Juan 19 - Tachi Ak'õre Pedea

¹ Maapae Pilatopa Jesú soapa p'episima.

² Mãɨya bɨde romanepema papaká berãpa poro jũra jɨ̃parí ɨɨrɨ k'ada Jesú porode jɨ̃ bɨsidama, mãɨnepa ichi k'ak'ua ɨ̃rɨ anamari jɨ̃parí arena k'ĩra bɨt'a jɨ̃pisidama.

³ Maapae Jesumá orrobaridak'ari nãɨya jarasidama: —¡Minachia pia bɨma, chi judiorã poro jũra jɨ̃parí jɨ̃ bɨt'a! Mãɨya jaradak'ari ichi k'ĩtarramá p'epachidama.

⁴ Maapae Pilato mãicha tajatá judiorãmá wãk'ari jarasima: —Ũrit'ɨ. Mɨa mãɨ mãra k'ĩrari enemeeruma, mɨmá ichia nemietá oo newẽa bɨt'a k'awadamẽrá.

⁵ Jesú tajatá ateeutade ɨɨrɨ k'ada poro jũra jɨ̃parí mãɨnepa chi ɨ̃rɨa anamari jɨ̃parí chi arena k'ĩra jɨ̃ basima. Mãɨne Pilatopa jarasima: —Nãɨ chi ẽpẽrapɨ.

⁶ Maamina Jesú unuutade p'aarerã chi mãɨrã chaarearãpa mãɨnepa Tachi Ak'õre te ot'eapataɨrãpa jĩk'ua jarasidama: —¡Ichi k'urusude barijira bɨk'ari peapise! ¡K'urusude barijira bɨk'ari peapise! Mãɨne Pilatopa jarasima: —¡Mãrapuru ateedak'ari k'urusude barijira bɨk'ari peapit'ɨ! Mɨmá ichi nemietá newẽa bɨma.

⁷ Maamina judiorãpa p'anoosidama: —Taipa Moisepa bɨda uru p'anɨma. Mãɨ Moisepa bɨdade jara bɨ jĩra ichi piui bɨma ara ichi Tachi Ak'õre Warraade a bɨ pẽra.

⁸ Mãɨ pedea ũriside Pilato minachia ne wap'easima.

⁹ Maapae ichi te minachia bide eda mãicha wãk'ari Jesua idisima: —¿Pɨ sãmapemama? Maamina Jesupa p'anooé pasima.

¹⁰ Mãɨya bɨde Pilatopa jarasima: —¿Pɨa p'anoowẽk'ãra? ¿Atua bɨk'ãra mɨa pɨ p'ue k'urusude barijira bɨk'ari peapii bɨt'a wa p'ue k'ẽet'aapii bɨt'a?

¹¹ Mãɨne Jesupa p'anoosima: —Tachi Ak'õrepa pɨ bɨdaépara pɨa mɨ mi ãpia pida ooiwẽ pasima. Mãɨpuru chi mɨ pɨ juade teadapa pɨ k'aepẽra nemietá atepe oosima.

¹² Mãɨ ũriside Pilatopa k'ɨ̃risia beesima Jesú sãmaasã́ k'ẽet'aapiit'a. Maamina judiorãpa mãicha jĩk'ua jarasidama: —Pɨa jãɨ ẽpẽra k'ẽet'aapiipɨra pɨ romanepema chi atepe poro chaarea bɨ ome chi mãɨ omepemawẽma. Parituapa ara ichi chi poro jũra jɨ̃parí jɨ̃ bɨade aipɨra, mãɨ ẽpẽra romanepema chi atepe poro chaarea bɨ ome chi nek'ĩramaapɨ.

¹³ Pilatopa mãɨ ũrina pẽra Jesú tajatá ateewãpisima. Maapae ichi ãk'aude suak'abari beesima tejã Mawara K'ak'ayá Ooda apataɨmá. Hebreo pedeade Gabatá apatama.

¹⁴ Judiorã Egitodepa wãnana k'ɨ̃risiapataɨ ewari norema pada pẽra ãchi ne oo p'anasidama mãɨ ewari pae. Ɨmat'ip'a papodode Pilatopa judiorã́ jarasima: —Ak'ɨt'ɨ. Cha nãɨ mãra poro jũra jɨ̃parí jɨ̃ bɨpɨ.

