Luca 21 - Tachi Ak'õre Pedea

P'ẽtãpa Tachi Ak'õrea ne teada

¹ Mãɨya bɨde Jesupa unusima chi erreara pará berãpa Tachi Ak'õre te minachia bɨ k'orea erreara bɨpataɨde tea p'anɨt'a.

² Mãɨne unusima p'ẽtã́ chupuria k'ɨrɨpa erreara tau ume tearut'a.

³ Mãɨpuru Jesupa jarasima: —Mɨa piarã mãrá jararuma: jãɨ p'ẽtã́ chupuria k'ɨrɨpa atepe teasima jõmãɨrãpa teadada k'aepẽra.

⁴ Ãchia ãarea chi erreara beedadepema teasidama, maamina chi wẽra chupuria k'ɨrɨpa nek'oi k'orea uru badadepema ãarea teasima.

Tachi Ak'õre te minachia bɨ ãrinai pada k'orea Jesupa jarada

⁵ Chi eda waapẽarãpa pedeamaa p'anasidama Tachi Ak'õre te minachia mawara pia k'edepa oodada k'orea mãɨnepa ẽpẽrarãpa Tachi Ak'õre pae nepia teadada k'orea. Mãɨya p'anɨne Jesupa ãchiá jarasima:

⁶ —Mãrapa nãma unu p'anɨ ewari abaɨde ãarea ãriipɨ. Nãɨ mawara p'ãnana pada ãarea ãriipɨ.

⁷ Mãɨpuru ãchia Jesua nãɨya idisidama: —Jarateaparí, Tachi Ak'õre te minachia bɨ ¿sãapae mãɨ ãriima? ¿K'ãrenepa k'awadaima mãɨ ewari k'ait'a parude?

⁸ Jesupa p'anoosima: —Jĩrak'aua nipat'ɨ abaɨa pida mãra seapiemaapa. Chok'araɨrãpa jaradaipɨ “mɨ Tachi Ak'õrepa Tachi K'aripaparí teai jara bada”. Mãɨ awara chi ewari arí payade adaipɨ. Maamina ãchi ome wãrãt'ɨ.

⁹ P'uuru aba bɨ awaraɨ ome k'ĩruupik'a nɨbɨ mãɨnepa mãɨ k'ĩruupik'a nɨbɨ ũriutade, p'erarãt'ɨ. Mãɨ jõma mãɨyai bɨma. Maamina chi k'aadeapema ewari waidi arí paiwẽma.

¹⁰ Mãɨ awara Jesupa jarasima: «Ĩjũa aba bɨ ĩjũa awaraɨ ome k'ĩruupik'a nɨbaipɨ. Ichiaba tua abaɨdepema poro jũra jɨ̃parí jɨ̃ bɨ tua awaraɨdepema poro jũra jɨ̃parí jɨ̃ bɨ ome k'ĩruupik'a nɨbaipɨ.

¹¹ Iurumia minachia wãipɨ, tua chok'ará bede jarra minachia oodaipɨ mãɨnepa k'ak'ua piawẽa wawaria k'ɨdade p'aneenaipɨ. Mãɨ awara pajãne ẽpẽrarãpa ẽpẽerãpa ne p'ue oodak'apɨ́ ununaipɨ. Mãɨ k'orea ẽpẽrarã minachia wap'eadaipɨ.

¹² »Maamina mãɨ naena mãra ẽp'ẽnaipɨ mĩapidai k'orea. Waapẽarã jitadak'ari judiorã ará pedeapataɨ tedea ateewãnaipɨ. Maapae ak'ɨdak'ari eda jɨ̃a nɨbɨpidaipɨ. Ichiaba mɨne ĩjãa p'anɨ k'orea mãra chi tua chaarearã k'ĩrari mãɨnepa chi minachia k'awa p'anɨrã k'ĩrari ateedaipɨ.

¹³ Mãɨne mãrapa mɨ k'orea ãchi k'ĩrari pedeadaipɨ.

¹⁴ Maamina k'ɨ̃risiarãt'ɨ mãɨ ewaride chi minachia k'awa p'anɨrã́ k'ãre jaradait'a mãra nepɨrawẽa p'anɨ k'awapidai k'orea.

¹⁵ Mɨapuru mãrá k'ɨ̃risia teaipɨ pia pedeadamẽrá. Mãɨpuru mãrapa jarautat'a mãra unuemaa p'anɨpa mi ãpia pida p'ue k'achia pedeadaiwẽma.

¹⁶ »Ara mãra ak'õrepa, mãra ũpẽarãpa, mãra ẽpẽrarãpa, mãra k'õp'ãerorã pida mãra jitapidaipɨ. Mãɨya mãranepema peapidaipɨ.

¹⁷ Mɨne ĩjãa p'anɨ k'orea jõmãɨrãpa mãra unuemaanaipɨ.

