Juan 1 - Tachi Ak'õre Pedea

Jesucristo chi Pedeade adapɨ

¹ Jua chiwidieda chi Pedea apataɨ basima. Mãɨ Pedea apataɨ Tachi Ak'õre ome basima. Piarã mãɨ Tachi Ak'õret'u ara mãɨya basima.

² Mãɨ jua chiwidieda Tachi Ak'õre ome basima.

³ Ichidepa Tachi Ak'õrepa ne ãarea oosima. Ichiwẽa, Tachi Ak'õrepa mi ãpia pida ne ooé pasima.

⁴ Chi pedea apataɨpa ne ãarea chok'ae bapipachima. Ɨnaa bɨ jĩra basima, ẽpẽerã́ ichi k'orea k'awapi bɨ pẽra.

⁵ Mãɨ ɨnaa p'ãrione urua bɨ jĩra bɨma. P'ãriopa mãɨ ɨnaa bɨt'a p'ue k'iap'et'aiwẽma.

⁶ Ẽpẽra Porochoaparí Juan apataɨ basima. Tachi Ak'õrepa ichi peesima

⁷ mãɨ ɨnaa bɨ jĩra bɨ k'orea jaramẽrá, ichidepa jõmãɨrãpa mãɨne ĩjãanamẽrá.

⁸ Juan mãɨ ɨnaa bɨ wẽpasima, mãɨpari mãɨ ɨnaa bɨ k'orea pedeapachima.

⁹ Chi nãɨ ĩjũane chei badat'a, mãɨ chi piarãpẽa ɨnaa bɨpɨ. Mãɨ ãareaɨrã pae urua bɨma.

¹⁰ Mãɨ ɨnaa bɨ ĩjũane basima. Tachi Ak'õrepa ichidepa nãɨ ĩjũa oodamina nãɨ ĩjũanepemarãpa ichi k'awadaé pasima.

¹¹ Pajãnepa ichi tuadepemarãmá chesima. Ya ãchia ichi jitadaé pasima.

¹² Maamina chi ichi jitadaadarãpa ichide ĩjãasidama. Mãɨpuru ichia ãchi bɨsima Tachi Ak'õre warrarã p'ananamẽrá.

¹³ Ãchi Tachi Ak'õre warrarã padaé pasima ãchi naepa t'õnanepa wa tachia k'ɨ̃ria p'anananepa. Mãɨpari Tachi Ak'õrepuru ichi warrarã papisima.

¹⁴ Chi Pedea apataɨ ẽpẽra k'ak'uade t'õk'ari tachi t'ãena bapachima. Ichi sõpiadepa tachi minachia k'aripasima. Ichia tachiá pia k'awapisima Tachi Ak'õre piarã sãmaasã́ bɨt'a. Mãɨne taipa ichi ãarea pia bɨt'a unusidama, Tachi Ak'õre Warrat'u mãɨya bɨ pẽra.

¹⁵ Juan chi Porochoaparipa ichi k'orea nãɨya ɨbɨa jarapachima: «Nãɨ ẽpẽra k'orea, mɨa nãɨya jara bapachima: “Chi mɨ k'aadea cherut'a mɨ k'aepẽra atepe bɨma, ichi mɨ naena bada pẽra”».

¹⁶ Ichi minachia k'awa bɨdepa, sõpiadepa tachi k'aripa basima mãɨnepa sõpiadepa tachi k'aripa bɨma.

¹⁷ Tachi Ak'õrepa naena Moisepa bɨda teasima, maamina Jesucristodepa tachiá k'awapisima ichi piarã sãmaasã́ bɨt'a mãɨnepa ichi sõpiadepa tachi minachia k'aripa bɨt'a.

¹⁸ Abaɨ pida Tachi Ak'õre ununak'ama. Maamina chi Warra aba bɨt'a Tachi Ak'õre pẽra mãɨnepa chi Ak'õre ome abarik'a bɨ pẽra, tachiá k'awapisima Tachi Ak'õre piarã sãmaasã́ bɨt'a.

Juan chi Porochoaparí k'orea bɨda

¹⁹ Nãɨ chi Juanpa ara ichi k'orea jaradapɨ. Judiorã chaarearãpa Jerusalenepa p'aarerã mãɨnepa Levidepemarã Juanmá peesidama ichiá nãɨya ididamẽrá: —¿Pɨ k'aima? ¿Pɨ Tachi Ak'õrepa Tachi K'aripaparí teai jaradak'ãra?

