Luca 1 - Tachi Ak'õre Pedea

Lucapa Teop'iloa bɨ tea peeda

¹ Tachi Ak'õrepa tachi t'ãena ooda k'orea, ẽpẽerã chok'araɨrãpa k'art'ade bɨ k'ɨ̃ria p'anasidama.

² Chi mãɨ ooda ununaanapa mãɨ nepɨrɨsidama mãɨnepa jarateasidama. Maapae chi k'art'a bɨdaadapa mãɨ bɨsidama.

³ Mãɨpuru mɨa ãchia bɨdada mãɨnepa nepɨrɨdada k'orea ãarea idi basima. Maapae mãɨ k'ɨ̃risiak'ari, mɨa nãɨ nepɨra bɨmaa bɨma pɨ pae, chi minachia k'awa bɨ Teóp'ilo pae.

⁴ Mãɨya pɨa k'awaipɨ pɨá jarateadada piarãpɨ.

Juan chi Porochoaparí t'õi k'awapida

⁵ Herode Judea tuadepema minachia k'awa bɨ paside p'aare Zak'aria apachidaɨ basima. Mãɨ Zak'aria mimiapachima p'aarerã waapẽarã paara; mãɨ Abía apachidaɨdepema pasima. Chi k'ima Elisabé Aarón ẽpẽrarãnepa cheda pasima.

⁶ Ãchi umea Tachi Ak'õre k'ĩrari jĩp'a p'anasidama. Tachi Chiparipa oopi bɨ pedea jõma ĩjãapachida pẽra, waapẽarãpa k'achia pedeadaiwẽa p'anasidama.

⁷ Maamina Elisabé warra t'õk'a pada pẽra warra nea p'anasidama. Mãɨ awara minachia chõa p'anasidama.

⁸ Mãɨya p'anɨne Zak'aria Tachi Ak'õre te minachia bɨde mimiapataɨ ewari pasima. Mãɨpuru ichi, waapẽarã p'aarerã ichi ome mimiapataɨ sida Tachi Ak'õre k'ĩrari mimia p'anasidama.

⁹ Mãɨne p'aarerãpa oopataɨ jĩra ne jemena ajorosidama k'awadai k'orea k'aipa Tachi Chipari te minachia bɨde eda ãp'o k'era uruapik'ari ameeit'a. Mãɨne Zak'aria t'ɨ̃t'u baesima.

¹⁰ Ãp'o k'era paateai hora pada pẽra Zak'aria eda wãsima. Mãɨne ẽpẽerã chok'araɨrãpa tajataria Tachi Ak'õrea ɨt'aa chiidimaa p'anasidama.

¹¹ Mãɨya bɨde Tachi Chiparipa ɨt'aripa peeda, ãp'o k'era paateapataɨ bɨk'á juaraari unupisima.

¹² Ichi unuside Zak'aria minachia p'erak'ari k'awa k'ɨ̃risiaé pasima.

¹³ Maamina Tachi Ak'õrepa ɨt'aripa peedapa jarasima: —Wap'earãse. Pɨa Tachi Ak'õrea ɨt'aa chiidi bada ichia ũrisima. Pɨ k'ima Elisabepa warra t'õipɨ. Ichi t'ɨ̃ bɨse Juan.

^14-15 Uvaba asia mãɨnepa it'ua tok'á baipɨ. Warra t'õi naena, Tachi Ak'õre Jaore ichi ome baima. Mãɨ warra k'orea ẽpẽerã minachia sõ arapaadaipɨ. Ichi Tachi Chipari k'ĩrari chi waibɨa pai pẽra, pɨ sida minachia arapá baipɨ.

¹⁶ Ichia chok'ará israel ĩjũanepemarã Tachi Ak'õremá jĩitea chepiipɨ.

¹⁷ Eliapa uru bada jaore, mãɨnepa ichi jua chaareadepema sida pɨ warrapa uru baipɨ. Mãɨnepa ichi Tachi Chipari naa wãipɨ chi ak'õrerã mãɨnepa chi naerã ãchi warrarã ome sõpiapii k'orea. Mãɨ awara ichia ĩjãanak'apɨɨrã sida k'aripaipɨ jĩp'a berãpa k'ɨ̃risiapataɨ jĩra k'ɨ̃risiadamẽrá. Mãɨya k'aripaipɨ p'uurudepemarãpa Tachi Chiparia pia pedeadamẽrá.

