Luca 6 - Tachi Ak'õre Pedea

Jesú mimianak'apɨ́ ewari chiparipɨ

¹ Mimianak'apɨ́ ewaride Jesú ichi ome p'ɨrrɨapataɨrã sida ĩjũa trigo uudade nipasidama. Mãma nipaside Jesú ome p'ɨrrɨapataɨrãpa trigo k'ɨmɨ baadak'ari, juadepa chi tau poasiradak'ari, chi tau k'opachidama.

² Waapẽarã p'ariseorãpa mãɨ unusidaɨde idisidama: —¿Mãrapa k'ãre k'orea mimianak'apɨ́ ewaride chi tachia ne oodak'apɨɨt'a jãɨya oo p'anɨma?

³ Jesupa p'anoosima: —¿Mãrapa Tachi Ak'õre pedea eda jaradawẽk'ãra? Daví mãɨnepa chi ichi ome p'ɨrrɨapataɨrã jarra p'anasidaɨde ¿k'ãre oosidama?

⁴ Daví Tachi Ak'õre tede eda wãk'ari Tachi Ak'õre k'ĩrari bɨda p'ana atasima. Mãɨ p'ana ¿abapuru p'aarerãpa k'odai p'anasidawẽk'ãra? Maamina Davipa k'ok'ari ichi ome p'ɨrrɨapataɨrã́ teasima.

⁵ Ichiaba Jesupa jarasima: —Mɨ, chi Ẽpẽra Warra mimianak'apɨ́ ewari chiparipɨ.

Jesupa mimianak'apɨ́ ewaride ẽpẽra jɨpa beepida

⁶ Waapẽarã mimianak'apɨ́ ewaride Jesú judiorã ará pedeapataɨ tedea eda wãk'ari jaratea basima. Mãma ẽpẽra juaraaripema sorek'ea bɨt'a basima.

⁷ Moisepa bɨda jarateapataɨrã mãɨnepa p'ariseorã p'anasidama. Ãchia Jesú ak'ɨ p'anasidama mimianak'apɨ́ ewaride ẽpẽra jua sorek'ea bɨ jɨpa beepii k'awadayá. Jɨpa beepisira Jesú k'orea k'achia pedeadai k'ɨ̃risia p'anasidama.

⁸ Maamina ãchia k'ɨ̃risia p'anɨt'a Jesupa k'awa bada pẽra chi ẽpẽra jua sorek'ea bɨa nãɨya jarasima: —P'irabarik'ari ãareaɨrã taade bai nɨbeese. Ara mãɨne chi ẽpẽra p'irabarik'ari maapae bai nɨbeesima.

⁹ Maapae Jesupa ãchiá jarasima: —Mɨa mãrá idiruma: mimianak'apɨ́ ewaride ¿k'ãre oodai p'anɨma? ¿Pia wa k'achia? ¿Abaɨ k'aripai wa itu piupii?

¹⁰ Maapae arí p'anɨrã́ ak'ɨk'ari chi ẽpẽrá nãɨya jarasima: —Jua ɨase. Mãɨya jua ɨaside ichi jua jɨpa beesima.

¹¹ Mãɨpuru arí p'anɨrã minachia k'ĩruunak'ari ãchi tuaba pedea para beesima Jesú k'orea sãɨya oodai k'awadayá.

Jesupa ẽpẽra doce peeda

¹² Ewariaba Jesú eyadea wãsima. Mãma Tachi Ak'õrea ɨt'aa chiidi bɨt'a ewarisima.

¹³ Ãsã pak'ari ichi ome p'anɨrã ará t'ɨ̃k'oak'ari mãɨrãnepema doce jɨrɨ atasima. Mãɨ doce jɨrɨ atadaɨrã “ichia peedaɨrã” bɨk'oasima.

¹⁴ Ãchi t'ɨ̃ nãɨ: Simón (Jesupa ichi t'ɨ̃ bɨsima Pedro), chi ũpẽa André, Santiago, Juan, P'elipe, Bartolomé,

¹⁵ Mateo, Tomá, Alp'eo warra Santiago, Simón Celote apataɨ,

¹⁶ Santiago ũpẽa Juda mãɨnepa Juda Iscariote. Mãɨya bak'ari ichia Jesú jitapisima.

Jesupa chi chok'ará p'anɨrã́ jarateada

¹⁷ Maapae Jesú ãchi ome eyadepa edá chedak'ari, k'oriide bai nɨp'aneesidama. Mãma ichi ome p'ɨrrɨapataɨrã chok'ará p'anɨ mãɨnepa waapẽarã ẽpẽerã minachia cheuta ome ará nɨbeesima. Mãɨ ẽpẽrarã Judea tuadepa, Jerusalenepa, senia choma ik'idaapema p'uuru Tirodepa mãɨnepa Sidonepa

¹⁸ cheepɨrɨsidama Jesupa jaratea bɨ ũrinai k'orea mãɨnepa k'ak'ua piawẽa berã jɨpa beepik'oamẽrá. Mãɨ awara Jesupa jaore mietá berã ẽpẽrarã k'ak'uadepema ãyá jerek'oasima.

