Luca 10 - Tachi Ak'õre Pedea

Jesupa ẽpẽrarã setenta peeda

¹ Mãɨya bak'ari Tachi Chipari Jesupa ichi ome p'ɨrrɨapataɨrã awara setenta jɨrɨ atasima Tachi Ak'õre pedea jarade wãnamẽrá. Ichi wãi bɨ p'uuru becha umeemea naa peesima.

² Ãchiá nãɨya jarasima: «Nãɨ ẽpẽrarã ne uu minachia chau nɨbapari jĩra p'anɨma. Maamina chi mimiapataɨrã waibɨawẽa p'anɨma. Mãɨpuru chi ne uu ĩjũa Chiparia ɨt'aa chiidit'ɨ mimiapataɨrã ichi ne uu ĩjũamá peemẽrá.

³ »¡Wãt'ɨ! Mɨa mãra ẽpẽra k'achia t'ãena peeruma. Ãchia mãra piawẽa oodaipɨ usa k'achiapa oveja chak'e orrabaripari jĩra.

⁴ Wãutade wãpia te, neet'á yaaparí, mãɨnepa jĩrune jɨ̃pataɨ awara ateewãrãt'ɨ. Ichiaba tãaraa bai nɨp'aneerãt'ɨ chi unuutarã ome pedeadai k'orea.

⁵ »Tede eda wãutade Tachi Ak'õre t'ɨ̃ne chi ẽpẽrarã́ jarat'ɨ ne k'ɨ̃risiadawẽa p'ananamẽrá.

⁶ Mãɨ tedepemarãpa ne k'ɨ̃risiawẽa p'aneenai k'ɨ̃ria p'anɨpɨra, mãrapa pedeadada jĩra ãchi ne k'ɨ̃risiawẽa p'aneenaipɨ. Mãɨpari ne k'ɨ̃risiawẽa p'aneenai k'ɨ̃riawẽpɨra, ãchi mãɨya p'aneenaiwẽma.

⁷ Techa k'ãirãt'ɨ. Mãrá pia pedeadaipɨra, mãɨ tede p'aneet'ɨ. Ãchia teauta k'ot'ɨ mãɨnepa netoparí tot'ɨ, chi mimiaparipa ichi erreara jitai bɨẽra.

⁸ »P'uurude cheutade ẽpẽrarãpa mãra pia pedeadaipɨra, ãchia mãrá teauta k'ot'ɨ.

⁹ Mãɨ awara chi k'ak'ua piawẽa berã jɨpa beepik'oat'ɨ. Ãchiá nãɨya jarat'ɨ: “Tãaraawẽa bɨde, Tachi Ak'õrepa mãra ichi juade ua beeipɨ, ichidirã paara”.

¹⁰ »Maamina p'uurude cheutade ẽpẽrarãpa mãrá pia chesidade adaepɨra, ãchiá nãɨya jarat'ɨ:

¹¹ “Nãɨ p'uurudepema yooro jora tai jĩrunepema mãra k'ĩrari jãrap'et'apatama Tachi Ak'õrepa mãɨ k'ɨ̃riawẽa bɨt'a ãchiá k'awapii k'orea. Pia k'awat'ɨ tãaraawẽa bɨde Tachi Ak'õrepa ichidirã ichi juade ua beeipɨ”.

¹² Mãɨpuru mɨa jararuma: Tachi Ak'õrepa ɨtɨai ewaride ichia mãɨ p'uurudepemarã atepe ɨtɨaipɨ Sodomanepema ẽpẽrarã ɨtɨai k'aepẽra.

Jesupa ichide ĩjãanak'apɨɨrã p'uuru ɨtɨada

¹³ »¡Corazín p'uurudepemarã mãɨnepa Betsaidadepemarã chupuri p'anɨma Tachi Ak'õrepa ɨtɨai pẽra! Mɨa ẽpẽrarãpa ne p'ue oodak'apɨ́ mãra t'ãena ooda Tirode mãɨnepa Sidone oodapara, mãɨ p'uurudepemarãpa isapea ãchi nemietá oopataɨ itu bɨdak'ari Tachi Ak'õrene ĩjãanai pasima. Mãɨ k'orea et'abarra jora ãchi poro ɨ̃rɨ p'odai pasima mãɨnepa neet'á sõp'ua p'anɨne jɨ̃pataɨ jɨ̃nai pasima.

