Juan 12 - Tachi Ak'õre Pedea

Mariapa k'era Jesú jĩru ɨ̃rɨ weada

¹ Egitodepa wãnana k'ɨ̃risiapataɨ ewari pai k'orea ewari k'ak'o seiwẽa baside, Jesú Betania p'uurudea wãsima Lázaro bapachimá. Mãɨ Lázaro Jesupa chok'ae p'irabaripida pasima.

² Mãma chik'o pia oodak'ari, Jesua nek'opisidama. Martapa jeda basima mãɨnepa Lázaro waapẽarã paara Jesú ome nek'omaa basima.

³ Mãɨya p'anɨne Mariapa nardo k'era chi ichiawa, chi neepɨa bɨt'a, chi k'era bi k'ɨrrɨk'apɨa atak'ari Jesú jĩrune weasima. Maapae ichi pudapa p'õesã́ p'oapisima. Mãɨ k'erapa te ãarea p'iumá nɨbeepisima.

⁴ Mãɨne Jesú ome p'ɨrrɨaparí aba basima Juda Iscariote apataɨ. Judapa Jesú jitapii basima. Mãɨ Judapa jarasima:

⁵ —¿K'ãre k'orea jãɨ k'era erreara minachia bɨ pari netoé pasima, chi mãɨ errearadepa chi nenea k'ede k'aripadai k'orea?

⁶ Maamina ichia mãɨya jaraé pasima nenea k'ede k'orea k'ɨ̃risia bɨ pẽra, mãɨpari mãɨya jarasima nechɨaparí pẽra. Ãchi erreara yaaparí te ichia uru bapachima maamina mãɨnepema chɨapachima.

⁷ Mãɨne Jesupa jarasima: —Nãɨ wẽra itu bɨse. Ichia nãɨ k'era yaa uru basima mɨ t'ɨbaridai ewari k'orea.

⁸ Nenea k'ede ewaricha mãra t'ãena p'ananaipɨ, maamina mɨ mãra ome ewaricha baiwẽma.

Judiorãpa Lázaro peadai k'orea pedea audada

⁹ Chok'ará judiorãpa Jesú Betania p'uurude bɨt'a k'awasida pẽra, ichi ak'ɨde wãsidama. Mãɨ awara Lázaro, chi Jesupa chok'ae p'irabaripida sida ak'ɨde wãsidama.

^10-11 Lázaro chok'ae p'irabarida k'orea judiorã chok'araɨrãpa p'aarerã chi mãɨrã chaarearã itu bɨdak'ari Jesude ĩjãasidama. Mãɨpuru p'aarerã chi mãɨrã chaarearãpa pedea ausidama Lázaro sida peadai k'orea.

Jerusalenepemarãpa Jesua pia pedeadada

¹² Norema chok'ará ẽpẽerã arapaapataɨ ewari oodai k'orea Jerusalenea chedaadapa k'awasidama Jesú Jerusalenea cherut'a.

¹³ Mãɨpuru ãchia p'ãara k'irú jĩra bet'a t'ɨɨdak'ari ichiá pia pedeade wãsidama. Nãɨya jĩk'ua jarasidama: «¡Minachia pia bɨma! ¡Minachia pia bɨma chi Tachi Chipari t'ɨ̃nepa cherut'a! ¡Pia bɨma chi Israeldepema Poro jũra jɨ̃parí jɨ̃ bɨt'a!»

¹⁴ Mãɨne Jesupa mũra k'aepea unuk'ari ya mãɨ ɨ̃rɨ suak'abari beesima. Mãɨyasima Tachi Ak'õre pedeade jara bɨ jĩra:

¹⁵ «Sión p'uurudepemarã, wap'earãt'ɨ. Ak'ɨt'ɨ, mãra Poro jũra jɨ̃parí jɨ̃ bɨ mũra chak'e ɨ̃rɨ cheruma».

¹⁶ Jesú ome p'ɨrrɨapataɨrãpa mãɨ unu p'anɨmina k'awadawẽa p'anasidama. Maamina Jesú chok'ae p'irabarik'ari chi pajã k'ĩrawãrea bɨmá wãk'ari, k'awasidama Tachi Ak'õre pedeade chi ichi k'orea naena bɨda ãarea piarã mãɨyasit'a.

¹⁷ Jesupa Lázaro t'ɨbari badamãɨpa tajatá chepade aside, mãɨ chok'ae p'irabaripiside chok'ará ẽpẽerã arí p'anasidama. Mãɨya nak'ari ãchia ununana waapẽarã́ nepɨrɨpachidama.

