Hecho 3 - Tachi Ak'õre Pedea

Pedropa ẽpẽra sĩta bak'ea bada jɨpada

¹ Ewariaba ɨmata baarea judiorãpa Tachi Ak'õrea ɨt'aa chiidipataɨ horade, Pedro mãɨnepa Juan Tachi Ak'õre te minachia bɨdea wãsidama.

² Mãɨne Tachi Ak'õre te minachia bɨde eda wãpataɨ Pia K'ɨrɨ apataɨk'á ẽpẽra bɨɨrɨ sorek'ea bɨt'a mãɨ t'õnaenapema pasima. Ẽpẽerãpa ichi ewaricha mãmá ateewãpachidama chi eda wãutarã́ erreara idimẽrá.

³ Ichia Pedro mãɨnepa Juan eda wãuta unuside erreara ãchiá idisima.

⁴ Pedro mãɨnepa Juanpa ichimá ak'ɨsidama. Mãɨne Pedropa jarasima: —Taimá ak'ɨse.

⁵ Ichiá ne teadai k'ɨ̃risiada pẽra ãchimá ak'ɨsima.

⁶ Maamina Pedropa jarasima: —Mɨa erreara wa nee newẽma, maamina chi mɨa uru bɨt'a pɨá teaipɨ: ¡Jesucristo Nazaredepema t'ɨ̃nepa p'irabarik'ari pɨ nipade wãse!

⁷ Mãɨne Pedropa chi ẽpẽra juaraari jitak'ari p'irabaripisima. Ara mãɨne chi ẽpẽra jĩru mãɨnepa jĩru k'ooro ɨbɨa beesima.

⁸ Ara mãɨne ɨt'ɨ jĩitɨk'ari ya p'ɨrrɨa beesima. Jĩitɨ nineepa ya Tachi Ak'õrea pia pedea nineepa, ãchi ome Tachi Ak'õre te minachia bɨde eda wãsima.

⁹ Ãareaɨrãpa ichi wãrune Tachi Ak'õrea pia pedea bɨt'a unusidaɨde,

¹⁰ k'awasidama ara ichi ewaricha Tachi Ak'õre te minachia bɨde eda wãpataɨ Pia K'ɨrɨ apataɨmá erreara idi suak'abari bapachit'a. Mãɨ unusidaɨde, ak'ɨɨtua para beesima mãɨnepa k'awa k'ɨ̃risiadaé pasima.

Pedropa Tachi Ak'õre te eda jarateada

¹¹ Ẽpẽra bɨɨrɨ sorek'ea badapa Pedro mãɨnepa Juan k'ẽet'awẽa ãchi ome basima. Ãchi Tachi Ak'õre te ãpɨtea p'ɨrrɨapataɨde p'anasidama. Mãɨ Salomoneane apatama. Ãareaɨrãpa k'awa k'ɨ̃risiadawẽa p'anɨ pẽra ãchimá p'ira wãsidama.

¹² Pedropa mãɨ unuside jarasima: «Israeldepemarã, ¿k'ãre k'orea k'awa k'ɨ̃risiadawẽa p'anɨma? ¿K'ãre k'orea tai ak'ɨ p'anɨma? ¿K'ɨ̃risia p'anɨk'ãra ara tai jua chaareadepa wa tai Tachi Ak'õre k'ĩrari jĩp'a p'anɨ pẽra nãɨ ẽpẽra jɨpa beepisidat'a? ¡Mãɨyawẽma!

¹³ Chi Abrahán Pajãnepema Ak'õre, Isá Pajãnepema Ak'õre, Jacobo Pajãnepema Ak'õre mãɨnepa ãarea tachi chõarãenapemarã Pajãnepema Ak'õre, mãɨpa chi ichi pae pari mimiaparí Jesú chi atepe bɨ bɨsima. Ara mãɨ Jesut'a mãrapa Pilatoa teasidama, peamẽrá. Pilatopa mãɨ ãjã́ pari bɨ k'ɨ̃ria badamina mãrapa ichi taade ichi ietasidama.

