Luca 5 - Tachi Ak'õre Pedea

Jesupa to bat'apataɨrã t'ɨ̃na

¹ Ewariaba Jesú senia choma Genesare apataɨ ik'idá basima. Mãɨne Tachi Ak'õre pedea ũrinai k'orea ẽpẽrarã chok'ará ichimá cheepɨrɨsidama.

² Arí to ik'idá p'ãp'orro ume ũu p'anasidama. Mãɨ p'ãp'orro chiparirã edá batoodak'ari, ãchi t'ɨri sɨɨmaa p'anasidama.

³ Mãɨne Jesú Simón Pedro p'ãp'orrode batook'ari jarasima to ik'idaɨpa ãpia eda waa ateewãmẽrá. Maapae p'ãp'orrode suak'abari beek'ari jõma arí p'anɨrã́ jaratea beesima.

⁴ Jarateak'ari Jesupa Simonoa jarasima: —Jãapae pɨ p'ãp'orro to estarik'a ateewãk'ari to bat'at'ɨ.

⁵ Maamina Simonpa p'anoosima: —Jarateaparí, tai teamasi to bat'a p'anɨ ewarisidama. Maamina mi ãpia pida peadaé pasima. Maamina pɨa mãɨya jara bɨẽra ooipɨ.

⁶ Ara mãɨne ãchi to bat'a p'aneesidama. Minachia peauta pẽra chi t'ɨri k'õachoasima.

⁷ Mãɨ k'orea waapẽarã p'ãp'orrode berã juadepa t'ɨ̃sidama k'aripade chedamẽrá. Chedak'ari p'ãp'orro umea betapa ipirusidama. Mãɨpa edá t'aawãnai jĩra nɨp'aneesidama.

^8-10 Simón Pedropa ichi ome p'anɨ pida beta chok'ará peadada unusidaɨde k'awa k'ɨ̃risiadaé pasima. Santiago mãɨnepa Juan ichi ome basima. Ãchi Zebedeo warrarã pasima. Mãɨne Simón Jesú taade wãk'ari sĩraporode k'obeek'ari jarasima: —Mɨ Chipari, pia bɨma pɨ mɨk'aapema ãyá wãit'a, mɨ nemietá oopari pẽra. Jesupa Simonoa jarasima: —P'erarãse, idiipa waa pɨ mɨ pae ẽpẽerã jɨrɨparí paipɨ.

¹¹ Ãchia p'ãp'orro ipudea ateewãnak'ari ãarea ameesidama. Maapae Jesú ome wãsidama.

Jesupa aidapa k'ɨdade bɨ jɨpa beepida

¹² Ewariaba Jesú p'uurude nine ẽpẽra aida pará bɨ chesima. Mãɨ ẽpẽrapa Jesú unuside ichi k'ĩrari sĩraporode bedabari k'obeek'ari nãɨya chichupuria idisima: —Mɨ Chipari, pɨa k'ɨ̃ria bɨpɨra, mɨ p'ue jɨpai bɨma.

¹³ Mãɨne Jesupa jua ɨ̃rɨ bɨrude jarasima: —Mãɨya oo k'ɨ̃ria bɨma. ¡Jɨpa beese! Ara mãɨne chi aida wẽpa wãsima.

¹⁴ Mãɨne Jesupa ichiá jarasima: —Pɨ jɨpa beeda mi ãpia pida abaɨa jararãse. Mãɨpari p'aaremá wãse pɨ jɨpa beesit'a unumẽrá. Jãapae Tachi Ak'õre k'ĩrari pia beei k'orea Moisepa jarada jĩra ne tease. Mãɨya ẽpẽrarãpa k'awadaipɨ pɨ piarã jɨpa beesit'a.

¹⁵ Maamina Jesupa ooda k'orea mãɨ atepe t'ɨ̃ p'oa wãsima. Mãɨpuru ẽpẽrarã chok'ará chepachidama ichia jaratea bɨ ũrinai k'orea. K'ak'ua piawẽa be chepachidama jɨpa beepik'oamẽrá.

