Juan 9 - Tachi Ak'õre Pedea

Jesupa ẽpẽra tau p'ãrio t'õna jɨpa beepida

¹ Wãrune Jesupa unusima ẽpẽra ichi t'õnaenapema tau p'ãrio bɨt'a.

² Mãɨne Jesú ome p'ɨrrɨapataɨrãpa idisidama: —Jarateaparí, ¿k'aipa nemietá oodadepa nãɨ ẽpẽra jãɨya tau p'ãrio t'õsima? ¿Ichi ak'õre mãɨnepa chi naepa nemietá oodaadadepa, wa ichia nemietá oodadepa?

³ Jesupa p'anoosima: —Ichia nemietá oodadepa wa chi ak'õrerãpa nemietá oodaadadepa jãɨya t'õé pasima. Mãɨpari chi tau p'ãrio t'õsima ichidepa Tachi Ak'õrepa ne oorut'a ẽpẽerãpa ununamẽrá.

⁴ Mãɨpuru ara ãst'á bɨeda, chi mɨ Peedapa oopi bɨt'a mɨa ãarea ooi bɨma. Mãɨ k'iuk'ari abaɨ pida p'ue mimiak'ama.

⁵ Maamina nãɨ ĩjũane bɨde mɨ ẽpẽerã pae ɨnaa bɨ jĩra bɨma mɨ Ak'õre k'orea k'awadamẽrá.

⁶ Mãɨya jarak'ari Jesupa ĩjũane iduk'ari yooro susua ook'ari, chi tau p'ãrio bɨ taude p'ɨrɨsima.

⁷ Maapae Jesupa ichiá jarasima: —K'uipataɨ Siloé apataɨmá sɨɨde wãse. (Mãɨ t'ɨ̃ jara bɨma “peeda”). Ara mãɨne chi tau p'ãrio bɨ wãk'ari ichi tau sɨɨk'ari unu beesima. Maapae ichi tiidá wãsima.

⁸ Ichi te k'ait'a berãpa mãɨnepa chi ichia erreara idipachit'a unupachidaɨrãpa jarapachidama: «¿Nãɨ chi erreara idi suak'abari bapachiwẽk'ãra?»

⁹ Chi eda waapẽarãpa ichiade apachidama. Waapẽarãpa ichi jĩra bɨmina ichiwẽane apachidama. Maamina chi tau p'ãrio badapa jarasima: «Piarã mɨpɨ».

¹⁰ Mãɨne ichiá idisidama: —¿Sãmaasã́ pɨa unu beesima?

¹¹ Ichia p'anoosima: —Ẽpẽra Jesú apataɨpa yooro susua ook'ari mɨ taucha p'ɨrɨsima. Maapae ichia jarasima: “K'uipataɨ Siloé apataɨmá sɨɨde wãse”. Wãk'ari mɨ tau sɨɨside unu beesima.

¹² Mãɨne ãchia idisidama: —Mãɨ ẽpẽra ¿sãma bɨma? Ichia p'anoosima: —Mɨa atuapɨ.

P'ariseorãpa tau p'ãrio badá minachia idi p'anana

^13-14 Jesupa yooro susua ook'ari tau p'ãrio bɨ jɨpa beepida ewari, mãɨ chi mimianak'apɨ́ ewari pasima. Mãɨpuru chi tau p'ãrio bada waapẽarãpa p'ariseorãmá ateewãsidama.

¹⁵ Maapae p'ariseorã pida mãɨ ẽpẽrá idisidama sãmaasã́ pɨ tau pia beesit'a. Mãɨne ichia jarasima: —Ichia yooro susua ook'ari mɨ taucha p'ɨrɨsima. Maapae mɨa paniapa sɨɨside unu beesima.

¹⁶ Chi waapẽarã p'ariseorãpa jarasidama: «Mãɨ ẽpẽra Tachi Ak'õrenepa chewẽa bɨma, mimianak'apɨ́ ewaride chi tachia ne oodaiwẽa p'anɨne mãɨya ooda pẽra». Maamina waapẽarãpa jarasidama: «¿Sãmaasã́ nemietá ooparí ẽpẽrapa mãɨ ẽpẽerãpa ne p'ue oodak'apɨ́ p'ue oosima?» Mãɨya ara ãchi paara ne wawaria pedea p'aneesidama.

¹⁷ Mãɨya p'anɨne mãicha chi tau p'ãrio badá idisidama: —Mãɨ ẽpẽra, chi pɨ tau jɨpa beepida, pɨmá ¿k'ai mãɨya bɨma? Chi tau p'ãrio badapa p'anoosima: —Mɨmá ichi Tachi Ak'õre pari pedeaparipɨ.

¹⁸ Maamina judiorã chi chaarearãpa ĩjãanak'a pasima mãɨ ẽpẽra naena tau p'ãrio basit'a. Mãɨpuru chi ak'õre chi nae ome t'ɨ̃ peesidama.

¹⁹ Maapae ãchiá idisidama: —¿Nãɨ mãra warra tau p'ãrio t'õna padat'a? ¿Sãmaasã́ idiapae ichia unu bɨma?

²⁰ Ãchia p'anoosidama: —Taipa k'awa p'anɨma nãɨ tai warra tau p'ãrio t'õ badat'a.

