Luca 16 - Tachi Ak'õre Pedea

Erreara ak'ɨparí k'orea nepɨrɨda

¹ Jesupa ichi ome p'ɨrrɨapataɨrã́ nãɨya nepɨrɨsima ne jarateai k'orea: «Ẽpẽra minachia ɨbɨa bɨpa ichi neet'á ak'ɨparí uru basima. Mãɨne waapẽarãpa chi chiparia jarasidama mãɨ neet'á ak'ɨparipa chi chipari erreara jõpiyá bɨt'a.

² Mãɨ k'orea chi chiparipa ichi t'ɨ̃k'ari nãɨya ɨtɨasima: “Pɨa mɨ erreara jõpiyá bɨt'a mɨa ũrisima. Pɨa ooda mɨ erreara ome k'art'ade ak'ɨpise, pɨ waa mɨ neet'á ak'ɨparí baiwẽ pẽra”.

³ »Mãɨ ũriside chi neet'á ak'ɨparipa ara ichi tuaba jarasima: “Mɨ chiparipa mɨá mimia waa teaiwẽma. ¿Mãɨpuru k'ãre ooima? Mɨa mimia chi t'aju bet'a p'ue ooiwẽma; mãɨ awara minachia p'era baipɨ chichupuria erreara idii k'orea.

⁴ Ya jãapae, k'awa bɨade asima, k'ãre ooit'a mɨá wãpade adai naena ẽpẽrarãpa mɨ ãchi tiida pia k'ɨ̃rianamẽrá”.

⁵ »Ara mãɨne ichi chiparia teadai pará bea abaabá t'ɨ̃k'oasima. Chi naapemá idisima: “¿Pɨa jõmasã́ mɨ chiparia teai bɨma?”

⁶ Ichia p'anoosima: “Mɨa olivo taa jiatau k'ak'o mil teai bɨma”. Mãɨne chi neet'á ak'ɨparipa jarasima: “Mãɨya bɨpɨra isapea suak'abari beek'ari mãicha k'art'a awara oose. Bɨse pɨa jiatau k'ak'o quiniento teai bɨade ase”.

⁷ »Maapae abaɨa idisima: “¿Pɨa jõmasã́ teai bɨma?” Mãɨpa p'anoosima: “Mɨa trigo jabara k'ak'o cien teai bɨma”. Chi neet'á ak'ɨparipa jarasima: “Pɨa mãicha k'art'a awara oose. Bɨse pɨa jabara k'ak'o ochenta teai bɨade ase”.

⁸ »Maapae chi chiparipa jarasima ichi neet'á ak'ɨparí sõk'achia bɨ k'ɨ̃risia minachia basima ichia mãɨya oo bada k'orea. Piarã Tachi Ak'õre ẽpẽrarã k'aepẽra nãɨ ĩjũanepemarãpa mãɨ ãchi aɨk'aɨrã ome ne netodai k'orea, ãchia pia ne k'ɨ̃risiadak'ari oopatama.

⁹ Ara mãɨ jĩra mɨa mãrá jararuma: nãɨ ĩjũanepema errearapa ẽpẽrarã chok'ará k'aripat'ɨ. Mãɨya mãra k'õp'ãerorã chok'ará uru p'ananaipɨ. Maapae mãra piuutade pajãne pia k'ɨ̃rianaipɨ.

¹⁰ »Abaɨ pida ãpia uru bɨ pia oo k'awa bɨpɨra, waibɨa uru bɨ sida pia oo k'awa baipɨ. Ichiaba ãpia uru bɨ pia ooepɨra, waibɨa uru bɨ sida pia ook'á baipɨ.

¹¹ Ara mãɨ jĩra mãrapa nãɨ ĩjũanepema nepia jĩp'a oodaepɨra ¿Tachi Ak'õrepa pajãnepema nepia mãrá teaik'ãra?

¹² Ichiaba Tachi Ak'õrepa nãɨ ĩjũane teada mãrapa jĩp'a oodaepɨra ¿ichia mãra pae pajãne uru bɨ teaik'ãra?

¹³ »Te chipari pae pari mimiaparí abaɨ pida p'ue mimia baiwẽma chipari ume p'anɨ pae. Ume uru bɨpɨra aba atepe pia k'ɨ̃ria baipɨ. Mãɨ ome nipaipɨ mãɨne chi abaɨ itu bɨipɨ. Ara mãɨ jĩra chi ne minachia uru ba k'ɨ̃ria bɨpa Tachi Ak'õre ome p'ue nipaiwẽma».

¹⁴ Jesupa jarada p'ariseorãpa ãarea ũri tuanasidama. Ãchia erreara k'ɨ̃riapata pẽra Jesú oo uru p'aneesidama.

¹⁵ Mãɨne Jesupa ãchiá jarasima: «Mãra waapẽarã k'ĩrari ẽpẽra pia jĩra p'anapatama. Maamina Tachi Ak'õrepa k'awa bɨma mãra piarã sãmaasã́ p'anɨt'a. Ẽpẽrarãpa pia unupataɨ, mãɨ Tachi Ak'õrepa pia unuk'ama.