¹⁸ Maamina mãra jaore mɨa ewaricha minachia ak'ɨ baipɨ.

¹⁹ Mãɨ k'aadepema ewari parudea mɨne wapida ĩjãa p'anɨ itu bɨdaepɨra, Tachi Ak'õrepa mãɨ k'aripaipɨ.

²⁰ »Mãrapa ununaipɨ papaká berãpa Jerusalén p'uuru jũrautat'a. Mãɨ unuutade k'awadaipɨ chi p'uuru ãarea ãrinai ewari pasit'a.

²¹ Mãɨne Judea tuade berã eyadea isapea wãt'ɨ, Jerusalene be mĩruwãt'ɨ, chi p'uuru k'ait'a be p'uurudea wãrãt'ɨ.

²² Mãɨ ewaride Tachi Ak'õrepa ichi p'uuru ɨtɨaipɨ. Ichi k'art'ade bɨdada jõma mãɨyaipɨ.

²³ Mãɨ ewaride wẽrarã biak'oa berã mãɨnepa warra juto ua berã chupuria p'aneenaipɨ. Nãɨ tuade jõmãɨrã minachia mĩanaipɨ Tachi Ak'õrepa nãɨ p'uuru ɨtɨaru pẽra.

²⁴ Waapẽarã k'ĩruuparí nek'opa k'enanaipɨ mãɨnepa waapẽarã tua becha jita ateek'oadaipɨ. Mãɨne judiorãwẽpa Jerusalén ãchi juade uru p'ananaipɨ aba Tachi Ak'õrepa bɨda ewaridea.

Ẽpẽra Warra chei k'orea

²⁵ »Mãrapa ɨmata, jedek'o, k'ãk'ãi sida k'ĩra awara ununaipɨ. Mãɨpa unupiipɨ ewari k'achia cherut'a. Mãɨ k'orea nãɨ ĩjũane ẽpẽrarã minachia p'eradaipɨ. Ãchia k'awa k'ɨ̃risiadaiwẽma p'usa k'ĩruu nɨbɨpa chi minachia jĩk'ua nɨbɨ pẽra.

²⁶ Pajãne be k'ĩra awara beerude ẽpẽrarã minachia p'eradaipɨ. Nãɨ ĩjũa k'achia nɨbɨ unu p'anɨ pẽra p'erapa piubari p'aneenaipɨ.

²⁷ Mãɨneepuru ununaipɨ mɨ, chi Ẽpẽra Warra jɨ̃arane jua chaareadepa cherut'a, mãɨnepa k'ĩrawãrea achiterrea bɨt'a.

²⁸ Mãɨ unuutade arapaat'ɨ, mãra k'aripai ewari ara paru pẽra».

²⁹ Maapae Jesupa nepɨrɨdepa nãɨya jarasima: «Higo bɨɨrɨ wa pak'uru awaraɨ k'orea pia ak'ɨt'ɨ.

³⁰ Pak'uru k'irú t'uk'uk'oarude mãrapa k'awapatama tãaraawẽa bɨde iu p'oit'a.

³¹ Ara mãɨ jĩra mãrapa ãarea mãɨ unuutade k'awadaipɨ Tachi Ak'õrepa ichidirã ichi juade tãaraawẽa bɨde ua bait'a.

³² »Mɨa mãrá piarã jararuma: nãɨ ewaridepema ẽpẽrarã piudai naena mãɨ ãarea mãɨyaipɨ.

³³ Pajã mãɨnepa nãɨ ĩjũa jõipɨ, maamina mɨ pedea jõiwẽma.

^34-35 »Jĩrak'aua p'anat'ɨ Tachi Ak'õre itu bɨdaemaapa. It'ua to p'anarãt'ɨ, ne k'ɨ̃risiawẽa p'anat'ɨ mãɨnepa tachi k'ak'uapa oo k'ɨ̃ria bɨ oorãt'ɨ. Jĩrak'aua p'ananaepɨra, ãnimara k'idap'ede baepari jĩra, mãɨ jĩra mãra atua p'anɨne mɨ mãicha cheipɨ. Mãɨ ewari cherude nãɨ ĩjũanepemarã ãarea sõ pará p'ananaipɨ.

³⁶ Mãɨ k'orea minachia jĩrak'aua p'anat'ɨ. Tachi Ak'õrea ewaricha ɨt'aa chiidi p'anat'ɨ mãɨ ewari k'achiadepema k'aripadai k'orea mãɨnepa mɨ, chi Ẽpẽra Warra k'ĩrari p'eradawẽa p'ananai k'orea».

³⁷ Jesupa Tachi Ak'õre te eda ãsã jaratea bak'ari teamasi Olivo eyadea wãpachima.

³⁸ Mãɨpuru tap'ededa ẽpẽrarã Tachi Ak'õre te minachia bɨdea wãpachidama Jesupa jaratea bɨ ũrinai k'orea.