Luca 12 - Tachi Ak'õre Pedea

P'ariseorãpa piawẽa oopataɨ k'orea

¹ Mãɨya p'anɨne ẽpẽrarã chok'ará tausia cheepɨrɨsidama. Minachia p'isua nɨbɨ pẽra waapẽarã para chi t'ɨ̃sia wã para basima. Mãɨne Jesupa naa ichi ome p'ɨrrɨapataɨrã́ nãɨya jarasima: «Jĩrak'aua p'anat'ɨ chi p'ariseorãné p'ana ooropiparí ome. Ãchi chi pia jĩra berãpɨ.

² Ne ãarea mẽra oodada Tachi Ak'õrepa k'awapiipɨ. Tachia k'awadawẽa p'anɨt'a mẽra beeiwẽma.

³ Mãrapa p'ãrione jaradada ẽpẽrarãpa ɨnaane ãarea ũrinaipɨ. Mãrapa eda wãpataɨ jõat'ɨdak'ari mẽra jaradada sida abaɨpa te ɨ̃rɨpa jĩk'ua jaraipɨ ãareaɨrãpa k'awadamẽrá.

¿K'ai wap'eadai p'anɨ?

⁴ »Mɨ k'õp'ãerorã, mɨa mãrá jararuma: chi nãɨ k'ak'ua peapataɨrã wap'earãt'ɨ, ãchia peadak'ari waa p'ue oodaiwẽ pẽra.

⁵ Mɨa mãrá jararuma k'ait'a piarã wap'eadai p'anɨma. Mãrapa wap'eadai p'anɨma nãɨ k'ak'ua peak'ari p'ue tachi jaore t'ɨpɨ tau uruadea peei bɨt'a. Mɨa piarã jararuma ichit'a wap'eadai pia bɨma.

⁶ »¿Netopatawẽk'ãra ĩpana chae joesoma p'anɨ erreara tau ume bɨ pari? Maamina Tachi Ak'õrepa ĩpana ãarea ak'ɨparima.

⁷ Mãɨ awara Tachi Ak'õrepa k'awa bɨma mãrapa puda jõmasã́ uru p'anɨt'a. Tachi Ak'õrepa mãra ĩpana chok'ará p'anɨ k'aepẽra pia ak'ɨ bɨẽra ne wap'eadawẽa p'anat'ɨ.

Jesú k'orea k'ĩra p'eraiwẽa bɨma

⁸ »Mɨa nãɨ jararuma: abaɨ pida ẽpẽrarã k'ĩrari mɨne ĩjãa bɨade aipɨra, Tachi Ak'õre peedarã pajãnepema k'ĩrari mɨ, chi Ẽpẽra Warrapa ichi mõréane aipɨ.

⁹ Ara mãɨ jĩra abaɨpa ẽpẽrarã k'ĩrari mɨ atua bɨade aipɨra, Tachi Ak'õre pajãnepema peedarã k'ĩrari mɨa ichi atua bɨade aipɨ.

¹⁰ »Abaɨpa mɨ, chi Ẽpẽra Warra k'orea k'achia pedeaipɨra, Tachi Ak'õrepa mãɨ k'ɨ̃risia atuaipɨ. Maamina abaɨpa Tachi Ak'õre Jaore k'orea k'achia pedeaipɨra Tachi Ak'õrepa mãɨ k'ɨ̃risia atuaiwẽma.

¹¹ »Mãra mɨne ĩjãa p'anɨ k'orea judiorã ará pedeapataɨ tedea ateedak'ari, wa chi ak'ɨpataɨrãmá k'ĩrari, wa chi minachia k'awa p'anɨrãmá nepɨra pará bɨade adai k'orea, k'ɨ̃risia pará p'aneerãt'ɨ sãmaasã́ p'anooi wa k'ãret'a jaradai.

¹² Mãra nepɨra ak'ɨutade Tachi Ak'õre Jaorepuru mãrá k'awapiipɨ k'ãre jaradai p'anɨt'a».

Erreara minachia uru bɨ k'orea nepɨrɨda

¹³ Mãɨne minachia nɨbɨdepemarã abaɨpa nãɨya jarasima: —Jarateaparí, mɨ ũpẽá jarase tai ak'õre neet'á bɨeda, mɨá pida teapade ase.

