Juan 8 - Tachi Ak'õre Pedea

Wẽra ɨmɨk'ĩra awaraɨ ome k'ãina

¹ Maapae Jesú Olivo eyadea wãsima.

² Norema tap'ede mãicha Tachi Ak'õre tede eda wãsima. Mãma bɨde ẽpẽerã minachia ichimá cheepɨrɨsidama. Jeeda suak'abari beek'ari ãchiá jaratea beesima.

³ Mãɨya p'anɨne judiorã Moisepa bɨda jarateapataɨrãpa mãɨnepa p'ariseorãpa wẽra ɨmɨk'ĩra awaraɨ ome k'ãi bɨ jitadada ateewãsidama. Mãɨ wẽra chi arí p'anɨ esa bɨdak'ari

⁴ Jesua jarasidama: —Jarateaparí, taipa nãɨ wẽra ɨmɨk'ĩra awaraɨ ome k'ãi bɨt'a jitasidama.

⁵ Moisepa bɨdade jara bɨma jãkɨɨ wẽrarã mawarapa bat'a peapidai p'anɨt'a. Pɨmá ¿pia bɨk'ãra mãɨya oodait'a?

⁶ Ãchia mãɨya jarasidama Jesupa sãmaasã́ p'anooi k'awadayá. Ichiá k'achia pedeapidai k'ɨ̃risia p'anasidama. Mãɨne Jesú jeeda barrobari k'obeek'ari, ichi jua jiminipa ĩjũane bɨpodosima.

⁷ Maamina ãchia waa idi p'anɨ pẽra p'irabarik'ari jarasima: —Chi mãranepema nemietá ook'apɨɨpa mawara atak'ari nãɨ wẽramá naa bat'ai bɨma.

⁸ Mãɨya jarak'ari Jesupa mãicha ĩjũane bɨpodosima.

⁹ Jesupa jarada ũrisidaɨde ara mãɨne ãchi abaabá wãpodosidama. Naa chõarã ãyá wãsidama. Mãɨ ɨ̃ari k'ũtãarã sida ãyá wãpodosidama. Jesú mãɨ wẽra ome ichi tuaba beesima.

¹⁰ Jesú bai nɨbeeside wẽra ichi tuaba bai nɨbɨt'a unusima. Maapae idisima: —Pɨ nemietá oo bɨade a p'anɨrã ¿sãma p'anɨma? ¿K'aipa pɨ nepɨra pará bɨade aima?

¹¹ Wẽrapa p'anoosima: —Aba pida, mɨ Chipari. Jesupa jarasima: —Mɨa pida pɨ nepɨra pará bɨade awẽma. Wãse, maamina waa nemietá oorãse.]

Jesú nãɨ ĩjũanepemarã pae ɨnaa bɨpɨ

¹² Mãɨya nak'ari Jesupa ẽpẽerã́ mãicha jarasima: —Mɨ nãɨ ĩjũanepemarã pae ɨnaa bɨ jĩra bɨma. Parituapa mɨ k'aade wãipɨra p'ãrione nipaiwẽma, mãɨpari ɨnaane bɨ pẽra chok'ae baipɨ.

¹³ Mãɨne p'ariseorãpa Jesua jarasidama: —Pɨa ara pɨchi k'orea pedea bɨ pẽra mãɨpa jarawẽa bɨma pɨa jara bɨ piarãpɨ.

¹⁴ Jesupa jarasima: —Ara mɨchi k'orea pedea bɨmina mɨa jara bɨ piarãpɨ. Mɨa k'awa bɨma mɨ sãmãɨpa chesit'a mãɨnepa sãmá mãicha wãit'a. Maamina mãrapa mãɨ atua p'anɨma.

¹⁵ Mãrapa nãɨ ĩjũanepema k'ɨ̃risiadepa mɨ ak'ɨ p'anɨma. Mɨa aba pida mãra jĩra mãɨya ak'ɨk'ama.

¹⁶ Mɨa ẽpẽerã sãmaasã́ be ak'ɨk'ari jaraipɨra, mɨa jara bɨ piarãpɨ, mɨ tuaba pida mãɨya jarawẽa bɨ pẽra. Mãɨpari mɨ Ak'õre, mɨ Peedapa mɨ ome mãɨya jara bɨma.

¹⁷ Mãrapa chi Moisepa bɨda uru p'anɨma. Mãɨ bɨdade jara bɨma ẽpẽra umeepa abarik'a pedea audaipɨra ãchia jara p'anɨt'a piarãpɨ.

¹⁸ Ara mãɨ jĩra ara mɨchi k'orea pedea bɨma, mãɨnepa mɨ Ak'õre, mɨ Peedapa mɨ k'orea pedea bɨma.

¹⁹ Mãɨne ãchia Jesua idisidama: —Mãɨya bɨpɨra pɨ ak'õre ¿sãma bɨma? Jesupa p'anoosima: —Mãrapa mɨ atua p'anɨma mãɨnepa mɨ Ak'õre atua p'anɨma. Mãrapa mɨ piarã k'awautapara, mɨ Ak'õre sida k'awadai pasima.