¹⁵ Maamina ãchia jĩk'ua jarasidama: —¡Ateewãpik'ari, peapise! ¡Ateewãpik'ari, peapise! ¡K'urusude barijira bɨk'ari, peapise! Mãɨ k'orea Pilatopa jarasima: —¿Mãɨyara mɨa mãra poro jũra jɨ̃parí jɨ̃ bɨ k'urusude barijira bɨk'ari, peapiik'ãra? Mãɨne p'aarerã chi mãɨrã chaarearãpa p'anoosidama: —¡Taipa poro jũra jɨ̃parí jɨ̃ bɨ awara newẽma! ¡Abapuru uru p'anɨma tachi romanepema chi atepe poro chaarea bɨt'a!

¹⁶ Maapae Pilatopa Jesú romanepema papaká berã́ teasima k'urusude barijira bɨk'ari peadamẽrá. Ara mãɨne ichi ateewãsidama.

Jesú k'urusude barijira bɨdada

¹⁷ Jesupa ichi k'urusu ua beek'ari papaká berãpa ichi ateewãsidama ĩjũa Poro Bɨɨrɨ apataɨmá. Hebreo pedeade Gólgota apatama.

¹⁸ Mãma ãchia Jesú k'urusude barijira bɨsidama. Mãɨnepa ichik'á ẽpẽra ume k'urusude barijira bɨsidama, aba Jesú juaraari, aba ichi juawieri.

¹⁹ Mãɨ awara Pilatopa pak'uru p'ep'edea Jesú poro nok'oari bɨpisima. Mãɨne nãɨya bɨpisima: «Jesú Nazaredepema, judiorã Poro Jũra Jɨ̃parí Jɨ̃ Bɨpɨ».

²⁰ Mãɨ pedea bɨsima hebreo pedeade, latin pedeade mãɨnepa griego pedeade. Chok'ará judiorãpa mãɨ pedea unusidama, Jesú k'urusude barijira bɨdada p'uuru k'ait'a bɨ pẽra.

²¹ Judiorã p'aarerã chi mãɨrã chaarearãpa mãɨ pedea unusidaɨde Pilatoa jarasidama: —Bɨrãse “Judiorã Poro Jũra Jɨ̃parí Jɨ̃ Bɨt'a”. Mãɨpari bɨse: “Nãɨ ẽpẽrapa jarasima ichi judiorã poro jũra jɨ̃parí jɨ̃ bɨpɨ”.

²² Maamina Pilatopa jarasima: —Mɨa bɨda ara mãɨya beeipɨ.

²³ Romanepema papaká berãpa Jesú k'urusude barijira bɨk'ari ichia ɨ̃rɨa anamari jɨ̃ bada atadak'ari mãɨ k'ĩmari k'õanak'ari ãchicha ateewãsidama. Ichia neet'á ek'ari jɨ̃ bada sida ateewãsidama. Mãɨ k'osada chichia nea basima, mãɨpari ɨt'ɨpa edá aba k'osada basima.

²⁴ Mãɨne papaká berãpa ãchi tuaba jarasidama: —Nãɨ k'õanaiwẽma. Pia bɨma nãɨ k'orea ne jemenanai, mãɨ k'aipa jitai k'awayá. Ara mãɨya mãɨt'u chi ãchia oosidama. Mãɨyasima Tachi Ak'õre pedeade naena bɨda jĩra: «Mɨa ɨ̃rɨa anamari jɨ̃ bada ãchicha jedasidama; mãɨnepa mɨa neet'á ek'ari jɨ̃ bada atadai k'orea jemenasidama».

²⁵ Jesú k'urusude jira bɨk'á Jesú nae, chi nae ũpẽawẽra, Cleop'á k'ima María mãɨnepa María Magdalena p'anasidama.

²⁶ Jesupa chi nae mãɨnepa chi ichi ome p'ɨrrɨaparí chi «ichia minachia k'ɨ̃ria bɨ» apataɨ ichi bɨk'á unuside, chi naea jarasima: —Nae, cha bɨ pɨ warrapɨ.

²⁷ Maapae ichi ome p'ɨrrɨaparia jarasima: —Cha bɨ pɨ naepɨ. Mãɨ ewaridepa Jesú nae chi Jesú ome p'ɨrrɨaparí tede bapachima.