¹⁴ Maamina Jesupa ichiá jarasima: —K'õp'ãero, ¿k'aipa mɨ bɨsima mãra nepɨra ak'ɨmẽrá?

¹⁵ Mãɨne ichia jõmãɨrã́ jarasima: —¡Jĩrak'aua p'anat'ɨ! Erreara chi awaa p'anarãt'ɨ. Neet'á minachia uru bɨdepa tachi chok'ae bak'ama.

¹⁶ Mãɨne Jesupa nepɨrɨdepa nãɨya jarateasima: «Ẽpẽra erreara minachia uru bɨ basima. Mãɨ ẽpẽrapa ne uuda ne minachia chausima.

¹⁷ Mãɨ k'orea nãɨya k'ɨ̃risiasima: “¿Mɨa k'ãre ooima? Te newẽma ãarea yaai k'orea”.

¹⁸ Maapae k'ɨ̃risiasima: “Nãɨya ooipɨ. Mɨa net'a tau yaaparí te t'erap'et'ak'ari awara waibɨa ooipɨ. Mãma eda ne ãarea mɨa uru bɨt'a yaaipɨ.

¹⁹ Mãɨya bak'ari piarã mɨchi tuaba jaraipɨ: mɨa yaada minachia uru bɨma ãyo minachia choai k'orea. Naapae minachia ne k'ɨ̃risiawẽa baipɨ. Mɨchia k'ɨ̃ria bɨ k'o baipɨ, to baipɨ mãɨnepa arapá baipɨ”.

²⁰ Maamina Tachi Ak'õrepa ichiá jarasima: “¡Pɨa k'ɨ̃risia pia bɨwẽma! Piarã nãɨ teamasi pɨ piuipɨ. Maapae pɨa yaada uru bɨt'a ¿k'ai pae beeima?”

²¹ »Abaɨpa nãɨ ĩjũanepema atepe atai k'ɨ̃risia bɨpɨra, maamina Tachi Ak'õre k'orea k'ɨ̃risiawẽa bɨpɨra, mãɨ jĩra mãɨyaipɨ».

Tachi Ak'õrepa ichidirã ak'ɨparima

²² Mãɨpuru Jesupa ichi ome p'ɨrrɨapataɨrã́ jarasima: «Mãra sãmaasã́ p'ananait'a minachia k'ɨ̃risiarãt'ɨ, nek'odai k'orea mãɨnepa neet'á jɨ̃nai k'orea.

²³ Tachi chok'ae bait'a, chik'o k'aepẽra atepe piipará bɨma. Tachi k'ak'ua, neet'á k'aepẽra atepe piipará bɨma.

²⁴ Ak'ɨt'ɨ, ĩpanarãpa ne uudak'ama mãɨnepa ne baadak'ama. Ne yaaparí te sida oodak'ama. Maamina Tachi Ak'õrepa ãchiá nek'opiparima. ¿Mãra ĩpana k'aepẽra atepe pia p'anɨwẽk'ãra?

²⁵ ¿K'ai mãranepema, ichi k'ak'ua k'orea minachia k'ɨ̃risia bɨpa tãaraa chok'ae baima?

²⁶ Tãaraa chok'ae baiwẽpɨra, ¿k'ãre k'orea minachia k'ɨ̃risiapatama nek'odai k'orea mãɨnepa neet'á jɨ̃nai k'orea?

²⁷ »Ak'ɨt'ɨ nep'ono sãmaasã́ wariparit'a. Mimiak'ama ichiaba p'aru k'osak'ama. Maamina mɨa jararuma: tachi chõarãenapema poro jũra jɨ̃parí jɨ̃ bɨ Salomón ne minachia uru badamina nep'ono jĩra k'ĩrawãrea jɨ̃k'a pasima.

²⁸ Chi idiapae p'ũajãra tachia mẽa unupataɨ mãɨ norema paapatamina Tachi Ak'õrepa wapida mãɨ t'õpiparima. Mãɨ k'aepẽra ¿ichia mãrá ne piipará jɨ̃namẽrá teaiwẽk'ãra? ¿K'ãre k'orea mãɨne p'ue ĩjãanawẽma?

²⁹ Mãɨpuru jɨrɨrãt'ɨ nek'odai k'orea mãɨnepa netodai k'orea. Minachia k'ɨ̃risiarãt'ɨ.

