Hecho 26 - Tachi Ak'õre Pedea

¹ Maapae Agripapa Pabloa jarasima: —Ara pɨchi k'ak'uat'u itu pedeapiruma. Ara mãɨne Pablo jua ɨt'aa jirak'ari pedeasima:

² —Poro jũra jɨ̃parí jɨ̃ bɨ Agripa, mɨ arapá bɨma idi pɨ k'ĩrari ara mɨ k'orea pedearu pẽra. Mɨa k'awapiipɨ chi judiorãpa nepɨra pará bɨade a jara p'anɨmina mɨ nepɨra pará bɨwẽt'a.

³ Pɨa minachia k'awa bɨma tachi judiorã sãmaasã́ p'anapataɨ mãɨnepa k'ĩra awara pedeapataɨ. Mãɨpuru chichupuria idiruma mɨ pedea sẽwẽa ũrimẽrá.

⁴ »Ãarea judiorãpa k'awa p'anɨma mɨ k'ũtãenapema sãmaasã́ basit'a mɨ tuade mãɨnepa Jerusalene.

⁵ Ãchia k'awa p'anɨma mɨ p'ariseopɨ. Parituapa mãɨ pɨ k'ĩrari jara k'ɨ̃ria bɨpɨra, mãɨ jarai bɨma. Pɨa k'awa bɨma Moisepa bɨda ũrinai k'orea p'ariseorãpa jĩrak'aua oopataɨ.

⁶ »Maamina Tachi Ak'õrepa tachi chõarãenapemarã́ teai jarada nɨ p'anɨ k'orea idi ãchia mɨ nepɨra pará bɨade a jara p'anɨma.

^7-8 Piarã ãarea Israel doce warrarãnepa ununaanarãpa ĩjãa p'anɨma Tachi Ak'õrepa tachi chok'ae p'irabaripit'a. Mãɨpuru tachia ãst'á mãɨnepa teamasi Tachi Ak'õrea pia pedeapatama. Poro jũra jɨ̃parí jɨ̃ bɨ Agripa, mãɨ ĩjãa bɨ k'orea waapẽarã judiorãpa mɨ nepɨra pará bɨade a jara p'anɨma. »Tachi Ak'õrepa tachi chok'ae p'irabaripiit'a ĩjãa p'anɨpɨra ¿k'ãre k'orea ĩjãanawẽa p'anɨma ichia piu bada aba chok'ae p'irabaripisit'a? Mãɨya jarak'ari Agripá nepɨrɨsima:

⁹ —Mɨa naena k'ɨ̃risia basima ne ãarea ooi bɨt'a ẽpẽerãpa Jesú Nazaredepema ĩjãapidaemaapa.

¹⁰ Mɨa Jerusalene piarã mãɨya oosima. P'aarerã chi mãɨrã chaarearãpa ãchi t'ɨ̃nepa mɨá itu Jesude ĩjãapataɨrã minachia eda jɨ̃a nɨbɨpisidama. Mãɨnepa mãɨ ẽpẽerã peapisidaɨde mɨa pida pia bɨade asima.

¹¹ Judiorã ará pedeapataɨ techa mɨa ãchi ɨtɨapipachima. Bari k'ak'o minachia ãchiá Jesú k'orea k'achia pedeapisima. Mɨ ãchi ome minachia k'ĩruu bada pẽra tua awaraɨdepema p'uurude pida ẽp'ẽpachima.

¹² »Ewariaba p'aarerã chi mãɨrã chaarearãpa mɨ Damasco p'uurudea peesidama ãchi t'ɨ̃nepa Jesude ĩjãapataɨrã jitak'oamẽrá.

¹³ Maamina, poro jũra jɨ̃parí jɨ̃ bɨ Agripa, ɨmat'ip'a ode wãrune mɨ mãɨnepa chi mɨ ome wã p'ananapa ɨt'aripa jẽrat'ĩu chesit'a unusidama. Mãɨ urua bɨ ɨmata k'aepẽra atepe achiterrea basima.

¹⁴ Ãarea tai jeeda baesidama. Mãɨne mɨa pedea ũrisima. Mãɨ pedeapa mɨá hebreo pedeade nãɨya jarasima: “Saulo, Saulo, ¿k'ãre k'orea mɨ ẽp'ẽ bɨma? Chi k'umia bɨmá t'ɨarude, ara pɨchi tuaba p'uaparima”.

¹⁵ Mãɨne mɨa idisima: “Mɨ chipari, ¿pɨ k'aima?” Mɨ Chiparipa p'anoosima: “Mɨ Jesupɨ, chi pɨa ẽp'ẽ bɨpɨ.

¹⁶ Maamina p'irabarise. Ara mɨ pɨá unupisima, chi mɨ pae pari mimiaparí bai k'orea. Pɨa ununat'a mãɨnepa mɨa unupit'a pedeai bɨma.

