Hecho 25 - Tachi Ak'õre Pedea

Pablo P'esto k'ĩrari bada

¹ P'esto chi mãɨ tuadea chek'ari chi chaarea pai k'orea, ewari k'ak'o ũpea padak'ari Cesarea p'uurudepa Jerusalenea wãsima.

² Mãma p'aarerã chi mãɨrã chaarearãpa mãɨnepa judiorã chaarearãpa P'estoa Pablo nepɨra pará bɨade a jarasidama.

³ Ãchia P'estoa chichupuria idisidama Pablo Jerusalenea ateewãpimẽrá. Mãɨya jarasidama Pablo ode peadai k'ɨ̃risia p'anɨ pẽra.

⁴ Maamina P'estopa p'anoosima: —Pablo Cesarea p'uurude eda jɨ̃a nɨbɨma. Mɨ tãaraawẽane mãmá wãipɨ.

⁵ Mãɨpuru mãra chi eda waapẽarã atepe berã mɨ ome Cesarea p'uurudea wãnai p'anɨma. Mãɨ ẽpẽrapa paritua nemietá oo badapara, mãmapuru mãrapa jaradai p'anɨma.

⁶ P'esto Jerusalene ewari k'ak'o ocho wa diez basima. Maapae Cesarea p'uurudea wãsima. Norema chi nepɨra ak'ɨpataɨ tede suak'abari beek'ari Pablo ateewãpisima.

⁷ Pablo ateewãsidaɨde judiorã Jerusalenepa chedaadapa ichi adu ãarea jũrasidama. Mãɨne ichia nemietá minachia oosiade a jarasidama, maamina p'ue k'awapidaé pasima chi ãchia jara p'anɨ piarãpẽat'a.

⁸ Mãɨne Pablo ara ichia pedeasima: —Mɨa aba pida nemietá oowẽa bɨma. Moisepa bɨda itu bɨwẽa bɨma, Tachi Ak'õre te minachia bɨ mietá oopiwẽa bɨma mãɨnepa Romanepema chi atepe poro chaarea bɨ sida itu bɨwẽa bɨma.

⁹ Maamina P'esto judiorã ome pia bee k'ɨ̃ria bɨ pẽra Pabloa idisima: —¿Pɨra Jerusalenea wã k'ɨ̃ria bɨk'ãra mɨa pɨ nepɨra jãma ak'ɨmẽrá?

¹⁰ Mãɨne Pablopa p'anoosima: —Mɨ nãma chi Romanepema chi atepe poro chaarea bɨpa bɨda nepɨra ak'ɨparí k'ĩrari bɨma. Nãmapuru pɨa mɨ nepɨra ak'ɨi bɨma. Pɨa minachia k'awa bɨma mɨa judiorã mi ãpia pida piawẽa oowẽa bɨt'a.

¹¹ Mɨa nemietá oo badapara, pɨa mɨ peai pasima. Mɨ pearãapade a bɨwẽma. Maamina chi nãɨrã ẽpẽerãpa mɨ nepɨra pará bɨade a jara p'anɨt'a piarãwẽ pẽra abaɨ pida mɨ ãchi juade bɨi bɨwẽma. Mãɨpuru mɨa k'ɨ̃ria bɨma chi Romanepema chi atepe poro chaarea bɨpa mɨ nepɨra ak'ɨmẽrá.

¹² Mãɨne P'esto chi ũraapataɨrã paara pedeak'ari Pabloa jarasima: —Pɨa k'ɨ̃ria bɨma chi Romanepema atepe poro chaarea bɨpa pɨ nepɨra ak'ɨit'a. Mãɨya ichimá peeipɨ.

P'esto Agripa ome pedeada

¹³ Mãɨya nak'ari judiorã poro jũra jɨ̃parí jɨ̃ bɨ Agripa ichi ũpẽawẽra Berenice ome Cesarea p'uurudea P'esto ak'ɨde wãsidama.

¹⁴ Ãchi mãma tãaraa p'anɨ pẽra P'estopa Agripá Pablo k'orea nãɨya jarasima: —P'elipa aba eda jɨ̃a nɨbɨ ameena nãma bɨma.

