Hecho 23 - Tachi Ak'õre Pedea

¹ Pablopa judiorã chaarearãmá pia ak'ɨk'ari jarasima: —Mɨ ũpẽarã, mɨ ne k'ɨ̃risiawẽa bɨma, k'awa bɨ pẽra idi wapida Tachi Ak'õre k'ĩrari pia baparit'a.

² Mãɨne chi p'aarerã minachia k'awa bɨ Ananiapa chi Pablo k'ait'a p'anɨa jarasima ichi it'aede p'edamẽrá.

³ Mãɨpuru Pablopa Ananiá jarasima: —¡Tachi Ak'õrepa pɨ p'eipɨ! ¡Pɨa jarateaparí jĩra ook'ama! Pɨ jãma suak'abari bɨma Moisepa bɨdadepa mɨ nepɨra ak'ɨi k'orea maamina ¡mɨ p'epi bɨdepa ara mãɨ Moisepa bɨda itu bɨ bɨma!

⁴ Mãɨne chi k'ait'a p'anɨpa Pabloa jarasidama: —Chi Tachi Ak'õre p'aare minachia k'awa bɨa ¿pɨa jãɨya nemietá jara bɨk'ãra?

⁵ Pablopa jarasima: —Ũpẽarã, mɨa atua basima ichi chi p'aare minachia k'awa bɨt'a. K'awa badapara mɨa mãɨya jaraiwẽ pasima, Tachi Ak'õre pedeade nãɨya bɨ bɨ pẽra: “Mãra poro chaarea k'orea k'achia pedearãt'ɨ”.

⁶ Mãɨya bɨde Pablopa k'awasima chi eda waapẽarã saduceorãpema pasima mãɨnepa chi waapẽarã p'ariseorãpema pasima. Mãɨpuru ãchiá ɨbɨa jarasima: —Ũpẽarã, mɨ p'ariseopɨ. Mɨ chõarãenapemarã sida p'ariseorã pasima. Mãɨpuru ĩjãa bɨma chi piudaadarã chok'ae p'irabaridait'a. Mãɨ k'orea mɨ ɨtɨa k'ɨ̃ria p'anɨma.

⁷ Pablopa mãɨya jarada k'orea p'ariseorã chi saduceorã ome k'ĩruu pedeadak'ari awara awará k'ɨ̃risia tuaneesidama.

⁸ (Saduceorãpa jarapatama piudaadarã chok'ae p'irabaridak'at'a, Tachi Ak'õrepa ɨt'aripa peedarã newẽt'a mãɨnepa tachi jaore newẽt'a. Maamina p'ariseorãpa mãɨ ãarea ĩjãa p'anɨma).

⁹ Mãɨpuru minachia k'ĩruu ooroa nɨbeesima. Chi eda waapẽarã Moisepa bɨda jarateapataɨrã, mãɨrã p'ariseorãpa p'irabaridak'ari ɨbɨa jarasidama: —Taipa unu p'anɨma nãɨ ẽpẽra nepɨra newẽt'a. ¿Tachi jaore wa Tachi Ak'õrepa ɨt'aripa peeda ichi ome pedeasiwẽk'ãra? Mãɨyaipɨra ¿sãmaasã́ Tachi Ak'õre ome k'ĩruunaima?

¹⁰ Ãchi mãicha atepe k'ĩruu pedea p'anɨ pẽra papaká berã chi atepe chaarea bɨpa wap'ea basima Pablo wawaria p'edait'a. Mãɨpuru papaká berã wãpisima Pablo ãchi t'ãenapema ẽemarinak'ari chi papaká berã tuanapataɨ tede eda ateewãnamẽrá.

¹¹ Mãɨ teamasi Tachi Chipari Pablomá unupik'ari nãɨya jarasima: «Pablo, sõpia base. Mɨ k'orea nãma Jerusalene pedeada jĩra Roma p'uurude pida pedeai bɨma».

Judiorãpa Pablo peadai k'orea pedeadada

¹² Norema chi eda waapẽarã judiorãpa pedea ausidama Pablo peadai k'orea. Mãɨ ẽpẽerãpa piarãnepa pedeasidama ne k'odaiwẽt'a mãɨnepa pania todaiwẽt'a aba Pablo peautadea.

¹³ Chi mãɨ pedea audada ɨmɨk'ĩira cuarenta p'anasidama.

¹⁴ Ãchi p'aarerã chi mãɨrã chaarearãmá mãɨnepa judiorã chõarãmá wãnak'ari jarasidama: —Taipa piarãnepa pedeasidama ne k'odaiwẽt'a mãɨnepa pania todaiwẽt'a aba jãɨ Pablo peautadea.

¹⁵ Mãɨpuru nãɨya oot'ɨ. Mãrapa chi papaká berã chi atepe bɨa idit'ɨ nũ Pablo mãicha mãramá ateewãpimẽrá. Jarat'ɨ mãrapa ichi k'orea jĩrak'aua idi k'ɨ̃ria p'anɨt'a. Ateewãutade nãma chei naena taipa ichi peadaipɨ.

¹⁶ Maamina Pablo ũpẽawẽra warra arí basima. Mãɨ k'ũtãpa chi ãchia jara p'anɨt'a ũrik'ari chi papaká berã p'anapataɨmá Pabloa jarade wãsima.