³⁰ Nãɨ ĩjũanepemarãpa ãarea mãɨ jɨrɨpatama, maamina Tachi Ak'õrepa k'awa bɨma mãrapa k'ãre uru p'ananai p'anɨt'a.

³¹ Mãɨpuru k'ɨ̃riat'ɨ Tachi Ak'õrepa machi ichi juade ua bai ichidirã ome. Mãɨya mãra ne newẽa p'anɨ ichia teaipɨ.

Nepia pajãne uru bai k'orea jarateada

³² »Mãra chi chok'ará p'anɨwẽmina ne wap'ea p'anarãt'ɨ. Tachi Ak'õrepa mãra ichi juade ua bai k'ɨ̃ria bɨma, ichidirã ome.

³³ Mãɨ k'orea mãrapa ne uru p'anɨnepema netodak'ari chi nenea k'edea teat'ɨ. Nepia pajãne uru p'anai k'orea jɨrɨt'ɨ. Chi ne pajãnepema jõk'ama. Jãma simiapa ãrik'ama mãɨnepa nechɨapataɨrã pida p'ue chɨadak'ama.

³⁴ Mãrapa chi piipará bɨ machi sõnepa k'ɨ̃riapatama.

Chi chipari pae pari mimiaparí pia bɨ k'orea jarada

^35-36 »Te chipari pae pari mimiaparí pia bɨ jĩra p'anat'ɨ, Tachi Ak'õrepa jara bɨt'a ũrinai k'orea. Chi te chipari pae pari mimiaparí pia bɨpa ĩpira k'oa uru baparima ichi chipari cherude pia pedeai k'orea. Miak'ãipataɨ arapá ewari oo p'anɨmãɨpa chek'ari, chi chiparipa t'ɨ̃rune chi ichi pae pari mimiaparí pia bɨpa ara mãɨne tede eda wãpataɨ ewaipɨ.

³⁷ Chi chipari chek'ari, chi ichi pae pari mimiapataɨrã chok'ae p'anɨ unuipɨra, ãchi pia ak'ɨipɨ. Mɨa piarã jararuma: ara mãɨne chi chiparipa chi ichi pae pari mimiaparí neet'á jɨ̃k'ari ichi pae pari mimiapataɨrã chik'o k'opataɨde suak'abari beepiipɨ, ãchiá nek'opii k'orea.

³⁸ Chi ichi pae pari mimiapataɨrã pia p'anɨpa ãchi chipari nɨpatama, teamasi estarik'a cherude mãɨyawẽpɨra tap'ededa cherude. Chi chiparipa ãchi nɨ p'anɨ unuipɨra, ãchi pia ak'ɨipɨ.

³⁹ »Nãɨ k'awat'ɨ: te chiparipa nechɨaparí sãapae chei k'awa bɨpara, k'ãiwẽa bai pasima tede eda wãpiemaapa.

⁴⁰ Ara mãɨ jĩra mãra sida tau pará p'anat'ɨ. Mãrapa mɨ, chi Ẽpẽra Warra chei atua p'anɨne cheipɨ».

Mimiapataɨrã ume p'anɨ k'orea jarada

⁴¹ Pedropa Jesua idisima: —Tai Chipari, ¿mãɨ nepɨra pɨa taiyá jara bɨk'ãra, wa ãareaɨrã́ jara bɨk'ãra?

⁴² Jesupa p'anoosima: —Te chipari pae pari mimiaparipa k'ɨ̃risia k'awa bɨdepa jĩp'a oo bɨpɨra, chi te chiparipa chi waapẽarã ichi pae pari mimiapataɨrã mãɨ ichi pae pari mimiaparí juade bɨipɨ ãchia ewari ará parude nek'opi bamẽrá.

⁴³ Chi te chipari pae pari mimiaparipa mãɨya oo bɨt'a ichi chiparipa unune cheipɨra, ichi sõpia baipɨ.

⁴⁴ Mɨa piarã jararuma: chi chiparipa ãarea ichia uru bɨt'a mãɨ ichi pae pari mimiaparí juade bɨipɨ.

⁴⁵ Maamina mãɨ ichi pae pari mimiaparipa ichi sõne “mɨ chipari tãaraayane” aipɨra, waapẽarã ichi pae pari mimiapataɨrã, wẽrarã sida jok'ae beek'ari, nek'ok'ari, netok'ari mãɨnepa it'uapa piu baipɨ.

