Luca 2 - Tachi Ak'õre Pedea

Jesú t'õna ewari

¹ Mãɨ ewaride Romanepema chi atepe poro chaarea bɨ Augusto apataɨpa ẽpẽrarã ichi juade ua bɨdepemarã ãarea joisiapisima.

² Mãɨ ewaride Cirenio Siria ĩjũane chi chaarea bɨ paside mãɨ chi naa ẽpẽrarã joisiapida pasima.

³ Mãɨne jõmãɨrã ãchi p'uurucha wãsidama joisiadamẽrá.

⁴ Mãɨ ewaride José Galilea tuade Nazaré p'uurude bapachima. Ichi Davidepa cheda pẽra Judea tuade Belén p'uurudea wãsima. Belén Daví t'õna p'uuru pasima.

⁵ Ichi k'ima pai bɨ María ome wãsima ãchi joisiadamẽrá. Mãɨ ewaride María biak'oa basima.

⁶ Belene p'anɨne María warra t'õi ewari pasima.

⁷ K'ãipataɨ te pari newẽ pẽra ichi warra ĩwini t'õna p'arupa pɨrak'ari ãnimara nek'opataɨde eda bɨsima.

Tachi Ak'õrepa ɨt'aripa peeda oveja ak'ɨpataɨrã́ unupida

⁸ Mãɨ teamasi oveja ak'ɨpataɨrãpa ãchi oveja Belén k'ait'a ak'ɨ p'anasidama.

⁹ Mãɨya bɨde Tachi Chiparipa ɨt'aripa peedapa ãchiá unupisima. Mãɨne Tachi Ak'õre k'ĩrawãrea achiterrea bɨ ãchik'á minachia ɨnaa jẽrat'ĩusima. Mãɨ k'orea oveja ak'ɨpataɨrã minachia p'erasidama.

¹⁰ Maamina Tachi Ak'õrepa ɨt'aripa peedapa ãchiá jarasima: «Wap'earãt'ɨ. Mɨa pedea pia mãrá jarade chesima. Mãɨ pedea k'orea jõmãɨrã sõ arapá p'aneenaipɨ.

¹¹ Idi Daví t'õna p'uuru Belene mãra k'aripaparí t'õsima. Ichi Cristopɨ, Tachi Chiparipɨ.

¹² Nãɨnepa mãrapa k'awadaipɨ mɨa piarã jararu: mãrapa mãɨ warra chak'e p'arupa pɨra bɨ ãnimara nek'opataɨde ununaipɨ».

¹³ Ara mãɨne Tachi Ak'õrepa ɨt'aripa peedarã chok'ará unupisima. Jõma ãchia Tachi Ak'õre k'orea nãɨya pia pedeasidama:

¹⁴ «¡Tachi Ak'õre ɨt'ɨ pajãne bɨ pi-ia bɨma! ¡Tachi Ak'õrepa pia unu bɨ ẽpẽrarã nãɨ ĩjũane ne k'ɨ̃risiadawẽa p'ananaima!»

¹⁵ Maapae Tachi Ak'õrepa ɨt'aripa peedarã pajãnea wãsidama. Mãɨne oveja ak'ɨpataɨrãpa ara ãchit'u jarasidama: «Wãtɨma Belenea, Tachi Chiparipa jara peeda ak'ɨdai k'orea».

¹⁶ Ara mãɨne isapea wãsidama. Mãma padak'ari María, José, chi warra chak'e ome unusidama. Warra chak'e ãnimara nek'opataɨde eda basima.

¹⁷ Mãɨ ununak'ari Tachi Ak'õrepa ɨt'aripa peedapa chi warra k'orea jarada ãchia jõmãɨrã́ nepɨrɨsidama.

¹⁸ Chi oveja ak'ɨpataɨrãpa jara p'anɨ ũrisidaɨde jõmãɨrãpa mãɨ k'orea k'awa k'ɨ̃risiadawẽa p'aneesidama.

¹⁹ Maamina chi nae Mariapa mãɨ ãarea ichi sõne minachia k'ɨ̃risia bapachima.

