Luca 9 - Tachi Ak'õre Pedea

Jesupa ichi ome p'ɨrrɨapataɨrã peeda

¹ Jesupa ichi ome p'ɨrrɨapataɨrã doce p'anɨ ará t'ɨ̃k'ari jua chaarea teasima jaore mietá ãyá jeret'aadamẽrá mãɨnepa k'ak'ua piawẽa be jɨpa beepidamẽrá.

² Mãɨne ãchi peesima Tachi Ak'õrepa ichidirã ichi juade ua bai k'orea jarade wãnamẽrá mãɨnepa k'ak'ua piawẽa be jɨpa beepidamẽrá.

³ Wãnai naena Jesupa ãchiá jarasima: —Mãra wãutade mi ãpia pida ateewãrãt'ɨ. Tuma, neet'á yaaparí, chik'o, erreara sida ateewãrãt'ɨ. Neet'á k'ak'uade jɨ̃ p'anɨawapuru wãt'ɨ.

⁴ Mãɨ wãnak'ari abaɨpa mãrá pia pedeasira mãɨ tede p'aneet'ɨ aba p'uurudepa wãutadea.

⁵ Maamina p'uurudepemarãpa mãrá pia chesidade adaepɨra mãmapema wãt'ɨ. Wãutade yooro jora mãra jĩrunepema jãrap'et'at'ɨ, Tachi Ak'õrepa mãɨ k'ɨ̃riawẽa bɨt'a ãchiá unupidai k'orea.

⁶ Mãɨya wãnak'ari p'uuru becha, Tachi Ak'õre pedea pia jarapachidama mãɨnepa k'ak'ua piawẽa be jɨpa beepik'oapachidama.

Herodepa Jesú k'orea ũrina

⁷ Herode Galilea tuadepema chi chaarea bɨ pasima. Mãɨ Herodepa ãarea Jesupa oo bɨt'a ũrisima. Ichia k'awa k'ɨ̃risiawẽa basima waapẽarãpa nãɨya jara p'anɨ pẽra: —Juan chi Porochoaparí chok'ae p'irabarisima.

⁸ Mãɨne waapẽarãpa jara p'anasidama: —Elía mãicha tachi t'ãena chesima. Chi waapẽarãpa jara p'anasidama: —Tachi Ak'õre pari pedeaparí naena bada chok'ae p'irabarisima.

⁹ Mãɨpuru Herodepa jarasima: «Mɨa Juan chi Porochoaparí poro bɨat'u peapisima. Mãɨya bɨt'a chi mãɨ jara p'anɨt'a ¿k'aima?» Mãɨpuru Jesú unu k'ɨ̃ria basima.

Jesupa ẽpẽrarã joesoma mil p'anɨa nek'opida

¹⁰ Jesupa peedaɨrã jĩitea chesidaɨde ãchia oodada ichiá ãarea nepɨrɨsidama. Mãɨya bak'ari Jesupa ãchi Betsaida p'uurudea ateewãsima, ãchi ará p'aneenai k'orea.

¹¹ Maamina ẽpẽrarãpa ichi mãma bɨ k'awadak'ari ará wãsidama. Mãɨne Jesupa ãchiá pia pedeak'ari jaratea beesima Tachi Ak'õrepa ichidirã ichi juade ua bɨ k'orea. Mãɨ pedea pia jaratea bɨde chi k'ak'ua piawẽa k'ede jɨpa beepik'oasima.

¹² K'iumaa beek'ari Jesupa doce peedaɨrã ichimá wãnak'ari jarasidama: —Ẽpẽrarã́ wãpade ase p'uuru bedea mãɨnepa te bedea, mãma k'ãinamẽrá mãɨnepa chik'o atadamẽrá. Nãma newẽma.

¹³ Jesupa jarasima: —Mãrapuru nek'opit'ɨ. Maamina ãchia jarasidama: —Taipa ne atade wãnai pada nãɨ ẽpẽrarã chi chok'ará p'anɨ pae p'ue nek'opidaiwẽma. P'ana joesoma mãɨnepa beta ume uru p'anɨma.

¹⁴ Mãma p'anɨ ɨmɨk'ĩirãowa cinco mil p'anasi jĩra bɨma. Mãɨpuru Jesupa ichi ome p'ɨrrɨapataɨrã́ nãɨya jarasima: —Ãchiá jarat'ɨ ara ãchi k'ak'awá posoa cicicuentá jeeda suak'abari p'aneenamẽrá.