¹⁶ Maamina Jesú edaɨde ẽpẽra newẽmá wãpachima Tachi Ak'õrea pedeai k'orea.

Jesupa sorek'ea bada jɨpapida

¹⁷ Ewariaba Jesupa jaratea bɨde p'ariseorã mãɨnepa Moisepa bɨda jarateapataɨrã arí suak'abari p'anasidama. Ãchi Galilea tuadepa, Judea tuadepa mãɨnepa Jerusalén p'uurudepa che p'anasidama. Mãɨne Tachi Chipari jua chaareadepa Jesupa k'ɨdade be jɨpa beepipachima.

¹⁸ Mãɨya bɨde waapẽarãpa ẽpẽra sorek'ea bɨ ẽpẽra uapataɨde enemeenak'ari, eda ateewã k'ɨ̃ria p'anasidama Jesú k'ĩrari bɨdai k'orea.

¹⁹ Maamina ẽpẽerã minachia nɨbɨ pẽra Jesumá p'ue chepidaé pasima. Mãɨpuru ãchia chi sorek'ea bɨ te ɨ̃rɨ enemeesidama. Maapae te ɨ̃rɨpema ãrinak'ari chi sorek'ea bɨ chi ẽpẽra uapataɨde edá t'aa peesidama. Ẽpẽrarã t'ãena Jesú k'ĩrari bɨsidama.

²⁰ Jesupa unusima ãchia piarã ĩjãa p'anɨ ichia sorek'ea bɨ p'ue jɨpa beepiit'a. Mãɨ k'orea chi sorek'ea bɨa nãɨya jarasima: —K'õp'ãero, pɨa nemietá ooda mɨa k'ɨ̃risia atuasima.

²¹ Mãɨ ũrisidaɨde chi arí p'anɨ p'ariseorãpa mãɨnepa Moisepa bɨda jarateapataɨrãpa nãɨya jarasidama: «Ichi ¿k'ai k'ɨ̃risia bɨma? ¿K'ãre k'orea mãɨya Tachi Ak'õre k'ĩrari piawẽa pedea bɨma? Aba Tachi Ak'õrepuru ẽpẽrapa nemietá ooda p'ue k'ɨ̃risia atuaipɨ».

²² Maamina Jesupa ãchia k'ɨ̃risia p'anɨ k'awada pẽra nãɨya idisima: —¿K'ãre k'orea mãra sõne jãɨya k'ɨ̃risia p'anɨma?

²³ Mãramá ¿chi sãɨ jarait'a chaarea bɨma: “Pɨa nemietá ooda k'ɨ̃risia atuayade” ait'a wa “P'irabarik'ari nipapade” ait'a?

²⁴ Tachi Ak'õrepa mɨ, chi Ẽpẽra Warra bɨsima nãɨ ĩjũane p'anɨpa nemietá oopataɨ k'ɨ̃risia atuamẽrá. Mãɨ mãrá unupiipɨ. Ara mãɨne chi sorek'ea bɨa nãɨya jarasima: —P'irabarise. Pɨchi ne ẽpẽra uapataɨ atak'ari tiidá wãse.

²⁵ Ara mãɨya jararude sorek'ea bada p'irabarik'ari ichi ẽpẽra uapataɨ atak'ari jõmãɨrã k'ĩrari wãsima. Maapae Tachi Ak'õre k'orea pia jara bɨmisa tedea wãsima.

²⁶ Mãɨ unusidaɨde ãareaɨrãpa k'awa k'ɨ̃risiadaé pasima. Mãɨpuru Tachi Ak'õre k'orea minachia pia jarasidama. Tachi Ak'õre wap'eadepa jarasidama: —¡Idi piarã ẽpẽrarãpa ne p'ue oodak'apɨ́ ne waibɨa unusidama!

Jesupa Leví t'ɨ̃na

²⁷ Mãɨya bak'ari Jesú wãrune ẽpẽra Romanepema pae erreara jɨrɨp'eparí unusima. Chi t'ɨ̃ Leví pasima. Mãɨ ẽpẽra erreara jɨrɨp'eparí tede suak'abari basima. Jesupa unuk'ari jarasima: —Mɨ ome chese.

