Juan 6 - Tachi Ak'õre Pedea

Jesupa 5 mil p'anɨa nek'opida

¹ Mãɨya nak'ari Jesú Galilea senia k'ĩaria lao wãsima. Mãɨ senia ichiaba Tiberia senia apatama.

² Jesupa ẽpẽerãpa ne p'ue oodak'apɨ́ oo bɨdepa k'ɨdade berã jɨpa beepik'oasima. Chok'ará ẽpẽerãpa mãɨ unu p'anana pẽra ichi k'aade wãsidama.

³ Maapae Jesú ichi ome p'ɨrrɨapataɨrã ome eyak'á p'eraade wãnak'ari jeeda suak'abari p'aneesidama.

⁴ Judiorã Egitodepa wãnana k'ɨ̃risiapataɨ ewari k'ait'a pa basima.

⁵ Mãɨne Jesupa ẽpẽerã chok'ará k'aade cheuta unuk'ari, P'elipea nãɨya jarasima: —¿Sãma p'ana atadaima nãɨrã́ nek'opidai k'orea?

⁶ Jesupa k'ãre ooit'a k'awa basima. Mãɨneepuru mãɨya jarasima P'elipepa sak'á p'anooi k'awa.

⁷ P'elipepa p'anoosima: —Mi jedek'o k'ak'o 8 mimiana erreara tau deepida, mãɨ jitadadepa mi ãpia pida ara baiwẽa bɨma, nãɨ ẽpẽerã́ mi ãpĩipiapida nek'opidayá.

⁸ Mãɨne chi Jesú ome p'ɨrrɨaparí André, Simón Pedro ũpẽapa nãɨya jarasima:

⁹ —Warra nãma bɨpa p'ana cebada ooda joesoma uru bɨma mãɨnepa beta ume uru bɨma. Maamina nãɨ ¿k'ãa sãit'a nãɨ ẽpẽerã chi minachia nɨbɨ pae?

¹⁰ Mãma p'ũajãra pará basima. Mãɨpuru Jesupa jarasima: —Ãareaɨrã́ jarat'ɨ p'ũajãrane suak'abari p'aneenamẽrá. Ara mãɨne jeeda suak'abari p'aneesidama. Ɨmɨk'ĩirãowa cinco mil p'anasidama.

¹¹ Jesupa p'ana juade jitak'ari Tachi Ak'õrea sõpia bɨade asima. Maapae ichi ome p'ɨrrɨapataɨrã́ jarasima ẽpẽerã́ jedadamẽrá. Betadeepida ara mãɨya oosima ãareaɨrãpa ãchia k'ɨ̃riautat'a k'odamẽrá.

¹² Ãareaɨrã jãwaanak'ari Jesupa ichi ome p'ɨrrɨapataɨrã́ jarasima: —Chi pichoada jõma jɨrɨp'et'ɨ mi ãpia pida ãrinaemaapa.

¹³ Ara mãɨne jɨrɨp'esidama. Jabara k'ak'o doce ipirupisidama mãɨ p'ana cebada oodat'a mãɨ joesomanepema pichoadapa.

¹⁴ Chi Jesupa ẽpẽerãpa ne p'ue oodak'apɨ́ ununak'ari ẽpẽerãpa jarasidama: —Piarã nãɨ Tachi Ak'õre pari pedeaparí chi waibɨa bɨ, chi nãɨ ĩjũane chei badapɨ.

¹⁵ Maamina Jesupa k'awasima ẽpẽerãpa ichi jita k'ɨ̃ria p'anasit'a ãchi poro jũra jɨ̃parí jɨ̃ bɨ papidai k'orea. Mãɨpuru mãicha ichi tuaba eyadea wãsima.

Jesú to ɨ̃rɨ wãna

¹⁶ K'iuk'ari Jesú ome p'ɨrrɨapataɨrã senia ik'idá wãsidama.

¹⁷ P'ãp'orrode batoosidaɨde Jesú ãchimá waidi chewẽa basima. Maamina waa k'ĩaria lao wãsidama Capernaunea wãnai k'orea. Mãɨya bɨde minachia p'ãrio nɨbeesima.

¹⁸ Mãɨne nãu minachia p'õat'ɨ nɨbeesidepa, senia t'umaane to bɨk'a minachia nɨbeesima.

