Hecho 9 - Tachi Ak'õre Pedea

Saulopa Jesude ĩjãana

^1-2 Mãɨ ewaride Saulopa wapida chi Tachi Chiparide ĩjãapataɨrã peak'oayade a bapachima. P'aare minachia k'awa bɨmá wãk'ari idisima k'art'a teamẽrá. Mãɨ k'art'a Damasco p'uurude judiorã ará pedeapataɨ techa ateei k'ɨ̃risia basima. K'art'ade bɨ basima ãchi t'ãena Jesú Ode nipada ɨmɨk'ĩrarã mãɨnepa wẽrarã sida jitak'ari Jerusalenea ãarea ateewãi bɨt'a.

³ Mãɨ k'art'a jitak'ari wãsima. Ode Damasco p'uuru k'ait'a paside mãɨya bɨde pajãnepa ichik'á urua jũra jẽrat'ĩusima.

⁴ Mãɨpa Saulo jeeda baepisima. Mãɨne pedea ũrisima. Mãɨ pedeapa jarasima: —Saulo, Saulo, ¿k'ãre k'orea mɨ ẽp'ẽ bɨma?

⁵ Mãɨne Saulopa idisima: —Mɨ chipari, ¿pɨ k'aima? Chi pedeapa p'anoosima: —Mɨ Jesupɨ, chi pɨa ẽp'ẽ bɨpɨ. Chi k'umia bɨmá t'ɨarude, ara pɨchi tuaba p'uaparima.

⁶ P'irabarik'ari Damasco p'uurudea wãse. Jãma jaraipɨ pɨa k'ãre ooi bɨt'a.

⁷ Chi Saulo ome wãuta minachia p'erasidama. Ãchia pedea ũrisidamina abaɨ pida ununaé pasima.

⁸ Saulo ĩjũanepema bai nɨbeek'ari, ya maapae tau uruak'ari, mãɨne ne aba pida unué pasima. Maapae chi ichi ome wãutapa ichi juade jitadak'ari Damasco p'uurudea ateewãsidama.

⁹ Mãma ewari ũpea p'ue unuwẽa basima, nek'owẽa basima mãɨnepa ne towẽa basima.

¹⁰ Damasco p'uurude ẽpẽra Anania apataɨ basima. Mãɨ Ananiapa Jesucristode ĩjãa basima. K'ãmok'araa jĩra ichia unusima Tachi Chiparipa nãɨya jararut'a: —¡Anania! Ichia p'anoosima: —Mɨ nãma bɨma, mɨ Chipari.

¹¹ Tachi Chiparipa jarasima: —P'irabarik'ari Juda tedea wãse. Mãɨ te O Jĩp'a Bɨ apataɨde bɨma. Cherude jarase pɨa ẽpẽra Saulo Tarso p'uurudepema ak'ɨde che bɨt'a. Ara nãɨyana ichia Tachi Ak'õrea ɨt'aa chiidi bɨma.

¹² Ichia k'ãmok'araa jĩra unusima ɨmɨk'ĩra Anania apataɨ ichimá chek'ari ichi ɨ̃rɨ jua bɨrut'a ya mãicha ichi taupa unumẽrá.

¹³ Mãɨne Ananiapa p'anoosima: —Mɨ Chipari, mɨa jãɨ ẽpẽra k'orea ũri bɨma. Minachia jarapatama Jerusalene ichia pɨ ẽpẽerã minachia mĩapi bɨt'a.

¹⁴ Mãɨ awara p'aarerã chi mãɨrã chaarearã t'ɨ̃nepa nãɨ p'uurudea che bɨma pɨde ĩjãapataɨrã jõma jita ateei k'orea.

¹⁵ Maamina Tachi Chiparipa jarasima: —Wãse. Mɨa ichi jɨrɨ atasima mɨ k'orea pedeamẽrá judiorãwẽmá, ãchi poro jũra jɨ̃parí jɨ̃pataɨrã́ mãɨnepa israel ĩjũanepemarã́.

