Luca 22 - Tachi Ak'õre Pedea

Jesú peadai k'orea k'ɨ̃risia jɨrɨ p'anana

¹ P'ana ooropiparí newẽa k'opataɨ ewari ara k'ait'a pasima. Mãɨ ewari Pascua ewari apatama.

² Mãɨne p'aarerã chi mãɨrã chaarearãpa mãɨnepa Moisepa bɨda jarateapataɨrãpa Jesú peadai k'orea k'ɨ̃risia p'anasidama. Maamina p'uurudepemarã wap'ea p'anɨ pẽra ãarea taade mẽra oo k'ɨ̃ria p'anasidama.

³ Mãɨya bɨde tiorepa Juda Iscariote k'ɨ̃risia p'uesima. Mãɨ Juda Jesupa doce peedaɨrãnepema pasima.

⁴ Juda p'aarerã chi mãɨrã chaarearãmá mãɨnepa chi Tachi Ak'õre te ot'eapataɨrã chaarearãmá wãsima. Ãchiá jarasima sãmaasã́ Jesú jitapii k'orea.

⁵ Mãɨ ũrisidaɨde ãchi arapaadak'ari ichiá erreara teadayade asidama.

⁶ Pia bɨade ak'ari Juda wãsima. Maapae ichia jɨrɨpachima ẽpẽrarã newẽne Jesú jitapii k'orea.

Jesupa doce peedaɨrã ome nek'oda

⁷ P'ana ooropiparí newẽa k'opataɨ ewari pasima. Mãɨ ewaride judiorã Egitodepa wãnana k'ɨ̃risiadai k'orea oveja chak'e peadak'ari k'opachidama.

⁸ Mãɨ k'orea Jesupa Pedro, Juan ome peeside, nãɨya jarasima: —Chi Egitodepa wãnana k'ɨ̃risiapataɨ ewari k'opataɨ ãarea oode wãt'ɨ.

⁹ Mãɨne ãchia idisidama: —¿Pɨa sãma k'ɨ̃ria bɨma taipa mãɨ oode wãnait'a?

¹⁰ Jesupa p'anoosima: —P'uurude eda wãutade mãrapa ununaima ɨmɨk'ĩrapa pania chok'ode ateerut'a. Ichi k'aade wãt'ɨ ichi wãru tiidá.

¹¹ Mãɨ te chiparia nãɨya jarat'ɨ: “Tachi Jarateaparipa nãɨ idipisima: mɨa mãɨnepa mɨ ome p'ɨrrɨapataɨrãpa Egitodepa wãnana k'ɨ̃risiapataɨ ewari nek'opataɨ ¿sãma k'odaima?”

¹² Mãɨne ichia tejã ɨt'aria lao nepalá ãarea pia oo nɨbɨt'a unupiipɨ. Mãma chik'o oot'ɨ.

¹³ Wãutade Jesupa ãchiá jarada jĩra unusidama. Ara mãɨne chi Egitodepa wãnana k'ɨ̃risiapataɨ ewari nek'opataɨ oosidama.

¹⁴ Nek'odai pẽra Jesú, ichia peedaɨrã ome chik'o k'opataɨde suak'abari p'aneesidama.

¹⁵ Mãɨne ãchiá jarasima: —Mɨ minachia mĩai naena mɨa piarã nãɨ k'opataɨ mãra ome ará k'o k'ɨ̃ria basima.

¹⁶ Mɨa mãrá piarã jararuma: nãɨ k'odadepa waa k'oiwẽma aba Tachi Ak'õrepa jõma ichidirã ichi juade ua beerudea. Mãɨ ewaride nãɨ k'opataɨ jara bɨ k'orea mãɨya jõma baipɨ.

¹⁷ Maapae pasu jitak'ari Tachi Ak'õrea mɨ sõpia bɨade a jarak'ari nãɨya jarasima: —Nãɨ tot'ɨ.

¹⁸ Mɨa jararuma: uvaba waa toiwẽma aba Tachi Ak'õrepa jõma ichidirã ichi juade ua beerudea.

¹⁹ Maapae p'ana jitak'ari Tachi Ak'õrea sõpia bɨade a jarasima. T'oet'aak'ari ãchiá tearude nãɨya jarasima: —Nãɨ mɨ k'ak'uapɨ, mãra k'orea teadapɨ. K'ot'ɨ. Mɨ k'ɨ̃risiadai k'orea ara nãɨ jĩra oo p'anat'ɨ.