²⁰ Jesupa Tachi Ak'õre te eda, erreara Tachi Ak'õrea teapataɨmá jaratea baside jõma mãɨ jarasima. Maamina mi ãpia pida ichi jitadaé pasima ichi ewari waidi pawẽa bada pẽra.

Mɨ wãrumá mãra p'ue wãnaiwẽma

²¹ Maapae Jesupa jarasima: —Mɨ wãipɨ. Wãk'ari mãrapa mɨ jɨrɨdaipɨ maamina waa ununaiwẽma. Mãrapa mɨne ĩjãanawẽ pẽra nemietaade piudaipɨ. Piarã mɨ wãrumá mãra p'ue wãnaiwẽma.

²² Mãɨpuru judiorã chaarearãpa ãchi tuaba pedea tuanasidama: —Mãɨya bɨpɨra ¿ichi tuaba piuik'ãra? ¿Ichia mãɨ k'orea jara bɨwẽk'ãra: “Mɨ wãrumá mãra p'ue wãnaiwẽane a bɨma”?

²³ Mãɨne Jesupa jarasima: —Mãra nãɨ ĩjũanepemarãpɨ, maamina mɨ pajãnepemapɨ. Mɨ nãɨ ĩjũanepemawẽma.

²⁴ Mãɨpuru mɨa jarasima mãra nemietaade piudaipɨ. Mãrapa chi Mɨt'u ĩjãanaepɨra nemietaade piudaipɨ.

²⁵ Mãɨpuru ãchia idisidama: —¿Pɨ k'aima? Jesupa p'anoosima: —Mɨ chesiedapema, mãɨ mãrá jara bɨma.

²⁶ Mɨa ne minachia mãra k'orea pedeai bɨma, mãra nepɨra pará p'anɨane ai k'orea. Maamina mãɨyaiwẽma. Chi mɨ peeda pedea piarãpɨ. Mɨa chi ichidepa ũri bɨt'a nãɨ ĩjũanepemarã́ jaraparima.

²⁷ Maamina ãchia k'awadaé pasima Jesupa ichi Ak'õre k'orea pedea bɨt'a.

²⁸ Mãɨpuru ichia jarasima: —Mãrapa mɨ, chi Ẽpẽra Warra ɨt'ɨ barijira bɨutade k'awadaipɨ chi Mɨt'a. K'awadaipɨ mɨa mi ãpia pida ara mɨa k'ɨ̃ria bɨ jĩra ook'at'a. Mãɨnepa k'awadaipɨ mɨ Ak'õrepa jarateada jĩra mɨa pedea bɨt'a.

²⁹ Mɨ Peeda mɨ ome bɨma. Mɨ Ak'õrepa mɨ tuaba ameek'ama mɨa ewaricha ichia k'ɨ̃ria bɨt'a oo bapari pẽra.

³⁰ Jesupa mãɨya pedea baside chok'araɨrãpa ichide ĩjãasidama.

Abrahanepa ununaanarã

³¹ Maapae Jesupa judiorã ichide ĩjãautarã́ jarasima: —Mãrapa mɨ pedea ĩjãa p'ananaipɨra, piarã mɨ ome p'ɨrrɨapataɨrã p'ananaipɨ.

³² Mɨnepa mãrapa Tachi Ak'õre piarã k'awadaipɨ. Mãɨpa mãra chipari pae pari mimiaparí beada pari ãjã́ p'ananaipɨ.

³³ Maamina ãchia jarasidama: —Tai Abrahanepa ununana pẽra, tai chipari pae pari mimiapataɨrãwẽpɨ. ¿Sãmaasã́ pɨa tai pari ãjã́ p'ananayane a bɨma?

³⁴ Jesupa p'anoosima: —Mɨa piarã jararuma: nemietá oopataɨrã mãɨ nemietá pae pari mimiapataɨrãpɨ.

³⁵ Chi chipari pae pari mimiaparí ichi chiparidirã ome ap'i baiwẽma, maamina chi chipari warra ichi ak'õre ome ewaricha baparima.

³⁶ Mãɨpuru Tachi Ak'õre Warrapa mãra ãjã́ pari bɨipɨra, piarã pari ãjã́ p'aneenaipɨ.

³⁷ Mɨa k'awa bɨma mãra Abrahanepa ununaanat'a, maamina mɨ pea k'ɨ̃ria p'anɨma mɨ pedea ĩjãanawẽa p'anɨ pẽra.

³⁸ Mɨa jara bɨma jõma mɨ Ak'õrepa mɨá jarateadat'a. Mãɨne mãrapa ĩjãa p'anɨma mãra ak'õrepa ũripidat'a.

³⁹ Ãchia p'anoosidama: —Tai chõarãenapema ak'õre Abrahanpɨ. Maamina Jesupa jarasima: —Mãra piarã Abrahán warrarã padapara ichia ooda jĩra oodai pasima.

⁴⁰ Mɨa mãrá piarã pedea jara bɨma Tachi Ak'õrepa mɨá k'awapida jĩra. Maamina mãrapa mɨ pea k'ɨ̃ria p'anɨma. ¿Abrahanpa mãɨya oosik'ãra?

