Luca 18 - Tachi Ak'õre Pedea

P'ẽtãpa itu bɨwẽa idi bada

¹ Jesupa nepɨrɨdepa jarateasima Tachi Ak'õrea sẽnawẽa ɨt'aa chiididai p'anɨ.

² Nãɨya jarasima: «P'uurude nepɨra ak'ɨparí basima. Ichia Tachi Ak'õre, ẽpẽerã paara wap'eak'a pasima.

³ Ara mãɨ p'uurude p'ẽtã́ basima. Mãɨ abaɨ ome nepɨra pará basima. Mãɨpuru ewaricha wãpachima chi nepɨra ak'ɨparipa k'aripamẽrá.

^4-5 Maamina wãrucha chi nepɨra ak'ɨparipa ichia jararut'a ũrii k'ɨ̃riak'a pasima. Maamina minachia itu bɨwẽa bɨẽra ara ichi tuaba jarasima: “Mɨa Tachi Ak'õre, ẽpẽerã paara wap'eak'ama. Maamina nãɨ wẽra paritua che bɨẽra mɨ sẽpii naena ichia jara bɨ ooipɨ”».

⁶ Maapae Tachi Chipari Jesupa jarasima: «K'ɨ̃risiat'ɨ chi nepɨra ak'ɨparí sõpiawẽa bɨpa jarada.

⁷ Tachi Ak'õrepa jɨrɨ atadaɨrãpa ãst'á mãɨnepa teamasi chichupuria idi p'anɨne ¿ichia jĩp'a oo bɨdepa k'aripaiwẽk'ãra? ¿Tãaraaik'ãra p'anooi k'orea?

⁸ Mɨa jararuma: piarã tãaraawẽa bɨde Tachi Ak'õrepa k'aripaipɨ. Maamina mɨ, chi Ẽpẽra Warra cherude ¿nãɨ ĩjũane wapida mɨ pedea ĩjãa p'anɨ unune cheik'ãra?»

P'ariseo mãɨnepa Romanepema pae erreara jɨrɨp'eparí

⁹ Waapẽarãpa ara ãchit'a jĩp'a be k'ɨ̃risia p'anasidama. Mãɨpuru ununaemaa uru p'anapachidama. Jesupa ãchiá nepɨrɨdepa nãɨya jarasima:

¹⁰ «Ẽpẽra ume Tachi Ak'õre te minachia bɨdea ɨt'aa chiidide wãsidama. Aba p'ariseo pasima. Chi abaɨ Romanepema pae erreara jɨrɨp'eparí pasima.

¹¹ P'ariseo bai nɨbɨpa ara ichia nãɨya ɨt'aa chiidisima: “Tachi Ak'õre, mɨ sõpia bɨade pɨá aipɨ mɨ waapẽarã jĩra bak'a pẽra. Ãchi nechɨapatama, nemietá oopatama, wẽra awaraɨ ome k'ãipatama. Ichiaba mɨ jãɨ Romanepema pae erreara jɨrɨp'eparí jĩra bɨwẽma.

¹² Tomiocha bari k'ak'o ume Tachi Ak'õrene k'ɨ̃risiadayá nek'odak'apɨ́ ewari ooparima mãɨnepa ne diez jitarudepema mɨa pɨá aba teaparima”.

¹³ »Mãɨne Romanepema pae erreara jɨrɨp'eparí t'ɨmɨwẽa basima. Maamina pajãnea ak'ɨé pasima. Mãɨpari sõp'uadepa ichi p'echumá sĩk'ari jarasima: “Tachi Ak'õre, mɨ k'ĩra chupuriase. Mɨa minachia nemietá ooparima”.

¹⁴ »Mɨa mãrá jararuma: mãɨ p'ariseo k'aepẽra mãɨ ẽpẽra tedea wãside Tachi Ak'õre k'ĩrari jĩp'a basima. Chi atepe bai k'ɨ̃ria bɨ, Tachi Ak'õrepa mãɨ wariwẽa bɨipɨ. Abaɨ pida ara ichi ãpia bɨ jĩra k'ɨ̃risiasira Tachi Ak'õrepa mãɨ chi atepe bɨ jĩra bɨipɨ».

Jesupa warrarã́ pia jarada

¹⁵ Mãɨne waapẽarãpa ãchi warra chak'erã Jesumá enemeesidama ichi jua ɨ̃rɨ bɨk'ari pia jara bɨmẽrá. Jesú ome p'ɨrrɨapataɨrãpa mãɨ unusidaɨde chi warrarã enemeedaadarã ɨtɨasidama.

¹⁶ Maamina Jesupa warrarã t'ɨ̃k'oak'ari ichi ome p'ɨrrɨapataɨrã́ jarasima: Warrarã mɨmá itu chepit'ɨ, ãchi chi Tachi Ak'õrepa ichidirã ichi juade ua bɨ jĩra p'anɨ pẽra.

¹⁷ Mɨa piarã jararuma: warra chak'e ichi ak'õre k'aade wãpari jĩra abaɨ pida Tachi Ak'õre k'aade wãepɨra, mãɨ ẽpẽra Tachi Ak'õre juade baiwẽma ichidirã paara.

Erreara minachia uru bɨ Jesú ome pedeada

¹⁸ Ẽpẽrarã chi chaarea bɨpa Jesua idisima: —Pia jarateaparí, Tachi Ak'õre ome ewaricha chok'ae bai k'orea ¿mɨa k'ãre ooi bɨma?

