Luca 13 - Tachi Ak'õre Pedea

Tachi Ak'õremá chedaepɨra piudayade ada

¹ Mãɨya p'anɨne ẽpẽrarãpa Jesua jarasidama waapẽarã Galileadepemarãpa ãnimara Tachi Ak'õrea paatea p'anɨne Pilatopa ãchi k'enapisit'a.

² Mãɨpuru Jesupa jarasima: «Mãɨ ẽpẽrarã mĩanak'ari piudada pẽra ¿mãrapa k'ɨ̃risia p'anɨk'ãra ãchia atepe nemietá oopachidat'a waapẽarã Galileadepemarãpa nemietá oopataɨ k'aepẽra?

³ Mɨa jararuma: Mãɨyawẽma. Maamina mãrapa nemietá oopataɨ itu bɨdak'ari Tachi Ak'õremá chedaepɨra mãra sida piudaipɨ.

⁴ Siloede te ɨt'ɨ teesoa bɨ ẽpẽrarã ɨ̃rɨ baewãside dieciocho piusidama. Mãɨya piudada pẽra ¿mãrapa k'ɨ̃risia p'anɨk'ãra ãchia atepe nemietá oopachidat'a waapẽarã Jerusalene berãpa oopataɨ k'aepẽra?

⁵ Mɨa jararuma: mãɨyawẽma. Maamina mãrapa nemietá oopataɨ itu bɨdak'ari Tachi Ak'õremá chedaepɨra mãra sida piudaipɨ».

Higojõ bɨɨrɨ chauk'a k'orea nepɨrɨda

⁶ Maapae nepɨrɨdepa Jesupa ãchiá nãɨya jarateasima: «Ẽpẽrapa ichi ne uu ĩjũane higojõ bɨɨrɨ uru basima. Ewariaba mãɨ pak'uru bɨɨrɨ ak'ɨde wãsima, chau nɨbɨ k'awai k'orea, maamina chauwẽa basima.

⁷ Mãɨpuru chi chiparipa ichi ne uu ĩjũa ak'ɨparia nãɨya jarasima: “Ãyo k'ak'o ũpea pa bɨma mãma higojõ jɨrɨde che bɨ, maamina chauk'ama. Mãɨpuru t'ut'aapese. ¿K'ãre k'orea pak'uru chauk'á bɨ uru baima?”

⁸ »Maamina chi ne uu ĩjũa ak'ɨparipa jarasima: “Jarateaparí, ãyo aba itu bɨdai pia bɨma. Mɨa chi k'arra k'ãramak'ari, t'ãa ãk'ak'a teaipɨ.

⁹ Mãɨya chaui k'awadaipɨ. Nãɨ ãyo cherude chausira mãɨ itu bɨipɨ. Chauepɨra mãɨ t'ut'aase”».

Mimianak'apɨ́ ewaride Jesupa wẽra jɨpa beepida

¹⁰ Mimianak'apɨ́ ewaride Jesupa judiorã ará pedeapataɨ tede jaratea basima.

¹¹ Mãma wẽra basima. Mãɨ wẽra dieciocho ãyo pa basima jai mietapa jãjorrea uru basit'a. Mãɨpuru p'ue jĩp'a jĩruk'a pasima.

¹² Jesupa ichi unuside t'ɨ̃k'ari nãɨya jarasima: —Wẽra, pɨ jɨpa beese.

¹³ Mãɨya jarak'ari Jesupa ichi jua ɨ̃rɨ bɨsima. Ara mãɨne chi wẽra jĩp'a bai nɨbeek'ari Tachi Ak'õrea pia jarasima.

¹⁴ Maamina Jesupa mimianak'apɨ́ ewaride jɨpa beepida pẽra judiorã ará pedeapataɨ tedepema minachia k'awa bɨ k'ĩruusima. Mãɨne jõmãɨrã́ nãɨya jarasima: —Mimianak'apɨ́ ewari awara sei ewari uru p'anɨma mimianai k'orea. Mãɨ ewaridepuru chet'ɨ mãra jɨpa beepidamẽrá. Maamina mimianak'apɨ́ ewaride cherãt'ɨ.

¹⁵ Mãɨpuru Jesupa jarasima: —¡Mãrapa jarateapataɨ jĩra oodak'ama! ¿Mimianak'apɨ́ ewaride mãra p'ak'a wa mũra ẽranak'ari pania topide ateewãnawẽk'ãra?

¹⁶ Mãɨyaipɨra ¿pia bɨwẽk'ãra nãɨ wẽra, tiorepa dieciocho ãyo pa bada piawẽa uru badadepema mimianak'apɨ́ ewaride jɨpa beepii? ¿Ichi sida Abrahanepa chedawẽk'ãra?

¹⁷ Jesupa mãɨ jaraside chi ichi k'orea k'achia pedea p'anana minachia p'erasidama, maamina ichia nepia oo bɨ k'orea chi p'uurudepemarã minachia arapá p'anasidama.

Mostaza net'a tau k'orea nepɨrɨda

¹⁸ Maapae Jesupa jarasima: «Tachi Ak'õrepa ichidirã ichi juade ua bɨt'a ¿k'ãre jĩra bɨma?

