Luca 4 - Tachi Ak'õre Pedea

Tiorepa Jesua mĩesa jara bada

¹ Jesú, Tachi Ak'õre Jaore ome bada, Jordán todepa jĩitea wãsima. Mãɨne Tachi Ak'õre Jaorepa ichi ĩjũa pania newẽa bɨdea ateewãsima.

² Mãma ewari k'ak'o cuarenta basima. Mãɨne tiorepa ichiá mĩesa jarasima nemietá oomẽrá. Mãɨ ewaride Jesupa mi ãpia pida nek'owẽa bɨẽra jarra basima.

³ Mãɨya bɨde tiorepa Jesua nãɨya jarasima: —Pɨ piarã Tachi Ak'õre warrapɨra, jarase nãɨ mawará p'ana pamẽrá.

⁴ Jesupa p'anoosima: —Tachi Ak'õre pedeade nãɨya bɨ bɨma: abapuru nek'o bɨdepa ẽpẽra chok'ae baiwẽma, [mãɨpari jõma Tachi Ak'õrepa jara bɨ ĩjãa bɨdepa chok'ae baipɨ].

⁵ Mãɨya bak'ari tiorepa Jesú eya ɨt'ɨ bɨdea ateesima. Mãmãɨpa nãɨ ĩjũane be p'uuru ãarea ak'ɨpisima.

⁶ Mãɨne tiorepa jarasima: —Nãɨ ĩjũane p'uuru be mãɨnepa mãɨ p'uurude nepia be ãarea pɨ juade bɨipɨ. Mõré pẽra mɨa tea k'ɨ̃riaru teai bɨma.

⁷ Mɨ k'ĩrari sĩraporode k'obeek'ari mɨá pia pedeaipɨra mɨa jõma teaipɨ.

⁸ Maamina Jesupa jarasima: —Tiore, ãyá wãse. Tachi Ak'õre pedeade nãɨya bɨ bɨma: “Aba pɨ Chipari Tachi Ak'õreapuru pia pedease. Ichia jara bɨt'a oo base”.

^9-10 Mãɨya bak'ari tiorepa Jesú Jerusalenea ateewãsima Tachi Ak'õre te poro ɨt'ɨ bɨmá. Maapae jarasima: —Pɨ piarã Tachi Ak'õre Warrapɨra, nãmãɨpa edá jĩitɨse. Tachi Ak'õre pedeade nãɨya bɨ bɨma: Tachi Ak'õrepa ichi ɨt'aripa peedarã pɨmá peeipɨ k'aripadamẽrá.

¹¹ Pɨ ãchi juade ateewãnaipɨ pɨ jĩru mawarapa p'uapiemaapa.

¹² Maamina Jesupa jarasima: —Ichi pedeade nãɨ sida bɨ bɨma: “Pɨ Chipari Tachi Ak'õrea waa mĩesa jararãse nemietá oomẽrá”.

¹³ Mãɨya waa mĩesa jara bak'ari tiore Jesuk'á bada ãyá wãsima aba mãicha ewari unuutadea.

Jesupa jaratea beeda

¹⁴ Mãɨya bak'ari Jesú Tachi Ak'õre Jaore jua chaareadepa Galilea tuadea jĩitea wãsima. Jõma mãɨ tuade ẽpẽerãpa ichi t'ɨ̃ k'orea minachia ũripachidama.

¹⁵ Judiorã ará pedeapataɨ techa ichia Tachi Ak'õre pedea jaratea bapachima. Mãɨpuru jõmãɨrãpa ichi k'orea pia jarapachidama.

Jesú Nazarede bada

¹⁶ Maapae Jesú ichi warida pada p'uuru Nazaredea wãsima. Mimianak'apɨ́ ewaride ichia oopari jĩra judiorã ará pedeapataɨ tede eda wãsima. Maapae ichi bai nɨbeesima Tachi Ak'õre pedea eda jarai k'orea.

¹⁷ Mãɨne Tachi Ak'õre pari pedeaparí Isaía k'art'a bɨda ichiá teasidama. Mãɨ t'uya bɨ ẽrak'ari nãɨ pedea jɨrɨk'ari jĩk'ua eda jarasima:

^18-19 «Tachi Ak'õre Jaore mɨ ome bɨma. Ichia mɨ jɨrɨ atasima chi nenea k'edea jaramẽrá Tachi Ak'õrepa ãchi k'aripait'a. Ichia mɨ peesima chi k'ɨ̃risia pará, sõp'ua be sõpiapik'oamẽrá, chi jita uadaadaɨrã ãchi k'ẽet'aapii jaramẽrá, tau p'ãrio be unupimẽrá, chĩara jua chaareade mĩa be pia bɨk'oamẽrá mãɨnepa jaramẽrá nãɨ ewaride Tachi Chiparipa ẽpẽrarã pia ooit'a».

²⁰ Eda jarak'ari, k'art'a pɨrak'ari chi ak'ɨparia teasima. Maapae suak'abari beesima jarateai k'orea. Jõmãɨrãpa ichi ak'ɨ tuanasidama.

²¹ Mãɨne Jesupa jarasima: —Mãɨ pedea eda jarada idi mãra k'ĩrari mãɨya baeruma.

²² Jõmãɨrãpa ichi k'orea pia pedeasidama. Ichia pia jaratea bɨ k'orea k'awa k'ɨ̃risiadaé pasima. Ara ãchi tuaba jara tuanasidama: —¿Ichi José warra jãɨya bɨwẽk'ãra?

²³ Jesupa jarasima: —Mãrapa nãɨ pedea mɨá jaradaima: “Nẽará teaparí, ara pɨchi tuaba jɨpa beepise. Pɨa Capernaune ooda taipa ũrisidama. Nãma pɨ p'uurude pida ara mãɨya abarik'a oose”.