¹⁵ Ichi ome p'ɨrrɨapataɨrãpa ichia jarada jĩra oosidama. Ẽpẽrarã ãarea suak'abari p'aneesidama.

¹⁶ Jesupa p'ana joesoma p'anɨ mãɨnepa beta ume p'anɨ ichi juade jitak'ari pajãnea ak'ɨk'ari Tachi Ak'õrea sõpia bɨade asima. Maapae t'oet'aak'ari ichi ome p'ɨrrɨapataɨrã́ jarasima jedadamẽrá.

¹⁷ Ãareaɨrã nek'odak'ari jãwaasidama. Chi pichoada jɨrɨp'esidaɨde jabara doce ipirupisidama.

Pedropa Jesú k'orea jarada

¹⁸ Ewariaba Jesú itu ɨt'aa chiidimaa bɨde, chi ichi ome p'ɨrrɨapataɨrã ará p'anɨne, Jesupa idisima: —Ẽpẽrarãpa mɨ ¿k'aiyade a p'anɨma?

¹⁹ Ãchia p'anoosidama: —Waapẽarãpa jara p'anɨma pɨ Juan chi Porochoaparipɨ. Waapẽarãpa jara p'anɨma pɨ Eliapɨ. Waapẽarãpa jara p'anɨma pɨ chõarãenapema Tachi Ak'õre pari pedeaparí chok'ae p'irabaridapɨ.

²⁰ Mãɨne ichia mãicha idisima: —Mãrapa mɨ ¿k'ai k'ɨ̃risia p'anɨma? Pedropa p'anoosima: —Pɨ Tachi Ak'õrepa Tachi K'aripaparí teai jaradapɨ.

²¹ Jesupa mãɨ mi ãpia pida abaɨa jararãapadade asima.

²² Mãɨ awara jarasima: —Mɨ, chi Ẽpẽra Warra minachia chupuria mĩa baipɨ. P'uurudepema minachia k'awa berãpa, p'aarerã chi mãɨrã chaarearãpa mãɨnepa Moisepa bɨda jarateapataɨrã pida mɨ itu bɨdak'ari peapidaipɨ. Maamina mɨ ewari ũpeaɨde chok'ae p'irabariipɨ.

²³ Jesupa jõmãɨrã́ jarasima: —Abaɨpa mɨ ome wã k'ɨ̃ria bɨpɨra, ichia oo k'ɨ̃ria bɨt'a itu bɨk'ari ewaricha minachia mĩai k'orea bai bɨma. Maapae mɨ ome wãi bɨma.

²⁴ Abaɨ pida nãɨ ĩjũane pia bai k'orea jɨrɨ baipɨra, k'aadea ewari parude ichi atuaipɨ. Maamina abaɨ pida mɨ k'orea piuipɨra, Tachi Ak'õre ome ewaricha chok'ae baipɨ.

²⁵ Minachia k'ɨ̃risiat'ɨ: ẽpẽra nãɨ ĩjũane ne ãarea uru bɨde piuk'ari t'ɨpɨ uruadea wãipɨra, ¿ichia uru badapa ichi k'aripaik'ãra?

²⁶ Abaɨpa mɨ mãɨnepa mɨ pedea atua bɨade aipɨra, mɨ, chi Ẽpẽra Warra jua chaarea bɨdepa cherude, mãɨ ẽpẽra atua bɨade aipɨ. Mãɨ ewaride mɨ Ak'õre jua chaarea bɨdepa mãɨnepa chi ichia ɨt'aripa peedaɨrã jua chaarea bɨdepa cheipɨ.

²⁷ Mɨa piarã jararuma: chi eda waapẽarã nãma p'anɨ piudai naena ununaipɨ Tachi Ak'õrepa ichidirã ichi juade ua bait'a.

Jesú k'ĩra awara unupida

²⁸ Mãɨya jarak'ari ewari ocho pa bɨde Jesú Tachi Ak'õrea ɨt'aa chiidide wãsima eyadea. Pedro, Juan, Santiago ome ateewãsima.

²⁹ Mãma Jesupa Tachi Ak'õrea ɨt'aa chiidimaa bɨde ichi k'ĩra awara unupisima. Ichi neet'á t'ot'oa achiterrea beesima.

