Luca 3 - Tachi Ak'õre Pedea

Juan chi Porochoaparí k'orea bɨda

¹ Tiberio chi Romanepema atepe poro chaarea bɨ quince ãyo pa bɨde, Poncio Pilato Judea tuade chi minachia k'awa bɨ pasima. Herode Galilea tuade chi minachia k'awa bɨ pasima. Chi ũpẽa P'elipe Traconite tuade mãɨnepa Iturea tuade chi minachia k'awa bɨ pasima. Lisania Abilene tuade chi minachia k'awa bɨ pasima.

² Aná mãɨnepa Caip'á chi p'aare minachia k'awa p'anɨrã pasima. Mãɨ ewaride ĩjũa pania newẽa bɨde Tachi Ak'õrepa Zak'aria warra Juaná pedeasima.

³ Mãɨpuru Juan jõma Jordán to k'ait'a berã́ jarade wãsima ãchia nemietá oopataɨ itu bɨdak'ari Tachi Ak'õremá chedamẽrá. Ichia jarasima mãɨya oosidara Tachi Ak'õrepa ãchi nemietá oodada k'ɨ̃risia atuait'a. Chi ichi pedea ũriuta ichia toeda porochoapachima.

⁴ Jõma mãɨ mãɨyasima Tachi Ak'õre pari pedeaparí Isaíapa naena bɨda jĩra: «Ẽpẽra ĩjũa pania newẽa bɨde jĩk'ua pedea bɨma: O jarit'ɨ Tachi Chipari pia chemẽrá. O ichi pae jĩp'a jarit'ɨ.

⁵ Joa be jõma k'orí beepiipɨ. Eya ɨt'ɨ be mãɨnepa eya jeeda be sida mãɨya ook'oaipɨ. O jõrea be jĩp'a jariipɨ, o piawẽa be ãarea pia ook'oaipɨ.

⁶ Mãɨya jõmãɨrãpa ununaipɨ sãmaasã́ Tachi Ak'õrepa tachi k'aripait'a».

⁷ Chok'ará ẽpẽrarã chepachidama Juanpa porochoamẽrá. Maamina Juanpa waapẽarã́ jarapachima: «Mãra taama jĩra berã, ¿k'aipa jarasima mãra Tachi Ak'õrepa tachi ɨtɨai ewaridepema p'ue mĩrunait'a?

⁸ Mãrapa oo p'anɨnepa unupit'ɨ piarã machi nemietá ooparí itu bɨdak'ari Tachi Ak'õremá chesidaɨt'a. K'ɨ̃risiarãt'ɨ Abrahanepa chedaadarã pẽra Tachi Ak'õrepa ɨtɨaiwẽane arãt'ɨ. Mɨa mãrá jararuma: Tachi Ak'õrepa k'ɨ̃riaipɨra, cha be mawaradepa Abrahanepa chedaadarã papik'oaipɨ.

⁹ Mãɨ awara mɨa jararuma: Tachi Ak'õrepa chaara uru bɨma pak'uru t'ut'aak'oai k'orea. Ãarea pak'uru pia chaudak'a t'ut'aak'oak'ari t'ɨpɨde bat'ak'oaipɨ. Ara mãɨ jĩra Tachi Ak'õrepa nemietá oopataɨrã ɨtɨaipɨ».

¹⁰ Mãɨ k'orea ẽpẽrarãpa ichiá idipachidama: —Mãɨya bɨpɨra taipa ¿k'ãre oodai p'anɨma?

¹¹ Juanpa p'anoosima: —Neet'á ume uru bɨpa chi ne newẽa k'ɨrɨa aba teai pia bɨma. Chi k'oi uru bɨpa chi nek'oi newẽa k'ɨrɨa teai pia bɨma.

¹² Mãɨya bɨde Romanepema pae erreara jɨrɨp'epataɨrã porochoadai k'orea chesidama. Maapae ãchia idisidama: —Jarateaparí, taipa ¿k'ãre oodai p'anɨma?

¹³ Juanpa ãchiá jarasima: —Mãrapa erreara jɨrɨp'eutade atepe idirãt'ɨ.

¹⁴ Mãɨne papaká berã arí p'anɨpa Juaná idisidama: —Taipa ¿k'ãre oodai p'anɨma? Juanpa p'anoosima: —Wap'eapidak'ari chĩara erreara ẽemarirãt'ɨ mãɨnepa seadepa chĩara k'orea k'achia pedearãt'ɨ. Sõpia p'anat'ɨ ara mãrá erreara p'aa p'anɨnepa.

¹⁵ Chi arí p'anɨpa mãɨ ũrisidaɨde ãarea jĩrak'aua p'aneesidama k'ãasãai k'awadai k'orea. Ara ãchi tuaba nãɨya k'ɨ̃risia p'anasidama: «¿Juan Tachi Ak'õrepa Tachi K'aripaparí teai jaradak'ãra?»

