Luca 17 - Tachi Ak'õre Pedea

Tachi Ak'õrepa nemietá oopataɨrã ɨtɨaipɨ

¹ Jesupa ichi ome p'ɨrrɨapataɨrã́ jarasima: «Ẽpẽra nemietaade baepipataɨrã paraapɨ. Mãɨ ewaricha mãɨya baipɨ maamina chi waapẽarã́ nemietá oopiparí, mãɨ mĩa chupuri baipɨ.

² Abaɨpa chi ãpia k'ede nemietaade baepiipɨra, Tachi Ak'õrepa mãɨ ẽpẽra minachia ɨtɨaipɨ. Mãɨ minachia ɨbɨa ɨtɨai pẽra piipará bɨma mãɨ ẽpẽra obɨɨrɨde k'ũruma jɨ̃nak'ari p'usade edá t'aa peedait'a.

³ »Mãɨpuru jĩrak'aua p'anat'ɨ. Pɨ ũpẽapa pɨ nemietá ooipɨra, ichi ɨtɨase. Ichia nemietá ooda itu bɨipɨra mãɨ ooda k'ɨ̃risia atuase.

⁴ Ewari paritua nɨbɨde ichia pɨ bari k'ak'o siete nemietá ooipɨra, maapae bari k'ak'o siete pɨmá wãk'ari “mɨa nemietá ooda k'ɨ̃risia atuasiede” aipɨra, ichia ooda k'ɨ̃risia atuase».

Taiyá pia ĩjãapise

⁵ Mãɨne Tachi Chiparipa ichi peedaɨrãpa ichiá jarasidama: —Tai k'aripase pia ĩjãanai k'orea.

⁶ Tachi Chiparipa jarasima: —Mostaza net'a tau ãpia k'ɨrɨ jĩra mãrapa ãpia ĩjãa p'anɨpara, cha bɨ pak'urua “pɨ k'arra ẽut'aak'ari p'usadea wãpade” autade ara mãɨ pak'urupa mãra pedea ĩjãai pasima.

Chi chipari pae pari mimiaparipa ooi bɨ

⁷ »Chi pɨ pae pari mimiaparí ne uu ĩjũane mimia bak'ari wa oveja ak'ɨ bak'ari cherude ¿pɨa ichiá jaraik'ãra “suak'abari beese nek'omẽrá”?

⁸ Mãɨya jaraiwẽma. Mãɨpari jaraipɨ: “Ara nãɨena ne chuuse. Maapae neet'á pia jɨ̃k'ari chik'o mɨmá enemeese. Maapaepuru pɨ nek'oi bɨma”.

⁹ Pɨa jarada pɨ pae pari mimiaparipa ooda pẽra ¿pɨa ichiá pia bɨade aik'ãra? Mãɨya oowẽma ichia ooi bɨt'a ooda pẽra.

¹⁰ Ara mãɨ jĩra mãrapa oodai p'anɨ jõma oosidara nãɨya jaradai p'anɨma: “Tai pɨ pae pari mimiapataɨrã k'aepe k'edema; abapuru taipa oodai p'anɨt'a oosidama”.

Diez ẽpẽrarã aidapa k'ɨdade p'anɨ jɨpapida

¹¹ Mãɨya bak'ari Jesú Samaria ĩjũane mãɨnepa Galilea ĩjũane wãpodosima, Jerusalenea pai k'orea.

¹² P'uuru chak'ede cherude ẽpẽra diez aidapa k'ɨdade p'anɨ ichimá chesidama. Maamina ara k'ait'a chedaé pasima.

¹³ Jesua nãɨya jĩk'ua biasidama: —¡Jarateaparí, Jesú, tai k'ĩra chupuriase!

¹⁴ Jesupa ãchi unuside nãɨya jarasima: —P'aarerãmá wãt'ɨ mãra jɨpa p'aneenana ak'ɨdamẽrá. Ara mãɨne ãchi wãsidama. Wãutade abaeda jɨpa beek'oasidama.

¹⁵ Mãɨ unuside aba Tachi Ak'õrea jĩk'ua pia pedea bɨ Jesumá jĩitea chesima.

¹⁶ Jeeda bedabari k'obeek'ari Jesua sõpia bɨade asima ichi jɨpa beepida k'orea. Mãɨ ẽpẽra Samariadepema pasima.

¹⁷ Jesupa ichiá idisima: ¿Chi jɨpa p'aneenana diez p'anɨwẽk'ãra? Chi waapẽarã nueve ¿sãma p'anɨma?

