apachima.

⁵ Mãɨne ẽpẽerã Jerusalenepemarã mãɨnepa ãarea Judea tuadepemarã Juanmá wãpachidama. Ãchia nemietá oodada ichi k'ĩrari jaradak'ari ãchi Jordán tode porochoapachima.

⁶ Juan neet'á camello k'ara k'ada jɨ̃pachima. Ichi k'ɨrrɨde jɨ̃parí ãnimara e ooda jɨ̃pachima. Sisi k'opachima mãɨnepa mẽapema jɨrrɨjõ jõpachima.

⁷ Mãɨne nãɨya jarateapachima: «Mɨ k'aadea aba cheipɨ. Ichi mɨ k'aepẽra atepe bɨma. Mãɨpuru mɨ sĩraporode k'obeek'ari, ichia jĩrune jɨ̃ bɨ ẽrai k'orea mɨ mãɨ pae pida pia bɨwẽma.

⁸ Piarã mɨa mãra paniapa porochoasima maamina ichia Tachi Ak'õre Jaoredepa porochoaipɨ».

Juanpa Jesú porochoada

⁹ Mãɨ ewaride Jesú Nazaré p'uuru Galilea ĩjũane bɨdepa Juan bɨmá wãsima. Mãma cheside Juanpa Jordán tode ichi porochoasima.

¹⁰ Jesú toedaɨpa ochiaside pajã ewa nɨbɨt'a unusima. Mãɨne Tachi Ak'õre Jaore p'aloma jĩra ichi ɨ̃rɨ cheru unusima.

¹¹ Tachi Ak'õrepa pajãnepa edá nãɨya pedeasima: «Pɨ mɨ Warra chi k'ɨ̃ria bɨpɨ. Pɨ k'orea mɨ sõ arapá bɨma».

Tiorepa Jesua nemietá mĩesa oopiyá bada

¹² Mãɨne Tachi Ak'õre Jaorepa Jesú ĩjũa pania newẽa bɨdea wãpisima.

¹³ Mãma ewari k'ak'o cuarenta tiorepa ichiá mĩesa jarasima nemietá oomẽrá. Mãma ãnimara mietá t'ãena basima mãɨnepa Tachi Ak'õrepa ɨt'aripa peedaɨrãpa ichi k'aripa p'anasima.

Jesupa jaratea beeda

¹⁴ Juan chi Porochoaparí eda jɨ̃a nɨbɨdak'ari Jesú Galilea tuadea wãk'ari chi pedea pia Tachi Ak'õre k'orea jarateapachima.

¹⁵ Nãɨya jarapachima: «Chi ewari ará pasima. Tãaraawẽa bɨde Tachi Ak'õrepa ichidirã ichi juade ua baipɨ. Mãrapa nemietá oopataɨ itu bɨdak'ari mãɨ pedea pia ĩjãat'ɨ».

Jesupa to bat'apataɨrã t'ɨ̃na

¹⁶ Jesú Galilea senia ik'idá wãrune Simón mãɨnepa chi ũpẽa André unusima. Mãɨrã to bat'apataɨrã pasi pẽra, to bat'amaa p'anasidama.

¹⁷ Mãɨya p'anɨne Jesupa ãchiá jarasima: —Mɨ ome chet'ɨ. Mãrapa to bat'apata jĩra mɨa mãrá jarateaipɨ ẽpẽerã mɨmá enemeenamẽrá.

¹⁸ Ara mãɨne t'ɨri ameenak'ari Jesú ome wãsidama.

¹⁹ Mãmãɨpa naa wãsidaɨde, Jesupa Santiago mãɨnepa chi ũpẽa Juan unusima. Ãchi Zebedeo warrarã pasima. P'ãp'orrode t'ɨri k'õa bet'a wãamaa p'anasidama.

²⁰ Mãɨne Jesupa ãchi sida t'ɨ̃sima ichi ome wãnamẽrá. Ara mãɨne Santiago mãɨnepa Juanpa ãchi ak'õre Zebedeo mãɨnepa chi ichi pae mimiapataɨrã p'ãp'orrode ameenak'ari Jesú ome wãsidama.

Jesupa jaore mietá ãyá jeret'aada

²¹ Ãchi Capernaum p'uurudea wãsidama. Maapae mimianak'apɨ́ ewaride Jesú judiorã ará pedeapataɨ tedea wãk'ari Tachi Ak'õre pedea jaratea beesima.

²² Jaratea bɨde jõmãɨrãpa k'awa k'ɨ̃risiadaé pasima. Chi Moisepa bɨda jarateapataɨrã jĩra jarateak'a pasima. Mãɨpari minachia k'awa bɨdepa pia jaratea basima.

²³ Mãɨya p'anɨne, mãɨ judiorã ará pedeapataɨ tede, ẽpẽra jaore mietá pará bɨ nãɨya jĩk'ua pedeasima:

²⁴ —¡Jesú Nazaredepema! ¿K'ãre k'orea tai waa oo bɨma? ¿Tai k'enane chesik'ãra? Mɨa k'awa bɨma pɨ k'ait'a: ¡Pɨ Tachi Ak'õrepa peedapɨ!

