Luca 24 - Tachi Ak'õre Pedea

Jesú chok'ae p'irabarida

¹ Tomione tap'ededa wẽrarã Jesú t'ɨbaridaadamá wãsidama. Ãchia k'ak'ua p'ɨrɨpataɨ k'era oodada ateewãsidama. [Ãchi ome waapẽarã wẽrarã sida wãsidama.]

² Maamina mawara waibɨa bɨpa chi uria jõat'ɨ bada ewa bari bɨ unusidama.

³ Eda wãutade Tachi Chipari Jesú k'ak'ua ununaé pasima.

⁴ Mãɨpuru ãchia k'awa k'ɨ̃risiadaé pasima. Mãɨya bɨde ãchi k'ait'a ẽpẽra ume unupisidama. Neet'á achiterrea jɨ̃ p'anasidama.

⁵ Mãɨ k'orea wẽrarã minachia p'eradak'ari sĩraporode k'op'aneenak'ari, ãchi tau bɨɨrɨ ĩjũamá t'ɨpisidama. Mãɨne chi ẽpẽrarãpa ãchiá jarasidama: —¿K'ãre k'orea mãrapa chok'ae bɨ piudaadarã t'ãena jɨrɨ p'anɨma?

⁶ Ichi nãma bɨwẽma chok'ae p'irabarida pẽra. Mãɨ wapida Galileade p'anasidaɨde ichia mãrá jarada k'ɨ̃risiat'ɨ.

⁷ Ichia nãɨya jarasima: “Mɨ, chi Ẽpẽra Warra ẽpẽerã k'achiarã́ jita teadai p'anɨma. Mɨ k'urusude peadaipɨ, maamina ewari ũpeaɨde chok'ae p'irabariipɨ”.

⁸ Mãɨneepuru wẽrarãpa k'ɨ̃risiasidama Jesupa mãɨya jarada.

⁹ Ara mãɨne jĩitea wãnak'ari Jesupa peedaɨrã once p'anɨa mãɨnepa ãarea waapẽarã́ ãchia ununana nepɨrɨsidama.

¹⁰ María Magdalenapa, Juanapa, Santiago nae Mariapa, waapẽarã wẽrarã ãchi ome p'anɨ pida Jesupa peedaɨrã́ mãɨya nepɨrɨsidama.

¹¹ Maamina ãchia chi wẽerãpa paritua pedeamaa p'anɨane a k'ɨ̃risiasidadeepuru, ĩjãanaé pasima.

¹² Maamina Pedro mãɨ Jesú t'ɨbaridaadamá p'ira wãsima. Jãjorrea k'obeek'ari chi uriade eda ak'ɨside chi k'ak'ua pɨra bada chi porobat'u unusima. Mãɨ k'orea k'awa k'ɨ̃risiawẽa tedea wãsima.

Emaú p'uurudea wãpataɨ ode nipadada

¹³ Ara mãɨ ewaride Jesude ĩjãapataɨrã ume Emaús p'uuru chak'edea wãuta pasima. Mãɨ p'uuru Jerusalenepa t'ɨmɨawẽa bɨma.

¹⁴ Ãchia Jesú jõma mãɨyana k'orea pedea nipasidama.

¹⁵ Mãɨya pedea wãutade Jesú ãchimá orrobarik'ari, ãchi ome wãpodosima.

¹⁶ Maamina Jesú mãɨya bɨt'a ãchiá k'awapié pasima.

¹⁷ Mãɨne Jesupa ãchiá idisima: —¿Mãrapa k'ãre nepɨrɨ wãutama? Mãɨ ũrisidaɨde k'ĩra piawẽa bai nɨp'aneesidama.

¹⁸ Aba Cleop'á apataɨpa p'anoosima: —Chi ẽpẽerã chok'ará Jerusalene cheepɨrɨdadepema ¿Pɨapuru atua bɨk'ãra nãɨ ewaride ãarea mãɨyana?