^17-18 Mɨa pɨ judiorã juadepema mãɨnepa judiorãwẽ juadepema ateewãipɨ. Mɨa pɨ judiorãwẽmá peeipɨ mɨ chi piarãpẽa pedea k'awadamẽrá. Mãɨpuru p'ãrione tuanana ɨnaane p'ɨrrɨadaipɨ. Tiore juadepema ãyá wãnak'ari Tachi Ak'õremá chedaipɨ. Mɨne ĩjãauta k'orea ãchia nemietá oodada Tachi Ak'õrepa k'ɨ̃risia atuaipɨ. Mãɨnepa Tachi Ak'õrepa ãchi bɨipɨ ichia jɨrɨ atada mãɨ p'uurudepemarã p'ananamẽrá”.

¹⁹ »Poro jũra jɨ̃parí jɨ̃ bɨ Agripa, Jesupa mãɨ ewaride mɨá jaradat'a mɨa ãarea oosima.

²⁰ Mɨa naena Damasco p'uurudepemarã́ jarasima ãchia nemietá oopataɨ itu bɨdak'ari Tachi Ak'õremá chedamẽrá. Mãɨya nak'ari Jerusalén p'uurude, ãarea Judea tuade mãɨnepa judiorãwẽmá pida abarik'a jarasima. Ãareaɨrã́ jarasima pia oo p'ananai p'anɨma, ãchia nemietá oodada piarã itu bɨdaadat'a unupidai k'orea.

²¹ Mãɨpuru judiorãpa mɨ Tachi Ak'õre te minachia bɨde jitadak'ari pea k'ɨ̃riasidama.

²² Maamina Tachi Ak'õrepa mãɨ ewaridepa mɨ k'aripa bɨ pẽra mɨa chi minachia k'awa p'anɨa mãɨnepa chi minachia k'awawẽa p'anɨa wapida Jesú k'orea pedea bɨma. Tachi Ak'õre pari pedeapataɨrãpa mãɨnepa Moisepa k'ãre baeit'a jarasidama. Mãɨt'a mɨa jara bɨma.

²³ Ãchia jarapachidama Tachi Ak'õrepa Tachi K'aripaparí teai jarada mĩa bai basit'a mãɨnepa chi piudadepema naa chok'ae p'irabarii basit'a, chi tachi k'aripai ɨnaa bɨt'a judiorã́ mãɨnepa judiorãwẽa jarai k'orea.

²⁴ Pablopa mãɨya ara ichi k'ak'ua k'orea pedea bɨde P'estopa jĩk'ua jarasima: —Pablo, ¡pɨ k'ĩra piawẽa bɨma! Pɨa minachia k'art'a k'awa bɨdepa k'ĩra piawẽa beesima.

²⁵ Maamina Pablopa jarasima: —Chi atepe chaarea bɨ P'esto, mɨ k'ĩra jĩp'a bɨma. Chi mɨa jara bɨ piarãpẽapɨ mãɨnepa arí bɨpɨ.

²⁶ Chi poro jũra jɨ̃parí jɨ̃ bɨ Agripapa mãɨ k'awa bɨma. Mãɨpuru mɨ ichi k'ĩrari ne wap'eawẽa pedea bɨma. Mɨmá ichia Jesú k'orea ãarea k'awa bɨma ãareaɨrãpa minachia nepɨrɨpata pẽra.

²⁷ Poro jũra jɨ̃parí jɨ̃ bɨ Agripa, chi Tachi Ak'õre pari pedeapataɨrãpa mãɨ k'orea bɨdada ¿pɨa ĩjãa bɨk'ãra? Mɨa k'awa bɨma pɨa ĩjãa bɨt'a.

²⁸ Agripapa Pabloa jarasima: —¿Pɨa ara nãɨya mɨá Cristode ĩjãapiik'ãra?

²⁹ Pablopa jarasima: —Mɨa Tachi Ak'õrea ɨt'aa chiidi bɨma tãaraawẽane wa tãaraarune pɨ mãɨnepa ãarea chi mɨ pedea ũri p'anɨ mɨ jĩra p'ananamẽrá, maamina nãɨ k'ãnena newẽa.

³⁰ Mãɨya jarak'ari Agripa, P'esto, Berenice mãɨnepa ãarea chi mãma suak'abari berã p'irabarisidama.

³¹ Tajatá wãnak'ari ãchicha jara tuanasidama: —Jãɨ ẽpẽrapa nemietá oowẽa bɨ k'orea piui bɨwẽma wa eda jɨ̃a nɨbɨi bɨwẽma.

³² Mãɨne Agripapa P'estoa jarasima: —Nãɨ ẽpẽrapa chi Romanepema chi atepe poro chaarea bɨa ichi nepɨra k'orea ididawẽpara, pɨa ichi p'ue k'ẽet'aai pasima.