²¹ Maamina atua p'anɨma sãmaasã́ idiapae unu beesit'a, mãɨnepa atua p'anɨma k'aipa ichi jɨpa beepisit'a. Ichi chõa pẽra ichiá idit'ɨ. Ara ichi pari pedeaipɨ.

²² Chi ak'õrepa mãɨnepa chi naepa mãɨya jarasidama judiorã chaarearã wap'ea p'anɨ pẽra. Piarã mãɨ judiorãpa jarasidama parituapa Jesú Tachi Ak'õrepa Tachi K'aripaparí teai jaradaade aipɨra, mãɨ chi judiorã ará pedeapataɨ tedepema ãyá jeret'aadayade asidama.

²³ Mãɨpuru ak'õrerãpa jarasidama: «Ichi chõa pẽra ichiá idit'ɨ».

²⁴ Mãɨpuru judiorã chi mãɨrã chaarearãpa chi tau p'ãrio badá mãicha t'ɨ̃nak'ari jarasidama: —Tachi Ak'õre k'ĩrari taiyá jãɨ ẽpẽra k'orea piarã jarase. Taipa k'awa p'anɨma ichi nemietá ooparipɨ.

²⁵ Tau p'ãrio badapa jarasima: —Mɨa atua bɨma ichia nemietá ooparit'a wa ook'apɨ́. Abapuru k'awa bɨma mɨ tau p'ãrio basit'a maamina naapae unu bɨt'a.

²⁶ Mãɨne ãchia mãicha ichiá idisidama: —Ichia ¿sãmaasã́ oosima? ¿K'ãre oosima pɨ tau jɨpa beepi k'orea?

²⁷ Ichia p'anoosima: —Mɨa mãrá jarasima maamina ĩjãanaé pasima. Mãɨ ¿k'ãre k'orea mãicha ũri k'ɨ̃ria p'anɨma? ¿Mãra sida ichi ome p'ɨrrɨa k'ɨ̃ria p'anɨk'ãra?

²⁸ Mãɨpuru ãchia ichi nãɨya ɨtɨasidama: —Pɨ jãɨ ẽpẽra ome p'ɨrrɨaparipɨ, maamina tai Moisepa bɨdadepa nipapatama.

²⁹ Taipa k'awa p'anɨma Tachi Ak'õrepa Moisea pedeasit'a, maamina jãɨ ẽpẽra sãmapemat'a atua p'anɨma.

³⁰ Mãɨne tau p'ãrio badapa jarasima: —¿K'ãre k'orea mãrapa ichi sãmapemat'a atua p'anɨane a p'anɨma? ¿Ichia mɨ tau jɨpa beepié pasik'ãra?

³¹ Tachia k'awa p'anɨma nemietá oopataɨrãpa idiuta Tachi Ak'õrepa pia ũrik'at'a. Mãɨ awara k'awa p'anɨma parituapa Tachi Ak'õre wap'ea bɨpɨra mãɨnepa ichia k'ɨ̃ria bɨt'a oo bɨpɨra, chi mãɨpa idirut'a Tachi Ak'õrepa pia ũriparit'a.

³² Ewariaba pida tachia tau p'ãrio t'õna jɨpa beepisit'a ũrinak'ama.

³³ Nãɨ ẽpẽra Tachi Ak'õrenepa chedawẽpara mi ãpia pida p'ue ne ooiwẽ pasima.

³⁴ Mãɨne judiorã chi chaarearãpa ichi ɨtɨasidama: —Pɨ t'õnanepa nemietá ooparima. ¿Sãmaasã́ taiyá ne jarateaima? Mãɨ k'orea ichi chi judiorã ará pedeapataɨ tedepema ãyá jeret'aasidama.

Chi piarã tau p'ãrio be

³⁵ Jesupa ũrisima tau p'ãrio bada ãyá jeret'aasidat'a. Mãɨ k'orea ichi jɨrɨde wãsima. Unuk'ari idisima: —¿Pɨa chi Ẽpẽra Warrade piarã ĩjãa bɨk'ãra?

³⁶ Ichia jarasima: —¿Mãɨ k'aima? Mɨá jarase mɨa ichide piarã ĩjãai k'orea.

³⁷ Jesupa p'anoosima: —Pɨa ichi unu bɨma. Mɨ, chi pɨ ome pedea bɨt'a mãɨpɨ.

³⁸ Ara mãɨne Jesú k'ĩrari sĩraporode k'obeek'ari jarasima: —Mɨ Chipari, mɨa ĩjãa bɨma.

³⁹ Mãɨne Jesupa jarasima: —Mɨ nãɨ ĩjũanea chesima ẽpẽerã nepɨra ak'ɨi k'orea. Mãɨya chi tau p'ãrio be jĩra bepa ununaipɨ mãɨnepa chi unu p'anɨane a p'anɨ tau p'ãrio be jĩra p'aneenaipɨ.

⁴⁰ Waapẽarã p'ariseorã Jesú k'ait'a p'anɨpa mãɨ pedea ũrisidaɨde idisidama: —Pɨa ¿k'ãre k'orea mãɨya jara bɨma? ¿Tai tau p'ãrio p'anɨk'ãra?

⁴¹ Jesupa p'anoosima: —Mãra piarã tau p'ãrio p'ananapara, nemietá oopataɨ k'orea nepɨra pará p'anɨane adaiwẽ pasima. Maamina mãrapa unu p'anɨane a p'anɨ pẽra nemietaade p'anɨma.