¹⁶ Mɨa ichiá k'awapiipɨ sãmaasã́ mĩai bɨt'a mɨnepema pedeai k'orea.

¹⁷ Ara mãɨne Anania Saulo bɨmá wãsima. Chi tede eda wãk'ari ichi jua Saulo ɨ̃rɨ bɨk'ari jarasima: «Ũpẽa Saulo, Tachi Chipari Jesú chi pɨmá ode unupidapa mɨ chepisima mãicha pɨ taupa unumẽrá mãɨnepa Tachi Ak'õre Jaoredepa beemẽrá».

¹⁸ Ara mãɨne Saulo taudepa beta ek'ama jĩra baedak'ari, mãicha unu beesima. Mãɨne p'irabarik'ari porochoapisima.

¹⁹ Maapae nek'ok'ari k'ak'ua ɨbɨasima. Saulo Damasco p'uurude chi Jesude ĩjãapataɨrã paara ewari k'ak'o tãaraawẽa basima.

Saulo Damasco p'uurude bada

²⁰ Mãɨne judiorã ará pedeapataɨ te p'anɨrãmá wãrune ichia jaratea beesima Jesú piarã Tachi Ak'õre Warra k'orea.

²¹ Ãarea mãɨ ũriutapa k'awa k'ɨ̃risiadaé pasima. Ãchia nãɨya idi tuanasidama: «¿Nãɨwẽk'ãra chi Jerusalene Jesude ĩjãapataɨrã jõpi k'ɨ̃ria badat'a? ¿Nãma che bɨwẽk'ãra ãchi p'aarerã chi mãɨrã chaarearãmá jɨ̃a nɨbɨyá ateewãyá k'ɨ̃ria badat'a?»

²² Maamina Saulopa ewaricha pia k'awapipachima Jesú piarã Tachi Ak'õrepa Tachi K'aripaparí teai jaradat'a. Mãɨpa Damasco p'uurudepema judiorãpa k'awa k'ɨ̃risiadawẽa p'anasima.

Saulo mĩruwãna

²³ Ewari minachia padak'ari judiorã Damasco p'uurudepemarãpa Saulo peadai k'orea pedea ausidama.

²⁴ Mãɨ k'orea ãsã mãɨnepa teamasi chi p'uurude eda wãpataɨmá ot'ea p'anasidama. Maamina ãchia k'ɨ̃risia p'anɨt'a Saulopa k'awasima.

²⁵ Mãɨpuru teamasi Jesude ĩjãapataɨrãpa Saulo jabara nepalade eda bɨdak'ari maapae chi p'uuru ik'idá jũk'a bɨ uriade ɨ̃rɨpa edá jira peesidama. Mãɨya mĩruwãsima.

Saulo Jerusalenea wãna

²⁶ Saulo jĩitea Jerusalenea wãside chi Jesude ĩjãapataɨrã ome bee k'ɨ̃ria basima. Maamina ichi wap'ea p'anasidama. Ãchia ĩjãanawẽa p'anasidama ichia piarã Jesude ĩjãa bɨt'a.

²⁷ Maamina Bernabepa Saulo ateewãsima Jesupa peedaɨrãmá. Maapae ichia nepɨrɨsima sãmaasã́ Saulopa Tachi Chipari ode unusit'a, Tachi Chipari ichi ome pedeadat'a mãɨnepa sãmaasã́ Saulopa Damasco p'uurude Jesú k'orea ne wap'eawẽa pedeapachit'a.

²⁸ Mãɨya Saulo ãchi ome beesima. Mãɨne Jerusalene Tachi Chipari Jesú k'orea ne wap'eawẽa pedea nipapachima.

²⁹ Judiorã chi griego pedeade pedeapataɨrã ome Jesú k'orea pedeapachima maamina ichi pea k'ɨ̃ria p'anasidama.