¹⁹ To estarik'a wãutade Jesú to ɨ̃rɨ cheru unusidama. Ãchimá cheru pẽra minachia p'erasidama.

²⁰ Maamina Jesupa jarasima: —P'erarãt'ɨ. Mɨpɨ.

²¹ Mãɨne ichi p'ãp'orrode sõpia batoopidak'ari, ateewãsidama. Ara mãɨne ãchi wãutamá to ik'idá pasidama.

Jesú chok'ae bapiparí p'anapɨ

²² Chi eda waapẽarã wa k'ĩaria lao p'aneesidama. Mãɨ norema k'awasidama chi Jesú ome p'ɨrrɨapataɨrã ãchi tuaba p'ãp'orrode batoodak'ari, wãsidat'a. Unusidama mãma p'ãp'orro abapuru basit'a mãɨnepa Jesú ãchi ome wãé pasit'a.

²³ Mãɨne waapẽarã p'ãp'orro Tiberia p'uurudepa chesidama chi Jesupa Tachi Chiparia sõpia bɨade ak'ari ẽpẽerã́ p'ana k'opidamá.

²⁴ Ẽpẽerãpa k'awasidama Jesú mãɨnepa ichi ome p'ɨrrɨapataɨrã mãma p'ananaé pasit'a. Mãɨpuru ãchi mãɨ p'ãp'orrode batoodak'ari Capernaunea Jesú jɨrɨde wãsidama.

²⁵ Jesú senia k'ĩaria lao unusidaɨde idisidama: —Jarateaparí, pɨ ¿sãapae nãmá chesima?

²⁶ Jesupa p'anoosima: —Mɨa piarã jararuma: mãrapa k'awadawẽa p'anɨma chi mɨa ẽpẽerãpa ne p'ue oodak'apɨ́ oodapa ne jara k'ɨ̃ria bɨt'a. Aba mɨ jɨrɨ p'anɨma mɨa nek'opik'ari jãwaanana pẽra.

²⁷ Mimiarãt'ɨ chik'o k'odai k'orea, mãɨ chik'o jõpari pẽra. Mãɨpari mimiat'ɨ chi Tachi Ak'õre ome ewaricha chok'ae bapiparí p'ana atadai k'orea. Mãɨ mɨ, chi Ẽpẽra Warrapa teaipɨ. Tachi Ak'õrepa mɨ mãɨ k'orea bɨsima.

²⁸ Mãɨpuru ãchia idisidama: —Taipa ¿k'ãre oodai p'anɨma Tachi Ak'õrepa oopi bɨt'a oodai k'orea?

²⁹ Jesupa p'anoosima: —Tachi Ak'õrepa oopi bɨ nãɨpɨ: chi ichia Peedade ĩjãanai p'anɨma.

^30-31 Mãɨpuru ãchia Jesua idisidama: —¿Pɨa taiyá k'ãre unupiima, pɨ pedea ĩjãanamẽrá? Tachi chõarãenapemarãpa ĩjũa pania newẽa bɨde maná k'opachidama. Tachi Ak'õre pedeade jara bɨma: “Ichia ɨt'aripema p'ana teasima ãchia k'odamẽrá”. ¿Pɨa k'ãre ooima?

³² Mãɨne Jesupa p'anoosima: —Mɨa piarã jararuma, mãɨ ɨt'aripema p'ana Moisepa mãrá teaé pasima. Mɨ Ak'õrepuru teasima. Mãɨ awara ɨt'aripema p'ana piarã mãrã́ tea bɨma.

³³ Mãɨ Tachi Ak'õrepa teada p'ana ɨt'aripa chedapa nãɨ ĩjũanepemarã chok'ae bapiparima.

³⁴ Ãchia jarasidama: —Tai Chipari, mãɨ chok'ae bapiparí p'ana ewaricha taiyá tea base.

³⁵ Jesupa jarasima: —Mãɨ Mɨpɨ. Mɨ mãɨ chok'ae bapiparí p'anapɨ. Mãɨpuru chi mɨmá cheru waa jarrapisia baiwẽma mãɨnepa chi mɨne ĩjãa bɨt'a waa opisia baiwẽma.

³⁶ Maamina mɨa jarada jĩra, mɨa ẽpẽerãpa ne p'ue oodak'apɨ́ ooda mãrapa unusidamina ĩjãanawẽa p'anɨma.