¹⁶ Maamina Juanpa ãareaɨrã́ jarasima: «Piarã mɨa mãra paniapa porochoa bɨma. Maamina mɨ k'aepẽra chi atepe bɨ cheipɨ. Ichia jĩrune jɨ̃ bɨ ẽrai k'orea mɨ mãɨ pae pia bɨwẽma. Ichiapuru Tachi Ak'õre Jaoredepa porochoaipɨ. Maamina ĩjãanaepɨra ɨtɨaipɨ.

¹⁷ Ɨt'aa jira bat'aparí ichi juade uru bɨma chi trigo tau jora ãyá amaai k'orea. Maapae chi tau ẽechoada yaaipɨ maamina chi jora t'ɨpɨ uruade paaipɨ. Mãɨ k'iik'ama».

¹⁸ Ara mãɨ jĩra ne wawariadepa Juanpa chi pedea pia tachi k'aripai k'orea jarateapachima mãɨnepa jarapachima mãɨne ĩjãanamẽrá.

¹⁹ Maamina Juanpa Galileadepema minachia k'awa bɨ Herode ɨtɨapachima ichia wẽra uru bɨ Herodía k'orea. Mãɨ Herodía piarã Herode ũpẽa P'elipe k'ima pasima. Mãɨ awara Juanpa ichi ɨtɨapachima nejõma nemietá ooda k'orea.

²⁰ Herodepa mãɨ nemietá oo bɨ awara nãɨ k'achia sida oosima: Juan eda jɨ̃a nɨbɨpisima ichi ɨtɨai k'orea.

Juanpa Jesú porochoada

²¹ Juanpa ẽpẽrarã porochoak'oa baside Jesú sida porochoasima. Mãɨne Jesupa Tachi Ak'õrea pedearude pajã ewa wãsima.

²² Ewa wãk'ari Tachi Ak'õre Jaore pajãnepa p'aloma jĩra ichi ɨ̃rɨ chesima. Mãɨne Tachi Ak'õrepa pajãnepa edá nãɨya pedeasima: «Pɨ mɨ Warra chi k'ɨ̃ria bɨpɨ. Pɨ k'orea mɨ minachia sõ arapá bɨma».

Lucapa Jesuderã chi chõarãenapemarã k'orea bɨda

²³ Jesupa jaratea beeside treinta ãyo bɨ jĩra basima. Ẽpẽrarãmá ichi José warra pasima. José Eli warra pasima.

²⁴ Eli Matá warra pasima. Matá Leví warra pasima. Leví Melquí warra pasima. Melquí Janai warra pasima. Janai José warra pasima.

²⁵ José Matatía warra pasima. Matatía Amó warra pasima. Amó Nahúm warra pasima. Nahúm Eslí warra pasima. Eslí Nagai warra pasima.

²⁶ Nagai Máhat warra pasima. Máhat Matatía warra pasima. Matatía Semeí warra pasima. Semeí José warra pasima. José Juda warra pasima.

²⁷ Juda Johanan warra pasima. Johanan Resá warra pasima. Resá Zorobabel warra pasima. Zorobabel Salatiel warra pasima. Salatiel Nerí warra pasima.

²⁸ Nerí Melquí warra pasima. Melquí Adí warra pasima. Adí Cosam warra pasima. Cosam Elmadán warra pasima. Elmadán Ere warra pasima.

²⁹ Ere Josué warra pasima. Josué Eliezer warra pasima. Eliezer Jorim warra pasima. Jorim Matá warra pasima.

³⁰ Matá Leví warra pasima. Leví Simeón warra pasima. Simeón Juda warra pasima. Juda José warra pasima. José Jonán warra pasima. Jonán Eliakín warra pasima.

³¹ Eliakín Melea warra pasima. Melea Mainán warra pasima. Mainán Matata warra pasima. Matata Natán warra pasima. Natán Daví warra pasima.

³² Daví Jesé warra pasima. Jesé Obed warra pasima. Obed Boa warra pasima. Boa Salmón warra pasima. Salmón Naasón warra pasima.

³³ Naasón Aminadá warra pasima. Aminadá Arán warra pasima. Arán Jesrón warra pasima. Jesrón P'are warra pasima. P'are Juda warra pasima.

³⁴ Juda Jacobo warra pasima. Jacobo Isá warra pasima. Isá Abrahán warra pasima. Abrahán Taré warra pasima. Taré Nak'or warra pasima. Nak'or Serug warra pasima.

³⁵ Serug Ragau warra pasima. Ragau Péleg warra pasima. Pelég Heber warra pasima. Heber Sala warra pasima.

³⁶ Sala Cainán warra pasima. Cainán Arp'ak'a warra pasima. Arp'ak'a Sen warra pasima. Sen Noé warra pasima. Noé Lamec warra pasima.

³⁷ Lamec Matusalén warra pasima. Matusalén Enoc warra pasima. Enoc Jared warra pasima. Jared Malale warra pasima. Malale Cainán warra pasima.

³⁸ Cainán Enó warra pasima. Enó Set warra pasima. Set Adán warra pasima. Adán Tachi Ak'õre warra pasima.