Hecho 27 - Tachi Ak'õre Pedea

Pablo Roma p'uurudea wãna

¹ Mãɨ ewaride chi poro chaarea bɨpa tai Italia tuadea wãnai p'anɨane a jarak'ari, Pablo mãɨnepa chi eda waapẽarã jɨ̃a nɨp'anana, mãɨrã Julio juade bɨsima. Mãɨ Julio papaká berã chi Augusto apataɨdepema chi mãɨrã chaarea pasima.

² Maapae tai p'ãp'orro Adramitio p'uurudepemane batoodak'ari wãsidama. Mãɨ p'ãp'orro Asia tuade p'uurucha wãru pasima. Ũpẽa Aristarco Macedonia tuadepema tai ome wãsima. Ichi Tesalónica p'uurudepema pasima.

³ Norema Sidón p'uurude pasidama. Mãɨne Juliopa sõpiadepa Pablo ichi ũpẽarã jĩra p'anɨmá itu wãpisima ichi ne newẽa bɨt'a mãɨ teadamẽrá.

⁴ Maapae Sidonepa wãnak'ari Chipre ĩjũa p'ɨrra bɨ k'ait'a wãsidama, chi nãupa p'ãp'orro k'ĩramá jãrap'ua nɨbasidepa.

⁵ Cilicia tua k'ĩrari mãɨnepa Panp'ília k'ĩrari p'usade wãnak'ari Liciadepema Mira p'uurudea chesidama.

⁶ Mãma papaká berã chi mãɨrã chaarea bɨpa awara p'ãp'orro Alejandría p'uurudepema unusima. Mãɨ p'ãp'orro Italia tuadea wãru pasima. Tai ichi ome mãɨ p'ãp'orrode batoodak'ari wãsidama.

⁷ Ewari minachia pa bɨde pik'ã́ wãsidama nãu k'ĩramá p'õat'ɨ nɨbada pẽra. Chi t'aju basima Gnido k'ĩrari padai k'orea. Wapida nãu minachia p'õat'ɨ nɨbɨ pẽra Creta ĩjũa p'ɨrra bɨ ik'idá wãsidama Salmona k'ĩrari.

⁸ P'usa ik'idá mĩa wãpodosidaɨde Lasea p'uuru k'ait'a Bueno Puerto apataɨmá pasidama.

⁹ Minachia tãaraauta pẽra judiorã Tachi Ak'õrene k'ɨ̃risiadayá nek'odak'apɨ́ ewari wãyá pa basima. Mãɨ ewaridepa p'usade wãi k'achia bapachima. Mãɨpuru Pablopa chi poro chaarea p'anɨrã́ jarasima waa wãpidaemaapa.

¹⁰ Nãɨya jarasima: «Poro chaarearã, mɨa k'awa bɨma tachi waa wãnaipɨra k'achiade wãnait'a. P'ãp'orro ãriipɨ, chi mãrapa ateewãuta neet'á ãarea atuadaipɨ, mãɨnepa tachi sida piudaipɨ».

¹¹ Maamina papaká berã chi mãɨrã chaarea bɨpa Pablo pedea ũrié pasima. Mãɨyawẽapuru chi p'ãp'orro ateewãparí mãɨnepa chi p'ãp'orro chipari pedeat'u ĩjãasima.

¹² Mãɨ p'ãp'orro jɨ̃pataɨmá piawẽa basima, mãɨ ewari ewãra nɨbɨde mãma nɨnai k'orea. Mãɨpuru chi ẽpẽerã minachia p'anɨrãmá pia basima P'enice p'uurudea wãnait'a mãma chi ewari ewãra nɨbɨt'a nɨnai k'orea. Mãɨ p'uuru sida Creta ĩjũa p'ɨrra bɨde bɨma. Mãmãɨpa unupachidama k'ĩraripema estarik'a mãɨnepa ãpɨteapema estarik'a.

Nãu minachia che nɨbɨpa p'ãp'orro ãyá ateewãna

¹³ Mãɨne nãu ãpɨtepa pik'ã́ p'õat'ɨ nɨbeek'ari, pia wãnai k'ɨ̃risiasidama. Chi jiorro p'ãp'orro jõe uru nɨbeeparí ɨt'aa jiradak'ari Creta ĩjũa p'ɨrra bɨ ik'idá wãsidama.