¹⁹ Ãarea chi k'ak'ua piawẽa berãpa ichi t'õmari k'ɨ̃ria p'anasidama Tachi Ak'õre jua chaareadepa jɨpa beepii bɨẽra.

Tachi pia p'ananai Jesupa jarada

²⁰ Jesupa ichi ome p'ɨrrɨapataɨrã ak'ɨk'ari nãɨya jarasima: «Pia p'anɨma mãra chi chichupuria berã mãɨ Tachi Ak'õrepa mãra ichi juade ua bɨẽra.

²¹ Pia p'anɨma mãra chi jarrapisia berã Tachi Ak'õrepa jãwaapii pẽra. Pia p'anɨma mãra chi sõp'uapa jẽa berã, Tachi Ak'õrepa arapaapii pẽra.

²² »Pia p'anɨma ẽpẽrarãpa mɨ, chi Ẽpẽra Warra k'orea mãra unuemaautade, itu bɨutade, k'achia pedeautade mãɨnepa mãra sõk'achiade autade.

²³ Mãra piawẽa ooutade minachia sõ arapaat'ɨ, mãrapa nepia waibɨa pajãne uru p'ananai pẽra. Ãchi chõarãenapemarãpa Tachi Ak'õre pari pedeapataɨrã sida piarã ara mãɨ jĩra piawẽa oopachidama.

²⁴ “Maamina chupuri p'aneenaipɨ mãra chi erreara pará berã, nãɨ ewaridepuru sõ arapá p'anɨ pẽra.

²⁵ Chupuri p'aneenaipɨ chi jãwaa berã, jarrapisia p'aneenai pẽra. Chupuri p'aneenaipɨ ara nãɨena ee p'anɨrã nãɨya bak'ari jẽanai pẽra mãɨnepa k'ɨ̃risia pará p'ananai pẽra.

²⁶ Chupuri p'ananaipɨ ẽpẽrarãpa mãra k'orea pia jaradaipɨra. Mãra chõarãenapemarãpa ẽpẽrarã Tachi Ak'õre t'ɨ̃nepa seat'a jarateapataɨrã sida ara mãɨya pia jarapachidama”.

Tachi chi nek'ĩramaarã k'ɨ̃rianai p'anɨ

²⁷ »Maamina mãra, chi mɨ pedea ũri p'anɨa mɨa jararuma: mãra chi nek'ĩramá k'ɨ̃riat'ɨ. Mãra unuemaa p'anɨ pia oot'ɨ.

²⁸ Chi mãrá k'achia pedeautá pia pedeat'ɨ. Mãra piawẽa oopataɨ k'orea Tachi Ak'õrea ɨt'aa chiidit'ɨ ãchi k'aripamẽrá.

²⁹ Abaɨpa uitarrade sĩsira, pɨchi uitarra abaɨ unupise sĩmẽrá. Abaɨpa pɨ neet'á ɨ̃rɨ jɨ̃parí ẽemariipɨra, pɨchi neet'á ek'aripema sida itu tea peese.

³⁰ Abaɨpa pɨá ne idiipɨra, wãak'arãse. Mãɨ awara pɨa uru bɨdepema abaɨpa ẽemarisira idirãse ya teamẽrá.

³¹ Mãrapa k'ɨ̃ria p'anɨma waapẽarãpa mãra pia oodait'a. Ara mãɨ jĩra mãrapa waapẽarã pia oot'ɨ.

³² »Abapuru mãra k'õp'ãerorãt'a k'ɨ̃ria p'ananaipɨra, ¿k'aipa mãra k'orea pia pedeaima? K'achia oopataɨrã pida ãchi k'õp'ãerorã k'ɨ̃riapatama.

³³ Mãɨ awara abapuru mãra k'õp'ãerorãt'a pia oodaipɨra, ¿k'aipa mãra k'orea pia pedeaima? K'achia oopataɨrã pida ara mãɨ jĩra oopatama.

³⁴ Mãɨ awara mãrapa abaɨa ne tearude, mãɨpa ara mãɨya mãrá ne teayade a k'ɨ̃risiasira ¿k'aipa mãra k'orea pia pedeaima? K'achia oopataɨrã pida ara mãɨ jĩra oopatama ãchia teadada mãicha jĩruerã jitadai k'ɨ̃risia p'anɨ pẽra.