³⁷ Chi mɨ Ak'õrepa mɨá tea bɨ ẽpẽerã mɨmá chedaipɨ; mãɨrã ãyá jeret'aiwẽma.

³⁸ Mɨ pajãnepa chewẽa bɨma mɨa k'ɨ̃ria bɨt'a ooi k'orea. Mãɨpari chesima mɨ Peedapa k'ɨ̃ria bɨt'u ooi k'orea.

³⁹ Mɨ Peedapa k'ɨ̃ria bɨma ichia mɨá teadaɨrã aba pida atuapiemaapa, mãɨpari nãɨ jõru ewari parude, ãchi chok'ae p'irabaripiipɨ.

⁴⁰ Mɨ Ak'õrepa piarã k'ɨ̃ria bɨma ẽpẽerãpa mɨ ichi Warra k'awadak'ari, mɨne ĩjãanak'ari ichi ome ewaricha chok'ae p'ananamẽrá. Mãɨya mɨa ãchi nãɨ jõru ewaride chok'ae p'irabaripiipɨ.

⁴¹ Jesupa «mɨ chi p'ana ɨt'aripa chedade» ada pẽra, chi mãma p'anɨ judiorãpa ichi k'orea pedea piawẽa pedeasidama.

⁴² Nãɨya jarasidama: —¿Nãɨ Jesú, José warrawẽk'ãra? Chi ak'õre mãɨnepa chi nae tachia unupatama. ¿K'ãre k'orea ichi ɨt'aripa chesiade a bɨma?

⁴³ Mãɨya p'anɨne Jesupa jarasima: —Waa k'achia pedearãt'ɨ.

⁴⁴ Abaɨ pida p'ue mɨne ĩjãaiwẽma mɨ Ak'õre, chi mɨ Peedapa ichi mɨmá enemeaepɨra. Maamina mɨ Ak'õrepa mãɨ enemeeipɨra nãɨ jõru ewaride mãɨ ẽpẽra mɨa chok'ae p'irabaripiipɨ.

⁴⁵ Tachi Ak'õre pari pedeapataɨrã k'art'ade nãɨya jara bɨma: “Tachi Ak'õrepa ãareaɨrã́ jarateaipɨ”. Mãɨya chi mɨ Ak'õre pedea ũrik'ari ichidepa k'awak'ari mɨne ĩjãane cheipɨ.

⁴⁶ Mãɨpa jarawẽa bɨma abaɨpa Tachi Ak'õre unusit'a. Abapuru mɨ chi ichidepa chedapa mãɨ unu basima.

⁴⁷ »Mɨa piarã jararuma: ẽpẽrapa mɨne ĩjãaipɨra Tachi Ak'õre ome ewaricha chok'ae baipɨ.

⁴⁸ Mɨ chi p'ana chok'ae bapiparí p'anapɨ.

⁴⁹ Mãra chõarãenapemarãpa ĩjũa pania newẽa bɨde maná k'o p'anasidamina, mãɨrã piusidama.

⁵⁰ Maamina chi nãɨ p'ana ɨt'aripa cheda k'oipɨra piuiwẽma.

⁵¹ Mɨ chi p'ana chok'ae bapiparí p'anapɨ, chi mãɨ p'ana ɨt'aripa chedapɨ. Parituapa mãɨ p'ana k'oipɨra ewaricha chok'ae baipɨ. Chi mɨa tea bɨ p'ana mɨ k'ak'uapɨ. Mɨa mɨ k'ak'ua teaipɨ, mãɨpa ẽpẽerã chok'ae p'ananamẽrá.

⁵² Mãɨya bɨde judiorã ãchi tuaba k'ɨ̃risia awara awará k'ĩruu pedea p'anasidadepa jara p'aneesidama: —¿Sãmaasã́ ichi k'ak'ua tachiá k'opiima?

⁵³ Mãɨne Jesupa jarasima: —Mɨa piarã jararuma: mãrapa mɨ chi Ẽpẽra Warra k'ak'ua k'odaepɨra mãɨnepa mɨ oa todaepɨra, ewaricha chok'ae p'ananaiwẽma.

