Juan 17 - Tachi Ak'õre Pedea

Jesupa ara ichi k'orea Tachi Ak'õrea ɨt'aa chiidida

¹ Jesupa mãɨya jarak'ari pajãnea ak'ɨk'ari jarasima: «Ak'õre, mɨ ewari ará pasima. Pɨ Warra chi choma bɨt'a unupise pɨ Warrapa pɨ piarã chi choma bɨt'a unupimẽrá.

² Pɨa ẽpẽerã ãarea mɨ juade bɨsima, mɨa ãchi ewaricha chok'ae bapimẽrá.

³ Ewaricha chok'ae bepa, ãchia k'awa p'anɨma pɨ piarã Tachi Ak'õre aba bɨt'a. Ichiaba k'awa p'anɨma chi pɨa peeda, Jesucristot'a.

⁴ Pɨa mɨá nãɨ ĩjũane oopida mɨa jõma oosima. Mãɨya k'awapisima pɨ chi choma bɨt'a.

⁵ Mãɨpuru Ak'õre, mɨ pɨ k'ĩrari chi choma bɨse pɨ ome nãɨ ĩjũa ooi naena chi choma bada jĩra.

Jesupa ichi ome p'ɨrrɨapataɨrã k'orea ɨt'aa chiidida

⁶ »Pɨa mɨá ẽpẽerã nãɨ ĩjũanepemarã teasima. Mɨa mãɨrã́ pɨ k'awapisima. Ãchi poremina, pɨa mɨá ãchi teasima. Ãchia pɨ pedea ĩjãa p'anɨma.

⁷ Mãɨpuru ãchia k'awa p'anɨma ne ãarea mɨa uru bɨ pɨdepa che bɨt'a.

⁸ Pɨa mɨá jarada mɨa ãchiá jarateasima. Ãchia mãɨ pedea ĩjãasidama. Mãɨpuru k'awa p'anɨma piarã mɨ pɨmãɨpa chesit'a. Piarã ĩjãa p'anɨma pɨa mɨ peesit'a.

⁹ »Mɨa pɨá ɨt'aa chiidiruma ãchi k'aripamẽrá. Mɨa pɨá ɨt'aa chiidi bɨwẽma nãɨ ĩjũanepemarã k'orea. Mãɨpari chi pɨa mɨá teadaɨrã k'orea ɨt'aa chiidi bɨma, ãchi pore pẽra.

¹⁰ Ãarea mõré porepɨ mãɨnepa ãarea poré mõrepɨ. Ãchia oo p'anɨnepa mɨ chi choma bɨt'a unupi p'anɨma.

¹¹ »Mɨ nãɨ ĩjũane waa baiwẽma maamina ãchi nãɨ ĩjũane p'aneenaipɨ. Ak'õre, pɨ minachia pia bɨma. Mɨ pɨmá wãru pẽra pɨ t'ɨ̃nepa ãchi minachia ak'ɨ base. Pɨ t'ɨ̃nepa, mɨ mãɨya jua chaarea beepisima, ãchi k'ak'ua aba bɨ jĩra p'ananamẽrá, tachi k'ak'ua aba p'anɨ jĩra.

¹² Mɨ nãma basi ewarimisa pɨ jua chaareadepa mɨa ãarea pɨa teadaɨrã ak'ɨ basima. Ãchidepemarã mi ãpia pida atuaé pasima. Abapuru chi atuai badat'a atuasima Tachi Ak'õre pedea jara bɨ jĩra piarã mãɨyamẽrá.

¹³ »Naapae mɨ pɨmá wãipɨ. Maamina wapida nãɨ ĩjũane bɨde mãɨ ãarea jararuma, arapá p'ananamẽrá, mɨ pɨ ome arapá bɨ jĩra.

¹⁴ Pɨa jarada mɨa ãchiá jarateasima. Maamina nãɨ ĩjũanepemarãpa ãchi unuemaa p'anɨma mɨ jĩra nãɨ ĩjũanepemawẽ pẽra.

¹⁵ Mɨa pɨá idi bɨwẽma ãchi nãɨ ĩjũanepema ãyá ateewãmẽrá, mãɨpari ɨt'aa chiidi bɨma nemietaadepema ak'ɨ bamẽrá.

¹⁶ Ãchi nãɨ ĩjũanepemarãwẽma ara mãɨ mɨ nãɨ ĩjũanepemawẽ jĩra.

¹⁷ Pɨ pedeapa pɨ piarã k'awapi bɨma. Mãɨpa ãchi aba pɨ pae pia bɨse.

¹⁸ Pɨa mɨ nãɨ ĩjũanepemarã t'ãena peeda jĩra mɨa ãchi nãɨ ĩjũanepemarã t'ãena peeruma.

¹⁹ Ãchi k'orea ara mɨ pɨ pae awara beeruma, ãchi sida pɨ pae awara p'ananamẽrá pɨ piarãt'a k'awa p'anɨnepa.

Jesupa jõma ichide ĩjãauta k'orea ɨt'aa chiidida

²⁰ »Mɨa abapuru ãchi k'orea ɨt'aa chiidi bɨwẽma. Mãɨpari ãchia mɨ pedea jarautade mɨne ĩjãauta k'orea pida idi bɨma.

²¹ Ak'õre, pɨ mɨ ome bɨ pẽra mãɨnepa mɨ pɨ ome bɨ pẽra mɨa idi bɨma ãchi sida tachi ome k'ak'ua aba bɨ jĩra p'ananamẽrá. Mãɨya nãɨ ĩjũanepemarãpa ĩjãanaipɨ pɨa mɨ peesit'a.

²² Pɨa mɨ ateewãsima tachi ará p'ananamẽrá. Mãɨya mɨ chi choma bɨsima. Ara mãɨ jĩra mɨa ãchi chi choma bɨsima tachi ome k'ak'ua aba bɨ jĩra p'ananamẽrá.

²³ Mɨ ãchi ome bɨ pẽra mãɨnepa pɨ mɨ ome bɨ pẽra tachi ãarea ará k'ak'ua aba bɨ jĩra p'ananaipɨ. Mãɨya nãɨ ĩjũanepemarãpa k'awadaipɨ pɨa mɨ peesit'a mãɨnepa k'awadaipɨ pɨa ãchi k'ɨ̃ria bɨt'a ara mɨ k'ɨ̃ria bɨ jĩra.

²⁴ »Ak'õre, pɨa nãɨ ĩjũa ooi naena mɨ k'ɨ̃ria basima. Mãɨpuru pajãne mɨ chi choma bɨsima. Mɨa k'ɨ̃ria bɨma ãarea pɨa mɨá teadaɨrã mãma mɨ ome ará p'ananait'a, pɨa mɨ chi choma bɨda ununamẽrá.

²⁵ Ak'õre, pɨ jĩp'a bɨma. Nãɨ ĩjũanepemarãpa pɨ atua p'anɨma, maamina mɨa pɨ k'awa bɨma. Mãɨnepa nãɨrã pida k'awa p'anɨma pɨa mɨ nãmá peesit'a.

²⁶ Mɨa ãchiá pɨ k'awapisima. Mãɨ awara wapida atepe k'awapi baipɨ pɨa mɨ k'ɨ̃ria bɨ jĩra ãchi sida chi k'ɨ̃ria p'ananamẽrá mãɨnepa mɨ ãchi sõne uru p'ananamẽrá».