¹⁵ Mɨ Jerusalenea wã baside p'aarerã chi mãɨrã chaarearãpa mãɨnepa judiorã chaarearãpa mãɨ ẽpẽra nepɨra pará bɨade mɨá mãɨya a jarasidama, mãɨnepa ichi peapipade a jarasidama.

¹⁶ Mɨa ãchiá jarasima abaɨ pida chi nepɨra pará bɨade a jara berã k'ĩrari ara ichi k'orea p'ue pedeaiwẽpɨra, tachi romanepemarãpa mãɨ waapẽarã juade teadak'at'a.

¹⁷ »Mãɨpuru judiorã nãmá chedak'ari, nɨwẽa norema mɨ nepɨra ak'ɨpataɨ tede suak'abari beek'ari mãɨ ẽpẽra ateewãpisima.

¹⁸ Maamina chi ichi nepɨra pará bɨade a jara p'anɨrãpa jaradaé pasima ichia nemietá oosit'a mɨa k'ɨ̃risia bada jĩra.

¹⁹ Mãɨpari ichi nepɨra pará bɨade a jara p'anasidama chi ãchia ĩjãa p'anɨ awara jaratea bɨ k'orea mãɨnepa ẽpẽra Jesú apataɨ k'orea. Mãɨ piudamina Pablopa jara bɨma chok'ae bɨt'a.

²⁰ Mɨa k'awawẽa beesima sãmaasã́ jãɨ nepɨra k'orea idiit'a. Mãɨpuru mɨa Pabloa idisima Jerusalenea wã k'ɨ̃ria bɨ k'awayá mãmapemarãpa ichi nepɨra ak'ɨdamẽrá.

²¹ Maamina ichia k'ɨ̃ria basima Romanepema chi atepe poro chaarea bɨ puru ichi nepɨra ak'ɨit'a. Mãɨpuru mɨa ichi nãma eda jɨ̃ nɨbɨpisima aba chi atepe poro chaareamá peerudea.

²² Mãɨne Agripapa P'estoa jarasima: —Mɨa mãɨ ẽpẽrá ũri k'ɨ̃ria bɨma. P'estopa jarasima: —Nũ pɨa p'ue mãɨa ũriipɨ.

Pablo Agripa k'ĩrari pedeada

²³ Norema Agripa Berenice ome chi nepɨra ak'ɨpataɨ tede eda wãsidaɨde pia k'ak'apia p'anasidama. Mãɨne papaká berã chi atepe chaarea p'anɨrã mãɨnepa p'uurudepema chi minachia k'awa p'anɨrã eda errosidama. Maapae P'estopa Pablo enemeepisima.

²⁴ P'estopa jarasima: —Judiorã poro jũra jɨ̃parí jɨ̃ bɨ Agripa mãɨnepa ãarea ẽpẽerã nãma tai ome ará p'anɨ, cha bɨ ẽpẽra mãra k'ĩrari bɨt'a ãarea judiorãpa Jerusalene mãɨnepa nãɨ Cesarea p'uurude pida nepɨra pará bɨade a jara p'anɨma. Ãchia mɨá bia jara p'anasidama ichi peamẽrá.

²⁵ Maamina mɨmá mi ãpia pida nemietá oowẽa bɨma ichi peadai k'orea. Mãɨne ichia idisima Romanepema chi atepe poro chaarea bɨpa ichi nepɨra ak'ɨmẽrá. Mãɨpuru mɨa ichi Romanea peei k'orea bɨma.

^26-27 Maamina mɨa piarã k'awawẽma k'ãre bɨit'a ichi nepɨra k'orea chi poro chaarea bɨpa mãɨ k'awamẽrá. Mɨmá mi ãpia pida bɨwẽpɨra pari peeipɨ. Mãɨpuru ichi mãra k'ĩrari enemeepisima. Judiorã poro jũra jɨ̃parí jɨ̃ bɨ Agripa, mɨa k'ɨ̃ria bɨma pɨapuru mãɨa pia ũriit'a. Mãɨya chi mãrapa ichiá minachia ididak'ari, mɨa tachi poro chaarea pae ichia nemietá oodat'a k'art'ade p'ue bɨipɨ.