¹⁹ Jesupa ichiá jarasima: —¿K'ãre k'orea mɨ pia bɨade a bɨma? Aba pida pia bɨwẽma; abapuru Tachi Ak'õret'u pia bɨpɨ.

²⁰ Pɨa k'awa bɨma Tachi Ak'õrepa oopi bɨ pedea. Nãɨya jara bɨma: wẽra awaraɨ ome k'ãirãse, ẽpẽra pearãse, nechɨarãse, sea jararãse chĩara k'orea, pɨ ak'õre pɨ nae ome wap'ea base.

²¹ Chi ẽpẽrapa p'anoosima: —K'ũtãenapema mɨa mãɨ ãarea oo bɨma.

²² Mãɨ ũrik'ari Jesupa ichiá jarasima: —Wapida ne aba ooiwẽa bɨma: pɨa ne uru bɨ ãarea netok'ari erreara chi nenea k'edea jedase. Mãɨya nepia pajãne uru baipɨ. Maapae mɨ ome p'ɨrrɨade chese.

²³ Mãɨ ũriside chi ẽpẽra k'ĩra piawẽa beesima, erreara minachia uru bɨẽra.

²⁴ Jesupa ichi mãɨya bɨ unuside nãɨya jarasima: —Piarã chi t'aju bɨma ẽpẽra ɨbɨa bɨ Tachi Ak'õre juade bai k'orea, ichidirã paara.

²⁵ T'ajuwẽa bɨma camello akuja ãtaude eda wãit'a, mãɨ chi ẽpẽra errearadepa ɨbɨa bɨ Tachi Ak'õre juade bai k'aepẽra.

²⁶ Mãɨ ũrinaanapa idisidama: —Mãɨyara Tachi Ak'õrepa ¿k'ait'a k'aripaima?

²⁷ Jesupa p'anoosima: —Ẽpẽrapa mãɨ p'ue ook'ama maamina Tachi Ak'õremá ne chi t'aju bɨ newẽma.

²⁸ Mãɨne Pedropa jarasima: —Taipa ne ãarea ameesidama pɨ ome wãnai k'orea.

^29-30 Jesupa ãchiá jarasima: —Mɨa piarã jararuma: abaɨ sida Tachi Ak'õre juade bai k'orea ichidirã paara, ichi te, ak'õre, nae, ũpẽarã, k'ima, warrarã sida ameeipɨra, ichia ameena k'aepẽra nãɨ ewaride ne minachia atepe uru baipɨ. Ichiaba chi k'aadeapema ewaride Tachi Ak'õre ome ewaricha chok'ae baipɨ.

Jesupa ichi peadai k'orea aba mãicha jarada

³¹ Jesupa doce peedaɨrã awara ateewãk'ari jarasima: «Tachi Ak'õre pari pedeapataɨrãpa mɨ, chi Ẽpẽra Warra k'orea k'art'ade bɨsidama. Tachi Jerusalene cheutade ãchia bɨdada jõma mãɨyaipɨ.

³² Waapẽarãpa mɨ judiorãwẽa teadaipɨ. Mɨ oo uru p'ananaipɨ, k'achia pedeadaipɨ mãɨnepa mɨ k'ĩtarra taba idudaipɨ.

³³ Maapae mɨ soapa p'edak'ari peadaipɨ. Maamina ewari ũpeaɨde mɨ chok'ae p'irabariipɨ».

³⁴ Mãɨpuru ichi ome p'ɨrrɨapataɨrãpa mi ãpia pida k'awadaé pasima. Ãchia k'awa k'ɨ̃risiadaé pasi pẽra atua p'anasidama ichia k'ãre jara bɨt'a.

Jesupa tau p'ãrio bɨ jɨpa beepida

³⁵ Jesú Jericó p'uuru k'ait'a cherude ẽpẽra tau p'ãrio bɨ o ik'idá erreara idi bɨ suak'abari basima.

³⁶ Ichia ẽpẽrarã ooroa cheuta ũriside idisima k'ãre k'orea mãɨya p'anɨ.

³⁷ Mãɨne waapẽarãpa jarasidama: —Jesú Nazaredepema cheru pẽra jãɨya ooroa p'anɨma.

³⁸ Mãɨpuru tau p'ãrio bɨpa jĩk'ua biasima: —¡Jesú, Davidepa cheda, mɨ k'ĩra chupuriase!

³⁹ Ichi Jesú naa wãutarãpa ɨtɨasidama k'ĩup'eamẽrá. Maamina jĩk'ua biasima: —¡Davidepa cheda, mɨ k'ĩra chupuriase!

⁴⁰ Mãɨ ũriside Jesú bai nɨbeesima. Maapae tau p'ãrio bɨ k'ait'a enemeepik'ari idisima:

⁴¹ —¿K'ãre k'ɨ̃ria bɨma mɨa ooit'a pɨ k'orea? Chi tau p'ãrio bɨpa p'anoosima: —Mɨ Chipari, mɨ taupa unu k'ɨ̃ria bɨma.

⁴² Jesupa jarasima: —Unu beese. Pɨa ĩjãana pẽra jɨpa beesima.

⁴³ Ara mãɨne unu beek'ari Jesú k'aade wãsima. Ichia Tachi Ak'õrea minachia pia jara nipasima. Mãɨ ununaanarã pida Tachi Ak'õrea pia jara p'aneesidama.