¹⁸ Jesupa mãɨ ẽpẽerãpa ne p'ue oodak'apɨ́ ooda chok'araɨrãpa ũrisidama. Mãɨpuru ichiá pia pedeade wãsidama.

¹⁹ Mãɨne p'ariseorãpa ara ãchi tuaba jara p'anasima: «¡Ak'ɨt'ɨ! Ãareaɨrã ichi k'aade wãutama. Mãɨpuru chi tachia k'ɨ̃risiadada ichi k'orea mãɨ p'ue oodaiwẽma».

Jesupa ichi peadai jarada

²⁰ Mãɨ arapaapataɨ ewari oo p'anɨne waapẽarã griegorãpa Tachi Ak'õrea pia pedeadai k'orea Jerusalenea chesidama.

²¹ Mãɨrã chi P'elipemá wãsidama. Mãɨ P'elipe Galilea tuade bɨ Betsaida p'uurudepema pasima. Ãchia P'elipea jarasidama: —Taipa Jesú unu k'ɨ̃ria p'anɨma.

²² Mãɨpuru P'elipepa Andrea jarade wãsima. Ya maapae ãchi umeepa Jesua jarade wãsidama.

²³ Mãɨne Jesupa jarasima: —Ewari ará pasima. Tachi Ak'õrepa mɨ, chi Ẽpẽra Warra chi Choma bɨipɨ.

²⁴ Mɨa piarã jararuma: trigo tau ĩjũane baek'ari ya piuepɨra, aba ichi tuaba beeima. Maamina mãɨ trigo tau piuda jĩra ĩjũane beeipɨra, mãɨya bak'ari minachia chauparima.

²⁵ Ara mãɨ jĩra chi nãɨ ĩjũane pia chok'ae bai k'orea jɨrɨ bɨpa mãɨ chok'ae bai atuaipɨ. Maamina nãɨ ĩjũane pia chok'ae bai k'ɨ̃riawẽa bɨpɨra, mãɨ Tachi Ak'õre ome ewaricha chok'ae baipɨ.

²⁶ Paritua mɨ pae pari mimiaparí pa k'ɨ̃ria bɨpɨra, mɨ ome nipai bɨma. Mɨ wãrumá, chi mɨ pae pari mimiaparí sida wãipɨ. Paritua mɨ pae pari mimiaparipɨra, mɨ Ak'õrepa ichi chi choma bɨipɨ.

²⁷ »Piarã mɨ minachia sõp'ua bɨma. ¿Mɨa k'ãre jaraima? “¿Ak'õre, nãɨ minachia mĩa bɨdepema mɨ k'aripase aik'ãra”? Mãɨya jarawẽma mɨ mãɨ k'orea cheda pẽra.

²⁸ Mãɨpari jararuma: Ak'õre, mãɨ mɨ mĩarunepa ãareaɨrã́ k'awapise pɨ chi Choma bɨt'a. Mãɨne ẽpẽerã arí p'anɨrãpa pedea pajãne ũrisidama. Mãɨ pedeapa jarasima: «Mɨa naena k'awapisima mɨ chi Choma bɨt'a mãɨnepa mãicha k'awapiipɨ».

²⁹ Mãɨ pedea ũrisidaɨde waapẽarãpa pa k'ĩruusiade a k'ɨ̃risiasidama. Waapẽarãpa jarasidama: —Tachi Ak'õrepa ɨt'aripa peedapa Jesua pedeasima.

³⁰ Mãɨne Jesupa jarasima: —Mãɨ pedea mɨ pae pedeaé pasima. Mãɨyawẽa mãra paepuru pedeasima.

³¹ Naapae Tachi Ak'õrepa nãɨ ĩjũanepemarãpa nemietá oopataɨ ak'ɨk'ari ɨtɨaipɨ. Naapae, chi nãɨ ĩjũanepema chipari Tachi Ak'õrepa p'ueipɨ.

³² Mɨ ɨt'ɨ barijira bɨutade mɨa ãareaɨrã ara mɨchimá enemeeipɨ mɨne ĩjãanamẽrá.

³³ Mãɨya jarasima ichi k'urusude barijira bɨk'ari mãɨya peadai k'awapii k'orea.

³⁴ Ẽpẽerã mãma p'anɨrãpa Jesua jarasidama: —Moisepa bɨdadepa taipa k'awa p'anɨma Tachi Ak'õrepa Tachi K'aripaparí teai jarada mãɨ ewaricha piuk'apɨɨt'a. Pɨa ¿sãmaasã́ jara bɨma chi Ẽpẽra Warra ɨt'ɨ barijira bɨdayade a bɨt'a? Mãɨ Ẽpẽra Warra ¿k'aima?