²⁰ Oveja ak'ɨpataɨrã jĩitea wãutade ãchia ununana k'orea mãɨnepa ũrinana k'orea Tachi Ak'õre k'orea pia pedeasidama. Tachi Ak'õrepa ɨt'aripa peedapa jarada jĩra piarã jõma mãɨyasima.

Jesú Tachi Ak'õre te minachia bɨdea enemeenana

²¹ Warra t'õk'ari ewari k'ak'o ocho pa bɨde chi warra k'ak'ua tauchaasidama. Mãɨne ichi t'ɨ̃ Jesú bɨsidama, chi nae biak'oai naena Tachi Ak'õrepa ɨt'aripa peedapa jarada jĩra.

²² María warra t'õk'ari, chi judiorã wẽerãpa nɨpachida jĩra ãarea ara mãɨya oosima, Moisepa bɨdade bɨ bɨ jĩra. Mãɨ ewari parude, ichia chi ak'õre ome warra chak'e Jerusalenea ateewãsidama Tachi Chipari k'ĩrari bɨdai k'orea.

²³ Mãɨya oosidama Tachi Chiparipa Moisea bɨpidade nãɨya bɨ bɨ pẽra: «Jõma warra ĩwini Tachi Chiparia teadai pia bɨma».

²⁴ Mãɨ awara Tachi Ak'õre k'ĩrari pia p'aneenai k'orea chi naepa mãɨnepa chi ak'õrepa p'aloma paapisidama Tachi Chiparipa Moisea bɨpidade nãɨya bɨ bɨ pẽra: «P'aloma wa soerre ume paateai pia bɨma».

²⁵ Mãɨ ewaride ẽpẽra Simeón apataɨ Jerusalene basima. Mãɨ Simeón jĩp'a basima mãɨnepa Tachi Ak'õrepa jara bɨ jĩra pia oopachima. Ichia nɨ basima Tachi Ak'õrepa Israel p'uuru sõpiapii ewarit'a. Tachi Ak'õre Jaore ichi ome basima.

²⁶ Naena Tachi Ak'õre Jaorepa ichiá k'awapisima ichi k'ĩrawẽai naena Tachi Chiparipa Tachi K'aripaparí teai jarada unuit'a.

²⁷ Moisepa bɨdade bɨ bɨ jĩra oodai k'orea, Jesú ak'õrepa chi nae ome ichi Tachi Ak'õre te minachia bɨdea ateewãsidaɨde, Tachi Ak'õre Jaorepa Simeón ará wãpisima.

²⁸ Simeónpa chi warra unuk'ari, jirak'ari maapae Tachi Ak'õrea nãɨya pia jarasima:

²⁹ «Mɨ Chipari, jãɨyapuru pɨ pae pari mimiaparí ne k'ɨ̃risiawẽa piupise, pɨa jarada jĩra ooda pẽra.

³⁰ Pɨa Tachi K'aripaparí teai jarada mɨá unupisima.

³¹ Pɨa ichi bɨsima ãarea p'uurudepemarãpa ununamẽrá.

³² Ichi ɨnaa jĩra baipɨ judiorãwẽpa pɨ k'orea k'awadamẽrá. Ichi k'orea, pɨ p'uuru Israel k'orea pia jaradaipɨ».

³³ Simeónpa ãchi warra k'orea jara bɨ ũrisidaɨde Jesú ak'õrepa chi nae ome k'awa k'ɨ̃risiadaé pasima.

³⁴ Mãɨne Simeónpa ãchiá pia jarak'ari Mariá nãɨya jarasima: —Tachi Ak'õrepa nãɨ warra teasima israeldepemarã chok'araɨrã pia bɨmẽrá mãɨnepa ichiaba chok'araɨrã piawẽa bɨyá. K'awapiipɨ ichi Tachi Ak'õrenepa che bɨt'a, maamina ichi k'orea k'achia pedeadaipɨ.

³⁵ Mãɨya chok'araɨrãpa ãchi sõne mẽra uru be unupiipɨ. Ichiaba pɨ minachia sõp'ua baipɨ k'ĩruuparí nek'opa su bɨ jĩra.

³⁶ Arí Tachi Ak'õre pari pedeaparí Ana apataɨ basima. Ichi Aserdepa cheda P'anuel k'au pasima. Ichi chõtã́ basima. Ãwẽra bɨt'a k'ima atak'ari siete ãyo bɨde p'ẽtã́ pasima.