Tachi Ak'õrepa ichidirã ichi juade ua bɨ k'orea jarada

¹⁶ »Juan chei naena Moisepa bɨda mãɨnepa Tachi Ak'õre pari pedeapataɨrãpa bɨdada tachia uru p'anasidama. Mãɨ ewaridepa taipa chi pedea pia Tachi Ak'õrepa ichidirã ichi juade ua bɨ k'orea jaratea p'anɨma. Piarã ẽpẽrarãpa ne ãarea oo p'anɨma Tachi Ak'õre juade p'aneenai k'orea.

¹⁷ Maamina pajã mãɨnepa nãɨ ĩjũa jõi t'ajuwẽa bɨma Moisepa bɨda jõi k'aepẽra.

Jesupa tachi k'ima amaai pia bɨwẽane ada

¹⁸ »Ɨmɨk'ĩrapa ichi k'ima amaak'ari wẽra awaraɨ ataipɨra mãɨ wẽra awaraɨ ome nemietá oo bɨma. Ichia amaana wẽra ɨmɨk'ĩra awaraɨpa ataipɨra mãɨ ɨmɨk'ĩra pida wẽra awaraɨ ome nemietá oo bɨma.

Lázaro mãɨnepa ẽpẽrapa erreara minachia uru bada

¹⁹ »Ẽpẽra ɨbɨa basima. Ewaricha neet'á pia jɨ̃pachima mãɨnepa arapá nek'opataɨ waibɨa oopachima. Mãɨ ẽpẽra minachia pia bapachima.

²⁰ Mãɨne ẽpẽra chupuria k'ɨrɨ Lázaro apataɨ basima. Ĩjũane suak'abari beepachima mãɨ erreara minachia uru bɨ tiida eda wãpataɨmá. K'ak'ua ãarea aida pará basima.

²¹ Ichia chi ɨbɨa bɨ nek'opataɨdepa chik'o baedat'a k'o k'ɨ̃ria bapachima. Mãɨne usapa chedak'ari ichi sarna senapachidama.

²² »Mãɨya p'anɨne chichupuria bɨ piusima. Ara mãɨne Tachi Ak'õrepa ɨt'aripa peedaɨrãpa ichi Abrahán bɨmá ateewãsidama. Mãɨya bak'ari chi ɨbɨa bɨ sida piusima. Piuk'ari, maapae ichi t'ɨbarisidama.

²³ »T'ɨpɨ uruade minachia mĩa bɨde chi ɨbɨa badapa Abrahán, Lázaro ome ará p'anɨ t'ɨmɨɨpa unusima.

²⁴ Mãɨ k'orea jĩk'ua jarasima: “Ak'õre Abrahán, mɨ k'ĩra chupuriase. Lázaro peese. Ichi jua jimini paniapa bek'eak'ari mɨ k'ĩrame bek'eade chepise. Nãɨ t'ɨpɨ uruade mɨ minachia mĩa bɨma”.

²⁵ Maamina Abrahanpa p'anoosima: “P'ue peeiwẽma. Warra, k'ɨ̃risiase pɨ pia bapachima chok'ae basieda; mãɨpari Lázaro chupuria bapachima. Idi Lázaro ne k'ɨ̃risiawẽa bɨma, mãɨne pɨ minachia mĩa bɨma.

²⁶ Mãɨ awara edá uria minachia bɨ tachi esa bɨma. Mãɨpuru mãramá wã k'ɨ̃ria berã p'ue wãnaiwẽma. Ichiaba jãmãɨpa abaɨ pida p'ue taimá chedaiwẽma”.

^27-28 »Mãɨne chi ɨbɨa badapa jarasima: “Ak'õre Abrahán, mãɨya bɨpɨra mɨ k'ĩra chupuriase; Lázaro mɨ ak'õre tedea peese mɨ ũpẽarã joesoma p'anɨa jaramẽrá nãma sãmaasã́ bɨt'a. Mɨa k'ɨ̃riawẽma ãchi sida nãma mĩane chedait'a”.

²⁹ Maamina Abrahanpa ichiá jarasima: “Moisepa bɨda mãɨnepa Tachi Ak'õre pari pedeapataɨrãpa bɨdada sida ãchia uru p'anɨma. Mãɨt'a ĩjãanai p'anɨma”.

³⁰ Mãɨne chi ẽpẽrapa p'anoosima: “Ak'õre Abrahán, mãɨ k'orea ĩjãanaiwẽma. Maamina abaɨpa piuda chok'ae p'irabarik'ari ãchimá jarade wãipɨra, ãchia nemietá itu bɨdak'ari ĩjãanaima”.

³¹ Maamina Abrahanpa jarasima: “Moisepa bɨda mãɨnepa Tachi Ak'õre pari pedeapataɨrãpa bɨdada ĩjãanaepɨra, piuda chok'ae p'irabaridapa mãɨ jararu sida ĩjãanaiwẽma”».