Luca 14 - Tachi Ak'õre Pedea

Jesupa ẽpẽra k'ak'ua ooro bɨ jɨpa beepida

¹ Mimianak'apɨ́ ewaride Jesú p'ariseo chi chaarea bɨ tede nek'ode wãsima. Mãɨne waapẽarã p'ariseorãpa minachia ak'ɨ p'anasidama ichia piawẽa ooi k'awa.

² Mãɨya bɨde, Jesú k'ĩrari ẽpẽra aba k'ak'ua ooro bɨ basima.

³ Jesupa Moisepa bɨda jarateapataɨrã́ mãɨnepa p'ariseorã́ pida nãɨya idisima: —¿Mãramá pia bɨk'ãra mimianak'apɨ́ ewaride k'ak'ua piawẽa be jɨpa beepii?

⁴ Maamina ãchi k'ĩup'ea para beesima. Mãɨ k'orea Jesupa chi k'ɨdade bɨ jitak'ari jɨpa beepik'ari tedea wãpisima.

⁵ Maapae Jesupa ãchiá jarasima: —Mimianak'apɨ́ ewaride mãra warra wa p'ak'a pania joepataɨ uriade baesira ¿piarã mãɨ jirade wãnaiwẽk'ãra?

⁶ Maamina ãchia mi ãpia pida p'anoonaé pasima.

Ãpia bai k'orea nepɨrɨda

⁷ Jesupa unusima mãɨ nek'ode t'ɨ̃ peedaadapa chi minachia k'awa berã suak'abari p'aneepataɨde jɨrɨsidama suak'abari p'aneenai k'orea. Mãɨ k'orea Jesupa nepɨrɨdepa ãchiá nãɨya jarasima:

⁸ «Miak'ãipataɨ arapaapataɨ ewaride pɨ t'ɨ̃ peesira chi minachia k'awa berã suak'abari p'aneepataɨde suak'abari beerãse, ẽpẽra pɨ k'aepẽra atepe k'awa bɨ k'aade chei bɨ pẽra.

⁹ Mãɨyara chi chiparipa pɨá jaraipɨ: “Ãyá wãse. Cha bɨ ẽpẽra nãma suak'abari beeipɨ”. Mãɨya oorude pɨ minachia k'ĩra p'eraipɨ chi wariwẽa be ome suak'abari beei pẽra.

¹⁰ »Mãɨpuru pɨ t'ɨ̃utade chi wariwẽa be ome suak'abari beese. Mãɨyara chi pɨ t'ɨ̃napa unurune t'ɨ̃k'ari jaraipɨ: “Chese, nãma chi minachia k'awa p'anɨrã ome suak'abari beese”. Mãɨyara pɨ minachia unupiipɨ chi waapẽarã t'ɨ̃nana k'ĩrari.

¹¹ Chi atepe bai k'ɨ̃ria bɨ, Tachi Ak'õrepa mãɨ wariwẽa bɨipɨ. Abaɨ pida ara ichi ãpia bɨ jĩra k'ɨ̃risiasira Tachi Ak'õrepa mãɨ chi atepe bɨ jĩra bɨipɨ».

¹² Maapae Jesupa ichi t'ɨ̃ná nãɨya jarasima: —Pɨa ẽpẽrarã nek'ode t'ɨ̃ peerude pɨ k'õp'ãerorã, pɨ ũpẽarã, pɨ ẽpẽrarã wa pɨ te k'ait'a p'anaparí erreara pará berã sida t'ɨ̃rãse. Ãchia pɨ p'ue t'ɨ̃ peepatama, nek'ode wãmẽrá. Mãɨya pɨa ooda k'orea pari ne unuipɨ.

¹³ Mãɨpari, pɨa ẽpẽrarã t'ɨ̃rune chi nenea berã, sorek'ea berã, sĩta bak'ea berã, tau p'ãrio berã sida t'ɨ̃k'oase.

¹⁴ Mãɨyaipɨra piarã pɨ minachia pia baipɨ. Ãchia pɨá mi ãpia pida p'ue teadak'a pẽra, chi jĩp'a berã chok'ae p'irabariuta ewaride Tachi Ak'õrepa pɨá nepia teaipɨ.

Nek'opataɨ waibɨa k'orea nepɨrɨda

¹⁵ Jesú ome suak'abari p'anɨpa mãɨ ũrisidaɨde abaɨpa jarasima: Tachi Ak'õrepa ichidirã ichi juade ua bɨ nek'opataɨde nek'oru ẽpẽrat'a minachia pia baipɨ.

¹⁶ Mãɨpuru Jesupa ichiá jarasima: —Ewariaba ẽpẽrapa nek'opataɨ waibɨa oopik'ari, ẽpẽrarã chok'ará t'ɨ̃ peesima chedamẽrá.

¹⁷ Chik'o ãarea chuu nɨbeek'ari, chi chiparipa ichi pae pari mimiaparia nãɨya jarade wãpisima: “Chepadade asima, chik'o ãarea chuu nɨbɨẽra”.