³⁰ Mãɨya bɨde ẽpẽra ume ará chedak'ari Jesú ome pedeasidama. Aba Moisé pasima; chi abaɨ Elía pasima.

³¹ Ãchi sida k'ĩrawãrea achiterrea p'anasidama. Ãchia pedea p'anasidama Jesú Jerusalene peadai k'orea.

³² Mãɨya bɨde Pedro waapẽarã ome minachia tap'ok'ea p'anasidamina k'ãinaé pasima. Mãɨne Jesú achiterrea bɨ mãɨnepa ẽpẽra ume ichi k'ait'a p'anɨ ome unusidama.

³³ Mãɨ ẽpẽrarã Jesú ome p'anana wãutade Pedropa Jesua jarasima: —Jarateaparí, pia bɨma tai nãma p'anɨt'a. Taipa te chak'e ũpea oodaima: aba pɨ pae, aba Moisé pae mãɨnepa aba Elía pae. Pedro mãɨya pedeasima ne k'ɨ̃risiawẽa pedeada pẽra.

³⁴ Mãɨya bɨde jɨ̃ara edá chek'ari ãchi ãarea t'ausima. Mãɨpuru ãchi minachia wap'easidama.

³⁵ Ara mãɨne pedea jɨ̃arane ũrisidama. Mãɨpa nãɨya jarasima: «Nãɨt'a mɨ Warrapɨ. Mɨa ichi jɨrɨ atasima. Ichia jara bɨt'a ũrit'ɨ».

³⁶ Mãɨ pedea k'ĩup'eak'ari Jesú ichi tuaba nɨbɨ unusidama. Ãchia ununana minachia tãaraasima mi ãpia pida abaɨa nepɨrɨdawẽa p'anɨ.

Jesupa warra jaore mietá pará bɨ jɨpa beepida

³⁷ Norema eyadepa edá chesidaɨde ẽpẽrarã chok'araɨrãpa Jesú ak'ɨde chesidama.

³⁸ Mãɨne abaɨpa nãɨya jĩk'ua jarasima: —Jarateaparí, mɨ k'ĩra chupuriak'ari, mɨ warra ak'ɨse. Mãɨ mɨa warra abapuru uru bɨpɨ.

³⁹ Ichi jaore mietá pará bɨma. Mãɨpa ichi chi jai jitapik'ari, mãɨya ichi biapiparima, wawapiparima, mãɨnepa it'aedea k'ok'op'ea nɨbeepiparima. Ichia mɨ warra itu bɨk'ama.

⁴⁰ Mɨa pɨ ome p'ɨrrɨapataɨrã́ jarasima jaore mietá ãyá jeret'aadamẽrá. Maamina p'uedaé pasima.

⁴¹ Mãɨpuru Jesupa p'anoosima: —¡Ẽpẽerã k'achia berã mãɨnepa ĩjãanak'apɨɨrã! ¿Waa sãma mãra ome baima? ¿Waa sãma mãra ome choaima? Chi warra nãmá enemeet'ɨ.

⁴² Chi warra Jesumá wãrune jaore mietapa jeeda baepik'ari minachia wawapisima. Maamina Jesupa jaore mietá ãyá jeret'aasima. Warra jɨpa beepik'ari chi ak'õrea teasima.

⁴³ Tachi Ak'õre jua chaareadepa mãɨyana unusidaɨde ãareaɨrãpa k'awa k'ɨ̃risiadaé pasima. Ichia oo bɨ k'orea ẽpẽrarãpa wapida minachia k'ɨ̃risia p'anɨne Jesupa ichi ome p'ɨrrɨapataɨrã́ jarasima:

Jesupa ichi peadai k'orea mãicha jarada

⁴⁴ —Mɨa mãrá jararut'a minachia pia ũrit'ɨ. Mɨ, chi Ẽpẽra Warra abaɨpa jitapik'ari, ẽpẽerã́ teaipɨ.

⁴⁵ Maamina ãchia mãɨ k'awa ũrinaé pasima. Tachi Ak'õrepa waidi ãchiá k'awapiwẽa basima. Mãɨne ãchia mãɨ k'orea Jesua ididai wap'ea p'anasidama.

¿K'ai chi atepe bɨma?

