Juda 1 - Tachi Ak'õre Pedea

Nãɨ k'art'ade Judapa naa bɨda

¹ Mɨ Judapɨ, Jacobo ũpẽapɨ mãɨnepa Jesucristo pae pari mimiaparipɨ. Nãɨ k'art'a bɨruma ãarea Tachi Pajãnepema Ak'õrepa t'ɨ̃naɨrã pae. Ichia mãra k'ɨ̃ria bɨma mãɨnepa Jesucristodepa ak'ɨ uru bɨma.

² Mɨa k'ɨ̃ria bɨma ichia mãra minachia k'ĩra chupuria bait'a, minachia ne k'ɨ̃risiawẽa bapiit'a mãɨnepa mãra minachia k'ɨ̃ria bait'a.

Chi sea jarateapataɨrã

³ Ũpẽarã, mɨa nãɨ k'art'ade Tachi Ak'õrepa tachi k'aripada k'orea bɨ k'ɨ̃ria basima. Maamina ara nãɨena bɨruma mãra jĩrak'aua p'ananamẽrá. Ara machia ĩjãa p'anɨ k'orea wawá choa p'anat'ɨ. Tachi Ak'õrepa chi piarãpẽa pedea ichi ẽpẽrarã́ barimama teasima. Mãɨ ewariaba pida k'ĩra awara teaiwẽma.

⁴ Mãɨya mɨa nãɨ bɨruma chi eda waapẽarã ũpẽarã jĩra berã chedak'ari mãra t'ãena eda p'anɨ pẽra. Mãɨ ẽpẽrarãpa seadepa jarateapatama Tachi Ak'õrepa ichi sõpiadepa tachi k'aripada pẽra tachi k'ak'uapa nemietá minachia oo k'ɨ̃ria bɨt'a p'ue oodai p'anɨt'a. Ãchia Tachi Chipari aba bɨ Jesucristot'a itu bɨpatama. Tãaraaenapemat'u eda bɨ basima Tachi Ak'õrepa ãchi ɨtɨait'a.

⁵ Mãɨ ãarea k'awa p'anɨmina mɨa k'ɨ̃risiapiruma Tachi Chiparipa ichi p'uuru Egitodepa k'aripasit'a. Maamina k'aripak'ari chi ichide ĩjãanawẽa berã k'enasima.

⁶ Mãɨnepa k'ɨ̃risiat'ɨ chi eda waapẽarã Tachi Ak'õrepa ɨt'aripa peedaɨrã Tachi Ak'õrepa bɨda jĩra p'aneenaé pasit'a. Mãɨpari ãchi p'anana itu bɨsidama. Mãɨpuru Tachi Ak'õrepa uria p'ãrio bɨde ewaricha eda jɨ̃a nɨbɨsima aba ichia ɨtɨai ewaridea.

⁷ Ara mãɨ jĩra Tachi Ak'õrepa Sodomanepemarã, Gomorradepemarã, mãɨnepa ãchi k'ait'a be p'uurudepemarã sida ɨtɨasima. Mãɨ ẽpẽrarãpa k'ĩranejasia oopachidama. Nejõma nemietá tachi k'ak'uapa ooiwẽa bɨt'a oopachidama. Mãɨpuru Tachi Ak'õrepa ãchi t'ɨpɨ urua k'iik'ade ewaricha minachia mĩa uru bɨma. Mãɨpa k'awapi bɨma nemietá oopataɨrã ãarea mãɨya minachia mĩa p'ananait'a.

⁸ Mãra t'ãena chedada mãɨ ẽpẽrarã jĩra p'anɨma. Ãchia k'ãmok'araautat'a ĩjãapatama. Ãchi k'ak'uapa nemietá oo k'ɨ̃ria bɨt'a oopatama, Tachi Chipari itu bɨpatama, mãɨnepa ɨt'ariapemarã́ k'achia pedeapatama.

⁹ Maamina Tachi Ak'õrepa ɨt'aripa peeda chi minachia k'awa bɨ Miguelpa mãɨya ook'a pasima. Moisé piuside Miguel tiore ome k'ĩk'ĩrua pedea p'anasima chi k'ak'ua k'ai juade beei k'awayá. Maamina k'achia pedeai k'ɨ̃risiaé pasima, mãɨyawẽapuru jarasima: «Tachi Chiparipa pɨ ɨtɨaipɨ».

¹⁰ Maamina mãɨ ẽpẽrarã mãra t'ãena chedaadapa ãchia ũrinawẽa p'anɨ k'orea piawẽa pedeapatama. Ãnimararã k'ɨ̃risiapata jĩra k'ɨ̃risiapatama. Ãnimara abapuru ichi k'ak'uapa k'ɨ̃ria bɨ jĩra mãɨya oopatama. Mãɨ k'orea Tachi Ak'õrepa ɨtɨaipɨ.

¹¹ ¡Miachupuri p'anɨma chi nemietaade nipapataɨrã! Caínpa ooda jĩra oopatama. Erreara k'ɨ̃ria p'anɨnepa Balaampa ooda jĩra piawẽa oo nipapatama. Corepa Moisé itu bɨda jĩra ara mãɨya Tachi Ak'õre itu bɨ p'anɨ pẽra ãchi sida ɨtɨaipɨ.

