Luca 19 - Tachi Ak'õre Pedea

Zak'eopa Jesú ununa

¹ Jesú Jericó p'uurude pak'ari p'uurujãne nipasima.

² Mãma ẽpẽra Zak'eo apataɨ basima. Mãɨ Zak'eo Romanepema pae erreara jɨrɨp'epataɨrã chi chaarea bɨ pasima. Erreara pará basima.

³ Ichia Jesú unu k'ɨ̃ria basima. Maamina ẽpẽra k'ak'at'ua k'ɨrɨẽra p'ue unuk'a pasima, ẽpẽrarã minachia nɨbɨdeepuru.

⁴ Mãɨpuru Jesú wãru naa p'ira wãk'ari, sicomoro pak'urude ɨt'ɨ ak'ɨde wãsima, Jesú mãmá wãi pasi pẽra.

⁵ Mãɨya bɨde Jesú mãma arí pak'ari, ɨt'aa ak'ɨk'ari jarasima: —Zak'eo, isapea edá chese. Idi mɨ pɨ tede k'ãine wãipɨ.

⁶ Ara mãɨne mãɨ Zak'eo arapá edá chek'ari Jesú ichi tiidá ateewãsima.

⁷ Mãɨ ununak'ari jõmãɨrãpa Jesú k'orea mãɨya piawẽa pedea para beesima: «¡Jãɨ Jesú ẽpẽra nemietá ooparí tede k'ãine wãsima!».

⁸ Ichi tiida padak'ari Zak'eo Jesú k'ĩrari bai nɨbeek'ari jarasima: —Mɨ Chipari, nenea k'ederã́ mɨa erreara mãɨnepa neet'á uru bɨdepema ak'ɨk'ari, abarik'a teaipɨ. Mãɨ awara erreara aba sea chɨa badapɨra, mãɨ aba chɨada pari bari k'ak'o k'ĩmari teaipɨ.

⁹ Jesupa ichiá jarasima: —Idi Tachi Ak'õrepa pɨ, pɨ tiidaɨrã sida k'aripasima, pɨa ĩjãa bɨẽra Abrahanpa ĩjãana jĩra.

¹⁰ Piarã mɨ, chi Ẽpẽra Warrapa chi o atua berã jɨrɨde chesima k'aripai k'orea.

Jesupa erreara k'orea nepɨrɨda

¹¹ Jesú Jerusalén k'ait'a bɨẽra chi arí p'anɨpa k'ɨ̃risia p'anasidama ara mãɨ ewaride Tachi Ak'õrepa ichidirã ichi juade ua beeit'a. Jesupa jara bɨ ũri p'anɨ pẽra nepɨrɨdepa nãɨya jarasima:

¹² «Ẽpẽra chi chaarea bɨ tua awaraɨdea t'ɨmɨa wãsima jõmãɨrã atepe k'awa bɨpa ara ichi tuadepema minachia k'awa bɨ bɨmẽrá. Ichia k'ɨ̃risiasima mãɨya bak'ari jĩitea cheit'a.

¹³ Wãi naena chi ichi pae pari mimiapataɨrã diez t'ɨ̃k'ari erreara minachia ãchicha teasima. Mãɨne jarasima: “Mɨ cherumisa nãɨ erreara eapapit'ɨ”.

¹⁴ Maamina ichi tuadepemarãpa ichi unuemaa p'anɨ pẽra, ẽpẽrarã peesidama jõmãɨrã minachia k'awa bɨ chi chaarea bɨa nãɨya jaradamẽrá: “Taipa k'ɨ̃riawẽa p'anɨma jãɨ tai minachia k'awa bɨ pait'a”.

¹⁵ »Maamina chi minachia k'awa bɨ bɨsima. Jĩitea chek'ari chi ichi pae pari mimiapataɨrã t'ɨ̃k'oasima ichia erreara teada eapapisida k'awai k'orea.