¹⁸ Mãɨne Zak'aríapa chi Tachi Ak'õrepa ɨt'aripa peedá idisima: —¿Mɨa sãmaasã́ k'awai pɨa jara bɨ piarãt'a? Mɨ minachia chõa bɨma. Mɨ k'ima sida chõtã́ bɨma.

¹⁹ Chi ɨt'aripa peedapa Zak'aria jarasima: —Mɨ Gabrielpɨ, Tachi Ak'õre pae pari mimiaparipɨ. Ichia mɨ pɨmá peesima mãɨ pedea pia jaramẽrá.

²⁰ Mɨa jara bɨma Tachi Ak'õrepa bɨda ewaride piarã mãɨyaipɨ. Maamina pɨa mɨ pedea ĩjãaé pada pẽra, k'ĩrame t'urrá beeyade asima, mɨa nãɨ ewari jarada ará parudea.

²¹ Mãɨmisa ẽpẽrarãpa tajataria nɨ p'anasidama. Ãchia k'awadawẽa p'anasidama k'ãre k'orea Zak'aria jãɨya eda tãaraamaa basit'a.

²² Mãɨya bɨde ichi tajatá chesima maamina p'ue pedeaé pasima. K'ĩrame t'urrá beesideepuru, juadepa puru su jara beepachima. Mãɨpa ẽpẽrarãpa k'awasidama Tachi Ak'õrepa ichiá ne unupisit'a.

²³ Mãɨ Zak'aríapa chi mimiat'a p'aare judiodé jõma ook'ari, ichi tiidá wãsima.

²⁴ Mãɨya bak'ari chi k'ima Elisabé biak'oa beesima. Mãɨpuru Elisabé jedek'o joesoma tiida beesima. Nãɨya k'ɨ̃risiasima:

²⁵ «Tachi Chiparipa mɨ k'aripasima biak'oa beemẽrá. Jãɨya ichia pia oodapa mɨ k'ĩra p'era bada ãyá bɨsima. Ẽpẽrarãpa mɨ k'orea waa k'achia pedeadaiwẽma».

Ɨt'aripema peedapa Mariá jarada

^26-27 Elisabé jedek'o k'ak'o sei biak'oa beek'ari Tachi Ak'õrepa ɨt'aripa peeda Gabriel Galilea tuade, Nazaré p'uurudea peesima ãwẽra waidi ɨmɨk'ĩra ome k'ãik'apɨ́ Mariamá. Mãɨ María José ome miak'ãii pasima. José Davidepa cheda pasima.

²⁸ Chi ɨt'aripa peeda Mariamá chek'ari nãɨya jarasima: —¡María! Tachi Chiparipa pɨ pia uru bɨma. Ichi pɨ ome bɨma.

²⁹ Mãɨ pedea ũriside Mariapa k'awa k'ɨ̃risiaé pasima, k'ãre k'orea chi Tachi Ak'õrepa ɨt'aripa peeda mãɨya pedea bɨt'a.

³⁰ Mãɨne chi Tachi Ak'õrepa ɨt'aripa peedapa ichiá jarasima: —María, wap'earãse; Tachi Ak'õrepa pɨ k'aripa bɨma.

³¹ Biak'oa beek'ari warra t'õipɨ. Mãɨ warra t'ɨ̃ bɨse Jesú.

³² Ichi chi minachia k'awa bɨ paipɨ mãɨnepa Tachi Ak'õre chi Atepe bɨpa ichi Warraade aipɨ. Tachi Chiparipa ichi israel ĩjũanepemarã chi minachia k'awa bɨ bɨipɨ ichi chõarãenapema Daví bada jĩra.

³³ Ichi Jacobodepa chedaadarã chi minachia k'awa bɨ baipɨ. Ewaricha ichidirã ichi juade ua baipɨ.

³⁴ Mãɨne Mariapa chi ɨt'aripa peedá idisima: —Mɨ ɨmɨk'ĩra ome k'ãik'apɨ́, ¿sãmaasã́ biak'oa beeima?

³⁵ Chi ɨt'aripema peedapa p'anoosima: —Tachi Ak'õrepa ichi Jaore pɨmá peek'ari, ichi jua chaareadepa pɨ ome baipɨ. Mãɨpuru ichia tearu warra pɨa t'õru, Tachi Ak'õrepa ichi Warraade aipɨ.

