Juan 3 - Tachi Ak'õre Pedea

Jesú Nicodemo ome pedeada

¹ P'ariseo Nicodemo apataɨ basima. Ichi judio chi minachia k'awa bɨ pasima.

² Teamasi Jesumá wãside, nãɨya jarasima: —Jarateaparí, taipa k'awa p'anɨma pɨ Tachi Ak'õrepa peedapɨ. Tachi Ak'õre pɨ ome badawẽpara, chi ẽpẽerãpa ne p'ue oodak'apɨ́ p'ue ooiwẽ pasima.

³ Jesupa ichiá jarasima: —Piarã ara mɨa pɨá jararuma: ẽpẽra mãicha chiwidi t'õepɨra p'ue baiwẽma Tachi Ak'õre juade ichidirã ome.

⁴ Mãɨ k'orea Nicodemopa ichiá idisima: —¿Sãmaasã́ tachi chõa bɨt'a mãicha t'õima? Mãɨya bɨpɨra ¿tachi nae bide wãi bɨk'ãra mãicha t'õmẽrá?

⁵ Jesupa p'anoosima: —Piarã mɨa pɨá jararuma: panianepa, Tachi Ak'õre Jaorede pida t'õepɨra, Tachi Ak'õre juade paiwẽma ichidirã paara.

⁶ Tachi naepa t'õna nãɨ k'ak'uadepa chedapɨ, maamina mãicha t'õna Tachi Ak'õre Jaoredepa t'õnapɨ.

⁷ Mɨa mãicha chiwidi t'õnai p'anɨane ada k'orea minachia k'ɨ̃risiarãse.

⁸ Nãu paritua p'õat'ɨparima. Chi jĩk'ua ũriparimina k'awak'ama sãmãɨpa cherut'a mãɨnepa sãmá wãrut'a. Ara mãɨ jĩra, Tachi Ak'õre Jaore ununak'amina k'awa p'anɨma ẽpẽra sõne sãmaasã́ mãɨya oo bɨt'a.

⁹ Nicodemopa jarasima: —Tachi Ak'õre Jaorepa ¿sãmaasã́ mãɨ mãɨyaima?

¹⁰ Jesupa p'anoosima: —Pɨ Israeldepemarã́ Tachi Ak'õre pedea jarateaparí chi minachia k'awa bɨmina ¿mãɨ atua bɨk'ãra?

¹¹ Piarã ara mɨa pɨá jararuma: taipa k'awa p'anɨnepa mãɨnepa unu p'anɨnepa pedea p'anɨma maamina taipa pedea p'anɨt'a mãrapa ĩjãanak'ama.

¹² Mɨa nãɨ ĩjũane unupataɨdepema jara bɨt'a mãrapa ĩjãanak'apɨra, mãɨ pajãnepema jararude ¿sãmaasã́ ĩjãanaima?

¹³ »Aba pida pajãnea wãk'ama mãɨ k'awai k'orea. Abapuru mɨ, chi Ẽpẽra Warrapa mãɨ k'awa bɨma, pajãnepa cheda pẽra.

¹⁴ Moisepa ĩjũa pania newẽa bɨde taama bronce ooda ɨt'ɨ barijira bɨda jĩra, mɨ, chi Ẽpẽra Warra ara mãɨya ɨt'ɨ barijira bɨdaipɨ,

¹⁵ chi mɨne ĩjãauta Tachi Ak'õre ome ewaricha chok'ae p'ananamẽrá.

¹⁶ »Tachi Ak'õrepa ẽpẽerã minachia k'ɨ̃ria bɨ pẽra ichi Warra aba bɨt'a nãɨ ĩjũanea peesima jõma ichide ĩjãauta atuapidaemaapa, mãɨpari ichi ome ewaricha chok'ae p'ananamẽrá.

¹⁷ Tachi Ak'õrepa ichi Warra nãɨ ĩjũanea peé pasima ẽpẽerã nepɨra pará p'anɨane amẽrá mãɨpari peesima k'aripamẽrá.

¹⁸ Tachi Ak'õrepa chi ichi Warrade ĩjãa bɨt'a nepɨra pará bɨade a bɨwẽma. Maamina chi ichi Warrade ĩjãawẽa bɨt'a Tachi Ak'õrepa mãɨ nepɨra pará bɨade aparima, ichi Warra aba bɨt'a itu bɨda pẽra.