⁴⁶ Abaeda ichi chipari chei k'ɨ̃risiawẽa bɨde ara mãɨya bɨde cheipɨ. Mãɨ ichi pae pari mimiaparí minachia ɨtɨak'ari chi ĩjãanak'apɨɨrã ome eda jɨ̃a nɨbɨpiipɨ.

⁴⁷ »Chi chipari pae pari mimiaparipa chi chiparipa oopi bɨt'a k'awaipɨra maamina mãɨya oowẽpɨra, chi chiparipa mãɨ ichi pae pari mimiaparí minachia soapa p'eipɨ.

⁴⁸ Maamina chi ichi pae pari mimiaparipa atua bɨdepa chi chiparipa jara bɨt'a piawẽa oosira mãɨ ichi pae pari mimiaparí ãpia puru soapa p'eipɨ. Piarã Tachi Ak'õrepa waapẽarã́ waibɨa tea bɨma ichi pae oodamẽrá. Chi waibɨa jitadaɨrãpa ichi pae waibɨa oodai pia bɨma.

Jesú k'orea ẽpẽrarã k'ĩruupik'adada

⁴⁹ »Mɨ chesima nãɨ ĩjũa ɨtɨai k'orea. Ara nãɨena mãɨya oorupara mɨmá pia bai pasima.

⁵⁰ Maamina mãɨ naena mɨ minachia mĩa bɨma. Mãɨpuru ãarea sõp'ua baparima mãɨ ewari parudea.

⁵¹ ¿Mɨ nãɨ ĩjũanea chesiade a k'ɨ̃risia p'anɨk'ãra ẽpẽerã ne k'ɨ̃risiadawẽa p'anapii k'orea? Mɨa jararuma mãɨ k'orea chewẽa bɨma, mãɨpari che bɨma ẽpẽerã ãarea k'ĩruu p'ananamẽrá.

⁵² Idiidepa ara tedepemarã mɨ k'orea chi nek'ĩramá p'aneenaipɨ. Joesoma p'anɨne umepema waapẽarã ũpẽarã p'anɨ ome chi nek'ĩramá p'aneenaipɨ.

⁵³ Chi ak'õre chi warra ome chi nek'ĩramá padaipɨ. Chi warra chi ak'õre ome chi nek'ĩramá padaipɨ. Chi nae chi k'au ome nek'ĩramá padaipɨ, chi k'au chi nae ome chi nek'ĩramá padaipɨ. Chi p'ak'õre chi ãyo ome chi nek'ĩramá padaipɨ. Ichiaba chi ãyo chi p'ak'õre ome chi nek'ĩramá padaipɨ.

Ewari sãmaasã́ bai k'orea k'awa jarada

⁵⁴ Mãɨ awara Jesupa ẽpẽrarã́ nãɨya jarasima: —Mãrapa jɨ̃ara t'aua ɨmata baeparide ochiaru unuutade k'oe cheyade apatama. Mãɨya piarã k'oe cheparima.

⁵⁵ Ichiaba nãu ĩjũa pania newẽa ãpɨteariipa p'õat'ɨsira pisia bayade apatama. Mãɨya beeparima.

⁵⁶ Mãra chi pia jĩra berãpa ewari k'ĩra k'awa p'anɨmina Tachi Ak'õrepa nãɨ ewaride oo bɨt'a k'awadak'ama.

⁵⁷ »Mãrapa ¿k'ãre k'orea p'ue k'awadak'ama k'ãre jĩp'a bɨt'a?

⁵⁸ Pɨchi nek'ĩramaapa pɨ chi nepɨra ak'ɨparimá ateewãipɨra, ode wãutade ãarea oose ichi ome sõpia beei k'orea. Mãɨya oowẽpɨra ichia pɨ chi nepɨra ak'ɨparí juade bɨipɨ. Maapae chi ak'ɨparipa pɨ chi jɨ̃a nɨbɨpataɨ te ot'eaparia jitapiipɨ eda jɨ̃a nɨbɨmẽrá.

⁵⁹ Mɨa jararuma: pɨ jãmapema wãiwẽma aba pɨa teai bɨ erreara ãarea p'aarudea.