³⁷ Ichi p'ẽtã́ beeda ãyo 84 basima. Ewaricha ãst'á, teamasi pida Tachi Ak'õre te minachia bɨdea wãpachima Tachi Ak'õrea pia pedeai k'orea, Tachi Ak'õrene k'ɨ̃risiadayá nek'odak'apɨ́ ewaride ooi k'orea mãɨnepa Tachi Ak'õrea ɨt'aa chiidii k'orea.

³⁸ Mãɨ chõtã́ Jesú ak'õre mãɨnepa chi naemá orrobarik'ari Tachi Ak'õrea sõpia bayade asima. Maapae chi Tachi Ak'õrepa Jerusalén p'uuru k'aripai ewari nɨ p'anɨrã́ chi warra chak'e k'orea pedeasima.

³⁹ Moisepa bɨdade bɨ jĩra jõma ook'ari José, María ome Galilea tuade ãchi p'uuru Nazaredea jĩitea wãsidama.

⁴⁰ Chi warra warisima mãɨnepa Tachi Ak'õre Jaoredepa chaarea beesima. Ichia minachia k'awasima mãɨnepa Tachi Ak'õrepa ne ãareane ichi k'aripapachima.

Jesú Tachi Ak'õre te minachia bɨde bada

⁴¹ Ãyocha Jesú ak'õre mãɨnepa chi nae Jerusalenea wãpachidama judiorã Egitodepa wãnana k'ɨ̃risiapataɨ ewari oodai k'orea.

⁴² Jesú doce ãyo baside ãchi wãsidama mãɨ arapaapataɨ ewari oodai k'orea jõma judiorãpa oopataɨ jĩra. Jesú sida ãchi ome wãsima.

⁴³ Mãɨ arapaapataɨ ewari jõk'ari ãchi jĩitea wãsidama. Maamina ãchi warra Jesú Jerusalene beesima. Mãɨ ãchia atua p'anasidama.

^44-45 K'ɨ̃risia p'anasidama Jesú ẽpẽrarã t'ãena nipasit'a. Mãɨya ewari aba pa basima. K'ewará ichi jɨrɨsidaɨde ãchi ẽpẽrarã t'ãena ununaé pasima. Ara mãɨne jĩitea Jerusalenea Jesú jɨrɨde wãsidama.

⁴⁶ Ewari ũpeaɨde ichi unusidama Tachi Ak'õre te eda Moisepa bɨda jarateapataɨrã t'ãena suak'abari bɨt'a. Ãchia jaratea p'anɨ ũri basima mãɨnepa ãchiá ne idipachima.

⁴⁷ Mãɨne ãchia idi p'ananat'a ichia pia p'anoopachima. Jõma ichi ũri p'anɨpa k'awa k'ɨ̃risiadaé pasima ichi k'ɨ̃risiadepa p'anoo bɨẽra.

⁴⁸ Ichi ak'õre mãɨnepa chi naepa ichi unusidaɨde k'awa k'ɨ̃risiadaé pasima. Chi naepa ichiá idisima: —Warra, ¿pɨa k'ãre k'orea jãɨya oosima? ¿K'ãre k'orea nãma beesima? Minachia sõp'ua k'ɨ̃risia p'anɨpa mɨa, pɨ ak'õre pida pɨ jɨrɨ p'anasidama.

⁴⁹ Jesupa p'anoosima: —Mãrapa ¿k'ãre k'orea mɨ jɨrɨ p'anasidama? ¿Mɨ Ak'õre tede bai bɨt'a k'awadawẽa p'anɨk'ãra?

⁵⁰ Maamina ãchia Jesupa jarada k'awadaé pasima.

⁵¹ Maapae Jesú ãchi ome Nazaredea wãsima. Mãma ãchi ome chok'ea bapachima. Jõma Jerusalene mãɨyana chi naepa minachia pia k'ɨ̃risia bapachima.

⁵² Jesú k'ak'ua ɨbɨa warisima mãɨnepa ewaricha ne k'awapodosima. Tachi Ak'õrepa, ẽpẽrarã pida mãɨ pia unusidama.