^54-55 Mɨ k'ak'ua mãɨ piarãpɨ mãɨnepa mɨ oa mãɨ piarãpɨ. Mãɨpuru chi mɨ k'ak'ua k'o bɨt'a mãɨnepa chi mɨ oa to bɨt'a, mãɨ Tachi Ak'õre ome ewaricha chok'ae baipɨ. Nãɨ jõru ewaride mɨa mãɨ ẽpẽra chok'ae p'irabaripiipɨ.

⁵⁶ Chi mɨ k'ak'ua k'o bɨ mãɨnepa mɨ oa to bɨ, mɨ ome bɨma mãɨnepa mɨ ichi ome bɨma.

⁵⁷ Mɨ Ak'õre chok'ae baparipa mɨ peesima. Ya mɨ ichidepa chok'ae bɨma. Ara mãɨ jĩra chi mɨ k'ak'ua k'o bɨpa mɨnepa chok'ae baipɨ.

⁵⁸ Mɨ p'ana ɨt'aripa cheda chi piarãpɨ. Mãra chõarãenapemarãpa maná k'opachidamina ãarea piusidama. Maamina mɨ maná jĩra bɨwẽma. Chi nãɨ p'ana k'o bɨ ewaricha chok'ae baipɨ.

⁵⁹ Jesupa jõma mãɨ Capernaune jarateasima judiorã ará pedeapataɨ tede.

Tachi Ak'õre ome ewaricha chok'ae p'ananai k'orea jarada

⁶⁰ Mãɨ jaratea bɨ ũrisidaɨde chok'ará Jesú ome p'anɨrãpa jarasidama: «Ichia jarada chi t'aju bɨma. ¿K'aipa mãɨ p'ue mãɨya k'ɨ̃riaima?»

⁶¹ Jesupa k'awasima ichia jarateada k'orea ãchi mãɨya piawẽa pedea p'anɨt'a. Mãɨpuru jarasima: —Mãramá, mɨa jarateada ¿chi t'aju bɨk'ãra?

⁶² Mãɨyaipɨra mãrapa mɨ, chi Ẽpẽra Warra ichi naena badamá ɨt'aa wãrut'a ununaipɨra ¿sãmaasã́ k'ɨ̃risiadaima?

⁶³ Tachi Ak'õre Jaorepuru tachi chok'ae bapiparima. Nãɨ k'ak'uapa mãɨya p'ue ook'ama. Mɨa mãrá Tachi Ak'õre Jaoredepa jaratea bɨma mãra piarã chok'ae p'ananamẽrá.

⁶⁴ Maamina eda waapẽarãpa waidi mɨ pedea ĩjãanawẽa p'anɨma. Jesupa mãɨya jarasima ichia naenaena k'awa bada pẽra k'airãpa ichi pedea ĩjãanawẽa p'anɨt'a mãɨnepa k'aipa ichi jitapii bɨt'a.

⁶⁵ Mãɨne Jesupa jarasima: —Mãɨ k'orea mɨa jarasima: mɨ Ak'õrepa ẽpẽra mɨmá enemeaepɨra, mãɨ ẽpẽrapa p'ue mɨne ĩjãaiwẽma.

⁶⁶ Mãɨpuru chok'ará Jesú k'aade wã p'ananarãpa ichi itu bɨsidama. Waa ichi ome p'ɨrrɨadaé pasima.

⁶⁷ Mãɨpuru Jesupa ichia doce jɨrɨ atadaɨrã́ jarasima: —¿Mãra sida wã k'ɨ̃ria p'anɨk'ãra?

⁶⁸ Simón Pedropa p'anoosima: —Tai Chipari, tai ¿k'aimá wãnaima? Aba pɨapuru taiyá jarateaparima Tachi Ak'õre ome ewaricha chok'ae p'ananamẽrá.

⁶⁹ Taipa pɨ pedea piarã ĩjãa p'anɨma mãɨnepa taipa piarã k'awa p'anɨma pɨ Tachi Ak'õrepa peeda jĩp'a bɨt'a.

⁷⁰ Jesupa jarasima: —Mɨa mãra doce jɨrɨ atasima, mɨ ome p'ɨrrɨadamẽrá. Maamina mãranepema aba tioredepɨ.

⁷¹ Jesupa Juda, Simón Iscariote warra k'orea pedea basima. Ichi Jesú ome p'ɨrrɨapataɨrã doce p'anɨnepemamina, mãɨpa ichi jitapii pasima.