¹⁴ Mãɨpuru Tachi Ak'õrepa ɨtɨai ewaride Tirodepemarã mãɨnepa Sidonepemarã k'aepẽra mãra atepe ɨtɨaipɨ.

¹⁵ ¿Capernaunepemarã ɨt'aa pajãnea wãnaik'ãra? ¡Wãnaiwẽma! ¡Tachi Ak'õrepa mãra piudaadarã p'anapataɨmá peeipɨ!»

¹⁶ Maapae ichi ome p'ɨrrɨapataɨrã́ jarasima: «Chi mãra pedea ĩjãa bɨpa mɨ pedea ĩjãa bɨma. Chi mãra unuemaa uru bɨpa mɨ sida unuemaa uru bɨma. Ichiaba chi mɨ unuemaa uru bɨpa mɨ Peeda sida unuemaa uru bɨma».

Jesupa setenta peeda jĩitea chedada

¹⁷ Jesupa setenta peeda pada sõpia jĩitea chesidama. Maapae ãchia Jesua nãɨya jarasidama: —¡Tai Chipari, pɨ t'ɨ̃nepa jaore mietaarã ãyá jeret'aautade ãchia oosidama taipa jaradada jĩra!

¹⁸ Mãɨ k'orea Jesupa ãchiá jarasima: —Ãjã, mɨa unu basima tiore ɨt'aripa pa baepari jĩra baesit'a.

¹⁹ Mɨa mãrá jua chaarea teasima tiore p'uedamẽrá mãɨnepa taama ɨ̃rɨ mãɨnepa tusõre ɨ̃rɨ p'ue t'ɨadamẽrá. Mi ãpia pida mãra piawẽa p'ue ooiwẽma.

²⁰ Maamina arapá p'anat'ɨ mãrapa jaore mietaarã ãyá jeret'aautade ãchia mãra ũrinak'ari mãɨya oopata pẽra, mãɨpari arapá p'anat'ɨ Tachi Ak'õrepa mãra t'ɨ̃ pajãne bɨ uru bɨẽra.

Jesú sõpia bada

²¹ Mãɨya pedea p'anɨne Jesú Tachi Ak'õre Jaoredepa sõpia nɨbeesima. Mãɨpuru Tachi Ak'õrea nãɨya jarasima: «Ak'õre, pɨ pajãnepema Chiparipɨ mãɨnepa nãɨ ĩjũanepema Chiparipɨ. Pɨa ne atua berã́ mɨa jarateada k'awapida pẽra mɨa pɨá pia pedeaipɨ. Mãɨt'u chi minachia k'awa berã́ pɨa k'awapié pasima. Ãjã, Ak'õre, pɨa mãɨya oosima jãɨya oo k'ɨ̃ria bada pẽra.

²² »Mɨ Ak'õrepa mɨá ara ichidepema ne ãarea k'awapisima. Abaɨ pida atua p'anɨma mɨ, chi Warra sãmaasã́ bɨ; aba mɨ Ak'õrepuru mãɨ k'awa bɨma. Ara mãɨ jĩra abaɨ pida atua p'anɨma mɨ Ak'õre sãmaasã́ bɨ; abapuru mɨ, chi Warrapuru mãɨ k'awa bɨma. Mɨa abaɨa mɨ Ak'õre k'awapisira, mãɨ ẽpẽra pida k'awaipɨ».

²³ Maapae ichi ome p'ɨrrɨapataɨrã awara ateewãk'ari nãɨya jarasima: «Mãra pia p'anɨma mɨa oo bɨt'a unu p'anɨ pẽra. Awaraɨpa mãɨ unusira mãɨ ẽpẽra sida pia baipɨ.

²⁴ Piarã Tachi Ak'õre pari pedeapataɨrã minachia p'anɨrãpa mãɨnepa poro jũra jɨ̃parí jɨ̃ p'anɨrãpa mãrapa unu p'anɨt'a unu k'ɨ̃ria p'anasidama, maamina ununaé pasima. Ichiaba mãrapa ũri p'anɨt'a ũri k'ɨ̃ria p'anasidamina ũrinaé pasima».

Samariadepema ẽpẽra sõpia bɨ k'orea nepɨrɨda

²⁵ Ewariaba Moisepa bɨda jarateaparí bai nɨbeek'ari Jesú piawẽa pedeapii k'orea nãɨya idisima: —Jarateaparí, ¿mɨa k'ãre ooi pia bɨma Tachi Ak'õre ome ewaricha chok'ae bai k'orea?