²⁸ Ara mãɨne Leví p'irabarik'ari ichia oo bada ameek'ari Jesú ome wãsima.

²⁹ Maapae Jesú k'orea Levipa ichi tede chik'o waibɨa oopisima. Chok'ará Romanepema pae erreara jɨrɨp'epataɨrã mãɨnepa waapẽarã ẽpẽrarã ãchi ome nek'o p'anasidama.

³⁰ Mãɨ unusidaɨde Moisepa bɨda jarateapataɨrãpa mãɨnepa p'ariseorãpa Jesú ome p'ɨrrɨapataɨrã́ nãɨya k'achia pedeasidama: —¿K'ãre k'orea Romanepema pae erreara jɨrɨp'epataɨrã ome mãɨnepa waapẽarã nemietá oopataɨrã ome ará nek'oparima?

³¹ Jesupa ãchiá jarasima: —Chi k'ak'ua pia bepa nẽará teaparí jɨrɨdak'ama. Mãɨpari chi k'ak'ua piawẽa bepa ichi jɨrɨpatama.

³² Mɨ chi jĩp'a berã t'ɨ̃i k'orea chewẽa bɨma, mãɨpari nemietá oopataɨrãt'u t'ɨ̃ bɨma Tachi Ak'õremá chedamẽrá.

Tachi Ak'õrene k'ɨ̃risiadayá nek'odak'apɨ́ ewari k'orea jarada

³³ Waapẽarãpa Jesua jarasidama: —Juan chi Porochoaparí ome p'ɨrrɨapataɨrãpa Tachi Ak'õrea ɨt'aa chiidiutade minachia Tachi Ak'õrene k'ɨ̃risiadayá nek'odak'apɨ́ ewari oopatama. Ara mãɨ jĩra p'ariseorã ome p'ɨrrɨapataɨrã pida oopatama. Maamina chi pɨ ome p'ɨrrɨapataɨrãpa ¿k'ãre k'orea mãɨya oodak'ama?

³⁴ Jesupa ãchiá jarasima: —Ɨmɨk'ĩrapa wẽra atarupa arapaapataɨ ewari oo bɨde ¿ichia t'ɨ̃narã́ Tachi Ak'õrene k'ɨ̃risiadayá nek'odak'apɨ́ ewari oopiik'ãra?

³⁵ Maamina chi ewari ará parude waapẽarã ẽpẽerãpa ichi ãyá ateewãnaipɨ. Mãɨ ewaridepuru ichia t'ɨ̃narãpa Tachi Ak'õrene k'ɨ̃risiadayá nek'odak'apɨ́ ewari oodaipɨ.

³⁶ Mãɨ awara Jesupa ãchiá nãɨya nepɨrɨsima jarateai k'orea: —Ẽpẽra abaɨ pida p'aru chiwidi k'õak'ari p'aru sorede wãak'ama. Mãɨya ooipɨra p'aru chiwidi ãriipɨ. Mãɨ awara chi p'aru chiwidi t'ɨɨda chi sore ome pia beeiwẽma.

³⁷ Ichiaba abaɨ pida uvaba chiwidi ãnimara e ooda chi sorede t'ɨɨdak'ama. Mãɨya oodaipɨra baak'ak'ari mãɨ ãnimara e ooda chota jĩawãipɨ. Maapae uvaba weawãipɨ mãɨnepa chi ãnimara e ooda ãriipɨ.

³⁸ Mãɨpuru uvaba chiwidi ãnimara e ooda chiwidide t'ɨɨdai p'anɨma. Mãɨya umea tãaraa choadaipɨ.

³⁹ Mãɨnepa uvaba asia chi naa oodada torupa chiwidi to k'ɨ̃riak'ama. Mãɨpari jaraparima: “Uvaba chi naa oodada chiwidi k'aepẽra atepe warrá bɨma”.