¹⁴ Mãrapa Tachi Ak'õre Pae pari mimiaparí Jĩp'a Bɨt'a k'aripadawẽa itu bɨdak'ari idi p'anasidama Pilatopa mĩa peaparí Barrabat'u ãjã́ pari bɨmẽrá.

¹⁵ Mãɨya mãrapa chi tachi Chok'ae Bapiparí peasidama. Maamina Tachi Ak'õrepa ichi piu bada chok'ae p'irabaripisima. Mãɨ chok'ae p'irabaridat'a taipa unusidama.

¹⁶ Ara mãɨ Jesú jua chaareadepa nãɨ ẽpẽra, chi mãrapa unu p'anɨt'a, nãɨ jɨpa beesima. Taipa ĩjãa p'anɨma Jesupa chi k'ɨdade be jɨpa beepiparit'a. Mãɨya ĩjãa p'anɨnepa nãɨ ẽpẽra piarã jɨpa beesima, mãɨ ara machia k'awa p'anɨ jĩra.

¹⁷ »Mɨ ũpẽarã judiorã, mɨa k'awa bɨma mãrapa mãɨnepa mãra minachia k'awa p'anɨrãpa Jesú peasidama ichi chi Tachi Ak'õrepa Tachi K'aripaparí teai jarada k'awadaé pasi pẽra.

¹⁸ Maamina mãɨneepuru Tachi Ak'õrepa naena jarada ãarea mãɨyapisima. Chi ichi pari pedeapataɨrãnepa jarasima ichia Tachi K'aripaparí teai jarada minachia mĩak'ari piuit'a.

¹⁹ Chi mãrapa nemietá oodada itu bɨdak'ari Tachi Ak'õremá chet'ɨ. Mãɨya oosidara Tachi Chiparipa mãrapa nemietá oodaadat'a k'ɨ̃risia atuak'ari sõpiapiipɨ.

²⁰ Mãɨya ichia chi tachi k'aripaparí teai jarada mãramá peeruma, ichia naena jara bada jĩra. Mãɨ Jesupɨ.

²¹ Nãɨena Jesucristo pajãne bɨma aba Tachi Ak'õrepa ne ãarea mãicha pia oorudea. Tachi Ak'õrepa chõarãenapema ewaride chi ichi pari pedeapataɨrãnepa piarã mãɨya ooyade a basima.

²² »Moisepa tachi chõarãenapemarã́ nãɨya jarasima: “Tachi Ak'õre, machi Chiparipa mɨ peeda jĩra, chi ichi pari pedeaparí aba mãramá peeipɨ. Mãɨ ẽpẽra ara mãra p'uurudepema paipɨ. Ichia jararut'a ãarea ĩjãat'ɨ.

²³ Ichia jara bɨt'a abaɨ pida ĩjãaepɨra, mãɨ ẽpẽra ichi p'uuru awara piu baipɨ”.

²⁴ Mãɨ awara Samuel ewaridepa ãarea Tachi Ak'õre pari pedeapataɨrãpa nãɨ ewari k'orea pedeasidama.

²⁵ Tachi Ak'õrepa ãchidepa pedeada ɨt'aa chiidi piarã unu p'anɨma. »Mãɨ awara Tachi Ak'õrepa mãra chõarãenapemarã ome pedea ausima. Ichia Abrahaná nãɨya jarasima: “Mɨa pɨdepa unurunepa nãɨ ĩjũane be p'uuru ãarea k'aripaipɨ”. Mãɨ pedea auda mãrapa idi piarã unu p'anɨma.

²⁶ Tachi Ak'õrepa chi ichi pae pari mimiaparí Jesú chok'ae p'irabarik'ari naa mãramá peesima k'aripamẽrá. Machicha k'aripa bɨma mãrapa nemietá oopataɨ itu bɨdamẽrá».