⁴¹ Mãrapa machi ak'õrepa oopari jĩra oopatama. Mãɨne ãchia jarasidama: —¡Maamina tai wẽra tuu bɨpa t'õnawẽma! Taipa Ak'õre abapuru uru p'anɨma. Mãɨ Tachi Ak'õrepɨ.

⁴² Jesupa jarasima: —Tachi Ak'õre mãra Ak'õrepara, mãrapa mɨ piarã k'ɨ̃rianai pasima, Tachi Ak'õrenepa chek'ari nãma bɨ pẽra. Mɨ ara mɨnepa chewẽa pasima. Ichiapuru peesima.

⁴³ Mɨa jara bɨ ¿k'ãre k'orea mãrapa k'awadawẽa p'anɨma? Mãrapa k'awadawẽa p'anɨma, mɨ pedea ũri k'ɨ̃rianak'a pẽra.

⁴⁴ Mãra ak'õre tiorepɨ. Mãɨpuru ichia k'ɨ̃ria bɨt'a mãrapa oo k'ɨ̃ria p'anɨma. Ichi jua chiwidiedadepema mĩa peaparima. Piarãnepa bak'ama chi piarãt'a ichide newẽ pẽra. Sea jararude ichidiidepema jaraparima, seajarapari pẽra mãɨnepa sea ak'õre pẽra.

⁴⁵ Mɨa piarã pedea jara bɨmina mãrapa mɨ pedea ĩjãanak'ama.

⁴⁶ ¿K'ai mãranepemapa mɨa piarã nemietá oo bɨade aima? Mɨa piarã pedea jara bɨpɨra, ¿k'ãre k'orea mɨ pedea ĩjãanawẽa p'anɨma?

⁴⁷ Chi Tachi Ak'õrene ĩjãa bɨpa ichi pedea pia ũrik'ari ooparima maamina mãra Tachi Ak'õrenewẽ pẽra ichi pedea ũrinak'ari, oodak'ama.

Abrahán bai naena Mɨ bada

⁴⁸ Maapae judiorãpa Jesua jarasidama: —¡Pɨ Samariadepemapɨ mãɨnepa jaore mietá uru bɨpɨ! ¿Taipa arí jara p'anɨwẽk'ãra?

⁴⁹ Mãɨne Jesupa jarasima: —Mɨ jaore mietá newẽma. Mɨ Ak'õre k'orea pia pedeaparima. Maamina mãrapa mɨ k'orea pia pedeadak'ama.

⁵⁰ Mɨa jɨrɨwẽma ẽpẽerãpa mɨ k'orea pia pedeadamẽrá. Maamina chi mãɨ jɨrɨi bɨt'a aba bɨma. Ichiapuru ẽpẽerã nepɨra ak'ɨparima.

⁵¹ Mɨa piarã jararuma, chi mɨ pedea ĩjãak'ari oo bɨt'a mãɨ piuk'á paipɨ.

⁵² Mãɨne judiorãpa Jesua jarasidama: —Naapae taipa k'awautama pɨ jaore mietá uru bɨt'a. Abrahán piusima. Ãarea Tachi Ak'õre pari pedeapataɨrã sida piusidama, maamina pɨa jara bɨma: “Mɨ pedea ĩjãak'ari oo bɨt'a mãɨ piuk'á paipɨ”.

⁵³ Mãɨyara ¿pɨ tai chõarãenapema Abrahán k'aepẽra chi atepe bɨk'ãra? Ichi piusima, mãɨnepa jõma Tachi Ak'õre pari pedeapataɨrã piusidama. Pɨ ¿k'ai k'ɨ̃risia bɨma?

⁵⁴ Jesupa p'anoosima: —Ara mɨ k'orea pia pedeaipɨra mãɨpa jarawẽa bɨma mɨ chi atepe pia bɨt'a. Maamina mɨ Ak'õrepa mɨ k'orea pia pedea bɨma. Mãrapa ichi mãra Tachi Ak'õreane a p'anɨma.

⁵⁵ Maamina ichi atua p'anɨma. Mãɨne mɨa ichi k'awa bɨma. Ichi atua bɨade adapara mɨ mãra jĩra chi sea bai pasima. Maamina mɨa ichi k'awa bɨ pẽra ichi pedea oo bɨma.

⁵⁶ Mãra chõarãenapema Abrahán arapaasima mɨ nãɨ ĩjũanea cheru ewari unui k'awa bada pẽra. Piarã unuk'ari maapae minachia arapá beesima.

⁵⁷ Mãɨne judiorãpa Jesua jarasidama: —Pɨ waidi cincuenta ãyo bɨwẽma. ¿Sãmaasã́ pɨa Abrahán unusiade a bɨma?

⁵⁸ Jesupa p'anoosima: —Mɨa piarã jararuma: Abrahán bai naena Mɨpɨ.

⁵⁹ Jesupa mãɨya jarada k'orea judiorãpa mawara atasidama ichi bat'a peadayá. Maamina Jesú mĩruk'ari Tachi Ak'õre te edapema ãyá wãsima.