²⁶ Jesupa p'anoosima: —Moisepa bɨdade ¿k'ãre bɨ bɨma? ¿Pɨmá k'ãret'a jara bɨma?

²⁷ Moisepa bɨda jarateaparipa p'anoosima: —Ãarea pɨ sõnepa, ãarea pɨ jaoredepa, ãarea pɨ jua chaareadepa mãɨnepa ãarea pɨ k'ɨ̃risiadepa pɨa pɨchi Chipari, Tachi Ak'õre k'ɨ̃riase. Ichiaba ẽpẽra abaɨ k'ɨ̃riase pɨchi k'ɨ̃ria bɨ jĩra.

²⁸ Mãɨne Jesupa jarasima: —Pɨa arí p'anoosima. Pɨa mãɨ jĩra oosira Tachi Ak'õre ome ewaricha chok'ae baipɨ.

²⁹ Maamina ichia unupiyá basima ichi jĩp'a bapari jĩra. Mãɨpa Jesua idisima: —Maamina “ẽpẽra abaɨ” ¿k'aima?

³⁰ Jesupa p'anoosima: —Ewariaba ẽpẽra Jerusalenepa Jericodea wãsima. Wãrune nechɨapataɨ mietaarãpa ichi jitadak'ari minachia sĩnak'ari piuda jĩra bari bɨesidama. Ichia uru bada ãarea ẽemarinak'ari wãsidama.

³¹ »Mãɨya bɨde p'aare judio mãɨ ode chesima. Chi ẽpẽra bari bɨ unusimina k'aripawẽa jĩp'a wãsima.

³² Ara mãɨya Levidepema aba mãɨ ode chesima. Ichia pida ẽpẽra bari bɨ unusimina k'aripawẽa jĩp'a wãsima.

³³ Mãɨ ɨ̃ari ẽpẽra Samariadepema mãɨ ode chesima. Chi ẽpẽra bari bɨ unuside sõchupuriasima.

³⁴ Orrobarik'ari chi ẽpẽra k'ak'ua p'ɨrɨk'oak'ari olivo taapa, mãɨnepa uvabapa p'arupa pɨrasima. Maapae ichi mũra ɨ̃rɨ bɨk'ari k'ãipataɨ tedea ateewãsima. Mãma chi ẽpẽra pia ak'ɨsima.

³⁵ »Norema Samariadepemapa chi te chiparia erreara teak'ari nãɨya jarasima: “Nãɨ ẽpẽra ak'ɨ base. Nãɨ erreara mɨa p'aaru awarawẽasira, pɨ errearadepa p'aadoose. Mɨ jĩitea cherude pɨ erreara bɨda mɨa jõma teaipɨ”».

³⁶ Mãɨya nepɨrɨk'ari Jesupa idisima: —Ẽpẽra ũpea p'anɨpa chi nechɨapataɨ mietaarãpa jok'aedaadat'a unusidama. Pɨmá ¿sãɨ ichi ome sõpia basima?

³⁷ Mãɨne chi Moisepa bɨda jarateaparipa p'anoosima: —Chi sõchupuriadapa. Jesupa ichiá jarasima: —Ara mãɨ jĩra ẽpẽra abaɨ k'ɨ̃riase.

Jesú Marta tedea wãna

³⁸ Mãɨ ode wãutade Jesú, chi ichi ome p'ɨrrɨapataɨrã paara, p'uuru chaedea chesidama. Mãma wẽra Marta apataɨ bapachima. Mãɨ Martapa Jesua ichi tede pia pedeasima.

³⁹ Martapa ũpẽawẽra uru basima María apataɨ. María Jesú jĩru k'ait'a suak'abari basima ichia jaratea bɨ ũrii k'orea.

⁴⁰ Mãɨya bɨde Marta ne minachia oomaa bɨẽra sõpiawẽa beesima. Jesú orrobarik'ari jarasima: —Jarateaparí ¿pɨmá pia bɨk'ãra mɨ ũpẽawẽrapa mɨ k'aripawẽa bɨt'a? Ichiá jarase mɨ k'aripamẽrá.

⁴¹ Jesupa jarasima: —Marta, Marta, pɨa ne minachia oo bɨ k'orea minachia k'ɨ̃risia pará bɨma.

⁴² Maamina ¿Tachi Ak'õre pedea ũrii pia bɨwẽk'ãra? Mãɨ Mariapa oo bɨma. Abaɨ pida ichiá mãɨ oowẽa bɨade adaiwẽma.