¹⁸ Nãɨ judiowẽ awara ¿abaɨpa Tachi Ak'õrea pia pedeade jĩitea chewẽk'ãra?

¹⁹ Mãɨne Jesupa chi ẽpẽrá jarasima: —P'irabarik'ari ne k'ɨ̃risiawẽa wãse. Pɨa piarã ĩjãana pẽra jɨpa beesima.

Tachi Ak'õrepa ichidirã ichi juade ua bai k'orea jarada

²⁰ P'ariseorãpa Jesua idisidama: —¿Sãapae Tachi Ak'õrepa ichidirã ichi juade ua baima? Mãɨne Jesupa p'anoosima: —Tachi Ak'õrepa ichidirã ichi juade ua beerude, ẽpẽrarãpa mãɨ ununaiwẽma.

²¹ Mãɨpuru p'ue jaradaiwẽma: “Nãma bɨma” wa “Jãma bɨma”. Mãɨpari Tachi Ak'õre ẽpẽrarã sõnepuru chi chipari beeparima.

²² Maapae Jesupa ichi ome p'ɨrrɨapataɨrã́ nãɨya jarasima: —Ewari chaarea cheipɨ. Mãɨ ewaride mãrapa mɨ, chi Ẽpẽra Warra abaɨpa unu k'ɨ̃rianaipɨ, maamina ununaiwẽma.

²³ Mãɨne waapẽarãpa jaradaipɨ ichi nãma bɨ wa jãma bɨ. Maamina ak'ɨde wãrãt'ɨ. Ãchi k'aade wãrãt'ɨ.

²⁴ Pa p'up'urea wiwirá wãrune jõma nãɨ ĩjũa ɨnaaparima. Ara mãɨ jĩra mɨ, chi Ẽpẽra Warra cherude jõmãɨrãpa ununaipɨ.

²⁵ Maamina mãɨ ewari pai naena mɨ minachia mĩa bɨma. Ichiaba idiapaepema ẽpẽrarãpa mɨ itu bɨdai p'anɨma.

²⁶ »Chi Ẽpẽra Warra chei ewari mãɨ Noé ewaride bada jĩra baipɨ.

²⁷ Mãɨ ewaride ẽpẽrarã nek'opachidama, netoparí topachidama, miak'ãipachidama mãɨnepa chi k'aurã k'ima teak'oapachidama. Mãɨya p'anapachidama Noé p'ãp'orro nepalade batoorudea. Mãɨya bak'ari to minachia chek'ari ẽpẽrarã ãarea todepa piusidama.

²⁸ »Lot ewaride pida ara mãɨ jĩra basima. Ẽpẽrarã nek'opachidama, netoparí topachidama, ne netopachidama, ne uupachidama mãɨnepa te oopachidama.

²⁹ Maamina Lot Sodomanepa wãk'ari pajãnepa t'ɨpɨ urua k'oe jĩra chesima. Mãɨpa chi ẽpẽrarã ãarea paa k'enasima.

³⁰ »Mɨ, chi Ẽpẽra Warra cheru ewaride ara mãɨ jĩra mãɨyaipɨ.

³¹ Mãɨ ewaride chi te ɨ̃rɨ bɨ ichi tede eda wãiwẽa bɨma ne ateewãi k'orea. Chi ne uu ĩjũane bɨ tedea ne jɨrɨde wãiwẽa bɨma.

³² Lot k'ima mãɨyana k'ɨ̃risiat'ɨ.

³³ Abaɨ pida nãɨ ĩjũane pia bai k'orea jɨrɨ bɨpɨra atuaipɨ. Maamina ne ãarea atuaipɨra, Tachi Ak'õre ome ewaricha chok'ae baipɨ.

³⁴ »Mɨa jararuma: mãɨ ewaride aɨk'a k'ɨdade ume ará p'ananaipɨ. Mãɨne Tachi Ak'õrepa aba ateewãipɨ maamina chi abaɨ ameeipɨ.

³⁵ Mãɨne wẽra ume trigo ará bamaa p'ananaipɨ. Aba ɨt'aa ateewãipɨ; chi abaɨ ameeipɨ.

³⁶ Ẽpẽra ume ãchi ne uu ĩjũane p'ananaima. Mãɨne Tachi Ak'õrepa aba ateeipɨ maamina chi aba ameeipɨ.

³⁷ Ãchia Jesua idisidama: —¿Mãɨ sãma mãɨyaima? Jesupa p'anoosima: —Ãkosi minachia chepatamá k'ak'ua piuda bari bɨt'a. Ara mãɨ jĩra jõmãɨrãpa k'awadaipɨ.