³⁶ Mãɨnepa pɨ ũpẽawẽra Elisabé biak'oada jedek'o k'ak'o sei pa bɨma, chõtã́ bɨmina. Ichi warra t'õk'aade apachidamina, ɨmɨk'ĩra warra t'õpiipɨ.

³⁷ Tachi Ak'õrepa p'ue ooiwẽa bɨ newẽma.

³⁸ Mariapa p'anoosima: —Mɨ Tachi Chipari pae pari mimiaparipɨ. Pia bɨma pɨchia jara bɨ jĩra ichia ooit'a mɨ ome. Maapae chi Tachi Ak'õrepa ɨt'aripa peeda wãsima.

Mariapa Elisabé ak'ɨde wãna

³⁹ Mãɨya bak'ari María isapea Elisabé p'uurudea wãsima. Mãɨ p'uuru Judea ĩjũa eya pará bɨde bɨma.

⁴⁰ Mãma Zak'aria tede eda wãk'ari Elisabea pia pedeasima.

⁴¹ Elisabepa María pedea ũrirune ichi warra bide eda k'ɨrɨ totomĩasima. Ara mãɨne Elisabé Tachi Ak'õre Jaorede beesima.

⁴² Mãɨne Elisabepa Mariá nãɨya jĩk'ua jarasima: —Pɨ piarã waapẽarã wẽrarã k'aepẽra Tachi Ak'õrepa pia k'aripa bɨma. Pɨ warra sida Tachi Ak'õrepa pia k'aripaipɨ.

⁴³ ¿Mɨ k'aima, mɨ Chipari naepa nãɨya ak'ɨde che bɨma?

⁴⁴ Piarã pɨ pedea ũrirune warra mɨ bide bɨ arapaapa totomĩasima.

⁴⁵ Tachi Chiparipa jarada piarã mãɨyai ĩjãana pẽra pɨ minachia pia bɨma.

⁴⁶ Mãɨne Mariapa jarasima: «Sõnepa mɨa jararuma: Tachi Chipari chi Atepe bɨpɨ.

⁴⁷ Mɨ sõ arapá bɨma Tachi Ak'õre ome, mɨ k'aripaparí.

^48-49 Mɨ ichi pae pari mimiaparí wẽra jĩra bɨmina, mãɨnepa minachia k'awa bɨwẽmina, mɨ pia ak'ɨsima. Idiipa waa jõmãɨrãpa jaradaipɨ Tachi Ak'õrepa nejõma p'ue bɨpa mɨ minachia k'aripa bɨma, mɨ pae ne waibɨa oo bɨẽra. ¡Aba ichit'a Tachi Ak'õrepɨ!

⁵⁰ Mãɨpuru ichi wap'ea berã ewaricha k'ĩra chupuria baparima.

⁵¹ Tachi Ak'õrepa ichi jua chaareadepa ne waibɨa ook'oasima. Ara ãchi tuaba chi minachia k'awa k'ɨ̃risia berã ichia ãyá jĩichoapisima.

⁵² Chi atepe beada ãyá jeret'aak'oak'ari chi k'aepe k'ede chi atepe bɨk'oasima.

⁵³ Chi nenea k'edea nejõma pia teasima, maamina chi minachia uru beadá jua k'ak'uá ãyá wãpik'oasima.

^54-55 Ichi pae pari mimiaparí Israel p'uuru k'aripasima. Ichia Abrahán, ichidepa chedaadarã sida ewaricha k'ĩra chupuriasima tachi chõarãenapemarã́ jarada jĩra».

⁵⁶ María Elisabé tede jedek'o k'ak'o ũpea bak'ari ichi tedea wãsima.

Juan chi Porochoaparí t'õna

⁵⁷ Ichi ewari paside Elisabé warra t'õsima.

⁵⁸ Ichi ara k'ait'a p'anapataɨrãpa, ichidirã pida mãɨ ũrisidaɨde ichi ome sõ arapá p'aneesidama Tachi Chiparipa minachia k'ĩra chupuriada pẽra.

⁵⁹ Warra t'õk'ari ewari k'ak'o ocho pa bɨde ateewãsidama warra k'ak'ua tauchaadai k'orea. Mãɨne waapẽarãpa ichi ak'õre t'ɨ̃ Zak'aria t'ɨ̃ jĩra bɨ k'ɨ̃ria p'anasidama.