²⁵ Jesupa chi jaore mietá nãɨya ɨtɨasima: —¡K'ĩup'ease! Jãɨ k'ak'uadepema ãyá wãse.

²⁶ Ara mãɨne chi jaore mietapa chi ẽpẽra wawapik'ari, ya minachia biak'ari ãyá wãsima.

²⁷ Mãɨpuru ãareaɨrãpa k'awa k'ɨ̃risiadaé pasima. Ara ãchi paara idi para beesima: «¿Nãɨ k'ãrema? Jesupa jaratea bɨ mãɨ chiwidipɨ, ichi juade ãarea uru bɨdepa pia jarateapari pẽra. Chi jaore mietaarã pida ichia jararut'a ũripatama».

²⁸ Mãɨ k'orea jõma Galilea tuade tãaraawẽa bɨde Jesú t'ɨ̃ p'oa nɨbeesima.

Jesupa Simón Pedro p'ak'õre jɨpa beepida

²⁹ Mãɨne chi judiorã ará pedeapataɨ tedepa wãnak'ari Simón tedea wãsidama Jesú, Santiago mãɨnepa Juan. Simón ũpẽa André sida mãma basima.

³⁰ Mãɨne Jesua jarasidama Simón p'ak'õre k'ɨamiapa k'ɨdade bɨt'a.

³¹ Orrobarik'ari, juade jitak'ari p'irabaripisima. Ara mãɨne k'ɨamia tuusima. Maapae Simón p'ak'õrepa ãchiá nek'opisima.

³² K'iuk'ari ẽpẽerãpa k'ak'ua piawẽa be mãɨnepa jaore mietá pará be Jesumá ateewãsidama.

³³ Chi p'uurudepemarã ãarea chi eda wãpataɨk'á minachia nɨbasima.

³⁴ Jesupa chi wawaria k'ak'ua piawẽa beada minachia jɨpak'oasima. Mãɨnepa ichiaba chi jaore mietá minachia ãyá jeret'aak'oasima. Chi jaore mietaarãpa ichi k'awa p'anasi pẽra Jesupa ãchiá pedeapik'a pasima.

Galileade jaratea nipada

³⁵ Teamasieda wapida p'ãrio nɨbɨeda Jesú p'irabarik'ari, mẽa ẽpẽra newẽmá wãk'ari, mãma ɨt'aa chiidi beesima.

³⁶ Mãɨne Simón mãɨnepa chi ichi ome p'anɨrãpa ichi jɨrɨde wãsidama.

³⁷ Ichi unusidaɨde jarasidama: —Ãareaɨrãpa pɨ jɨrɨ p'anɨma.

³⁸ Mãɨne Jesupa jarasima: —Nãmapema wãtɨma waapẽarã p'uuru ara k'ait'a bedea mɨa jãma p'ue jarateai bɨ pẽra. Mɨ mãɨ k'orea chesima.

³⁹ Mãɨya Galilea tuade ãarea p'ɨrrɨasima. Judiorã ará pedeapataɨ techa jarateapachima. Ichi wãrumá jaore mietá ãyá jerek'oapachima.

Jesupa aida pará bɨ jɨpa beepida

⁴⁰ Mãɨya bɨde ẽpẽra aida pará bɨ Jesumá orrobarik'ari, sĩraporode k'obeek'ari nãɨya chichupuria idisima: —Pɨa k'ɨ̃ria bɨpɨra, mɨ p'ue jɨpai bɨma.

⁴¹ Jesupa sõchupuriada pẽra ichi jua ɨ̃rɨ bɨrude nãɨya jarasima: —Mãɨya oo k'ɨ̃ria bɨma. ¡Jɨpa beese!

⁴² Ara mãɨne chi ẽpẽra aida pará bada wẽpasima. Jɨpa beesima.

⁴³ Mãɨne Jesupa ichiá pia wãpade aside, nãɨya ɨbɨa pedeasima:

⁴⁴ —Pɨ jɨpa beeda mi ãpia pida abaɨa jararãse. Mãɨpari p'aaremá wãse pɨ jɨpa beesit'a unumẽrá. Maapae Tachi Ak'õre k'ĩrari pia beei k'orea Moisepa jarada jĩra ne tease. Mãɨya ẽpẽerãpa k'awadaipɨ pɨ piarã jɨpa beesit'a.

⁴⁵ Maamina ãareaɨrã́ ichi jɨpa beeda mẽrawẽa nepɨrɨ beesima. Mãɨ k'orea Jesú mi ãpia pida p'uurude waapẽarã p'uuru bemaapida wãiwẽa basima. Mãɨpari p'uuru awara nipapachima ẽpẽerã beadak'amá. Maamina ẽpẽerã p'uuruchadepemarã ichimá wãpachidama.