²⁰ Mãɨne ichia piarã p'anoosima: —Mɨ Tachi Ak'õrepa Tachi K'aripaparí teai jaradawẽma.

²¹ Ãchia mãicha idisidama: —¿Mãɨya bɨpɨra pɨ k'aima? ¿Pɨ Eliak'ãra? Ichia p'anoosima: —Mɨ mãɨwẽma. Ãchia mãicha idisidama: —Pɨ ¿Tachi Ak'õre pari pedeaparí chi waibɨa bɨ chei badak'ãra? Ichia p'anoosima: —Mɨ mãɨwẽma.

²² Mãicha idisidama: —¿Mãɨya bɨpɨra pɨ k'aima? Chi tai peedaadarã́ pɨ k'orea jarade wãnai p'anɨma. Ara pɨchi k'orea ¿k'ãre jaraima?

²³ Mãɨne Juanpa p'anoosima: —Tachi Ak'õre pari pedeaparí Isaíapa nãɨya jarasima: “Ĩjũa pania newẽa bɨde abaɨpa nãɨya jĩk'ua pedea bɨma: Tachi Chipari o jĩp'a jarit'ɨ”. Mɨ mãɨ ẽpẽrapɨ.

²⁴ Chi eda waapẽarã chi Juanmá peedaadarã p'ariseorã pasima.

²⁵ Mãɨrãpa ichiá idisidama: —Pɨ Tachi Ak'õrepa Tachi K'aripaparí teai jaradaepɨra, mãɨnepa Eliawẽpɨra mãɨnepa Tachi Ak'õre pari pedeaparí chi waibɨa bɨwẽpɨra, ¿k'ai t'ɨ̃nepa pɨa ẽpẽerã jãɨya porochoaparima?

^26-27 Juanpa nãɨya p'anoosima: —Mɨa paniapa porochoaparima. Maamina chi mɨ k'aadea chei bada mãra t'ãena bɨmina mãrapa ichi atua p'anɨma. Ichi mɨ k'aepẽra chi atepe bɨ pẽra, ichia jĩrune jɨ̃ bɨ ẽrai k'orea mɨ mãɨ pae pia bɨwẽma.

²⁸ Mãɨyasima ĩjũa Betania p'uuru apataɨmá, Jordán to k'ĩaria Juanpa porochoa badamá.

Jesú, Tachi Ak'õre Oveja Chak'epɨ

²⁹ Mãɨ norema Juanpa Jesú ichimá cheru unuk'ari, ya jarasima: «¡Ak'ɨt'ɨ! Jãɨt'a Tachi Ak'õre oveja chak'epɨ. Ichidepa Tachi Ak'õrepa nãɨ ĩjũanepemarãpa nemietá oopataɨ k'ɨ̃risia atuaipɨ.

³⁰ Ichi k'orea mɨa naena jarasima: “Chi mɨ k'aadea cherut'a mɨ k'aepẽra atepe bɨma, ichi mɨ naena bada pẽra”.

³¹ Naena mɨa Jesú mãɨya bɨt'a atua basima. Maamina mɨa paniapa porochoa bɨma Israel ĩjũanepemarãpa k'awadamẽrá k'ai Tachi Ak'õrepa peedat'a».

³² Mãɨnepa jarasima: «Mɨa unusima Tachi Ak'õre Jaore pajãnepa p'aloma jĩra chek'ari Jesú ɨ̃rɨ beesit'a.

³³ Mɨa ichi atua basima. Maamina mɨa panianepa porochoamẽrá Tachi Ak'õrepa peeside nãɨya jarasima: “Pɨa unuipɨ mɨ Jaore ẽpẽra ɨ̃rɨ chek'ari ichi ome beeit'a. Unurune pɨa k'awaipɨ mãɨpa ichi Jaoredepa porochoaipɨ”.

³⁴ Mɨa mãɨ unusima. Mãɨ k'orea mɨa jara bɨma ichi piarã Tachi Ak'õre Warrapɨ».

Jesú ome p'ɨrrɨapataɨrã chi naapemarã

³⁵ Mãɨ norema Juan chi Porochoaparí mãicha arí basima. Mãɨnepa chi ichi ome p'ɨrrɨapataɨrã ume p'anasidama.