²⁰ Ara mãɨ jĩra nek'ok'ari pasu jitak'ari jarasima: —Nãɨ pasude eda bɨt'a mɨ oa mãra k'orea ãriipɨ. Mɨ oadepa Tachi Ak'õrepa mãra ome pedea chiwidi bɨruma.

²¹ Maamina chi mɨ jitapii bɨt'a nãma mɨ ome nek'omaa bɨma.

²² Piarã mɨ, chi Ẽpẽra Warra minachia mĩa bɨma Tachi Ak'õrepa jarada jĩra, ¡maamina chi mɨ jitapii bɨ ẽpẽra mãɨ chichupuria baipɨ!

²³ Mãɨpuru ichi ome p'ɨrrɨapataɨrãpa ara ãchi tuaba idi para p'aneesidama k'aipa Jesú mãɨya ooit'a.

¿K'ai chi atepe bɨma?

²⁴ Mãɨya p'anɨne ara ãchi tuaba idi para p'aneesidama k'ai chi atepe k'awa bɨt'a.

^25-26 Mãɨpuru Jesupa ãchiá jarasima: «Abaɨ pida ichi k'orea ichi atepe bɨ jĩra k'ɨ̃risiai pia bɨwẽma. Nãɨ ĩjũanepema minachia k'awa berãpa ãchi ẽpẽrarã jua chaareadepa minachia chok'apatama mãɨnepa ãchi p'uuru k'aripapariade apatama. Maamina mãra mãɨya p'ananaiwẽa p'anɨma. Chi chõa bɨt'a chi k'ũtã́ jĩra bai bɨma. Mãɨnepa chi minachia k'awa bɨ, chi ichi pae pari mimiaparí jĩra bai bɨma.

²⁷ Ẽpẽrarãmá ¿k'ai chi atepe bɨ: chik'o k'opataɨde suak'abari bɨ nek'oyá mãɨyawẽpɨra chi chik'o jedaparí? ¿Chi chik'o k'opataɨde suak'abari bɨ chi atepe bɨwẽk'ãra? Mãɨt'u, mɨ chi atepe bɨmina nãma mãra t'ãena machi pae pari mimiaparí jĩra bɨma.

²⁸ »Mɨ minachia mĩa baside mãrapa mɨ ome ãarea choasidama.

²⁹ Mãɨpuru mɨ Ak'õrepa mɨ chi minachia k'awa bɨ bɨsima. Ara mãɨ jĩra mɨa mãra minachia k'awa p'anɨrã jĩra bɨ bɨma.

³⁰ Mɨchidirã mɨ juade ua barude, mãra mɨ ome nek'odaipɨ. Poro jũra jɨ̃parí jɨ̃ bɨ suak'a beeparide suak'abari p'aneenaipɨ, Israeldepema p'uuru doce p'anɨ nepɨra ak'ɨdai k'orea».

Pedropa Jesua itu bɨwẽane ada

³¹ Mãɨ awara Tachi Chiparipa jarasima: «Simón, Simón, tiorepa Tachi Ak'õrea idisima mãra oo bɨdepa mɨne ĩjãa p'anɨ itu bɨpii k'orea.

³² Maamina mɨa Tachi Ak'õrea ɨt'aa chiidisima pɨa ĩjãa bɨ itu bɨpiemaapa. Mãɨya bak'ari pɨa nemietá ooi bɨ itu bɨk'ari, pɨ ũpẽarã k'aripase pia ĩjãanamẽrá».

³³ Mãɨpuru Pedropa Jesua nãɨya p'anoosima: —Mɨ Chipari, mɨmá, pɨ ome eda jɨ̃a nɨbɨde wãit'a arí bɨma; ichiaba pɨ ome piui k'ɨ̃risia bɨma.

³⁴ Jesupa ichiá jarasima: —Mɨa jararuma, Pedro, piarã ara nãɨ teamasi et'erre pirui naena pɨa bari k'ak'o ũpea mɨ unuk'aade aipɨ.

Ewari mietá chei k'orea

³⁵ Maapae Jesupa ãchiá jarasima: —Mɨa mãra erreara newẽa peeside, neet'á yaaparí newẽa mãɨnepa jĩrune jɨ̃pataɨ newẽa ¿ne abawẽasidawẽk'ãra? Ãchia p'anoosidama: —Mi ãpia pida newẽaé pasima.

³⁶ Mãɨ k'orea ichia jarasima: —Maamina mɨa jararuma: naapae chi erreara uru bɨpa ateese. Chi neet'á yaaparí uru bɨpa mãɨ sida ateese. Chi k'ĩruuparí nek'o nenea bɨpa ichia neet'á netok'ari aba atase.