¹⁶ Mãɨne aba naa chek'ari jarasima: “Mɨ chipari, chi pɨa erreara teadadepa mɨa bari k'ak'o diez atepe eapapisima”.

¹⁷ Mãɨ k'orea chi minachia k'awa bɨpa jarasima: “Mɨ pae pari mimiaparí, piapɨ. Mɨa ãpia teadadepa pɨa arí ooda pẽra mɨa pɨ juade p'uuru k'ak'o diez bɨipɨ”.

¹⁸ Abaɨ ichi pae pari mimiaparí chek'ari jarasima: “Mɨ chipari, pɨa erreara teadadepa mɨa bari k'ak'o joesoma atepe eapapisima”.

¹⁹ Mãɨpuru chi minachia k'awa bɨpa jarasima: “Mɨa p'uuru k'ak'o joesoma pɨ juade bɨipɨ”.

²⁰ »Maapae chi k'aadea ichi pae pari mimiaparí chek'ari jarasima: “Mɨ chipari, pɨa erreara teada nãma bɨma. Mɨa p'arude yaa uru basima.

²¹ Mãɨya oosima pɨ wap'ea bɨẽra. Mɨa k'awa bɨma pɨa k'ĩra chupuria idik'ama chĩarané atai k'orea. Mãɨ awara waapẽarãpa uudadadepa pɨ baparima”.

^22-23 »Mãɨ k'orea chi minachia k'awa bɨpa jarasima: “Mɨ pae pari mimiaparí, ¡pɨ piawẽa bɨma! Piarã pɨchia jarasidepa k'awa bɨma mɨa pɨa ne oopade ada pada oowẽa bɨt'a. Pɨa mɨ mãɨya bɨ k'awa basipɨra ¿k'ãre k'orea erreara yaapataɨ tede mɨ erreara yaaé pasima? Mãɨya oodapara mɨ erreara atepe eapai pasima”.

²⁴ »Maapae chi minachia k'awa bɨpa chi arí tuanarã́ jarasima: “Ichia uru bɨ ẽemarinak'ari chi diez uru bɨa teat'ɨ”.

²⁵ Ãchia jarasidama: “Maamina, tai chipari, ichia diez uru bɨma”.

²⁶ Chi minachia k'awa bɨpa jarasima: “Mɨa jararuma: Abaɨpa Tachi Ak'õre k'orea piarã k'awaipɨra, Tachi Ak'õrepa mãɨ atepe k'awapiipɨ. Maamina chi atua bɨpa ne k'awa bɨ k'ɨ̃risiaipɨra, ichia k'ɨ̃risia bɨ sida Tachi Ak'õrepa mãɨ ẽemariipɨ”.

²⁷ “Mãɨ awara mɨ ãchi minachia k'awa bɨ pai k'ɨ̃riawẽa p'anana jitadak'ari mɨ k'ĩrari k'enat'ɨ”».

Jesú Jerusalene cheda

²⁸ Mãɨya jarak'ari Jesú ãchi naa Jerusalenea wãsima.

²⁹ Wãrune Betp'aké p'uuru mãɨnepa Betania p'uuru k'ait'a Olivo eyadea chesima. Maapae ichi ome p'ɨrrɨapataɨrã ume p'uurudea peesima.

³⁰ Ãchiá nãɨya jarasima: «P'uuru k'ĩrari bɨdea wãt'ɨ. Mãma pautade mãrapa mũra chae ununaipɨ. Mãɨ mũra chae ɨ̃rɨ aba pida bat'oodak'a pasima. Ẽranak'ari nãmá enemeet'ɨ.

³¹ Abaɨpa mãrá k'ãre k'orea mãɨya oo p'anɨane a idiipɨra, nãɨya jarat'ɨ: “Tachi Chiparipa nãɨ k'ɨ̃ria bɨma”».

³² Mãɨne wãnak'ari Jesupa ãchiá jarada jĩra unusidama.

³³ Mũra ẽra p'anɨne chi chiparirãpa ãchiá idisidama: —¿K'ãre k'orea mãɨ mũra jãɨya ẽramaa p'anɨma?

