Luca 15 - Tachi Ak'õre Pedea

Oveja atuada k'orea nepɨrɨda

¹ Ewariaba Romanepema pae erreara jɨrɨp'epataɨrã mãɨnepa nemietá oopataɨrã chesidama Jesupa jaratea bɨ ũrinai k'orea.

² Mãɨpuru p'ariseorãpa mãɨnepa Moisepa bɨda jarateapataɨrãpa ichi k'orea nãɨya piawẽa pedea p'aneesidama: «Ichia nemietá oopataɨrã́ pia pedeak'ari ãchi ome nek'oparima».

³ Mãɨpuru Jesupa ãchiá nãɨya nepɨrɨsima, jarateai k'orea:

⁴ «Abaɨpa 100 oveja uru bɨdepema aba atuaipɨra ¿sãima? ¿Chi 99 p'anɨ ĩjũa ewará bɨde ameek'ari chi atuada jɨrɨde wãiwẽk'ãra mãɨ unurunea?

^5-6 Unusira ichi ĩk'iade bɨk'ari sõpia ichi tiidá ua ateewãipɨ. Maapae ichi chi k'õp'ãerorã́, ichi k'ait'a p'anapataɨrã́ pida t'ɨ̃k'oak'ari jaraipɨ: “Mãra mɨ ome arapá p'aneet'ɨ. Mɨ oveja atuada unusiade asima”.

⁷ »Ara mãɨ jĩra mɨa mãrá jararuma: 99 jĩp'a be k'orea pajãnepemarã sõ arapaapatamina, atepe sõ arapaapatama ẽpẽra aba nemietá ooparí Tachi Ak'õremá cherude.

Erreara tau atua bada k'orea nepɨrɨda

⁸ »Wẽrapa erreara tau diez uru badadepema aba atuaipɨra, ¿ĩpira k'oak'ari ichi tejãne parrek'ari pia jɨrɨiwẽk'ãra aba chi erreara tau unurunea?

⁹ Unusira ichi chi k'õp'ãerorã́, ichi k'ait'a p'anapataɨrã́ ome t'ɨ̃k'oak'ari jaraipɨ: “Mãra mɨ ome arapá p'aneet'ɨ. Mɨ erreara tau atuada unusima”.

¹⁰ Mɨa jararuma ara mãɨ jĩra nemietá ooparí aba Tachi Ak'õremá cherude Tachi Ak'õrepa ɨt'aripa peedarã ome minachia arapaapatama».

Warrarã ume p'anɨ nemietá oopataɨrã k'orea nepɨrɨda

¹¹ Mãɨ awara Jesupa jarasima: «Ẽpẽra basima. Mãɨ ẽpẽrapa warra ume uru basima.

¹² Ewariaba chi k'aadeapemapa chi ak'õrea jarasima: “Ak'õre, pɨa uru bɨdepema mɨá teai bɨt'a mɨá tease”. Mãɨ k'orea chi ak'õrepa uru bɨdepema ãchicha teasima.

¹³ Tãaraawẽane chi k'aadeapemapa chi ichiá teada jõma netok'ari k'ait'awẽa wãsima tua awaraɨdea. Mãma ne ãarea nemietá oo beesima chi erreara jõrunea.

¹⁴ »Ãarea jõk'ari mãɨ tuade jarra minachia oosima. Mãɨneepuru jarra choa beesima.

¹⁵ Mãɨ k'orea mimia jɨrɨde wãsima mãɨ ĩjũanepema ẽpẽra chi ĩjũa uru bɨmá. Mãɨpa sina ak'ɨpisima.

¹⁶ Minachia jarra bada pẽra sinapa k'o p'anɨnepema ichia pida k'o k'ɨ̃ria bapachima. Maamina abaɨ pida ichiá teadak'a pasima nek'omẽrá.

¹⁷ »Maapae k'awasima ichia nemietá ooda k'orea jãɨya bɨt'a. Mãɨne ara ichi tuaba jarasima: “Mɨ ak'õre pae mimiapataɨrã minachia nek'opatama mãɨpari mɨ nãma jarrapa piumaa bɨma.

¹⁸ Ara nãɨena mɨ ak'õremá wãyane asima. Wãk'ari, nãɨya jarayade asima: Ak'õre, mɨa nemietá oosima Tachi Ak'õre k'ĩrari mãɨnepa pɨ k'ĩrari pida.

¹⁹ Mãɨpuru pia bɨwẽma mɨ waa pɨ warraade ait'a. Mãɨpari mɨ chi pɨ pae mimiaparí jĩra bɨse”.

²⁰ Ara mãɨne chi ak'õremá wãsima. »Mãɨ k'ait'awẽa cheru chi ak'õrepa unusima mãɨnepa sõchupuriasima. P'irasima chi warramá mãɨnepa orek'ari, uitarra sõsima.

²¹ Mãɨne chi warrapa jarasima: “Ak'õre, piarã mɨa Tachi Ak'õre k'ĩrari, pɨ k'ĩrari pida nemietá oosima. Mãɨpuru pia bɨwẽma mɨ waa pɨ warraade ait'a”.

²² Maamina chi ak'õrepa chi ichi pae pari mimiapataɨrã́ jarasima: “Anamari jɨ̃parí chi piipará bɨ atadak'ari jɨ̃pit'ɨ. Ichi juade sortia jɨ̃pit'ɨ. Mãɨ awara jĩrune jɨ̃pataɨ sida jɨ̃pit'ɨ.

^23-24 Maapae p'ak'a chak'e chi atepe porek'ea bɨ peat'ɨ nek'odai k'orea. ¡Arapaapataɨ ewari oodaipɨ! Mɨ warra piu bada chok'ae p'irabarisima; chi atua bada tachia mãicha unusidama”. Maapae minachia arapá tuaneesidama.

²⁵ »Mãɨne chi ũpẽa naapema mimia bada tedea cheru pasima. Te k'ait'a cherude ũrisima siru chaa p'anɨ mãɨnepa paera p'anɨ.

²⁶ Mãɨ k'orea chi ak'õre pae pari mimiaparí aba t'ɨ̃k'ari idisima k'ãre k'orea mãɨya oo p'anɨ k'awayá.

²⁷ Chi ak'õre pae pari mimiaparipa jarasima: “Pɨ ak'õrepa p'ak'a chak'e porek'ea bɨ peapisima pɨ ũpẽa jĩitea k'ak'ua pia cheda pẽra”.

²⁸ »Mãɨ ũriside k'ĩruuk'ari chi tede eda wã k'ɨ̃riaé pasima. Mãɨya bɨde chi ak'õre ichimá wãk'ari chichupuria idisima eda wãmẽrá.

²⁹ Mãɨne chi warra naapemapa chi ak'õrea jarasima: “Ewaricha mɨ pɨ pae minachia mimiaparima. Pɨa jararu jõma oo baparima. Maamina waidi pɨa cabra chak'e aba pida mɨá teak'ama mɨ chi k'õp'ãerorã ome arapá nek'odai k'orea.

³⁰ Maamina pɨchi warrapa pɨ erreara wẽrarã k'achia be ome ãarea jõpik'ari, maapae pɨmá cherude pɨa ichi pae p'ak'a chak'e porek'ea bɨ peapisima arapá nek'odai k'orea”.

³¹ »Mãɨne chi ak'õrepa jarasima: “Warra, pɨ ewaricha mɨ ome baparima. Jõma mɨa uru bɨ poreade asima.

³² Maamina naapae sõ arapaadai pia bɨma, pɨ ũpẽa piuda jĩra bada chok'ae bɨẽra; chi atua bada unusidaɨdeepuru”».