Juan 21 - Tachi Ak'õre Pedea

Jesupa ichi ome p'ɨrrɨapataɨrã siete p'anɨrã́ ichi unupida

¹ Mãɨya nak'ari Jesupa mãicha ara ichi ome p'ɨrrɨapataɨrã́ unupisima Tiberia senia choma ik'idá. Nãɨyasima:

² Mãɨ ewaride ará p'anasidama Simón Pedro, Tomá ichi ɨ̃ana t'ɨ̃ Mikisu apataɨ, Natanael Galileade bɨ p'uuru Caná p'uurudepema, Zebedeo warrarã mãɨnepa waapẽarã ume.

³ Mãɨya p'anɨne Simón Pedropa jarasima: —Mɨ to bat'ade wãipɨ. Mãɨne ãchia jarasidama: —Tai sida pɨ ome wãnaipɨ. Ara mãɨne p'ãp'orrode batoodak'ari wãsidama. Maamina mãɨ teamasi beta jitadaé pasima.

⁴ Tap'ededa Jesú ipude bai nɨbasima maamina ãchia ichi atua p'anasidama.

⁵ Mãɨya bɨde Jesupa ãchiá idisima: —Ũpẽarã, ¿beta jitasidak'ãra? Ãchia p'anoosidama: —Jitadawẽma.

⁶ Jesupa jarasima: —Mãɨya bɨpɨra juaraari t'ɨri bat'at'ɨ. Mãɨyara jitadaipɨ. Mãɨya ichia jarada jĩra oosidama. Maapae mãɨ t'ɨri p'ue jiradaé pasima beta minachia beesideepuru.

⁷ Mãma basima Jesú ome p'ɨrrɨaparí chi “Jesupa minachia k'ɨ̃ria bɨ” apataɨ. Mãɨpa Pedroa jarasima: —¡Jãɨ Tachi Chiparipɨ! Simón Pedropa “Tachi Chipariade” a jarada ũriside ichi neet'á ɨ̃rɨpema jɨ̃sima, mãɨ neet'áwẽapachi pẽra mãɨ to bat'ai k'orea. Jɨ̃k'ari maapae toedá t'ĩu wãsima.

⁸ Maamina chi waapẽarã p'ãp'orrode p'aneesidama. Chi t'ɨri beta ipiru beeda jidibari enemeesidama ipudea, senia ik'idá cien metros k'ait'a p'ana pẽra.

⁹ Batooutade t'ɨpɨ urua nɨbɨt'a unusidama, beta, p'ana ome.

¹⁰ Jesupa jarasima: —Mãrapa beta arat'ea jitadaadadepema enemeet'ɨ.

¹¹ Ara mãɨne Simón Pedro p'ãp'orrodea wãk'ari t'ɨri ipudea jidibari enemeesima. T'ɨri beta nepalá bepa ipiru basima. 153 joisiasidama. Maamina chok'ará jitasidamina chi t'ɨri k'õaé pasima.

¹² Maapae Jesupa jarasima: —Nek'ode chet'ɨ. Mãɨne ãchia wap'easidama ichi k'ayade a ididai k'orea, ichi Tachi Chiparit'a k'awasida pẽra.

¹³ Mãɨya p'anɨne Jesupa p'ana atak'ari ãchiá teasima. Mãɨnepa beta teasima.

¹⁴ Mãɨpa bari k'ak'o ũpea pa basima Jesupa chi ichi ome p'ɨrrɨapataɨrã́ chok'ae p'irabari bak'ari unupisit'a.

Jesú Pedro ome mãicha sõpia bada

¹⁵ Nek'ok'ari Jesupa Simón Pedroa idisima: —Simón, Joná warra, ¿pɨa mɨ pia k'ɨ̃ria bɨk'ãra cha berãpa mɨ k'ɨ̃ria p'anɨ k'aepẽra? Pedropa p'anoosima: —Ãjã mɨ Chipari, pɨa k'awa bɨma mɨa pɨ k'ɨ̃ria bɨt'a. Jesupa jarasima: —Chi mɨne ĩjãa berã minachia ak'ɨ base oveja chak'erã ak'ɨpari jĩra.