¹⁹ Mostaza tau jĩra bɨma. Ẽpẽrapa mostaza tau ichi ĩjũane uusima. T'õnok'ari warisima aba pak'uru minachia nɨbeerudea. Mãɨpuru ĩpana chi pak'uru juat'aede te ook'oade chesidama».

P'ana ooropiparí k'orea nepɨrɨda

²⁰ Mãɨ awara jarasima: «Tachi Ak'õrepa ichidirã ichi juade ua bɨt'a ¿k'ãre jĩra bɨma?

²¹ P'ana ooropiparí jĩra bɨma. Mãɨ p'ana ooropiparí wẽrapa ãpia atak'ari harina ome p'oerasima. Maapae minachia eapasima ãarea ẽesãarunea».

Eda wãpataɨ p'isua bɨ

²² Jerusalenea wãrune Jesupa p'uuru waibɨade, p'uuru chak'ede pida jarateasima.

²³ Mãɨne abaɨpa ichiá idisima: —Mɨ Chipari, ¿Tachi Ak'õrepa ẽpẽrarã chok'araawẽa p'anɨ k'aripaik'ãra? Jesupa p'anoosima:

²⁴ —Tausia p'anat'ɨ chi eda wãpataɨ p'isua bɨde eda wãnai k'orea. Piarã eda wãnai k'orea berã chok'ará p'anɨma maamina p'ue ãarea eda wãnaiwẽma.

²⁵ Te chiparipa chi eda wãpataɨ jõat'ɨk'ari chi tajata p'anɨpa nãɨya t'ɨ̃ jaradaipɨ ewamẽrá: “Tai chipari, tai chipari, ewase”. Maamina chi te chiparipa p'anooipɨ: “Mɨa mãra unuk'ama mãɨnepa sãmapema atuama”.

²⁶ Chi tajata p'anɨpa nãɨya jaradaipɨ: “Tai pɨ ome ará nek'osidama, netosidama mãɨnepa pɨa tai p'uurude jaratea nipaside arí p'anasidama”.

²⁷ Mãɨne ichia mãrá jaraipɨ: “Mɨa mãra unuk'ama mãɨnepa sãmapema atua bɨma. K'achia oopataɨrã, ãyá wãt'ɨ”.

²⁸ »Mãra chi tajata berã jẽa p'ananaipɨ mãɨnepa p'uapa k'ida k'ɨterrea p'ananaipɨ. Abrahán, Isá, Jacobo mãɨnepa Tachi Ak'õre pari pedeapataɨrã sida Tachi Ak'õrepa ichidirã ichi juade ua bɨde p'ananaipɨ, maamina mãrat'u Tachi Ak'õrepa itu eda wãpiiwẽma.

²⁹ Mãɨ ewaride tua awaraɨdepema ɨmata ochiaparidepa, ɨmata baeparidepa, k'ĩrariipa mãɨnepa ãpɨtepa chedaipɨ. Mãɨrã Tachi Ak'õrepa ichidirã ichi juade ua bɨde nek'o suak'abari p'aneenaipɨ.

³⁰ Mãɨya chi k'aadea p'anɨ naa p'ananaipɨ mãɨnepa chi naa p'anɨ k'aadea p'ananaipɨ.

Jesú Jerusalén k'orea k'ĩra piawẽa bada

³¹ Mãɨ ewaride waapẽarã p'ariseorã orrobaridak'ari Jesua jarasidama: —Nãmapema isapea wãse. Herodepa pɨ pea k'ɨ̃ria bɨma.

³² Mãɨne Jesupa ãchiá jarasima: —Jãɨ ẽpẽra et'erre k'oparí jĩra bɨa nãɨya jarade wãt'ɨ: “Idi, nũ pida mɨa k'ɨdade be, jaore mietá pará be sida jɨpa beepik'oaipɨ. Mɨa ooi bɨt'a, ewari ũpeaɨde jõma ook'ari uru baipɨ”.

³³ Maamina idi, nũ mãɨnepa nõnorema ode wãipɨ Jerusalenea chei k'orea. Tachi Ak'õre pari pedeapataɨrã Jerusalene peapata pẽra mãmá wãi pará bɨma.

³⁴ »¡Jerusalén, Jerusalén, mãrapa Tachi Ak'õre pari pedeapataɨrã peapatama! ¡Tachi Ak'õrepa peedarã sida mawarapa bat'a peapatama! Mɨa bari k'ak'o minachia mãra ará jerep'e k'ɨ̃ria basima et'erre wẽrapa ichi warrarã ĩk'arra ek'ari jerep'epari jĩra. Maamina mãrapa k'ɨ̃rianaé pasima.

³⁵ Mãɨpuru Tachi Ak'õre waa mãra ome baiwẽma. Mɨa jara bɨma: mãrapa mɨ waa ununaiwẽma aba mɨá pia pedeautamá. Mãɨ ewaride nãɨya jaradaipɨ: “¡Minachia pia bɨma chi Tachi Chipari t'ɨ̃ne cherut'a!”