¹⁹ »Tachi Ak'õrepa nãɨ ĩjũanepemarã nepɨra pará p'anɨane aparima nãɨ k'orea: chi ɨnaa bɨ nãɨ ĩjũane chesima ãareaɨrãpa Tachi Ak'õre ununamẽrá. Maamina ẽpẽerãpa k'achia oopata pẽra p'ãriot'a k'ɨ̃riasidama.

²⁰ Ãarea nemietá oopataɨrãpa chi ɨnaa bɨ k'ɨ̃rianak'ama. Chi ɨnaa bɨdea chedak'ama ãchia nemietá oo p'anɨt'a unupidaemaapa.

²¹ Maamina ãarea chi piarã oopataɨrã chi ɨnaa bɨdea che p'anɨma, ãchia mãɨ Tachi Ak'õrepa k'ɨ̃ria bɨ jĩra oopataɨ ãareaɨrãpa k'awadamẽrá.

Juan chi Porochoaparipa Jesú k'orea pedeada

²² Mãɨya nak'ari Jesú ichi ome p'ɨrrɨapataɨrã sida Judea tuadea wãsidama. Mãma p'anasidaɨde chi ichide ĩjãauta porochoapachima.

²³ Mãɨmisa Juanpa porochoa bapachima Enonde, mãɨ Salim p'uuru k'ait'a, mãma pania minachia bɨẽra. Mãma ẽpẽerã wãpachidama porochoapidai k'orea.

²⁴ Mãɨ mãɨyasima Juan jɨ̃a nɨbɨpataɨ tede jɨ̃a nɨbɨi naena.

²⁵ Mãɨ ewaride waapẽarã Juan ome p'ɨrrɨapataɨrã judio aba bɨ ome k'ĩruu pedeasidama, ne sɨɨdak'ari, ya mãɨ k'orea Tachi Ak'õrepa ãchi pia unumẽrá.

²⁶ Mãɨne Juanmá wãnak'ari jarasidama: —Jarateaparí, chi pɨ ome Jordán k'ĩrari badapa ẽpẽerã porochoa bɨma, chi pɨa ichi k'orea pia pedea badapa. Mãɨ ãareaɨrã ichimá wãutama.

²⁷ Mãɨpuru Juanpa jarasima: —Abaɨ pida ne p'ue uru baiwẽma, chi mãɨ Tachi Ak'õrepa ichiá teaiwẽpɨra.

²⁸ Mãrapa mɨa jarada ũrisidama. Mɨa jarasima mɨ chi Tachi Ak'õrepa Tachi K'aripaparí teai jaradawẽpɨ. Mãɨpari Tachi Ak'õrepa mɨ naa peesima o jarimẽrá ichi pae.

²⁹ Miak'ãiutade chi wẽra ataru mãɨ chi atepe bɨma. Maamina chi ichik'á bɨ k'õp'ãero arapá bɨma, ichia pedearut'a ũri bɨẽra. Ara mãɨ jĩra mɨ sõpia bɨma ichi nãma bɨ k'orea.

³⁰ Ichi chi atepe bai bɨma. Mɨ k'aepe bai bɨma.

Ɨt'aripema ẽpẽra

³¹ »Chi ɨt'aripa cheru ãareaɨrã k'aepẽra chi atepe bɨma. Chi nãɨ ĩjũane bɨt'a nãɨ ĩjũanepema pẽra aba nãmapemat'u pedeaparima. Mãɨpuru chi pajãnepa cheru ãareaɨrã k'aepẽra chi atepe bɨma.

³² Ichiapuru pedea bɨma pajãne ununa k'orea mãɨnepa ũrina k'orea. Maamina ichia pedea bɨt'a mi ãpia pida ĩjãanak'ama.

³³ Chi ichi pedeade ĩjãa bɨpa k'awa bɨma Tachi Ak'õrepa jara bɨt'a piarãpɨ.

³⁴ Tachi Ak'õrepa peedapa Tachi Ak'õre pedea pedeaparima, Tachi Ak'õrepa ichi Jaore wãak'awẽa teada pẽra.

³⁵ Tachi Ak'õrepa ichi Warra k'ɨ̃ria bɨma; mãɨnepa ne ãarea teasima ichi juade uru bamẽrá.

³⁶ Chi ichi Warrade ĩjãa bɨ Tachi Ak'õre ome ewaricha chok'ae baipɨ, maamina chi ichi Warra itu bɨru, mãɨ Tachi Ak'õre ome ewaricha chok'ae baiwẽma. Ara nãɨena Tachi Ak'õrepa ichi ɨtɨa uru bɨma.