¹² Mãra ara machi ũpẽarã paara k'ɨ̃ria p'anɨnepa sõ arapá nek'o p'anɨne, ãchia mãra paara wap'eadawẽa k'opatama. Ãchi jɨ̃ara nãupa ateewãru jĩra p'anɨma. Ara ãchi paepuru k'ɨ̃risiapatama. Nãupa jɨ̃ara ãyá ateewãrune k'oe chek'ama. Ara nãɨya chi ãchia jaratea p'anɨnepa mãra k'aripak'ama. Mãɨ chi pak'uru bari k'ak'o ume piuda jĩra p'anɨma, mãɨ nejõ chi jarade chauk'a pẽra, mãɨnepa chi k'arra ẽut'aadada pẽra.

¹³ Ãchi p'usa jɨ̃ara t'awa jĩra p'anɨma. Ara chi p'usapa ichi t'awadepa k'ok'op'ea amaapari jĩra, ãchia ne k'ĩra p'era wawaria oopatama. Mietade wãpata pẽra, ãchi chi k'ãk'ãi urua wãru jĩra p'anɨma, chi o atua p'anɨẽra. Tachi Ak'õrepa uria minachia p'ãrio bɨde bɨsima ãchi ewaricha ɨtɨai k'orea.

^14-15 Enopa mãɨ ẽpẽerã k'orea pedeasima. (Mãɨ Adannepa waa Enomá ẽpẽerãnepa chedaadarã bari k'ak'o siete pa p'anasima). Enopa nãɨya jarateasima: «¡Ũrit'ɨ! Tachi Chipari cheruma chi ichidirã minachia p'anɨ paara mãɨrã ãarea ɨtɨai k'orea. Mãɨne ãarea chi ichi k'ɨ̃rianak'apɨɨrã ɨtɨaipɨ, nemietá oodada pẽra ichi k'ɨ̃rianaé pẽra, mãɨnepa ichi k'orea minachia k'achia pedeadada pẽra».

¹⁶ Mãɨ ẽpẽerã ne wariwẽa bɨ k'orea k'ĩroopatama, mãɨnepa waapẽarã k'orea ara ne wariwẽa bɨ k'orea pedeapatama. Abapuru ãchia k'ɨ̃ria p'anɨt'a jɨrɨpatama. Minachia be jĩra pedeapatama. Chi waapẽarã seapatama, chi ara ãchia k'ɨ̃ria p'anɨ jɨrɨdai k'orea.

Ũpẽarãpa sãmaasã́ oodai p'anɨt'a

¹⁷ Maamina ũpẽarã, chi Tachi Chipari Jesucristopa peedaɨrãpa naena jaradada k'ɨ̃risiat'ɨ.

¹⁸ Mãrá nãɨya jarasidama: «K'aadeapema ewaride ẽpẽerã Tachi Ak'õre oo uru p'anapataɨrã pará p'ananaipɨ. Tachi Ak'õre k'ɨ̃rianak'a pẽra ãchi k'ak'uapa oo k'ɨ̃ria bɨt'a oo p'ananaipɨ».

¹⁹ Mãɨrãpa ũpẽarã ãchi k'ak'awá awara paneepipatama, ãchia ne wawaria k'ɨ̃riautat'a oopatama, mãɨnepa Tachi Ak'õre Jaore uru p'anɨwẽma.

²⁰ Maamina ũpẽarã, ara machi k'ak'awá k'aripat'ɨ Cristode ĩjãanamẽrá. Tachi Ak'õrea ichi Jaoredepa ɨt'aa chiidit'ɨ.

²¹ Tachi Ak'õrepa tachi k'ɨ̃ria bɨdepa nipat'ɨ. Tachi Chipari Jesucristopa k'ĩra chupuria bɨdepa ewaricha chok'ae bapiit'a nɨ p'anat'ɨ.

²² Chi ũpẽarã minachia ĩjãawẽa berã k'ĩra chupuriat'ɨ.

²³ Chi t'ɨpɨ tau urua nɨbɨdea wãuta k'aripa p'anat'ɨ. Waapẽarã k'ĩra chupuria p'anat'ɨ, maamina jĩrak'aua p'anat'ɨ. Ãchia nemietá ãarea oopataɨ itu bɨt'ɨ.

Judapa Tachi Ak'õrea pia pedeada

²⁴ Tachi Ak'õrepa mãra p'ue pia ak'ɨipɨ nemietaade baepidaemaapa. Ichi k'ĩrawãrea bɨ k'ĩrari nemietaawẽa p'ue pia bɨipɨ. Mãma minachia arapá p'ananaipɨ.

²⁵ Tachi Ak'õre abapuru bɨma. Ichi Tachi K'aripaparipɨ. Ichit'a chi atepe bɨma, mãɨnepa ne ãarea p'ue ooi bɨma. Naenaenapema mãɨya nima, idiapae pida mãɨya bɨma, mãɨnepa ewaricha mãɨya baipɨ. Tachi Chipari Jesucristodepa ichiaapuru pia pedeadai p'anɨma. Mãɨya beese.