³⁷ Mɨa jararuma: Tachi Ak'õre pari pedeaparipa mɨ k'orea bɨda piarã mãɨyai pia bɨma. Nãɨya bɨsima: “Ara ichi ẽpẽra k'achia bɨ jĩra k'ɨ̃risia p'anasidama”. Chi mɨ k'orea bɨdada piarã ãarea mãɨyaipɨ.

³⁸ Mãɨ k'orea ãchia jarasidama: —Tai Chipari, nãma k'ĩruuparí nek'o ume uru p'anɨma. Jesupa jarasima: —Arí bɨma. Waa pedearãt'ɨ.

Jesupa Olivo eyade Tachi Ak'õrea ɨt'aa chiidida

³⁹ Maapae Jesú mãicha Olivo eyadea wãsima ichia oode wãpari jĩra. Ichi ome p'ɨrrɨapataɨrã sida wãsidama.

⁴⁰ Mãma chesidaɨde Jesupa ãchiá jarasima: Tachi Ak'õrea ɨt'aa chiidit'ɨ, machia nemietá ooit'a k'ɨ̃risiadaipɨra, ichia machi k'aripamẽrá.

⁴¹ Maapae ãchimãɨpa ãyá miká wãsima. Sĩraporode k'obeek'ari Tachi Ak'õrea nãɨya ɨt'aa chiidisima:

⁴² «Ak'õre, pɨmá pia bɨpɨra, mɨ itu mĩapirãse. Maamina mɨa k'ɨ̃ria bɨ jĩra oorãse, mãɨpari pɨa k'ɨ̃ria bɨ jĩra oose».

⁴³ [Mãɨya bɨde Tachi Ak'õrepa ɨt'aripa peedapa k'ak'ua ɨbɨapiyá chesima.

⁴⁴ Jesú minachia sõp'ua nɨbada pẽra, Tachi Ak'õrea mãicha ɨt'aa chiidi basima. Mãɨne ichi jɨa oa jĩra ĩjũanea baesima.]

⁴⁵ Jesupa Tachi Ak'õrea jõma ɨt'aa chiidik'ari jĩitea wãsima. Mãɨne ichi ome p'ɨrrɨapataɨrã sõp'uapa k'ãi nɨp'anɨt'a unusima.

⁴⁶ Mãɨ k'orea ãchiá jarasima: —¿K'ãre k'orea mãra k'ãi p'anɨma? P'irabaridak'ari Tachi Ak'õrea ɨt'aa chiidit'ɨ machia nemietá ooit'a k'ɨ̃risiadaipɨra, ichia machi k'aripamẽrá.

Jesú jitadada

⁴⁷ Jesú mãɨya pedeamaa bɨde ẽpẽrarã chok'ará chesidama. Juda ãchi naa basima. Ichi Jesupa doce peedaɨrãnepema pasima. Jesumá orrobarisima ichi uitarra sõi k'orea.

⁴⁸ Mãɨne Jesupa ichiá jarasima: Juda, uitarra sõrupa ¿mɨ, chi Ẽpẽra Warra pɨa jita teaik'ãra?

⁴⁹ Jesú ome p'ɨrrɨapataɨrãpa k'awasidama ichi jitadait'a. Mãɨ k'orea nãɨya idisidama: —Tai Chipari, ¿k'ĩruuparí nek'opa k'ĩruunaik'ãra?

⁵⁰ Mãɨne abaɨpa p'aare minachia k'awa bɨ pae pari mimiaparí k'ɨɨrɨ juaraaripema oat'ut'aasima.

⁵¹ Mãɨpuru Jesupa jarasima: —¡K'ĩruurãt'ɨ! ¡Itu bɨt'ɨ! Ara mãɨne chi ẽpẽra k'ɨɨrɨ t'õmarik'ari ará anipisima.

⁵² Maapae Jesupa ichi jitade chedada p'aarerã chi mãɨrã chaarearã́, Tachi Ak'õre te minachia bɨ ot'eapataɨrã chaarearã́ mãɨnepa judiorã chõarã minachia k'awa p'anɨrã́ nãɨya jarasima: —Mãrapa ¿k'ãre k'orea k'ĩruuparí nek'o pará, pak'uru pará mɨ jãɨya jitade che p'anɨma? ¿Mãɨya mɨ ẽpẽra nechɨaparik'ãra?