³⁵ »Mãɨpari mãra chi nek'ĩramá k'ɨ̃riat'ɨ. Ãchi pia oot'ɨ. Ãchiá ne teat'ɨ. Maamina mãrapa ne teautade ãchia mãrá ne teadai k'ɨ̃risiarãt'ɨ. Mãɨyapuru mãrapa Tachi Ak'õrenepa jitadait'a atepe waibɨa baipɨ mãɨnepa unupidaipɨ piarã mãra Tachi Ak'õre chi atepe bɨ warrarãpɨ. Ichia nemietá oopataɨrã mãɨnepa ichiá pia bɨade adak'aɨrã ichi sõpiadepa k'aripaparima.

³⁶ Ara mãɨ jĩra mãrapa k'ĩra chupuria beadai p'anɨma mãra Ak'õre pajãne bɨpa k'ĩra chupuriapari jĩra.

Waapẽarã k'achia pedeapataɨ k'orea

³⁷ »Waapẽarãpa nemietá oodada k'orea pedearãt'ɨ abaɨa mãrapa nemietá oodada ak'ɨpiemaapa. Waapẽarã́ nepɨra pará bɨade arãt'ɨ, Tachi Ak'õrepa mãra nepɨra pará p'anɨane apiemaapa. Mãɨya mãrapa piawẽa oodada Tachi Ak'õrepa k'ɨ̃risia atuaipɨ.

³⁸ Waapẽarã́ ne teat'ɨ. Mãɨyapuru Tachi Ak'õrepa mãrá ne minachia teaipɨ, ẽne ne minachia jok'ari, ipiruk'ari, jurruchoa bɨ jĩra. Ichia teaipɨ mãrapa waapẽarã́ teapata jĩra».

³⁹ Mãɨ awara Jesupa nepɨrɨsima ne jarateai k'orea: «¿Tau p'ãrio bɨpa abaɨ tau p'ãrio bɨ p'ue ateewãik'ãra? ¿Ateewãipɨra, ãchi umea uriade baewãnaiwẽk'ãra?

⁴⁰ Chi jarateaparí ome baparí, chi jarateaparí k'aepẽra atepe k'awa bɨwẽma. Maamina ichia ne minachia k'awak'ari chi jarateaparí jĩra beeipɨ.

⁴¹ »¿K'ãre k'orea nejarra taujãne bɨ machi k'õp'ãeroné ak'ɨparima? ¿K'ãre k'orea pak'uru waibɨa bɨ pɨ taujãne bɨ ak'ɨk'ama?

⁴² Pak'uru waibɨa machi taujãne bɨ ununawẽa p'anɨpɨra ¿sãmaasã́ waapẽarã́ nãɨya jaradaima: “Nejarra pɨ taujãne bɨ mɨa aubariipɨ”? ¡Mãrapa jarapataɨ jĩra oodak'ama! Nãɨrã pak'uru waibɨa machi taujãne bɨ aubarit'ɨ. Mãɨya p'ue ununaipɨ nejarra waapẽarã taujãne bɨ aubaridai k'orea. Ara mãɨ jĩra pɨa nemietá oo bɨ itu bɨse. Mãɨyapuru waapẽarã p'ue k'aripaipɨ.

Pak'uru k'awapatama chi nejõnepa

⁴³ »Pak'uru mietapa nejõ pia chauk'ama. Ara mãɨ jĩra pak'uru piapa nejõ mietá chauk'ama.

⁴⁴ Nejõ bɨɨrɨ chi nejõnepa k'awapatama. Ɨɨrɨ bɨɨrɨpa higo chauk'ama. Ichiaba jõjõek'apa uva chauk'ama.

⁴⁵ Ara mãɨ jĩra ẽpẽra pia bɨpa ichi sõne nepia uru bɨdepa nepia pedeaparima. Maamina ẽpẽra k'achiapa ichi sõne ne k'achia uru bɨdepa ne k'achia pedeaparima. Ẽpẽrapa ichi sõne k'ɨ̃risia bɨ jĩra pedeaparima.

Te ume bɨ k'orea nepɨrɨda

⁴⁶ »Mɨa jara bɨ mãrapa oodak'ama. Mãɨ ¿k'ãre k'orea “Tai Chipari, Tai Chipari” apatama?

⁴⁷ Mɨmá cherupa mɨ pedea ũrik'ari ooipɨra mɨa jaraipɨ ichi k'ai jĩra bɨ.

⁴⁸ Ichi ẽpẽrapa te ooru jĩra bɨma. Mãɨ ẽpẽrapa minachia eda k'orosima aba mawara chaarea unurunea. Mãɨ ɨ̃rɨ te jĩru wãat'u nɨbɨsima. Mãɨ te minachia chaarea nɨbɨ pẽra to minachia cherude t'erap'et'aé pasima.

⁴⁹ Maamina chi mɨ pedea ũrik'ari ooepɨra, nãɨ jĩra bɨma: Ẽpẽrapa te oosima maamina te jĩru eudu wãat'ué pasima. Mãɨpuru to minachia cherude mãɨpa ichi te t'erap'et'asima. Abaeda ãarea ãrisima».