Hecho 28 - Tachi Ak'õre Pedea

Malta ĩjũa p'ɨrra bɨde tuanana

¹ Tuá chedak'ari taipa k'awasidama mãɨ ĩjũa p'ɨrra bɨ Malta apataɨt'a.

² Chi mãmapemarã tai ome minachia sõpia p'anasidama. K'oe che nɨbɨ pẽra mãɨnepa k'õresã́ nɨbɨ pẽra ãchia t'ɨpɨ uruapidak'ari taiyá jarasidama t'ɨpɨ k'ãne chedamẽrá.

³ Pablopa pak'uru jua jɨrɨ p'ek'oak'ari t'ɨpɨ uruadea bat'a basima. Mãɨne chi wãsiapa taama ochiak'ari Pablo juade k'aa jira beesima.

⁴ Mãɨ taamapa Pablo juade k'aa jira bɨt'a unusidaɨde chi mãɨ ĩjũa p'ɨrra bɨdepemarãpa ara ãchi tuaba jara tuaneesidama: «¡Jãɨ ẽpẽra mĩa peaparipɨ! P'usadepema piuwẽa chok'ae beesimina tachi sãdo wẽrapa ichi itu chok'ae bapiiwẽma».

⁵ Mãɨne Pablopa taama t'ɨpɨdea jĩnap'et'at'aasima, mãɨne ichi ne baé pasima.

⁶ Ãareaɨrãpa ak'ɨ tuanasidama Pablo ooroi k'awadayá wa mãɨya bɨde piui k'awadayá, maamina mãɨya tãaraa ak'ɨ p'anɨne Pablo mi ãpia pida piawẽa beé pasima. Mãɨpuru ãchia k'ɨ̃risia awara k'ɨ̃risiadak'ari Pablo ak'õre minachia k'awa bɨade a jarasidama.

⁷ Mãɨ ĩjũa p'ɨrra bɨde chi poro chaarea bɨ Publio apachidama. Mãɨ Publiopa tai p'anɨ k'ait'a ĩjũat'a uru basima. Ichia tai ichi tede ewari k'ak'o ũpea sõpia k'ãipisima.

⁸ Mãɨya p'anɨne Publio ak'õre amisuk'ari, k'ɨa nɨbeek'ari, k'ɨdade basima. Mãɨneepuru Pablopa ak'ɨde wãk'ari, ɨt'aa chiidik'ari mãɨne ichi jua ɨ̃rɨ bɨsima. Mãɨne jɨpa beepisima.

⁹ Mãɨpuru waapẽarã k'ɨdade be chedak'ari Pablopa jɨpa beepisima.

¹⁰ Mãɨ ẽpẽerãpa tai chi minachia k'awa p'anɨrã jĩra pia oosidama. Mãicha p'ãp'orrode batoosidaɨde chi taipa ne newẽa p'ananat'a ãchia ãarea teasidama.

Romanea chedada

¹¹ Jedek'o k'ak'o ũpea padak'ari, p'ãp'orro Alejandría p'uurudepemane batoosidama. Mãɨ p'ãp'orro mãɨ ĩjũa p'ɨrra bɨde basima ewari ewãra pẽra. Chi p'ãp'orro k'ũne ãchi sãdo be ume uru basima: aba Cástor apatama, chi abaɨ Polu apatama.

¹² Siracusa p'uurudea padak'ari, ewari k'ak'o ũpea mãma p'anasidama.

¹³ Mãmãɨpa p'usa ik'idá k'ait'a wãutade Regio p'uurude pasidama. Norema wãutade nãu ãpɨte p'õat'ɨ nɨbɨ pẽra mãɨ norema Puteoli p'uurude chesidama.

¹⁴ Mãma taipa chi eda waapẽarã ũpẽarã unusidama. Ãchia taiyá jarasidama ãchi ome tomio aba p'ananamẽrá. Mãmãɨpa Roma p'uurudea pasidama.

¹⁵ Ũpẽarã Romanepemarãpa tai wãuta ũrisidaɨde pia pedeade chesidama. Waapẽarã Apio p'uurudea chesidama mãɨnepa waapẽarã Tres Taberna p'uurudea chesidama. Pablopa ãchi unuside Tachi Ak'õrea pia pedeak'ari, ãchi k'orea arapá beesima.

¹⁶ Roma p'uurudea chedak'ari papaká berã chi mãɨrã chaarea bɨpa chi jɨ̃a nɨp'anɨrã chi mãmapema chaarea bɨa juade teasima, maamina Pablo tuaba te awara bɨde itu beepisima. Papaká bɨ aba bɨsima ichi ot'ea bamẽrá.

