Hecho 24 - Tachi Ak'õre Pedea

Pablo P'eli k'ĩrari pedeada

¹ Ewari k'ak'o joesoma padak'ari p'aare minachia k'awa bɨ Anania chi eda waapẽarã judiorã chõarã ome Cesarea p'uurude chesidama. Ãchia chi k'aripa pedeaparí Tértulo ateewãsidama, ichia chi Pablo nepɨra P'eli k'ĩrari jaramẽrá.

² P'elipa Pablo ateewãpiside mãɨ Tertulopa Pablo nepɨra pedea beesima. Nãɨya jarasima: —Chi atepe bɨ P'eli, pɨ tai chi poro chaarea beeda ewaridepa nãɨ tuade tãaraa nek'ĩramariwẽa p'anɨma. Mãɨnepa pɨ k'ɨ̃risia k'awa bɨdepa ne minachia oo bɨma tai pia tuananamẽrá.

³ Pɨa oo bɨ k'orea tai p'anɨcha ne ãareaɨne pia bɨade apatama.

⁴ Maamina tãaraa waa jaraemaapa mɨa pɨá chichupuria idiruma pɨ piadepa tai pedea ũrimẽrá.

⁵ Taipa k'awa p'anɨma nãɨ ẽpẽra nepɨra pará baparit'a. Ãarea nãɨ ĩjũane judiorã k'ĩruupik'apiparima. Ichi chi Nazaredepema chi poro chaarea bɨpɨ.

⁶ Mãɨ awara Tachi Ak'õre te minachia bɨde chi taipa ne p'ue oodaiwẽa p'anɨt'a ichia mãɨ ooyá oosima. Mãɨpuru taipa ichi jitasidama. [Tai Moisepa bɨdadepa ichi nepɨra ak'ɨdai k'ɨ̃ria p'anasidama.

⁷ Maamina papaká berã chi atepe bɨ Lisiapa ichi jua chaareadepa k'ĩruuk'ari, tai juadepema ẽemarisima.

⁸ Mãɨ awara jarasima chi ichi nepɨra pará bɨade apataɨrã pɨmá chedai p'anɨt'a.] Pɨa ichiá idipɨra k'awaipɨ ãarea taipa jara p'anɨ piarãt'a.

⁹ Chi judiorã mãma p'anɨ pida ãarea mãɨ pedea piarãane asidama.

¹⁰ Maapae chi poro chaarea bɨpa Pabloa juadepa jarasima pedeamẽrá. Ara mãɨne Pablopa jarasima: —Mɨa k'awa bɨma pɨ tãaraa bɨ chi nãɨ tuadepema nepɨra ak'ɨparit'a. Mãɨpuru mɨ ara mɨchi k'orea sõpiadepa pedeaipɨ.

¹¹ Mɨ ewari k'ak'o doce pa bɨma Jerusalenea wã basit'a, Tachi Ak'õrea pia pedeai k'orea. Pɨa mãɨ k'orea abaɨa idiipɨra k'awaipɨ mãɨ piarãt'a.

¹² Chi mɨ nepɨra pará bɨade a p'anɨrãpa mɨ ununaé pasima chĩara ome k'ĩruu pedea bɨt'a wa ẽpẽerã k'ĩruupik'api bɨt'a. Tachi Ak'õre te minachia bɨde, judiorã ará pedeapataɨ tede mãɨnepa mi ãpia pida p'uurude pida mɨa mãɨya oo bɨt'a ununaé pasima.

¹³ Nãɨ ẽpẽerãpa p'ue k'awapidawẽma chi ãchia jara p'anɨ piarãt'a.

¹⁴ Maamina mɨa pɨá nãɨ jararuma: mɨa tai chõarãenapemarã Tachi Ak'õrene ĩjãa bɨpɨ. Mɨ chi O Chiwidi apataɨdepemapɨ. Ãchia mãɨ O Chiwidi seade apatama maamina mɨa Moisepa bɨda mãɨnepa Tachi Ak'õre pari pedeapataɨrãpa bɨdada ãarea ĩjãa bɨma.

