Hecho 6 - Tachi Ak'õre Pedea

Ũpẽarã k'aripapataɨrã siete p'anɨ jɨrɨ atadada

¹ Mãɨ ewaride chi Jesude ĩjãapataɨrã minachia waripodosidama. Mãɨne chi judiorã griego pedeade pedeapataɨrãpa chi hebreo pedeade pedeapataɨrã k'orea k'ĩruu pedea p'aneesidama. Jarasidama ũpẽarãpa p'ẽtãarã ewaricha chik'o jedautade ãchi p'ẽtãarã k'aripadak'a pasit'a.

² Mãɨ k'orea Jesupa peedaɨrã doce p'anɨpa Jesude ĩjãapataɨrã ãarea ará jeredak'ari nãɨya jarasidama: —Pia bɨwẽma taipa Tachi Ak'õre pedea jaratea p'anɨ itu bɨdait'a, mãɨ p'ẽtã́ k'aripadai k'orea.

³ Mãɨpuru ũpẽarã, mãranepema siete ẽpẽerã jĩp'a be jɨrɨ atat'ɨ. Ãchi Tachi Ak'õre Jaore minachia uru p'ananai p'anɨma mãɨnepa k'ɨ̃risia minachia p'ananai p'anɨma. Mãɨrã taipa bɨdaipɨ p'ẽtãarã mãɨnepa waapẽarã k'aripadamẽrá.

⁴ Mãɨya taipa p'ue pia Tachi Ak'õrea ɨt'aa chiidi p'ananaipɨ mãɨnepa ichi pedea jara p'ananaipɨ.

⁵ Ãchia jaradada ãareaɨrãpa pia ũrisidama. Mãɨpuru Esteban jɨrɨ atasidama. Mãɨ Estebanpa Jesude minachia ĩjãa basima; Tachi Ak'õre Jaore minachia uru basima. Ichi awara P'elipe, Procoro, Nicanor, Timón, P'armena, mãɨnepa Nicolá Antioquía p'uurudepema jɨrɨ atasidama. Mãɨ Nicolá griego pasima maamina judio jĩra bapachima.

⁶ Mãɨrã chi Jesupa peedaɨrãmá ateesidama. Maapae Tachi Ak'õrea ɨt'aa chiidiutade ãchi jua abaɨ ɨ̃rɨ bɨsidama.

⁷ Mãɨne ũpẽarãpa Tachi Ak'õre pedea minachia pedeapachidama. Mãɨya chi Jesude ĩjãapataɨrã Jerusalene atepe waripodosidama. Mãɨ awara minachia p'aarerã pida ĩjãasidama.

Esteban judiorã chõarãmá ateewãnana

⁸ Tachi Ak'õrepa ichi sõpiadepa Esteban minachia k'aripa basima. Ichi jua chaareapisima ẽpẽerãpa ne p'ue oodak'apɨ́ waibɨa ẽpẽerã t'ãena oo bamẽrá.

⁹ Mãɨne waapẽarã judiorã Cirene tuadepema mãɨnepa Alejandría p'uurudepema p'anasidama. Chi judiorã ará pedeapataɨ te “Chi Ãjã́ Pari P'anɨrã” apachidama. Waapẽarã judiorã Cilicia ĩjũanepema mãɨnepa Asia ĩjũanepema p'anasidama. Ãarea mãɨ judiorã Esteban ome k'ĩruu pedea tuaneesidama.

¹⁰ Maamina ãchia Esteban p'uedaé pasima, ichi Tachi Ak'õre Jaore k'ɨ̃risiadepa pedeapachi pẽra.

¹¹ Mãɨpuru ãchia waapẽarã ẽpẽerã́ erreara teasidama nãɨya sea jaradamẽrá: «Taipa ũrisidama jãɨ ẽpẽrapa Moisé k'orea mãɨnepa Tachi Ak'õre k'orea k'achia pedea bɨt'a».

¹² Mãɨya ãchia chi p'uurudepemarã, judiorã chi chõarã mãɨnepa judiorã Moisepa bɨda jarateapataɨrã k'ĩruupik'apisidama. Mãɨpuru Esteban jitadak'ari judiorã chi chõarã posoa ará p'anɨmá ateewãsidama.

¹³ Mãɨne sea jaradamẽrá waapẽarã ẽpẽra mãmá ateesidama. Mãɨrãpa nãɨya jarasidama: «Jãɨ ẽpẽrapa Tachi Ak'õre te minachia bɨ k'orea mãɨnepa Moisepa bɨda k'orea k'achia pedea baparima.

¹⁴ Ichia jarasima Jesú Nazaredepemapa Tachi Ak'õre te minachia bɨ ãriit'a mãɨnepa Moisepa jaratea bada k'ĩra awara ooit'a. Ichia mãɨya pedea bɨt'a taipa ũrisidama».

¹⁵ Ãarea chi chõarã mãma suak'abari p'anɨrãpa chi Esteban ak'ɨutade unusidama ichi k'ĩra Tachi Ak'õrepa ɨt'aripa peeda k'ĩtarra jĩra bɨt'a.