Juan 11 - Tachi Ak'õre Pedea

Lázaro piuda

^1-2 Mãɨ ewaride ẽpẽra Lázaro apataɨ k'ɨdade basima. Mãɨ Lázaro Betania p'uurudepema pasima. Ara mãɨ p'uurude ichi ũpẽawẽrarã María mãɨnepa Marta sida p'anasidama. Mãɨ Mariapa Tachi Chipari jĩrune k'era weak'ari ichi pudapa p'oapi bada pasima.

³ Mãɨne Lázaro ũpẽawẽrarãpa Jesua jara peesidama: —Tai Chipari, pɨchi ũpẽa jĩra k'ɨ̃ria baparit'a k'ɨdade bɨma.

⁴ Mãɨ pedea ũriside Jesupa jarasima: —Lázaro piuiwẽma, maamina mãɨ k'ɨdade bɨ, ẽpẽerãpa k'awadamẽrá Tachi Ak'õre mãɨnepa chi Warra ãchi chi chomarãpɨ.

⁵ Jesupa Lázaro mãɨnepa chi ũpẽawẽrarã minachia k'ɨ̃ria basimina,

⁶ Lázaro k'ɨdade bɨ k'awak'ari ewari k'ak'o ume beesima ichi badamá.

⁷ Mãɨya nak'ari ichi ome p'ɨrrɨapataɨrã́ nãɨya jarasima: —Wãtɨma mãicha Judeadea.

⁸ Mãɨpuru ichi ome p'ɨrrɨapataɨrãpa jarasidama: —Jarateaparí, tãaraawẽa bɨma Judeadepemarãpa pɨ mawarapa bat'a peada k'ɨ̃ria p'ananat'a. ¿Pɨ mãicha jãmá wãik'ãra?

⁹ Jesupa jarasima: —¿Ewaripa doce hora uru bɨwẽk'ãra? Chi ãst'á nit'a t'enabarik'ama, ichia chi ewari ɨnaa nãɨ ĩjũanepema uru bɨ pẽra.

¹⁰ Maamina chi teamasi nit'a tenabariparima, ɨnaa bɨwẽ pẽra.

¹¹ Mãɨya jarak'ari Jesupa jarasima: —Tachi k'õp'ãero Lázaro k'ãi bɨma maamina mɨa ichi ɨ̃ramapiipɨ.

¹² Mãɨne Jesú ome p'ɨrrɨapataɨrãpa ichiá jarasidama: —Tai Chipari, ichi k'ãi bɨpɨra jɨpa beeipɨ.

¹³ Jesupa mãɨya jaradadepa Lázaro piuda k'orea pedea basima, maamina ichi ome p'ɨrrɨapataɨrãpa k'ɨ̃risiasidama Lázaro k'ãi bɨ k'orea pedea bɨt'a.

¹⁴ Maapae Jesupa jĩp'a jarasima: —Lázaro k'ĩrawẽasima.

¹⁵ Mãma badawẽ pẽra mɨ arapá bɨma mãɨ k'orea mãrapa mɨne pia ĩjãanai pẽra. Mãicha ichimá wãtɨma.

¹⁶ Mãɨne Tomá, Mikisu apataɨ basima. Mãɨpa Jesú ome p'ɨrrɨapataɨrã waapẽarã́ jarasima: —Judeadea wãtɨma tachi sida peadamẽrá.

Piudaadarã Jesupa chok'ae p'irabaripii k'orea

¹⁷ Betania p'uurude cheside Jesupa k'awasima Lázaro t'ɨbaridada ewari k'ak'o k'ĩmari pa basit'a.

¹⁸ Betania p'uuru Jerusalenepa t'ɨmɨawẽa basima.

¹⁹ Mãɨpuru chok'ará judiorã chesidama Marta, María ome sõchupuriadai k'orea ãchi ũpẽa piuda pẽra.

²⁰ Mãɨya p'anɨne Martapa k'awasima Jesú cherut'a. Ara mãɨne ichiá pia pedeade wãsima. Mãɨne María tiida beesima.

²¹ Martapa Jesú unuside ichiá jarasima: —Mɨ Chipari, pɨ nãma badapara mɨ ũpẽa piuiwẽ pasima.