¹⁵ Chi nãɨrã judiorãpa nɨ p'anɨma chi jĩp'a be mãɨnepa chi jĩp'awẽa be piudak'ari Tachi Ak'õrepa chok'ae p'irabaripiit'a. Mɨa pida mãɨ nɨ bɨma.

¹⁶ Mãɨpuru mɨa ne ãarea ooparima Tachi Ak'õre k'ĩrari mãɨnepa ẽpẽerã k'ĩrari jĩp'a nipai k'orea.

¹⁷ »Mɨ Jerusalén awara bada ãyo minachia bak'ari, maapae mãicha Jerusalenea wãsima, mɨ p'uurudepemarã nenea k'ede pae erreara teai k'orea mãɨnepa Tachi Ak'õrea ãnimara paateai k'orea.

¹⁸ Mãɨya bɨde chi Tachi Ak'õre k'ĩrari pia bai k'orea mɨa jõma ooside, Tachi Ak'õre te minachia bɨde chi Asiadepema judiorãpa mɨ unusidama. Maamina ẽpẽra minachia cheepɨrɨdaé pasima mãɨnepa ẽpẽerã k'ĩruupik'adaé pasima.

¹⁹ Chi mɨ ununaanapa mɨ nepɨra pará bɨade a k'ɨ̃ria p'anɨpɨra, ãchi pɨ k'ĩrari mãɨ jarade chedai p'anɨma.

²⁰ Mãɨyawẽpɨra chi nãma p'anɨpa jaradai p'anɨma k'ãre nemietá unusidat'a, chi judiorã chaarearã k'ĩrari mɨ ateewãsidaɨde.

²¹ Abapuru p'ue jaradaipɨ mɨa nãɨya jĩk'ua jarasit'a: “Idi mãrapa mɨ nepɨra pará bɨade a p'anɨma chi piudaadarã chok'ae p'irabaridai mãɨne ĩjãa bɨ k'orea”.

²² P'elipa chi O Chiwidi k'orea minachia k'awa bada pẽra, Pablo nepɨra ak'ɨit'a itu bɨdook'ari, nãɨya jarasima: —Papaká berã chi atepe chaarea bɨ Lisia cherude mɨa mãra nepɨra ak'ɨipɨ.

²³ Maapae ichia chi papaká berã chi mãɨrã chaarea bɨa Pablo jɨ̃a nɨbɨpataɨ tede ak'ɨpisima, maamina jarasima Pablopa oo k'ɨ̃ria bɨt'a itu oopimẽrá. Mãɨnepa itu bɨsima chi Pablo ũpẽa jĩra berãpa ichi k'aripade chedamẽrá.

²⁴ Mãɨya nak'ari P'eli chi k'ima Drusila ome mãicha chesima. Mãɨ wẽra judio pasima. Mãɨne P'elipa Pablo t'ɨ̃sima ichia Jesucristo ĩjãanai k'orea pedea bɨ ũrii k'orea.

²⁵ Mãɨya bɨde Pablopa chi tachi jĩp'a nipai k'orea, k'ak'ua jĩp'a uru bai k'orea mãɨnepa Tachi Ak'õrepa ɨtɨai ewari chei k'orea pedeasima. P'elipa mãɨ k'orea ũriside ne wap'eak'ari nãɨya jarasima: «Naapae wãse. Mɨ pari bɨde mãicha pɨ t'ɨ̃ipɨ».

²⁶ P'elipa k'ɨ̃risia basima Pablopa ichiá erreara teait'a ichi k'ẽet'aamẽrá. Mãɨpuru edaɨde Pablo t'ɨ̃ peepachima ichi ome pedeai k'orea.

²⁷ Ãyo ume padak'ari P'eli chi poro chaarea bada itu bɨk'ari, maapae Porcio P'esto chi poro chaarea beesima. Maamina P'eli wãside judiorã ome pia bee k'ɨ̃ria basima. Mãɨpuru Pablo eda jɨ̃a nɨbeesima.