¹⁷ Mãɨpuru Pablopa papaká berã chi mãɨrã chaarea bɨ aba t'ɨ̃k'ari jarasima: —Nãɨ k'ũtã́ chi atepe bɨmá ateese. Ichia ne jara k'ɨ̃ria bɨma.

¹⁸ Mãɨne chi k'ũtã́ papaká berã chi atepe bɨmá ateewãk'ari jarasima: —Pablo, chi eda jɨ̃a nɨbɨpa mɨ t'ɨ̃k'ari jarasima nãɨ k'ũtã́ pɨmá ateewãmẽrá. Ichia pɨá ne jara k'ɨ̃ria bɨma.

¹⁹ Maapae papaká berã chi atepe bɨpa chi k'ũtã́ juade jitak'ari ãyá ateewãsima. Maapae idisima: —¿K'ãre mɨá jara k'ɨ̃ria bɨma?

²⁰ Mãɨne chi k'ũtãpa jarasima: —Judiorãpa pedea ausidama nãɨya oodai k'orea: ãchia pɨá chichupuria ididaipɨ Pablo nũ chi judiorã chaarearã ará p'anɨmá ateewãpimẽrá. Jaradaipɨ ichi k'orea jĩrak'aua idi k'ɨ̃ria p'anɨt'a.

²¹ Maamina ãchi pedea ĩjãarãse. Pablo peadai k'orea ɨmɨk'ĩra k'ak'o cuarenta o k'ait'a mĩru p'anɨma. Ãchia piarãnepa pedeasidama ne k'odaiwẽt'a mãɨnepa pania todaiwẽt'a aba Pablo peautadea. Ara nãɨyana ichi peadai k'orea p'anɨma. Abapuru nɨ p'anɨma pɨa jarait'a Pablo ateewãpimẽrá.

²² Maapae papaká berã chi atepe bɨpa k'ũtã́ jarasima: —Chi pɨa mɨá jaradat'a mi ãpia pida jararãse. Mãɨya jarak'ari wãpisima.

Romanepemarãpa Pablo Cesarea p'uurudea ateewãnana

²³ Maapae papaká berã chi atepe bɨpa chi chaarearã berã ume t'ɨ̃k'ari jarasima: —Jɨrɨ atase papaká berã dosciento, papaká berã mũrane wãpataɨrã setenta mãɨnepa papaká berã miasudepa k'ĩruupataɨrã dosciento, maapae nãɨ teamasi las nuevede Cesarea p'uurudea wãt'ɨ.

²⁴ Mãɨ awara mũra Pablo pae ateewãt'ɨ nãɨ Judea tuadepema chi poro chaarea bɨ P'elimá pia ateewãnai k'orea.

²⁵ Papaká berã chi chaarea bɨpa k'art'a nãɨya bɨsima:

²⁶ Mɨ, Claudio Lisiapa nãɨ k'art'a bɨruma chi atepe chaarea bɨ P'eli pae. Mɨa k'ɨ̃ria bɨma pɨ pia bait'a.

²⁷ Judiorãpa nãɨ ẽpẽra jitadak'ari peadai pasima. Maamina mɨa k'awasima ichi romanepemapɨ. Mãɨpuru papaká berã ome wãk'ari judiorã juadepema ẽemarisima.

²⁸ Mɨa k'awa k'ɨ̃ria basima ichi mãɨ k'ãre k'orea nepɨra pará bɨade a jara p'anasit'a. Mãɨpuru ichi ateewãsima chi judiorã chaarearã ará p'anɨmá.

²⁹ Mãɨne mɨa k'awasima abapuru ãchi Moisepa bɨda k'orea ichi nepɨra paraayade a jara p'anɨt'a. Maamina ichia nemietá oowẽa bɨ pẽra peadaiwẽa p'anɨma wa eda jɨ̃anaiwẽa p'anɨma.

³⁰ Mãɨya nak'ari mɨa k'awasima judiorã pedea ausidama ichi peadai k'orea. Ara mãɨne ichi pɨmá peeyade asima. Mãɨnepa mɨa ãchiá jarasima chi ichia nemietá oosiade a jara p'anɨt'a pɨ k'ĩrari jarade wãnai p'anɨ. Pia base.

³¹ Mãɨne chi papaká berãpa ichia jarada jĩra oosidama. Teamasi Pablo Antípatri p'uurudea ateewãsidama.

³² Norema papaká berã jĩte wãpataɨrã ãchi tedea jĩitea wãsidama. Mãɨne mũrane wãpataɨrãpa Pablo Cesarea p'uurudea ateewãsidama.

³³ Cesarea p'uurude chesidaɨde chi k'art'a chi atepe poro chaarea bɨa teasidama. Mãɨnepa Pablo sida ichimá ateewãsidama.

^34-35 Mãɨ k'art'a ak'ɨk'ari chi atepe poro chaarea bɨpa Pabloa idisima sãmapema k'awayá. Pablo Cilicia ĩjũanepema k'awaside nãɨya jarasima: «Chi pɨ nepɨra pará bɨade apataɨrã chedak'ari mɨa pɨá ũriipɨ». Maapae ichia chi papaká berã́ jarasima Pablo chi Herodepa oopida te atepe bɨdea ateewãnak'ari, ãchia mãma ak'ɨdamẽrá.