Pablopa Romane be judiorã́ jarada

¹⁷ Ewari ũpea padak'ari Pablopa Romanepema judiorã chi atepe berã t'ɨ̃pisima. Ãarea ará p'anasidaɨde Pablopa jarasima: —Ũpẽarã, mɨ mi ãpia pida tachi judiorã́ piawẽa oowẽa basimina, mãɨnepa tachi chõarãenapemarãpa oopataɨ k'orea piawẽa pedeawẽa basimina, mɨ Jerusalene eda jɨ̃a nɨbɨdak'ari maapae romanepemarã juade bɨsidama.

¹⁸ Romanepemarãpa mɨá minachia idisidaɨde mɨ nepɨra newẽa unusidama, mɨ peadai k'orea. Mãɨne mɨ ãjã́ bɨdayá p'anasidama.

¹⁹ Maamina judiorãpa mãɨya k'ɨ̃rianaé pasi pẽra, mɨa idisima chi Romanepema chi atepe poro chaarea bɨa mɨ nepɨra ak'ɨmẽrá. Mãɨya ooé pasima ara mɨ p'uurudepemarã nepɨra p'anɨane a jara k'ɨ̃ria bada pẽra.

²⁰ Mãɨpuru mɨa mãra unu k'ɨ̃ria basima mãra ome pedeai k'orea. Tachi Ak'õrepa Tachi K'aripaparí teai jarada ãarea israel ĩjũanepemarãpa nɨ p'anɨma. Ichi k'orea mɨ nãɨya k'ãnenapa jɨ̃ bɨma.

²¹ Mãɨne ãchia jarasidama: —Judeadepemarãpa taiyá pɨ k'orea k'art'a tea peedawẽa p'anɨma. Tachi ũpẽarã judiorã abaɨ pida jãmãɨpa chewẽa bɨma pɨ k'orea k'achia pedeai k'orea.

²² Maamina taipa k'awa p'anɨma ãarea tuacha jãɨ k'ɨ̃risia chiwidi k'orea piawẽa pedea p'anɨt'a. Mãɨpuru ũri k'ɨ̃ria p'anɨma pɨa sãmaasã́ k'ɨ̃risia bɨt'a.

²³ Mãɨne ãchia ewari aba bɨsidama. Mãɨ ewari cheside ẽpẽerã minachia Pablo bɨmá cheepɨrɨsidama. Tap'ededa waa k'ewara Pablopa pedea basima Tachi Ak'õrepa ichidirã ichi juade ua bɨ k'orea. Moisepa bɨdadepa mãɨnepa Tachi Ak'õre pari pedeapataɨrãpa bɨdaadadepa jaratea basima Jesude ĩjãanamẽrá.

²⁴ Pablopa jarada chi eda waapẽarãpa ĩjãasidama, maamina waapẽarãpa ĩjãanaé pasima.

²⁵ Mãɨpuru k'ĩruu pedeadak'ari wãnai k'orea k'ɨ̃risiasidama. Mãɨne Pablopa nãɨya jarasima: —Tachi Ak'õre Jaorepa mãra chõarãenapemarã́ piarã pedea Tachi Ak'õre pari pedeaparí Isaíadepa nãɨya jarasima:

²⁶ “Nãɨ p'uurua nãɨya jarade wãse: Mãrapa ũri p'anɨmina k'awadaiwẽma. Minachia unu p'anɨmina k'awadaiwẽma.

²⁷ Ãchia sõnepa p'ue k'awadawẽma, k'ɨɨrɨdepa ũri k'ɨ̃rianawẽma mãɨnepa taudepa unu k'ɨ̃rianawẽma. Mãɨya bedaépara ãchia ununai pasima, ũrinai pasima mãɨnepa sõnepa k'awadai pasima. Maapae mɨne ĩjãanak'ari mɨa ãchi jɨpa beepii pasima”.

²⁸ »Nãɨ k'awat'ɨ: Tachi Ak'õrepa tachi k'aripai jara bɨt'a judiorãwẽmá peesima. Ãchia mãɨ pia ũrinaipɨ.

²⁹ Pablopa mãɨya jaraside judiorã ãchi tuaba k'ĩruu pedea p'anɨ ãyá wãsidama.

³⁰ Mãɨya nak'ari Pablo ãyo k'ak'o ume mãma te aba bɨde beesima. Mãɨ te chiparia erreara teapachima mãma bai k'orea. Chi ichi ak'ɨde wãutarã́ ãarea pia pedeapachima.

³¹ Ichia wap'eawẽa pedeapachima Tachi Chipari Jesucristodepa Tachi Ak'õrepa ichidirã ichi juade ua bɨ k'orea. Mãɨne abaɨ pida ichiá ne mãɨya oorãpade a jarak'a pasima.