¹⁶ Jesupa mãicha Pedroa idisima: —Simón, Joná warra, ¿mɨ k'ɨ̃ria bɨk'ãra? Pedropa p'anoosima: —Ãjã mɨ Chipari, pɨa k'awa bɨma mɨa pɨ k'ɨ̃ria bɨt'a. Jesupa jarasima: —Chi mɨne ĩjãa berã minachia ak'ɨ base oveja chak'erã ak'ɨpari jĩra.

¹⁷ Jesupa mãicha idisima: —Simón, Joná warra, ¿mɨ k'ɨ̃ria bɨk'ãra? Mãɨpa bari k'ak'o ũpea idi basima. Pedro k'ĩra piawẽa nɨbeesima, Jesupa bari k'ak'o ũpea abarik'a idida pẽra. Maapae ichia jarasima: —Mɨ Chipari, pɨa ne ãarea k'awa bɨma. Pɨa k'awa bɨma mɨa pɨ k'ɨ̃ria bɨt'a. Jesupa jarasima: —Chi mɨne ĩjãa berã minachia ak'ɨ base oveja chak'erã ak'ɨpari jĩra.

¹⁸ Piarã jararuma: k'ũtã́ basieda pɨ tuaba neet'á jɨ̃pachima pɨ wã k'ɨ̃riarumá wãi k'orea. Maamina pɨ chõa beek'ari waapẽarãpa pɨ jua jiradaipɨ neet'á jɨ̃pidai k'orea. Maapae ateewãipɨ pɨ wã k'ɨ̃riawẽa bɨmá.

¹⁹ Mãɨ jara bɨdepa Jesupa k'awapisima Pedro sãmaasã́ piui bɨt'a, ichi piurudepa ẽpẽerãpa k'awadamẽrá Tachi Ak'õre chi choma bɨt'a. Mãɨya jarak'ari Jesupa Pedroa jarasima: —¡Mɨ ome p'ɨrrɨase!

Jesú, chi ichia minachia k'ɨ̃ria bɨ ome bada

²⁰ Pedropa jĩitea ak'ɨk'ari Jesú ome p'ɨrrɨaparí, chi Jesupa minachia k'ɨ̃ria uru baparí k'aadea cheru unusima. Mãɨ Jesú k'ait'a suak'abari basima Egitodepa wãnana k'ɨ̃risiapataɨ chik'o k'osidaɨde. Ichia idi basima: «Tai Chipari, ¿k'aipa pɨ jitapiima?»

²¹ Pedropa mãɨ ẽpẽra unuk'ari Jesua idisima: —Mɨ Chipari, ¿nãɨ ẽpẽra ome sãaima?

²² Jesupa p'anoosima: —Mɨa k'ɨ̃ria bɨpɨra ichi chok'ae beeit'a aba mɨ mãicha cherudea ¿pɨa mãɨ k'orea sak'aima? Mɨa k'ɨ̃ria bɨma pɨ mɨ ome p'ɨrrɨait'a.

²³ Mãɨya jarada k'orea chok'ará ũpẽarãpa k'ɨ̃risia p'aneesidama chi mãɨ Jesú ome p'ɨrrɨaparí piuiwẽt'a. Maamina Jesupa jaraé pasima ichi piarã piuiwẽt'a. Mãɨpari jarasima: “Mɨa k'ɨ̃ria bɨpɨra ichi chok'ae beeit'a aba mɨ mãicha cherudea ¿pɨa mãɨ k'orea sak'aima?”

²⁴ Ara mãɨ Jesú ome p'ɨrrɨaparipa mãɨ k'orea jara bɨma mãɨnepa nãɨ k'art'ade nãɨya bɨruma. Tachia k'awa p'anɨma ichia jara bɨ piarãt'a.

Jesupa mãɨ ne minachia ooda

²⁵ Jesupa nãɨ ne oo bada k'aepẽra atepe ne minachia ook'oapachima. Maamina mãɨ ãarea k'art'ade abaabá bɨutapara, mɨmá mãɨ k'art'a bɨk'oadada nãɨ ĩjũa ãareaɨne ara baiwẽ pasima.