⁶⁰ Maamina chi naepa jarasima: —Mãɨya t'ɨ̃ bɨdaiwẽma, mãɨpari ichi t'ɨ̃ bɨdaipɨ Juan.

⁶¹ Ãchia jarasidama: —¿K'ãarea mãɨ t'ɨ̃ bɨdaima? Mãra ẽpẽrarã t'ãena mãɨ t'ɨ̃ newẽma.

⁶² Maapae chi ak'õre Zak'ariá juadepa idisidama k'ãre t'ɨ̃ bɨ k'ɨ̃ria bɨ k'awadayá.

⁶³ Mãɨ k'orea Zak'ariapa pak'uru p'ep'edea peda enemeepisima. Mãɨne nãɨya bɨsima: «Ichi t'ɨ̃ Juan bɨdaipɨ». Mãɨ unusidaɨde jõmãɨrãpa k'awa k'ɨ̃risiadaé pasima.

⁶⁴ Ara mãɨne Zak'aria k'ĩrame t'urrá bada mãicha pedeasima mãɨnepa Tachi Ak'õrea pia pedeasima.

⁶⁵ Jõma ãchi k'ait'apemarãpa mãɨ k'orea ũrisidaɨde Tachi Ak'õre wap'ea p'anɨpa jõma Judea tua eya pará bɨde nepɨrɨpachidama.

⁶⁶ Jõma mãɨ ũrinaanapa jarapachidama: «Mãɨya paipɨra, mãɨ warra chi atepe paipɨ». Mãɨya jarasidama Tachi Chipari jua chaarea chi warra ome bɨẽra.

⁶⁷ Maapae chi Juan ak'õre Zak'ariapa Tachi Ak'õre Jaoredepa nãɨya pedeasima:

⁶⁸ «¡Israel p'uuru Tachi Ak'õre minachia pia bɨma, ichi ẽpẽrarã k'aripai k'orea chesideepuru!

⁶⁹ Ichi pae pari mimiaparí Davidepa cheda peeruma Tachi k'aripaparí jua chaarea bɨt'a bamẽrá.

⁷⁰ Naena Tachi Ak'õrepa ichi pari pedeapataɨrã́ mãɨ k'orea jarapisima.

⁷¹ Ichia jarapisima jõma tachi nek'ĩramá, mãɨnepa tachi unuemaa p'anɨ ãchi jua chaareadepema k'aripait'a.

⁷² Mãɨya ooipɨ tachi chõarãenapemarã́ k'ĩra chupuriayade ada pẽra ichiaba ãchi ome pedea bɨda jõma ooyade ada pẽra.

^73-74 Ichia tachi chõarãenapema Abrahaná jarasima tachi chi nek'ĩramá jua chaareadepema k'aripai. Mãɨya ne wap'eawẽa tachia ichi pae nepia oo p'ananai.

⁷⁵ Tachi chok'ae p'anɨmisa ichi k'ĩrari pia jĩp'a nipadaipɨ».

⁷⁶ Maapae Zak'ariapa ichi warra k'orea nãɨya jarasima: «Warra, pɨ Tachi Ak'õre chi atepe bɨ pari pedeapariade adaipɨ. Pɨ Tachi Chipari naa wãipɨ ichi o jarii k'orea.

⁷⁷ Pɨa israel ĩjũanepemarã́ k'awapiipɨ sãmaasã́ Tachi Ak'õrepa ãchi nemietá k'ɨ̃risia atuak'ari k'aripait'a.

⁷⁸ Ichia tachi minachia k'ĩra chupuria bɨẽra, ɨmata pajãne ochiapari jĩra, ara mãɨya Tachi K'aripaparí pajãnepa cheipɨ.

⁷⁹ Mãɨpa chi p'ãrione berã́, mãɨnepa chi piudai wap'ea berã́ Tachi Ak'õrepa ichi ɨnaa k'awapiipɨ. Ichiaba tachiá k'awapiipɨ sãmaasã́ ichi ode ne k'ɨ̃risiawẽa nipadai k'orea».

⁸⁰ Chi warra warisima mãɨnepa Tachi Ak'õre Jaoredepa chaarea beesima. Chõa bak'ari ĩjũa pania newẽa bɨde bade wãsima. Mãma bapachima aba israel ĩjũanepemarã k'ĩrari pedearudea.