²² Maamina mɨa k'awa bɨma pɨa ãarea Tachi Ak'õrea idirut'a ichia mãɨ ooit'a.

²³ Jesupa ichiá jarasima: —Pɨ ũpẽa chok'ae p'irabariipɨ.

²⁴ Mãɨne Martapa jarasima: —Ãjã, mɨa k'awa bɨma nãɨ k'aadepema ewaride, chi piudaadarã chok'ae p'irabariutade, ichi sida chok'ae p'irabaripiipɨ.

²⁵ Jesupa jarasima: —Mɨa chi piudaadarã chok'ae p'irabaripiparima mãɨnepa chok'ae bapiparima. Parituapa mɨne ĩjãaipɨra, piurumina ewaricha Tachi Ak'õre ome chok'ae baipɨ.

²⁶ Chi mɨne ĩjãa bɨ, mɨnepa chok'ae bɨ pẽra mãɨ mi ãpia pida piuiwẽma. ¿Pɨa mãɨ ĩjãa bɨk'ãra?

²⁷ Mãɨne Martapa p'anoosima: —Ãjã mɨ Chipari, mɨa ĩjãa bɨma pɨ Tachi Ak'õre Warra, Tachi Ak'õrepa Tachi K'aripaparí teai jarada, chi nãɨ ĩjũane chei bada padat'a.

Jesú Lázaro k'orea jẽana

²⁸ Mãɨya jarak'ari Marta wãsima ichi ũpẽawẽramá. Maapae k'ɨɨrɨk'á jarasima: —Chi Jarateaparí nãma bɨma. Ichia pɨ t'ɨ̃ peesima.

²⁹ Mãɨ ũrik'ari María p'irabarik'ari Jesú bɨmá isapea wãsima.

³⁰ Jesú p'uurudea wãwẽa basima. Martapa ichi ununamá wapida basima.

³¹ Judiorã María tiida p'anasidama ichi sõpiapidai k'orea. Mãɨne unusidama ichi isapea p'irabarik'ari tajatá wãrut'a. Chi t'ɨbaridaadamá jẽane wãsiade a k'ɨ̃risiadada pẽra, k'aade wãsidama.

³² María Jesú bɨmá cheside ichi unuside, ichi jĩru k'ait'a bedabari k'obeesima. Nãɨya jarasima: —Mɨ Chipari, pɨ nãma badapara, mɨ ũpẽa piuiwẽ pasima.

³³ Jesupa María jẽaru mãɨnepa judiorã ichi ome chedada sida jẽauta unuside ãchi k'orea minachia sõp'ua nɨbeek'ari k'ĩruu ɨ̃apaasima.

³⁴ Maapae idisima: —Ichi ¿sãma t'ɨbarisidama? Ãchia p'anoosidama: —Tai Chipari, ak'ɨde chese.

³⁵ Jesú jẽasima.

³⁶ Mãɨya bɨde judiorã arí p'anɨpa jarasidama: —¡Ak'ɨt'ɨ! Sãɨya Lázaro k'ɨ̃ria bapachit'a.

³⁷ Maamina chi eda ãchidepemarãpa jarasidama: —Nãɨ tau p'ãrio bɨ jɨpa beepidapa ¿k'ãre k'orea p'ue k'aripaé pasima Lázaro piupiemaapa?

Jesupa Lázaro chok'ae p'irabaripida

³⁸ Jesú mãicha k'ĩruu ɨ̃apaaside Lázaro p'ẽya uriade t'ɨbaridaadamá chesima. Chi eda wãpataɨ mawarapa jɨ̃a basima.

³⁹ Mãɨne Jesupa jarasima: —Jãɨ mawara ãyá bɨt'ɨ. Marta, chi piuda ũpẽawẽrapa Jesua jarasima: —Mɨ Chipari, ichi piuda ewari k'ak'o k'ĩmari pa bɨ pẽra mik'ia bɨma.

⁴⁰ Maamina Jesupa jarasima: —¿Mɨa jarawẽa basik'ãra pɨa piarã ĩjãaipɨra, Tachi Ak'õre chi choma bɨ unuit'a?