²⁴ Mãɨ awara jarasima: —Mɨa mãrá piarã jararuma: abaɨ pida Tachi Ak'õre pari pedeaparia ara ichi tuade pia pedeadak'ama.

²⁵ K'ɨ̃risiat'ɨ, Elía basi ewaride Israel tuade p'ẽtãarã chok'ará p'anasidama. Mãɨ ewaride ãyo k'ak'o ũpeak'ari ya estarik'a k'oe chewẽa bada pẽra jarra minachia oosima.

²⁶ Maamina Tachi Ak'õrepa Elía abaɨ pida Israeldepema p'ẽtã́ k'aripade wãpié pasima. Mãɨ k'aepẽra p'ẽtã́ Sidón tuade Sarepta p'uurude bɨmá wãpisima.

²⁷ Ara mãɨ jĩra chi Tachi Ak'õre pari pedeaparí Eliseo basi ewaride, aidapa k'ɨdade berã Israel tuade chok'ará p'anasidama maamina ãchidiidepema abaɨ pida ichia jɨpa beepié pasima. Mãɨpari Siria tuadepema Naamán jɨpa beepisima.

²⁸ Mãɨ ũrisidaɨde ãarea judiorã ará pedeapataɨ tede p'anɨ k'ĩruusidama.

²⁹ Ara mãɨne Jesú p'uurudepa tajatá sĩsĩamat'á ateewãnak'ari, mãɨ p'uuru eya poro nok'odea ateewãsidama p'ẽyanepa jirat'aadai k'orea.

³⁰ Maamina Jesú ara ãchi t'ãena nek'aiwẽa wãsima.

Jesupa ẽpẽra jaore mietá pará bɨ jɨpa beepida

³¹ Mãɨya bak'ari Jesú Galilea tuade Capernaum p'uurudea wãsima. Mimianak'apɨ́ ewaride ichia jaratea basima.

³² Minachia k'awa bɨdepa arí jaratea bɨẽra ãareaɨrãpa k'awa k'ɨ̃risiadaé pasima.

³³ Judiorã ará pedeapataɨ tede ẽpẽra jaore mietá pará bɨ basima. Mãɨya bɨde ichia jĩk'ua pedeasima:

³⁴ —¡Jesú Nazaredepema! ¿K'ãre k'orea tai waa oo bɨma? ¿Tai k'enane chesik'ãra? Mɨa k'awa bɨma pɨ k'ait'a: ¡Pɨ Tachi Ak'õrepa peedapɨ!

³⁵ Jesupa chi jaore mietá nãɨya ɨtɨasima: —K'ĩup'ease. Jãɨ k'ak'uadepema ãyá wãse. Ara mãɨne chi jaore mietapa chi ẽpẽra jeeda baepik'ari ãyá wãsima, mãɨ p'ua oowẽa.

³⁶ Mãɨ unusidaɨde ãareaɨrãpa k'awa k'ɨ̃risiadaé pasima. Ara ãchi paara idi para beesima: «Ichi pedeadepa ¿sãmaasã́ jãɨya oo bɨma? Ichia jararut'a chi jaore mietaarãpa ũripatama. Ichi jua chaarea bɨdepa mãɨnepa ichi juade ãarea uru bɨdepa, chi jaore mietaarã pedearude ãyá wãk'oapatama».

³⁷ Mãɨpuru ichi p'uuru k'ait'a becha ichi t'ɨ̃ k'orea ãarea t'ɨ̃ p'oa nɨbeesima.

Jesupa Simón Pedro p'ak'õre jɨpa beepida

³⁸ Judiorã ará pedeapataɨ tedepa wãk'ari Jesú Simón tedea wãsima. Mãma Simón p'ak'õre minachia k'ɨa nɨbasima. Mãɨpuru Jesua chichupuria idisidama jɨpa beepimẽrá.

³⁹ Jesupa edá ak'ɨk'ari chi k'ɨamiá ɨtɨa pedeasima. Ara mãɨne k'ɨamia tuusima. Maapae chi k'ɨdade bada p'irabarik'ari ãchiá nek'opisima.

Jesupa chok'ará jɨpa beepik'oada

⁴⁰ K'iuk'ari chok'ará wawaria k'ak'ua piawẽa berã Jesumá ateewãsidama. Jesupa ichi jua ãchi ɨ̃rɨ bɨk'ari jɨpa beepik'oasima.

⁴¹ Ichiaba chok'ará jaore mietaarã ẽpẽrarã k'ak'uadepema jeret'aasima. Wãutade nãɨya bia jarapachidama: «¡Pɨ piarã Tachi Ak'õre warrapɨ!» Ãchia k'awa p'anasidama ichi Tachi Ak'õrepa teai jarada Tachi K'aripaparí. Mãɨ k'orea Jesupa ãchi ɨtɨak'ari, pedeapik'a pasima.

Galileade jaratea nipada

⁴² Tap'ededa Jesú mẽa wãsima ẽpẽra newẽmá. Maamina ẽpẽrarãpa ichi jɨrɨ p'anasidama. Unusidaɨde jarasidama ãchi p'uurude beemẽrá.

⁴³ Maamina Jesupa ãchiá jarasima: —Mɨa waapẽarã p'uuru bede jarateai bɨma Tachi Ak'õrepa ichidirã ichi juade ua bɨ k'orea. Tachi Ak'õrepa mɨ peesima mãɨ pedea pia jaramẽrá.

⁴⁴ Mãɨpuru Jesupa judiorã tuade judiorã ará pedeapataɨ techa jaratea wãpachima.