Jesú k'urusude piuda

²⁸ Mãɨya jarak'ari Jesupa k'awasima ichia ooi pada ãarea oosit'a. Mãɨne jarasima: —Mɨ opisia bɨma. Mãɨ jarasima Tachi Ak'õre pedeade jara bɨ jĩra.

²⁹ Mãɨne arí chok'o uvaba jɨjɨyá ipiru nɨbasima. Chi eda waapẽarãpa mãɨ uvaba jɨjɨyá ne motá bɨ bek'eadak'ari ateewãsidama. Chi ne motá bɨ hisopo pak'uru juade oodak'ari Jesú it'aemá t'õmaripisidama.

³⁰ Jesupa mãɨ uvaba jɨjɨyá tok'ari jarasima: —Mɨa ooi pada ãarea oosima. Maapae ichi poro edá jaabarik'ari k'ĩrawẽasima.

Jesú orrode miasupa suda

³¹ Judiorã Egitodepa wãnana k'ɨ̃risiapataɨ ewari norema pada pẽra ne oo p'anasidama. Mãɨ arapaapataɨ ewari mimianak'apɨ́ ewari pẽra, judiorãpa ẽpẽerã k'urusude barijira bɨdai k'ɨ̃rianawẽa p'anasidama. Mãɨpuru Pilatoa idisidama chi k'urusude barijira be jĩru bɨap'et'apimẽrá isapea piudak'ari ãchi k'ak'ua mãmapema edá jirapidamẽrá.

³² Mãɨ k'orea papaká berã wãnak'ari Jesú ome k'urusude barijira bɨ p'anana aba jĩru bɨap'et'asidama. Ara mãɨya oosidama chi abaɨ sida.

³³ Maamina Jesumá chesidaɨde ichi piusit'a unusidama. Mãɨpuru ichi jĩru bɨap'et'adaé pasima.

³⁴ Mãɨya bɨde aba papaká bɨpa Jesú orrode miasupa susima piarã piusi k'awai k'orea. Ara mãɨne oa mãɨnepa pania chesima.

³⁵ Chi nãɨ k'art'a bɨdapa piarã mãɨ unusima. Ichia jara bɨt'a piarãpɨ. Ichia k'awa bɨma piarã pedea jara bɨt'a mãra pida sõnepa ĩjãanamẽrá.

³⁶ Ãarea mãɨ piarã mãɨyasima Tachi Ak'õre pedeade bɨ bɨ jĩra. Nãɨya bɨ bɨma: «Ichi bɨɨrɨ aba pida bɨap'et'adaé pasima».

³⁷ Ichiaba Tachi Ak'õre pedeade nãɨya bɨ bɨma: «Chi ãchia sudada pada ẽpẽerãpa ununaipɨ».

Jesú t'ɨbaridada

³⁸ Mãɨya nak'ari judio José apataɨ Pilatomá wãsima. Mãɨ José Arimatea p'uurudepema pasima. Ichi Jesú ome p'ɨrrɨaparí pasima, maamina mi ãpia pida abaɨa jarak'a pasima waapẽarã judiorã wap'ea bɨ pẽra. Ichia Jesú k'ak'ua Pilatoa idisima t'ɨbaride ateewãi k'orea. Mãɨpuru Pilatopa itu ateewãpisima. Ara mãɨne Josepa Jesú k'ak'ua t'ɨbaride ateewãsima.

³⁹ Mãɨ awara Nicodemo, chi naena Jesumá teamasi pedeade che badapa mirra k'era áloe ome p'oerada ateewãsima. Mãɨ chɨk'ɨa 34 kilo basima.

⁴⁰ Ãchia Jesú k'ak'ua ateedak'ari mãɨ mirra k'era áloe ome p'oerada p'aru t'orrode p'ɨrɨsidama. Maapae ichi k'ak'ua mãɨ p'aru t'orropa pɨrasidama judiorãpa t'ɨbaridai k'orea oopata jĩra.

⁴¹ Jesú k'urusude barijira bɨdada k'ait'a ne uu ĩjũa basima. Mãɨ ne uu ĩjũane piuda t'ɨbaripataɨde uria basima p'ẽya uria k'oroda chiwidit'a. Mãma piuda waidi t'ɨbaridak'a pasima.

⁴² Mãɨ uria k'ait'a bɨ pẽra mãɨnepa judiorã mimianak'apɨ́ ewari ará papodo pẽra, Jesú mãma t'ɨbarisidama.