⁴¹ Mãɨya bɨde ẽpẽerãpa mawara ãyá bɨsidama. Maapae Jesupa ɨt'aa ak'ɨk'ari jarasima: —Ak'õre, mɨa pɨá pia jaraipɨ mɨa idida ũrina pẽra.

⁴² Mɨa k'awa bɨma pɨa mɨ pedea ũri baparit'a, maamina mɨa mãɨ jarasima nãɨrã ẽpẽerãpa k'awadamẽrá pɨa mɨ peesit'a.

⁴³ Mãɨya jarak'ari Jesupa jĩk'ua jarasima: —¡Lázaro, tajatá chese!

⁴⁴ Ara mãɨne Lázaro piu bada tajatá chesima. Ichi jua mãɨnepa jĩru wapida p'arupa pɨra basima. Mãɨnepa ichi k'ĩra p'arupa pɨra basima. Mãɨne Jesupa jarasima: —Ichi ẽranak'ari, itu peet'ɨ.

Jesú peadai k'orea pedea audada

⁴⁵ Chok'ará judiorã María ak'ɨde wãnaanarãpa Jesupa ooda unusidama. Mãɨpuru ãchia ichide ĩjãasidama.

⁴⁶ Maamina chi eda waapẽarã p'ariseorãmá Jesupa ooda jarade wãsidama.

⁴⁷ Mãɨpuru p'ariseorã mãɨnepa p'aarerã chi chaarearãpa ara ãchi paara t'ɨ̃ peedak'ari, pedea ausidama. Nãɨya jarasidama: —Tachia ¿k'ãre oodaima? Mãɨ ẽpẽrapa ne p'ue oodak'apɨ́ minachia oo bɨma.

⁴⁸ Ichi itu bɨdaipɨra ãareaɨrãpa ichide ĩjãanaipɨ. Ichi k'aade wãnaipɨra Romanepemarã papaká berã chedak'ari ãchia Tachi Ak'õre te minachia bɨ ãrinaipɨ mãɨnepa tachi judiorã k'enanaipɨ.

⁴⁹ Mãma aba basima Caip'á apataɨt'a. Mãɨ ãyone ichi p'aare minachia k'awa bɨ pasima. Mãɨ Caip'apa jarasima: —¡Mãra ãpia pida atuama!

⁵⁰ Romanepemarãpa ãarea tachi judiorã peadai k'aepẽra pia bɨma ẽpẽra aba judiorã ãareaɨrã k'orea piuit'a.

⁵¹ Caip'apa ara ichi k'ɨ̃risiadepa mãɨya jaraé pasima. Mãɨpari ichi mãɨ ãyone chi p'aare minachia k'awa bɨ bada pẽra Tachi Ak'õrepuru ichiá jarapisima Jesú piui bɨt'a ãarea judiorã k'orea.

⁵² Maamina abapuru judiorã k'orea piuiwẽ pasima, mãɨpari ãarea Tachi Ak'õre warrarã nãɨ ĩjũane awara awará be p'uuru aba bɨi k'orea.

⁵³ Mãɨya mãɨ ewaridepa pedea ausidama Jesú peadai k'orea.

⁵⁴ Mãɨpuru Jesú judiorã t'ãena nipak'a pasima, mãɨpari Judeadepema ãyá wãsima. Ep'raín p'uurude ichi ome p'ɨrrɨapataɨrã ome bade wãsima. Mãɨ p'uuru ĩjũa pania newẽa bɨ k'ait'a bɨma.

⁵⁵ Judiorã Egitodepa wãnana k'ɨ̃risiapataɨ ewari k'ait'a basima. Mãɨ arapaapataɨ ewari pẽra p'uuruchadepemarã Jerusalenea wãsidama ãchia ne oopataɨ oo p'anɨnepa Tachi Ak'õre k'ĩrari pia p'ananai k'orea.

⁵⁶ Mãɨ ewaride ẽpẽerãpa Jesú jɨrɨ nipasidama. Tachi Ak'õre te eda tausia p'anɨne idipachidama: «Mãramá ¿ichi nãɨ arapá oopataɨ ewaridea cheik'ãra?»

⁵⁷ Maamina p'aarerã chi mãɨrã chaarearãpa mãɨnepa p'ariseorãpa jarasidama parituapa Jesú unusira jarai bɨma ichi jitadamẽrá.