⁴⁶ Mãɨya p'anɨne ara ãchi tuaba pedea p'aneesidama k'ai chi atepe k'awa bɨt'a k'awadayá.

⁴⁷ Maamina Jesupa mãɨ k'awada pẽra warra chak'e jitak'ari ichik'á bɨsima.

⁴⁸ Mãɨne nãɨya jarasima: —Chi mɨne ĩjãa bɨ k'orea nãɨ warrá pia pedea bɨpa, mɨá pida pia pedea bɨma. Mãɨ awara chi mɨá pia pedea bɨpa chi mɨ Peedá pia pedea bɨma. Mãranepema chi ãpia k'ɨrɨ Tachi Ak'õre k'ĩrari chi atepe bɨma.

Tachi chi nek'ĩramaawẽ tachi lawari bɨma

⁴⁹ Maapae Juanpa nãɨya jarasima: —Jarateaparí, taipa ẽpẽra unusidama pɨ t'ɨ̃nepa jaore mietá ãyá jeret'aa bɨt'a. Maamina tachi ome niwẽ pẽra taipa ichiá jarasidama waa mãɨya oopiemaapa.

⁵⁰ Jesupa jarasima: —Mãrapa ichiá waa mãɨya p'ue ooiwẽane arãt'ɨ. Chi tachi nek'ĩramaawẽ, mãɨ tachi lawari bɨma.

Jesupa Juan, Santiago sida ɨtɨada

⁵¹ Jesú ɨt'aria wãi ewari k'ait'a paside mãɨne Jerusalenea wãyane a k'ɨ̃risiasima.

⁵² Wãrune waapẽarã Samaria tuadea naa peesima. P'uuru chak'ede chedak'ari sãma k'ãinai jɨrɨsidama.

⁵³ Maamina mãɨ p'uurudepemarãpa k'awasidama Jesú Jerusalenea wãru. Mãɨ k'orea ichiá pia pedeadaé pasima.

⁵⁴ Mãɨpuru Juanpa mãɨnepa Santiagopa Jesua jarasidama: —Tai Chipari, Eliapa ooda jĩra ¿Tachi Ak'õrea ɨt'aa chiididaik'ãra t'ɨpɨ urua ɨt'aripa peerupa ãchi ãarea k'enamẽrá?

⁵⁵ Jesupa ãchi ak'ɨk'ari ɨtɨasima. [Nãɨya jarasima: «Mãra ¿k'ãre k'orea mãɨya pedea p'anɨma?

⁵⁶ Mɨ, chi Ẽpẽra Warra chewẽma ẽpẽrarã piawẽa ooi k'orea mãɨpari che bɨma ãchi k'aripai k'orea».] Maapae p'uuru awaraɨdea wãsidama.

Jesú ome p'ɨrrɨai chaarea bɨ k'orea jarada

⁵⁷ Ode wãutade ẽpẽrapa Jesua jarasima: —Jarateaparí, pɨ wãrumá mɨ pɨ ome wãipɨ.

⁵⁸ Jesupa jarasima: —Et'erre k'oparí te pará bɨma mãɨnepa ĩpana te pará bɨma, maamina mɨ, chi Ẽpẽra Warra chi mãma k'ãi newẽa bɨma.

⁵⁹ Mãɨne Jesupa awaraɨa jarasima: —Mɨ ome chese. Chi ẽpẽrapa p'anoosima: —Mɨ Chipari, pɨ ome wãi naena mɨ ak'õre itu t'ɨbaripise.

⁶⁰ Jesupa ichiá jarasima: —Itu bɨse, chi piudaadapa chi piudada t'ɨbaridamẽrá. Maamina pɨa ẽpẽrarã́ jarade wãse Tachi Ak'õrepa ichidirã ichi juade ua bɨ k'orea.

⁶¹ Mãɨne waapẽarãpa Jesua jarasima: —Mɨ sida pɨ ome p'ɨrrɨa k'ɨ̃ria bɨma, maamina mãɨ naena mɨ tiidapemarãmá jarade wãi bɨma.

⁶² Jesupa p'anoosima: —Abaɨ pida mimiane wãk'ari mãicha ãpɨtea ak'ɨipɨra, ichi pia bɨwẽma Tachi Ak'õrepa ichidirã ichi juade ua bɨde mimiai k'orea.