¹⁸ Maamina ẽpẽrarãpa ne oodai p'anɨane asidama, wãnaemaapa. Chi naapemapa jarasima: “Arat'eapuru mɨa ĩjũa netosima. Mãɨ ak'ɨde wãi bɨẽra p'ue wãiwẽma. Mɨ k'ĩra chupuriapade asima, p'ue wãiwẽ pẽra”.

¹⁹ Abaɨpa jarasima: “Mɨa arat'ea p'ak'a k'ak'o diez atada pẽra p'ue wãiwẽma. Mãɨ p'ak'a ak'ɨde wãruma piarã pia mimia k'awayá. Mɨ k'ĩra chupuriapade asima, p'ue wãiwẽ pẽra”.

²⁰ Mãɨne abaɨpa jarasima: “Mɨa arat'ea k'ima atada pẽra p'ue wãiwẽma”.

²¹ Chi ichi pae pari mimiaparí jĩitea wãk'ari ãchia jaradada te chiparia jarasima. Mãɨ k'orea chi chipari minachia k'ĩruuk'ari ichi pae pari mimiaparia jarasima: “P'uurudea isapea wãpade asima. Maapae chi nenea berã, chi sorek'ea berã, chi tau p'ãrio berã, chi sĩta bak'ea berã sida ãarea chepik'oase”.

²² Chi ichi pae pari mimiaparipa mãɨya ook'ari jarasima: “Pɨa jarada jĩra mɨa oosima, maamina ãk'au wapida pari nɨbɨade asima”.

²³ Mãɨpuru te chiparipa chi ichi pae pari mimiaparia mãicha jarasima: “P'uuru awara o becha wãpade asima. Ẽpẽrarã unusira isapea chepipadaade asima, mɨ te minachia bɨ ipiru k'obeemẽrá.

²⁴ Mɨa jararuma: mɨa naa t'ɨ̃ peedaɨrãpa mɨ k'opataɨ waibɨa bɨde mi ãpia pida k'odaiwẽma”.

Jesú ome nipai chaarea bɨ k'orea jarada

²⁵ Ẽpẽrarã Jesú k'aadea chok'ará nipapachidama. Mãɨpuru Jesupa ãchimá ak'ɨk'ari nãɨya jarasima:

²⁶ «Abaɨ pida mɨ ome p'ɨrrɨa k'ɨ̃ria bɨpɨra, naa minachia k'ɨ̃risiai pia bɨma. Ichi ak'õre, chi nae, chi k'ima, chi warrarã, chi ũpẽarã, chi ũpẽawẽrarã, wa ichi chok'ae bai mɨ k'aepẽra atepe k'ɨ̃ria bɨpɨra, mãɨ mɨ ome p'ue nipaiwẽma.

²⁷ Minachia mĩa bai k'orea bɨwẽpɨra, mɨ ome p'ue nipaiwẽma.

²⁸ »Abaɨ pida te waibɨa oo k'ɨ̃ria bɨpɨra, naa pia k'ɨ̃risiai pia bɨma ichia uru bɨ errearadepa mãɨ te jõma p'ue ooi k'awai k'orea.

²⁹ Mãɨya ooepɨra te jĩru ook'ari te ãarea p'ue jõma oowẽa baipɨ. Waapẽarãpa mãɨ ununak'ari nãɨya oo uru p'aneenak'ari, jaradaipɨ:

³⁰ “Jãɨ ẽpẽrapa te oomaa beesima, maamina p'ue ãarea ooé pasima”.

³¹ »Mãɨyawẽpɨra, minachia k'awa bɨ abaɨpa papaká berã diez mil uru bɨpɨra, mãɨne tua awaraɨdepema minachia k'awa bɨ veinte mil papaká berã paara ichi ome k'ĩruune cheipɨra, k'ĩruunai naena ¿ichia pia k'ɨ̃risiaiwẽk'ãra p'ue k'awai k'orea?

³² Ichia p'ueiwẽ k'awasira chi awaraɨ wapida t'ɨmɨa bɨedá ¿jara peeiwẽk'ãra ichi ome k'ĩruunawẽa pedeade wãnamẽrá?

³³ »Ara mãɨ jĩra mɨ ome p'ɨrrɨai naena mãranepemapa abaɨpa ne ãarea itu bɨi k'orea k'ɨ̃risiaepɨra mɨ ome p'ue nipaiwẽma.

T'ã k'ɨyaawẽa bɨ k'orea jarateada

³⁴ »Piarã t'ã minachia pia bɨma, maamina k'ɨyaawẽa beesira ¿sãmaasã́ mãicha k'ɨyaa beeima?

³⁵ Mãɨ t'ã yoorode p'oi k'orea pia bɨwẽma mãɨnepa t'ãa ãk'ak'a ome p'oerai sida pia bɨwẽma. Amaait'u pia bɨma. ¡Chi k'ɨɨrɨ pará bɨpa jĩrak'aua ũrise!»