¹⁴ Maamina tãaraawẽane nãu minachia Euroclidó apataɨ chi ĩjũa p'ɨrra bɨdepa minachia p'õat'ɨ nɨbeesima.

¹⁵ Mãɨpa chi p'ãp'orro ãyá ateewãsima. Chi p'ãp'orro k'ũ p'ue ará jĩp'a bɨdawẽ pẽra nãua itu ateepisidama.

¹⁶ Ĩjũa ãpia p'ɨrra bɨ Clauda apataɨ ãpɨte wãsidaɨde mãɨne nãu ɨbɨa p'õat'ɨwẽa beesima. Mãɨne chi japa ãpia bɨt'a toeda jɨ̃ nɨbada p'ãp'orrode ɨt'aa jirasidama, maamina chi t'aju basima.

¹⁷ Mãɨ chi japa ãpia bɨt'a eda bɨdak'ari, chi p'ãp'orro jɨ̃k'arapa ãarea pia pɨra jɨ̃sidama, ãripidaemaapa. Mãɨne wap'ea p'anasidama ipu Sirte ɨ̃rɨ p'aneenait'a. Mãɨpuru p'ãp'orrode p'aru ɨt'ɨ jira bɨpataɨ edá bɨdak'ari itu nãua ateepisidama.

¹⁸ Norema nãu wapida minachia p'õat'ɨ nɨbasima. Mãɨpuru chi p'ãp'orrode mimiapataɨrãpa neet'á ateewãutat'a toedá amaak'oasidama p'ãp'orro wẽsã́ beemẽrá.

¹⁹ Nãu wapida minachia p'õat'ɨ nɨbɨ pẽra, ewari ũpeaɨde ara ãchi juapa chi p'ãp'orrodepema chi ne chɨk'ɨa berã toedá amaak'oasidama.

²⁰ Mãɨya p'anɨne ewari minachia ɨmata mãɨnepa k'ãk'ãi ununawẽa p'anasidama. Mãɨ iu mietá wapida che bɨẽra waa p'ananai k'ɨ̃risiadaé pasima.

²¹ Ewari k'ak'o minachia tai nek'odawẽa p'anasima. Mãɨpuru Pablo ãarea t'ãena bai nɨbeek'ari jarasima: —Ẽpẽerã, mɨa mãrá jarasima Creta ĩjũa p'ɨrra bɨdepa wãpidaemaapa. Mɨ pedea ĩjãananaapara nãɨ nepɨrade p'ananaiwẽ pasima mãɨnepa ne atuadaiwẽ pasima.

²² Maamina ne minachia k'ɨ̃risiarãt'ɨ. Nãɨ p'ãp'orro ãarea ãriimina aba pida piudaiwẽma.

²³ Mɨ Tachi Ak'õrenepɨ. Ichide ĩjãa bɨma. Teamasi chi ichia ɨt'aripa peeda mɨk'á bai nɨbeek'ari,

²⁴ mɨá jarasima: “Ne wap'earãse, Pablo. Pɨ Romanepema chi atepe poro chaarea bɨ k'ĩrari pedeai bɨma. Pɨ k'orea Tachi Ak'õrepa ãareaɨrã nãɨ p'ãp'orrode wãutat'a itu piupiiwẽma”.

²⁵ Mãɨpuru, ẽpẽerã, sõpia p'anat'ɨ. Mɨa ĩjãa bɨma Tachi Ak'õrepa ooit'a, chi ɨt'aripa peedapa mɨá jarada jĩra.

²⁶ Maamina paritua ĩjũa p'ɨrra bɨde mãɨ ipude wãnai p'anɨma».

P'ãp'orro ãrina

²⁷ Tomio ume parude Adriático p'usade ũu wãsidama. Mãɨ ewate teamasi estarik'a chi p'ãp'orrode mimiapataɨrãpa k'ɨ̃risiasidama ĩjũa k'ait'a pa p'anɨt'a.

²⁸ Jɨ̃k'aradepa chi p'usa edá chaasidaɨde juachama veinte basima. Wawá wãutade mãicha chaasidama. Mãɨne juachama quince basima.

