Juan 2 - Tachi Ak'õre Pedea

Jesupa pania uvaba papida

¹ Ewari ũpeaɨde arapá miak'ãipataɨ ewari oosidama Caná p'uurude, Galilea ĩjũane. Jesú nae ichiaba mãma basima.

² Jesú mãɨnepa chi ichi ome p'ɨrrɨapataɨrã mãɨ arapá miak'ãipataɨ ewari oo p'anɨmá t'ɨ̃ p'anasidama.

³ Mãɨya p'anɨne uvaba jõna pẽra chi naepa Jesua jarasima: —Uvaba jõsima.

⁴ Mãɨne Jesupa jarasima: —Nae, ¿k'ãre k'orea pɨa mɨá mãɨya jara bɨma? Mɨ ewari waidi ará pawẽma.

⁵ Maamina Jesú naepa chi ne jeda p'anɨa jarasima: —Ichia jararut'a ãarea oot'ɨ.

⁶ Mãɨne chok'o mawara ooda sei arí p'anasidama. Judiorãpa mãɨ chok'o mawara ooda mãɨya oopatama, Tachi Ak'õre pae pia awara bɨdamẽrá. Chok'ocha cincuenta wa setenta pot'eya wãpatama.

⁷ Mãɨne Jesupa uvaba jeda p'anɨa jarasima: —Chok'orãne paniapa ipirut'ɨ. Ara mãɨne ipiru t'ɨk'oa nɨbeepisidama.

⁸ Maapae Jesupa jarasima: —Naapae awara ãpia joedak'ari chi arapaapataɨ ewari ooparia ateewãt'ɨ. Ara mãɨya oosidama.

⁹ Maapae chi arapaapataɨ ewari ooparipa mãɨ pania pada ajorosima. Piarã uvaba tosima, maamina ichia atua basima sãmãɨpa t'ɨsidat'a. Abapuru chi uvaba jeda p'anɨrãpa mãɨ k'awa p'anasidama. Chi arapaapataɨ ewari ooparipa chi ɨmɨk'ĩra wẽra atai bɨt'a t'ɨ̃k'ari nãɨya jarasima:

¹⁰ —Ãareaɨrãpa chi uvaba piipará bɨt'a naa jedapatama. Maapae chi t'ɨ̃k'oadaadapa minachia todak'ari, chi uvaba neena bɨt'a jedapatama. Maamina pɨa chi uvaba chi piipará bɨt'a mẽra uru bada naapae jedapiruma.

¹¹ Mãɨ ẽpẽerãpa ne p'ue oodak'apɨ́ naa ooda Jesupa Caná p'uurude Galilea ĩjũane oosima. Mãɨnepa chi ichi minachia atepe bɨt'a unupisima. Mãɨya ichi ome p'ɨrrɨapataɨrãpa ichide piarã ĩjãasidama.

¹² Mãɨya nak'ari Jesú Capernaum p'uurudea wãsima. Ichi nae, ichi ũpẽarã mãɨnepa ichi ome p'ɨrrɨapataɨrã ichi ome wãsidama. Mãma tãaraa p'ananaé pasima.

Jesupa ne netopataɨrã ãyá jerek'oada

¹³ Judiorã Egitodepa wãnana k'ɨ̃risiapataɨ ewari k'ait'a pa bada pẽra Jesú Jerusalenea wãsima.

¹⁴ Mãma Tachi Ak'õre te eda unusima p'ak'a, oveja mãɨnepa p'aloma netopataɨrã. Ichiaba chi erreara tau tua awaraɨdepema k'ãpiapataɨrã mãma suak'abari p'anɨt'a unusima.

¹⁵ Mãɨya unuk'ari, Jesupa soa jɨ̃k'ara ook'ari, ãarea tajatá jerek'oasima ãchi p'ak'a, oveja ome. Chi erreara tau tua awaraɨdepema k'ãpiapataɨrã erreara tau jeeda k'oet'aak'ari, ãchi nek'opataɨ jãwarik'oak'ari,

¹⁶ maapae chi p'aloma netopataɨrã́ mãɨya jarasima: —Nãɨ ãarea ãyá ateewãt'ɨ. Mɨ Ak'õre te ne netopataɨ te papirãt'ɨ.

¹⁷ Mãɨne ichi ome p'ɨrrɨapataɨrãpa k'ɨ̃risiasidama Tachi Ak'õre pedeade nãɨya bɨ bɨt'a: «Mɨa pɨ te minachia k'ɨ̃ria bɨ pẽra mɨ peapidaipɨ».

¹⁸ Mãɨya bɨde p'aarerã chi chaarearã arí p'anasidama. Mãɨrãpa Jesua jarasidama: —Taiyá unupise Tachi Ak'õrepa pɨá jãɨya oopi bɨt'a.

¹⁹ Jesupa p'anoosima: —Nãɨ te minachia bɨt'a ãrinaipɨra, mɨa ewari ũpeaɨde mãicha ooipɨ.

²⁰ Mãɨne chi p'aarerã chaarearãpa jarasidama: —Nãɨ Tachi Ak'õre te minachia bɨ 46 ãyo mimiasidama mãɨ jõma oodai k'orea. Mãɨ pɨa ¿sãmaasã́ ewari ũpeaɨde jõma ooyade a bɨma?

²¹ Jesupa nãɨ te minachia bɨade aside ara ichi k'ak'ua k'oreapuru pedea basima.

²² Ichi chok'ae p'irabarik'ari ichi ome p'ɨrrɨapataɨrãpa ichia mãɨya jara badat'a k'ɨ̃risiasidama. Mãɨne ãchia Tachi Ak'õre pedeade bɨ bɨt'a mãɨnepa Jesupa jarada piarã ĩjãasidama.

Jesupa ẽpẽerã sãmaasã́ be k'awada

²³ Judiorã Egitodepa wãnana k'ɨ̃risiapataɨ ewaride Jesú Jerusalene basima. Mãɨne minachia ẽpẽerãpa ne p'ue oodak'apɨ́ ichia ooside chok'araɨrãpa ichide ĩjãasidama.

²⁴ Maamina Jesupa ãareaɨrã k'ɨ̃risia k'awa bɨ pẽra ĩjãaé pasima ãchia ichide piarã ĩjãa p'anɨt'a.

²⁵ Ãareaɨrã sõ k'awa bɨ pẽra mi ãpia pida ichiá ẽpẽerã sãmaasã́ be jaradaiwẽa p'anasidama.