³⁵ Jesupa p'anoosima: —Nãɨ ɨnaa bɨ mãra ome tãaraa baiwẽma. Mãɨpuru ɨnaa bɨde nipat'ɨ ichi mãra ome bɨmisa mãɨ paritua p'ãrione baedaemaapa. Chi p'ãrione ni, mãɨpa sãmá wãrut'a k'awawẽma.

³⁶ Chi ɨnaa bɨ mãra t'ãena uru p'anɨne mãɨ ɨnaa bɨde ĩjãat'ɨ, ɨnaa bɨdepema ẽpẽrarã padai k'orea. Mãɨ pedea jarak'ari Jesú mĩruwãsima.

Judiorãpa waidi Jesude ĩjãanawẽa tuanana

³⁷ Jesupa ẽpẽerãpa ne p'ue oodak'apɨ́ chok'ará ẽpẽerã k'ĩrari oodamina ãchia waidi ĩjãanawẽa p'anasidama.

³⁸ Tachi Ak'õre pari pedeaparí Isaíapa jarada jĩra piarã mãɨyasima. Nãɨya jarasima: «Tai Chipari, ¿taipa jaradada k'aipa ĩjãasima? Pɨ jua chaarea bɨ ¿k'aiyá k'awapisima?»

³⁹ Mãɨpuru ãchia p'ue ĩjãanaé pasima, Isaíapa jarada jĩra:

⁴⁰ «Mɨa ãchi tau p'ãrio be jĩra bɨsima mãɨnepa sõ chaarea bɨsima ãchi taupa unu p'anɨmina k'awapidaemaapa mãɨnepa ũri p'anɨmina sõnepa k'awapidaemaapa. Mãɨya p'anɨ pẽra mɨmá chedak'ama mɨa jɨpa beepimẽrá».

⁴¹ Isaíapa ichi k'art'ade mãɨya bɨsima Jesú chi Choma bɨ ununa pẽra. Mãɨ k'orea pedeasima.

⁴² Isaíapa mãɨya bɨdamina chok'ará judiorãpa mãɨnepa p'aarerã chi mãɨrã chaarearã pida Jesude ĩjãasidama. Maamina waapẽarã́ mãɨ jaradaé pasima. Wap'ea p'anasidama p'ariseorãpa chi ará pedeapataɨ tedepema ãyá jeret'aadait'a.

⁴³ Tachi Ak'õrepa ãchi k'orea pia pedeai k'aepẽra mãɨ judiorãpa k'ɨ̃ria p'anasidama ẽpẽerãpa ãchi k'orea pia pedeadait'a.

Tachi Ak'õrepa Jesú pedeadepa ẽpẽerã ɨtɨaipɨ

⁴⁴ Maapae Jesupa jĩk'ua jarasima: «Chi mɨne ĩjãa bɨpa mɨ Peedade pida ĩjãa bɨma.

⁴⁵ Chi mɨ unu bɨpa mɨ Peeda sida unu bɨma.

⁴⁶ Mɨ nãɨ ĩjũanea ɨnaa bɨ jĩra che bɨma chi mɨne ĩjãauta p'ãrione p'ananaemaapa.

⁴⁷ Abaɨpa mɨ pedea ũrik'ari ĩjãawẽpɨra, mɨa ichi nepɨra pará bɨade aiwẽma, mɨ nãɨ ĩjũane be nepɨra pará p'anɨane ai k'orea chewẽa bɨ pẽra. Mɨ nãɨ ĩjũane be k'aripai k'oreapuru chesima.

⁴⁸ Maamina chi mɨ itu bɨrupa, chi mɨ pedea ũri k'ɨ̃riawẽa bɨpa, mãɨ Tachi Ak'õrepuru ɨtɨaipɨ. K'aadeapema ewaride Tachi Ak'õrepa k'awapiipɨ mãɨ nepɨra pará bɨt'a, mɨa jarada pedea ĩjãawẽa bɨ pẽra.

⁴⁹ Mɨ ara mɨchidepa pedeawẽma. Mɨ Ak'õre, chi mɨ nãmá peedapa mɨá jarasima k'ãre jarai bɨt'a mãɨnepa sãmaasã́ mãɨ pedea jarai bɨt'a.

⁵⁰ Mɨa k'awa bɨma chi ichia mɨá pedeapit'a, ẽpẽerã ichi ome ewaricha chok'ae tuananamẽrá. Mãɨpuru mɨ Ak'õrepa mɨá jarada jĩra mɨa mãɨya pedea bɨma».