²⁹ P'ẽyamá t'ĩunai wap'ea p'anɨ pẽra, chi p'ãp'orro ãtaudepa jiorro jõe uru nɨbeeparí k'ĩmari edá t'aa peesidama. Maapae minachia wap'ea p'anɨpa ɨt'aa chiidi p'anasidama isapea ãsã papidai k'orea.

³⁰ Mãɨya p'anɨne p'ãp'orrode mimiapataɨrã p'ãp'orrodepa mĩruwãnai k'ɨ̃risiasidama. Mãɨpuru chi japa ãpia bɨt'a edá jirapodosidama chi k'ũne jiorro p'ãp'orro jõe uru nɨbeeparí edá jira peedai mãɨya k'ɨ̃risiapidai k'orea.

³¹ Maamina Pablopa papaká berã chi mãɨrã chaarea bɨa mãɨnepa chi ichidí papaká berã́ jarasima: «Jãɨrã p'ãp'orrode p'aneenaepɨra mãra p'ue k'aripadaiwẽma».

³² Mãɨpuru papaká berãpa japa jɨ̃ bɨ jɨ̃k'ara t'ɨa k'õnak'ari p'usadea edá baepisidama.

³³ Ãsã papodode Pablopa ãareaɨrã́ nek'odamẽrá jarasima: «Tachi sãit'a atua p'anɨ pẽra tomio ume mãra nek'odawẽa p'anɨma.

³⁴ Mɨa chichupuria idiruma nek'odamẽrá. Mãɨya k'ak'ua chaarea p'aneenaipɨ pia choadai k'orea. Aba pida piuiwẽma».

³⁵ Mãɨya jarak'ari Pablopa p'ana juade atak'ari ãareaɨrã k'ĩrari Tachi Ak'õrea sõpia bɨade asima. Maapae p'ana t'oet'aak'oak'ari k'osima.

³⁶ Mãɨ unuutade ãareaɨrã sõpia p'aneenak'ari nek'osidama.

³⁷ Tai p'ãp'orrode ẽpẽerã 276 p'anasidama.

³⁸ Ãchi jãwaanak'ari trigo p'usade bat'a peek'oasidama p'ãp'orro wẽsãamẽrá.

³⁹ Ãsã paside ãchia ĩjũa unusidama maamina k'awadaé pasima sãma p'anɨt'a. Mãɨ ĩjũane senia jĩra to ik'idá ununak'ari, k'ɨ̃risiasidama p'uedaipɨra, chi p'ãp'orro mãɨ ipu ik'idá bari ũu bɨdait'a.

⁴⁰ Mãɨpuru chi jiorro p'ãp'orro jõe uru nɨbeeparí jɨ̃k'ara t'ɨak'õk'oadak'ari p'usade t'aa peesidama. Mãɨnepa chi p'ãp'orrode juadepa pɨrabari ateewãparí jɨ̃ bada ẽrasidama. Maapae chi k'ũne p'aru ɨt'ɨ jira bɨpataɨ ɨt'aa jirasidama nãupa ipudea ateewãmẽrá.

⁴¹ Maamina ik'idá pai naena, chi p'ãp'orro k'ũ ipu minachia bɨmá t'ĩune wãk'ari ipude eda joa beesima. Mãɨya bɨde p'usa t'awa ɨbɨa cherupa chi p'ãp'orro ãtau ãripodosima.

⁴² Mãɨne papaká berãpa chi eda jɨ̃a nɨberã peadai k'ɨ̃risiasidama aba pida ũu wãnak'ari mĩrupidaemaapa.

⁴³ Maamina papaká berã chi mãɨrã chaarea bɨpa Pablo k'aripayá bada pẽra, mãɨrã itu k'enapié pasima. Mãɨpari ãarea chi k'ui k'awa berã naa p'usadea edá jĩitɨpisima ipudea ũu wãnamẽrá.

⁴⁴ Chi waapẽarã p'ãp'orrode ne beada wa pak'urude ɨ̃rɨ ũu wãpisima. Mãɨya ãareaɨrã tuá pia jõnawẽa wãsidama.