³⁰ Ũpẽarãpa mãɨ k'awasidaɨde Saulo Cesarea p'uurudea ateewãsidama. Mãmãɨpa ichi p'uuru Tarsodea peesidama.

³¹ Mãɨmisa Judea tuade, Galilea tuade mãɨnepa Samaria tuade ũpẽarã nek'ĩramariwẽa tuanasidama mãɨnepa ne minachia k'awapodosidama. Tachi Chipari wap'ea p'anɨnepa nipasidama mãɨnepa Tachi Ak'õre Jaore chi jua chaareadepa waripodosidama.

Ẽpẽra Enea apataɨ jɨpa beeda

³² Mãɨ ewaride Pedro chi Tachi Ak'õreneerã ak'ɨde wãpachima mãɨ tua ãarea. Mãɨne ũpẽarã Lida p'uurude berã ak'ɨde wãsima.

³³ Mãma ẽpẽra Enea apataɨ unusima. Mãɨ ẽpẽra sorek'ea bɨ pẽra ocho ãyo k'ɨdade basima.

³⁴ Mãɨne Pedropa jarasima: —Enea, Jesucristopa pɨ jɨpa beepisima. ¡P'it'ɨk'ari, pɨchi k'ɨda jitase! Ara mãɨne Enea p'it'ɨsima.

³⁵ Lida p'uurudepemarã mãɨnepa Sarón ĩjũanepemarã ãareaɨrãpa Enea jɨpa beepida ununak'ari Tachi Chiparide ĩjãasidama.

Dorca chok'ae p'irabarida

³⁶ Mãɨ ewaride Jesude ĩjãa bɨ wẽra Tabita apataɨ Jope p'uurude basima. Griego pedeade ichi t'ɨ̃ Dorca apachidama. Mãɨ ũpẽawẽrapa nepia be oo bapachima. Chi nenea k'ede minachia k'aripapachima.

³⁷ Ewariaba Dorca k'ɨdade bak'ari k'ĩrawẽasima. Maapae chi k'ak'ua sɨɨdak'ari chi te ɨt'aride aba k'ãipataɨmá bɨsidama.

³⁸ Jope p'uuru Lida k'ait'a basima. Chi Jesude ĩjãapataɨrãpa ũrisidama Pedro Lidade bɨt'a. Mãɨpuru ẽpẽra ume ichimá peesidama nãɨya chichupuria ididamẽrá: «Taimá isapea chese».

³⁹ Ara mãɨne Pedro ãchi ome wãsima. Chesidaɨde ichi chi te ɨt'aride aba k'ãipataɨmá ateewãsidama. Mãma p'ẽtãarã ãarea jẽa tuanasidama. Ãchia Pedroa chi Dorcapa p'aru k'osak'oa bada ak'ɨpisidama.

⁴⁰ Mãɨne Pedropa ãareaɨrã tajatá wãpisima. Sĩraporode k'obeek'ari Tachi Ak'õrea ɨt'aa chiidisima Dorca chok'ae p'irabaripimẽrá. Ɨt'aa chiidik'ari chi piudamá ak'ɨrude jarasima: —Tabita ¡p'irabarise! Ara mãɨne ichi tau uruasima. Pedro unuk'ari suak'abari beesima.

⁴¹ Pedropa ichi juade jitak'ari bai nɨbeepisima. Maapae ũpẽarã mãɨnepa p'ẽtãarã t'ɨ̃k'oak'ari Dorca chok'ae p'irabarida ak'ɨpisima.

⁴² Ãarea Jope p'uurude mãɨ k'orea k'awasidama. Mãɨya minachia p'anɨrãpa Tachi Chiparide ĩjãasidama.

⁴³ Maapae Pedro Jope p'uurude tãaraasima ẽpẽra Simón apataɨmá. Mãɨ Simonpa ãnimara e p'oapiparí pasima.