³⁴ Ãchia p'anoosidama: —Tachi Chiparipa k'ɨ̃ria bɨma.

³⁵ Ara mãɨne mũra Jesumá ateewãnak'ari ãchia anamari jɨ̃ p'anana chi mũra ɨ̃rɨ bɨdak'ari, maapae Jesú mãɨ ɨ̃rɨ batoopisidama.

³⁶ Jesú wãru naa ẽpẽrarãpa chi ãchia anamari jɨ̃ p'anana wẽanak'ari, ojãne t'õk'oasidama ichiá pia pedeadai k'orea.

³⁷ Jesú Olivo eyadepa edá wãpataɨ o k'ait'a padak'ari jõma ichi ome p'ɨrrɨapataɨrãpa Tachi Ak'õrea jĩk'ua pia pedea tuaneesidama. Sõ arapá p'anasidama Jesupa ẽpẽrarãpa ne p'ue oodak'apɨ́ ãchi k'ĩrari oo bada pẽra.

³⁸ Ãchia jara tuanasidama: «¡Minachia pia bɨma tachi Poro jũra jɨ̃parí jɨ̃ bɨt'a, chi Tachi Chipari t'ɨ̃nepa cheru! ¡Naapae Tachi Ak'õre ome nek'ĩramariwẽa tuananaipɨ! ¡Pajãne Bɨ chi Atepe bɨma!»

³⁹ Mãɨ k'orea waapẽarã p'ariseorã arí p'anɨpa Jesua jarasidama: —Jarateaparí, ¡pɨ ome p'ɨrrɨapataɨrã k'ĩup'eapise!

⁴⁰ Maamina Jesupa ãchiá jarasima: —Mɨa piarã mãrá jararuma, ãchi k'ĩup'eadaipɨra mawara biadaipɨ.

⁴¹ Jesú Jerusalén k'ait'a cherude, chi p'uuru unusima. Mãɨ p'uuru k'orea jẽasima.

⁴² Mãɨne jarasima: «¡Pɨa k'awarupara nãɨ ewaride k'aipa pɨ nek'ĩramariwẽa bɨit'a! Maamina tau pɨra bɨ jĩra bɨẽra pɨa mãɨ p'ue k'awawẽma.

⁴³ Mãɨpuru ewariaba pɨ chi nek'ĩramá pɨ ome chõone chedaipɨ. Pɨ adu jũramarinak'ari pɨ ik'idá mawara yooro ome jũk'adaipɨ aba pida wãpidaemaapa.

⁴⁴ Pɨ te oodada t'erap'et'autade pɨ ẽpẽrarã sida ãarea k'enanaipɨ. Ãchia aba pida mawara abaɨ ɨ̃rɨ ameenaiwẽma. Mãɨya oodaipɨ Tachi Ak'õrepa peeda k'aripaparí pɨa k'awaé pasi pẽra».

Jesupa ne netopataɨrã ãyá jerek'oada

⁴⁵ Jesú Tachi Ak'õre te eda cherude unusima Tachi Ak'õrea ne teadayá netopataɨrã. Ãchi ãyá jeret'aak'oasima. Nãɨya jarasima:

⁴⁶ —Tachi Ak'õre pedeade nãɨya bɨ bɨma: “Mɨ te ɨt'aa chiidipataɨ teade adaipɨ”. Maamina mãrapa “nechɨapataɨ te uria bɨ jĩra” papisidama.

⁴⁷ Jesupa ewaricha Tachi Ak'õre te eda jaratea bapachima. Mãɨne p'aarerã chi mãɨrã chaarearãpa, Moisepa bɨda jarateapataɨrãpa mãɨnepa ẽpẽrarã chi atepe berãpa ichi pea k'ɨ̃ria p'anasidama.

⁴⁸ Maamina p'ue peadaé pasima jõmãɨrãpa ichi pedea ewaricha ũri p'anɨ pẽra.