¹⁹ Jesupa ãchiá idisima: —¿K'ãret'a jara p'anɨma? Ãchia p'anoosidama: —Jesú Nazaré k'orea jara p'anɨma. Ichia ooda mãɨnepa jarada k'awapisima ichi Tachi Ak'õre pari pedeaparipɨ. Tachi Ak'õrepa mãɨnepa p'uurudepemarãpa ichi pia unusidama.

²⁰ Maamina p'uuru minachia k'awa p'anɨrãpa mãɨnepa p'aarerã chi mãɨrã chaarearãpa ichi chi Romanepema chaarearã́ teasidama, mãɨrãpa peapadaade adamẽrá. Maapae k'urusude barijira bɨk'ari peasidama.

²¹ Ichiapuru tachi Israel p'uuru nepɨra pará bɨ k'aripayade a k'ɨ̃risia p'anasima. Maamina ichi peadada idiipa ewari ũpea pa bɨma.

²² Maamina taidiidepemarã wẽerãpa jaradada k'orea tai k'awa k'ɨ̃risiadawẽa p'aneesidama. Ãchi idi tap'ededa ichi t'ɨbaridaadamá wãsidama.

²³ Chi k'ak'ua ununawẽ pẽra taimá jarade chesidama ãchia Tachi Ak'õrepa ɨt'aripa peedarã unusidaɨt'a. Mãɨrãpa ãchiá jarasidama Jesú chok'ae p'irabarisit'a.

²⁴ Mãɨ k'orea waapẽarã taidiidepemapa ak'ɨde wãsidama. Ichi t'ɨbaridaadamá ara wẽerãpa jaradada jĩra unusidama. Maamina ichi ununaé pasima.

²⁵ Mãɨpuru Jesupa ãchiá jarasima: —¡Jõma Tachi Ak'õre pari pedeapataɨrãpa jaradada mãrapa ĩjãanawẽa p'anɨma! ¡Mãra k'ɨ̃risia nea p'anɨma!

²⁶ ¿Tachi Ak'õrepa Tachi K'aripaparí teai jarada chi Choma beei naena minachia mĩa baiwẽ pasik'ãra?

²⁷ Maapae Tachi Ak'õre k'art'ade ichi k'orea bɨdada ãarea k'awa jarasima. Moisepa bɨda mãɨnepa Tachi Ak'õre pari pedeapataɨrãpa bɨdada ãarea k'awa jarasima.

²⁸ Mãɨya ãchi wãuta pada p'uurudea chesidama. Mãɨne Jesú jĩp'a wãru pasima.

²⁹ Maamina ãchi ome beemẽrá nãɨya minachia chichupuria idisidama: —Ewari k'iupodo pẽra wãrãse. Tai ome beese. Mãɨpuru ãchi ome beesima.

³⁰ Nek'outade Jesupa p'ana atak'ari Tachi Ak'õrea pia jarasima. T'oet'aak'ari ãchiá teasima.

³¹ Mãɨneepuru Tachi Ak'õrepa ãchiá k'awapisima Jesú mãɨya bɨt'a. Maamina Jesú ara mãɨne wẽpasima.

³² Mãɨne ãchi tuaba nãɨya jarasidama: —Ichia Tachi Ak'õre pedea k'awa jara nipaside ¿tachi minachia arapá p'ananaé pasik'ãra?

³³ Ara mãɨne ãchi jĩitea Jerusalenea wãsidama. Mãma Jesupa peedaɨrã once p'anɨ waapẽarã ome chi ará jere nɨbɨ unusidama.

³⁴ Mãɨrãpa nãɨya jara p'anasidama: —¡Tachi Chipari Jesú piarã chok'ae p'irabarisima! Simonoa ichi unupisima.

³⁵ Ara mãɨne ãchia nepɨrɨsidama ode mãɨyana. Ãchia jarasidama: —Jesupa p'ana t'oet'aaside taipa k'awasidama ichi mãɨya bɨt'a.

Jesupa peedaɨrã́ ichi unupida

³⁶ Wapida mãɨya nepɨrɨmaa p'anɨne Jesú ãchi esa bai nɨbee chesima. Maapae ãchiá jarasima: —¡Ne k'ɨ̃risiawẽa p'anat'ɨ!