³⁶ Mãɨne Juanpa Jesú ichi k'ait'a wãru unuk'ari jarasima: —¡Ak'ɨt'ɨ! Jãɨ jãma bɨt'a Tachi Ak'õre Oveja Chak'epɨ.

³⁷ Mãɨ ũrinak'ari Juan ome p'ɨrrɨapataɨrã umepema Jesú k'aade wãsidama.

³⁸ Jesupa jĩitea ak'ɨrude ichi k'aade cheutat'a unusima. Mãɨne idisima: —Mãrapa ¿k'ãre k'ɨ̃ria p'anɨma? Ãchia jarasidama: —Rabí, pɨ ¿sãma k'ãi baparima? (Mãɨ pedea Rabí jara bɨma “Jarateaparí”).

³⁹ Jesupa p'anoosima: —Ak'ɨde chet'ɨ. Ara mãɨne wãnak'ari unusidama sãma k'ãi baparit'a. Mãɨ ewaride ichi ome p'aneesidama k'ewara paru pẽra.

⁴⁰ Juanpa jarada ũrinak'ari Jesú k'aade wãnana ume p'anasidama. Aba Simón Pedro chi ũpẽa André pasima.

⁴¹ André Jesumá bak'ari naa ichi ũpẽa Simón jɨrɨde wãsima. Unuk'ari jarasima: —Taipa unusidama Tachi Ak'õrepa Tachi K'aripaparí teai jarada.

⁴² Maapae Andrepa Simón Jesumá ateewãsima. Chedak'ari Jesupa Simonmá ak'ɨk'ari jarasima: —Pɨ Joná warra Simonpɨ, maamina idiipa naa pɨ t'ɨ̃ Cep'a adaima. (Mãɨ t'ɨ̃ Cep'a ichiaba Pedro apatama).

Jesupa P'elipe mãɨnepa Natanael t'ɨ̃na

⁴³ Norema Jesú Galilea tuadea wãi k'ɨ̃risiasima. Mãɨpuru P'elipe unusima. Unuk'ari jarasima: —Mɨa k'ɨ̃ria bɨma pɨ mɨ ome p'ɨrrɨait'a.

⁴⁴ Mãɨ P'elipe Betsaida p'uurudepema pasima. André mãɨnepa Pedro mãmapema pasima.

⁴⁵ Mãɨne P'elipepa Natanael jɨrɨde wãsima. Unuk'ari jarasima: —Taipa chi ẽpẽra k'orea Moisepa bɨdade eda jara bɨt'a unusidama. Tachi Ak'õre pari pedeapataɨrãpa ichi k'orea bɨsidama. José warra, Jesú Nazaredepemapɨ.

⁴⁶ Natanaelpa P'elipea jarasima: —¿Mãɨyara nepia tachi pae Nazaredepa cheik'ãra? P'elipepa jarasima: —Ak'ɨde wãnama.

⁴⁷ Jesupa Natanael ichimá orrobari cheru unuside nãɨya jarasima: —¡Ak'ɨt'ɨ! Nãɨt'a chi piarãpẽa ẽpẽra Israeldepemapɨ. Ichia tachi seak'ama.

⁴⁸ Natanaelpa Jesú unuk'a pada pẽra ichiá idisima: —Pɨa mɨ ¿sãmaasã́ k'awa bɨma? Jesupa p'anoosima: —P'elipepa pɨ jɨrɨde wãi naena mɨa k'awa basima pɨ higo pak'uru ek'ari bɨt'a.

⁴⁹ Mãɨpuru Natanaelpa jarasima: —Jarateaparí, pɨ piarã Tachi Ak'õre Warrapɨ. Pɨ tachi israel ĩjũanepemarã chi poro jũra jɨ̃paripɨ.

⁵⁰ Mãɨne Jesupa jarasima: —Mɨa pɨ higo pak'uru ek'ari bɨ k'awasiade a bɨ pẽra ¿pɨa mãɨya k'ɨ̃risia bɨk'ãra? Mãɨ k'aepẽra ẽpẽerãpa ne p'ue oodak'apɨ́ atepe waibɨa be unuipɨ.

⁵¹ Maapae Jesupa jarasima: —Mɨa piarã jararuma: mãrapa pajã ewa nɨbɨt'a ununaipɨ. Mãɨnepa ununaipɨ Tachi Ak'õrepa ɨt'aripa peedaɨrã mɨ, chi Ẽpẽra Warra bɨmá chedak'ari ya ɨt'aa wãutat'a.