⁵³ Ewaricha mɨ Tachi Ak'õre te eda mãra t'ãena badamina jitadak'a pasima. Maamina piarã nãɨena Tachi Ak'õrepa tiorea itu p'uepi bɨma. Mãɨya mãrapa oo k'ɨ̃ria p'anɨt'a oo p'anɨma.

Pedropa Jesú unuk'aade ada

⁵⁴ Jesú jitadak'ari p'aare minachia k'awa bɨ tedea ateewãsidama. Pedro t'ɨmɨɨpa k'aade nipasima.

⁵⁵ Mãɨne waapẽarãpa te tuda t'ɨpɨ uruapidak'ari ara k'ait'a suak'abari p'aneesidama. Pedro sida ãchi t'ãena suak'abari beesima.

⁵⁶ Mãɨya bɨde mimiaparí wẽra abaɨpa Pedro t'ɨpɨ urua nɨbɨk'á suak'abari bɨ unuk'ari ichi k'ĩramá pia ak'ɨ nɨbeesima. Mãɨne jarasima: —Cha bɨ Jesú ome p'ɨrrɨapachima.

⁵⁷ Maamina Pedropa nãɨya mẽrasima: —Pɨa jara bɨ ẽpẽra mɨa unuk'ama.

⁵⁸ Tãaraawẽane abaɨpa Pedro unuk'ari nãɨya jarasima: —Pɨ ãchidepemapɨ. Mãɨ k'orea Pedropa jarasima: —K'õp'ãero, mãɨyawẽma.

⁵⁹ Mãɨya bak'ari abaɨpa jarasima: —Piarã cha bɨ Jesú ome p'ɨrrɨapachima. Ichi Galileadepemapɨ.

⁶⁰ Maamina Pedropa p'anoosima: —K'õp'ãero, mɨa atua bɨma pɨa k'ãre jara bɨt'a. Pedro mãɨya pedeamaa bɨde et'erre pirusima.

⁶¹ Mãɨne Tachi Chiparipa Pedro ãpɨte p'ɨrrabarik'ari ak'ɨsima. Mãɨne Pedropa k'ɨ̃risiasima Tachi Chiparipa ichiá jara badat'a: «Et'erre pirui naena pɨa bari k'ak'o ũpea mɨ unuk'aade aipɨ».

⁶² Ara mãɨne Pedro ãyá wãk'ari minachia sõp'uapa jẽasima.

Jesú piawẽa oodada

⁶³ Mãɨne Jesú jita uru p'anɨ ẽpẽrarãpa ichi oo uru p'anapachidama mãɨnepa sĩ p'anapachidama.

⁶⁴ Jesú k'ĩra p'ãjɨ̃nak'ari nãɨya jarapachidama: —¡Tachi Ak'õre pari pedease! ¡Taiyá jarase k'aipa pɨ sĩsit'a!

⁶⁵ Mãɨ awara ne wawaria jara p'anɨnepa Jesua k'achia pedeapachidama.

Jesú chi atepe k'awa p'anɨrã k'ĩrari bada

⁶⁶ Ãsã pak'ari p'uurudepema chi atepe k'awa p'anɨrã ará p'anasidama chi p'aarerã chi mãɨrã chaarearã mãɨnepa chi Moisepa bɨda jarateapataɨrã paara. Maapae Jesú ãchi k'ĩrari enemeepisidama. Ichiá nãɨya jarasidama:

⁶⁷ —Taiyá jarase: ¿Pɨ Tachi Ak'õrepa Tachi K'aripaparí teai jaradak'ãra? Jesupa p'anoosima: —Mɨa mãrá jaraipɨra, ĩjãanaiwẽma.

⁶⁸ Mãɨ awara mɨa mãrá k'ãre k'orea ĩjãanawẽa p'anɨ idiipɨra p'anoonaiwẽma. Ichiaba mɨ k'ẽet'aadaiwẽma.

⁶⁹ Maamina idiidepa mɨ, chi Ẽpẽra Warra, Tachi Ak'õrepa chi Ne Ãarea P'ue Bɨ juaraari suak'abari baipɨ.

⁷⁰ Mãɨ k'orea jõmãɨrãpa idisidama: —Mãɨyara ¿pɨ Tachi Ak'õre Warrak'ãra? Jesupa p'anoosima: —Ãjã, mãrapa mãɨya jara p'anɨma.

⁷¹ Mãɨne ãchia jarasidama: —¿Tachia waa k'ãre jɨrɨdaima? ¿Piarã ichi it'aedepa jara bɨwẽk'ãra ichi Tachi Ak'õre Warrapɨ?