³⁷ Mãɨ unusidaɨde ãchi minachia p'erasidama, ichi jaoret'a unu p'anɨane a k'ɨ̃risiasida pẽra.

³⁸ Maamina Jesupa ãchiá jarasima: —¿K'ãre k'orea mãra p'era p'anɨma? ¿K'ãre k'orea ĩjãanawẽa p'anɨma mɨ chok'ae p'irabarisit'a?

³⁹ Mɨ jua, mɨ jĩru sida ak'ɨt'ɨ. Mɨpɨ. Mɨ k'ak'ua t'õmarit'ɨ. Ẽpẽra jaore k'ak'ua newẽa baparima, mãɨne ak'ɨt'ɨ: mɨ k'ak'ua pará bɨma.

⁴⁰ Mãɨya jarak'ari ichi jua mãɨnepa jĩru ak'ɨpisima.

⁴¹ Maamina arapaapa ãchia wapida p'ue ĩjãanaé pasima. Ãchia k'awa k'ɨ̃risiadaé pasima. Mãɨ k'orea Jesupa ãchiá nãɨya idisima: —¿Nãma chik'o uru p'anɨk'ãra?

⁴² Mãɨ k'orea ãchia Jesua beta paada ãpia beet'aadak'ari teasidama. Jɨrrɨjõ sida teasidama.

⁴³ Ara mãɨne jitak'ari ãchi k'ĩrari k'osima.

⁴⁴ Mãɨya bak'ari ãchiá jarasima: —Mɨ wapida mãra ome baside jara bapachima mɨ k'orea naa bɨdada jõma mãɨyai bɨ. Mãɨ Moisepa bɨsima, Tachi Ak'õre pari pedeapataɨrãpa bɨsidama, mãɨnepa Salmo k'art'ade pida bɨ bɨma.

⁴⁵ Maapae Jesupa ãchiá k'ɨ̃risia teasima Tachi Ak'õre pedea k'awadamẽrá.

⁴⁶ Nãɨya jarasima: —Tachi Ak'õre k'art'ade nãɨya bɨ bɨma: Tachi Ak'õrepa Tachi K'aripaparí teai jarada minachia mĩa bɨma. Piuk'ari ewari ũpeaɨde chok'ae p'irabariipɨ.

⁴⁷ Maapae ichi t'ɨ̃nepa ichide ĩjãa berãpa ẽpẽrarã́ jaradaipɨ ãchi nemietá itu bɨdak'ari Tachi Ak'õremá chedamẽrá. Mãɨya Tachi Ak'õrepa ãchi nemietá k'ɨ̃risia atuaipɨ. Mãɨ naa Jerusalén p'uurude jaradak'ari jõma p'uuru becha jarade wãnaipɨ.

⁴⁸ Ara machi taupa mɨ mãɨyana jõma unusidama.

⁴⁹ Piarã mɨa mãramá mɨ Ak'õrepa ichi Jaore teai jarada peeipɨ. Mãɨpuru mãra nãma Jerusalene nɨp'aneet'ɨ aba ichi pajãnepa jua chaarea bɨ jitautadea.

Jesú pajãnea wãna

⁵⁰ Mãɨya bak'ari Jesupa ãchi Jerusalén p'uuru tajatá Betania p'uuru k'ait'a ateewãsima. Maapae ichi jua ɨt'aa jirak'ari ãchiá pia jarasima Tachi Ak'õrepa k'aripa bamẽrá.

⁵¹ Mãɨya pia pedea bɨde Tachi Ak'õrepa ichi pajãnea ɨt'aa ateewãsima.

⁵² Ãchia Jesua chi k'ɨ̃ria pedea p'ananak'ari sõpia Jerusalenea jĩitea wãsidama.

⁵³ Mãmãɨpa ãchi ewaricha Tachi Ak'õre te eda wãpachidama Tachi Ak'õrea pia pedeadai k'orea.